Īśvarapratyabhijñākārikā with Vṛtti · Chapter 1.7

yā caiṣā pratibhā tattat padārthakramarūṣitā
akramānantacidrūpaḥ pramātā sa maheśvaraḥ //

tattadvibhinnasaṃvitti mukhair ekapramātari
pratitiṣṭhatsu bhāveṣu jñāteyam upapadyate //

deśakālakramajuṣām arthānāṃ svasamāpinām
sakṛdābhāsasādhyo 'sāv anyathā kaḥ samanvayaḥ //

pratyakṣānupalambhānāṃ tattadbhinnāṃśapātinām
kāryakāraṇatāsiddhi hetutaikapramātṛjā //

smṛtau yaiva svasaṃvittiḥ pramāṇaṃ svātmasaṃbhave
pūrvānubhavasadbhāve sādhanaṃ saiva nāparam //

bādhyabādhakabhāvo 'pi svātmaniṣṭhāvirodhinām
jñānānām udiyād eka pramātṛpariniṣṭhiteḥ //

viviktabhūtalajñānaṃ ghaṭābhāvamatir yathā
tathā cecchuktikājñānaṃ rūpyajñānāpramātvavit //

naivaṃ śuddhasthalajñānāt siddhyet tasyāghaṭātmanā
na tūpalabdhiyogyasyāpy atrābhāvo ghaṭātmanaḥ //

viviktaṃ bhūtalaṃ śaśvad bhāvānāṃ svātmaniṣṭhiteḥ
tat kathaṃ jātu tajjñānaṃ bhinnasyābhāvasādhanam //

kim tv ālokacayo 'ndhasya sparśo voṣṇādiko mṛduḥ
tatrāsti sādhayet tasya svajñānam aghaṭātmatām //

piśācaḥ syād anāloko 'py ālokābhyantare yathā
adṛśyo bhūtalasyānta na niṣedhyaḥ sa sarvathā //

evaṃ rūpyavidābhāva rūpā śuktimatir bhavet
na tv ādyarajatajñapteḥ syād aprāmāṇyavedikā //

dharmyasiddher api bhaved bādhā naivānumānataḥ
svasaṃvedanasiddhā tu yuktā saikapramātṛjā //

ittham atyarthabhinnārthā -vabhāsakhacite vibhau
samalo vimalo vāpi vyavahāro 'nubhūyate //