Scripture Library

Īśvarapratyabhijñākārikā with Vṛtti · Chapter 1.1

1.1.1

kathaṃ cid āsādya maheśvarasya dāsyaṃ janasyāpy upakāram icchan
samastasaṃpatsamavāptihetuṃ tatpratyabhijñām upapādayāmi //

1.1.2

kartari jñātari svātmany ādisiddhe maheśvare
ajaḍātmā niṣedhaṃ vā siddhiṃ vā vidadhīta kaḥ //

1.1.3

kiṃ tu mohavaśād asmin dṛṣṭe 'py anupalakṣite
śaktyāviṣkaraṇeneyaṃ pratyabhijñopadarśyate //

1.1.4

tathā hi jaḍabhūtānāṃ pratiṣṭhā jīvadāśrayā
jñānaṃ kriyā ca bhūtānāṃ jīvatāṃ jīvanaṃ matam //

1.1.5

tatra jñānaṃ svataḥsiddhaṃ kriyā kāyāśritā satī
parair apy upalakṣyeta tayānyajñānam ūhyate //

Original text: Īśvarapratyabhijñākārikā with Vṛtti · Edition: Madhusudan Kaul Shastri, Srinagar 1921. (Kashmir Series of Texts and Studies ; 34); Revised according to the edition by Raffaele Torella, Roma 1994 (Serie Orientale Roma ; 71) · Data entry Somadeva Vasudeva · GRETIL (Göttingen) · CC BY-NC-SA 4.0