ઈશ્વરપ્રત્યભિજ્ઞાવિમર્શિની · અધ્યાય 1.8

તાત્કાલિકાક્ષસામક્ષ્યસાપેક્ષાઃ કેવલં ક્વચિત્ ।
આભાસા અન્યથાન્યત્ર ત્વન્ધાન્ધતમસાદિષુ ॥

વિશેષોઽર્થાવભાસસ્ય સત્તાયાં ન પુનઃ ક્વચિત્ ।
વિકલ્પેષુ ભવેદ્ ભાવિભવદ્ભૂતાર્થગામિષુ ॥

સુખાદિષુ ચ સૌખ્યાદિહેતુષ્વપિ ચ વસ્તુષુ ।
અવભાસસ્ય સદ્ભાવેઽપ્યતીતત્વાત્તથા સ્થિતિઃ ॥

ગાઢમુલ્લિખ્યમાને તુ વિકલ્પેન સુખાદિકે ।
તથા સ્થિતિસ્તથૈવ સ્યાત્સ્ફુટમસ્યોપલક્ષણાત્ ॥

ભાવાભાવાવભાસાનાં બાહ્યતોપાધિરિષ્યતે ।
નાત્મા સત્તા તતસ્તેષામાન્તરાણાં સતાં સદા ॥

આન્તરત્વાત્પ્રમાત્રૈક્યે નૈષાં ભેદનિબન્ધના ।
અર્થક્રિયાપિ બાહ્યત્વે સા ભિન્નાભાસભેદતઃ ॥

ચિન્મયત્વેઽવભાસાનામન્તરેવ સ્થિતિઃ સદા ।
માયયા ભાસમાનાનાં બાહ્યત્વાદ્બહિરપ્યસૌ ॥

વિકલ્પે યોઽયમુલ્લેખઃ સોઽપિ બાહ્યઃ પૃથક્પ્રથઃ ।
પ્રમાત્રૈકાત્મ્યમાન્તર્યં તતો ભેદો હિ બાહ્યતા ॥

ઉલ્લેખસ્ય સુખાદેશ્ચ પ્રકાશો બહિરાત્મના ।
ઇચ્છાતો ભર્તુરધ્યક્ષરૂપોઽક્ષાદિભુવાં યથા ॥

તદૈક્યેન વિના ન સ્યાત્સંવિદાં લોકપદ્ધતિઃ ।
પ્રકાશૈક્યાત્તદેકત્વં માતૈકઃ સ ઇતિ સ્થિતમ્ ॥

સ એવ વિમૃશત્ત્વેન નિયતેન મહેશ્વરઃ ।
વિમર્શ એવ દેવસ્ય શુદ્ધે જ્ઞાનક્રિયે યતઃ ॥