ઈશ્વરપ્રત્યભિજ્ઞાકારિકા · અધ્યાય 1.1

કથં ચિદ્ આસાદ્ય મહેશ્વરસ્ય દાસ્યં જનસ્યાપ્ય્ ઉપકારમ્ ઇચ્છન્
સમસ્તસંપત્સમવાપ્તિહેતું તત્પ્રત્યભિજ્ઞામ્ ઉપપાદયામિ ॥

કર્તરિ જ્ઞાતરિ સ્વાત્મન્ય્ આદિસિદ્ધે મહેશ્વરે
અજડાત્મા નિષેધં વા સિદ્ધિં વા વિદધીત કઃ ॥

કિં તુ મોહવશાદ્ અસ્મિન્ દૃષ્ટે ઽપ્ય્ અનુપલક્ષિતે
શક્ત્યાવિષ્કરણેનેયં પ્રત્યભિજ્ઞોપદર્શ્યતે ॥

તથા હિ જડભૂતાનાં પ્રતિષ્ઠા જીવદાશ્રયા
જ્ઞાનં ક્રિયા ચ ભૂતાનાં જીવતાં જીવનં મતમ્ ॥

તત્ર જ્ઞાનં સ્વતઃસિદ્ધં ક્રિયા કાયાશ્રિતા સતી
પરૈર્ અપ્ય્ ઉપલક્ષ્યેત તયાન્યજ્ઞાનમ્ ઊહ્યતે ॥