ईश्वरप्रत्यभिज्ञाकारिका · अध्याय 1.1

कथं चिद् आसाद्य महेश्वरस्य दास्यं जनस्याप्य् उपकारम् इच्छन्
समस्तसंपत्समवाप्तिहेतुं तत्प्रत्यभिज्ञाम् उपपादयामि ॥

कर्तरि ज्ञातरि स्वात्मन्य् आदिसिद्धे महेश्वरे
अजडात्मा निषेधं वा सिद्धिं वा विदधीत कः ॥

किं तु मोहवशाद् अस्मिन् दृष्टे ऽप्य् अनुपलक्षिते
शक्त्याविष्करणेनेयं प्रत्यभिज्ञोपदर्श्यते ॥

तथा हि जडभूतानां प्रतिष्ठा जीवदाश्रया
ज्ञानं क्रिया च भूतानां जीवतां जीवनं मतम् ॥

तत्र ज्ञानं स्वतःसिद्धं क्रिया कायाश्रिता सती
परैर् अप्य् उपलक्ष्येत तयान्यज्ञानम् ऊह्यते ॥