guru gītā · Chapter 1

/
//guru gītā //
//śrī gurugītā //
//prathamo'dhyāyaḥ //
acintyāvyaktarūpāya nirguṇāya gaṇātmane /
samastajagadādhāramūrtaye brahmaṇe namaḥ

ṛṣaya ūcuḥ /
sūta sūta mahāprājña nigamāgamapāragam /
gurusvarūpamasmākaṃ brūhi sarvamalāpaham

yasya śravaṇamātreṇa dehī duḥkhādvimucyate /
yena mārgeṇa munayaḥ sarvajñatvaṃ prapedire

yatprāpya na punaryāti naraḥ saṃsārabandhanam /
tathāvidhaṃ paraṃ tattvaṃ vaktavyamadhunā tvayā

guhyādguhyatamaṃ sāraṃ gurugītā viśeṣataḥ /
tvatprasādācca śrotavyā tatsarvaṃ brūhi sūta naḥ

iti saṃprārthitaḥ sūto munisaṅghairmuhurmuhuḥ //
kutūhalena mahatā provāca madhuraṃ vacaḥ

sūta uvāca /
śruṇudhvaṃ munayaḥ sarve śraddhayā parayā mudā /
vadāmi bhavarogaghnīṃ gītāṃ mātṛsvarūpiṇīm

purā kailāsaśikhare siddhagandharvasevite /
tatra kalpalatāpuṣpamandire'tyantasundare

vyāghrājine samāsīnaṃ śukādimunivanditam /
bodhayantaṃ paraṃ tattvaṃ madhye munigaṇe kvacit

praṇamravadanā śaśvannamaskurvantamādarāt /
dṛṣṭvā vismayamāpanna pārvatī paripṛcchati

pārvatyuvāca /
ॐ namo deva deveśa parātpara jagadguro /
tvāṃ namaskurvate bhaktyā surāsuranarāḥ sadā

vidhiviṣṇumahendrādyairvandyaḥ khalu sadā bhavān /
namaskaroṣi kasmai tvaṃ namaskārāśrayaḥ kila

dṛṣṭvaitatkarma vipulamāścarya pratibhāti me /
kimetanna vijāne'haṃ kṛpayā vada me prabho

bhagavan sarvadharmajña vratānāṃ vratanāyakam /
brūhi me kṛpayā śambho gurumāhātmyamuttamam

kena mārgeṇa bho svāmin dehī brahmamayo bhavet /
tatkṛpāṃ kuru me svāminnamāmi caraṇau tava

iti saṃprārthitaḥ śaśvanmahādevo maheśvaraḥ /
ānandabharatiḥ svānte pārvatīmidamabravīt

śrī mahādeva uvāca /
na vaktavyamidaṃ devi rahasyātirahasyakam /
na kasyāpi purā proktaṃ tvadbhaktyarthaṃ vadāmi tat

mama rūpāsi devi tvamatastatkathayāmi te /
lokopakārakaḥ praśno na kenāpi kṛtaḥ purā

yasya deve parā bhaktiryathā deve tathā gurau /
tasyaite kathitā hyarthāḥ prakāśante mahātmanaḥ

yo guruḥ sa śivaḥ prokto yaḥ śivaḥ sa guruḥ smṛtaḥ /
vikalpaṃ yastu kurvīta sa naro gurutalpagaḥ

durlabhaṃ triṣu lokeṣu tacchṛṇuśva vadāmyaham /
gurubrahma vinā nānyaḥ satyaṃ satyaṃ varānane

vedaśāstrapurāṇāni cetihāsādikāni ca /
mantrayantrādividyānāṃ mohanoccāṭanādikam

śaivaśāktāgamādīni hyanye ca bahavo matāḥ /
apabhraṃśāḥ samastānāṃ jīvānāṃ bhrāntacetasām

japastapo vrataṃ tīrthaṃ yajño dānaṃ tathaiva ca /
gurutattvamavijñāya sarvaṃ vyarthaṃ bhavetpriye

gurubuddhyātmano nānyat satyaṃ satyaṃ varānane /
tallābhārthaṃ prayatnastu kartavyaśca manīṣibhiḥ

gūḍhāvidyā jaganmāyā dehaścājñānasambhavaḥ /
vijñānaṃ yatprasādena guruśabdena kathayate

yadaṅghrikamaladvandvaṃ dvandvatāpanivārakam /
tārakaṃ bhavasindhośca taṃ guruṃ praṇamāmyaham

dehī brahma bhavedyasmāt tvatkṛpārthaṃ vadāmi tat /
sarvapāpaviśuddhātmā śrīguroḥ pādasevanāt

sarvatīrthāvagāhasya samprāpnoti phalaṃ naraḥ /
guroḥ pādodakaṃ pītvā śeṣaṃ śirasi dhārayan

śoṣaṇaṃ pāpapaṅkasya dīpanaṃ jñānatejasaḥ /
guroḥ pādodakaṃ samyak saṃsārārṇavatārakam

ajñānamūlaharaṇaṃ janmakarmanivārakam /
jñānavijñānasiddhyarthaṃ gurupādodakaṃ pibet

gurupādodakaṃ pānaṃ gurorucchiṣṭabhojanam /
gurumūrteḥ sadā dhyānaṃ gurornāmnaḥ sadā japaḥ

svadeśikasyaiva ca nāmakīrtanaṃ
bhavedanantasya śivasya kīrtanam /
svadeśikasyaiva ca nāmacintanaṃ
bhavedanantasya śivasya cintanam

yatpādareṇurvai nityaṃ ko'pi saṃsāravāridhau /
setubandhāyate nāthaṃ deśikaṃ tamupāsmahe

yadanugrahamātreṇa śokamohau vinaśyataḥ /
tasmai śrīdeśikendrāya namo'stu paramātmane

yasmādanugrahaṃ labdhvā mahadajñānmutsṛjet /
tasmai śrīdeśikendrāya namaścābhīṣṭasiddhaye

kāśīkṣetraṃ nivāsaśca jānhavī caraṇodakam /
guruviśveśvaraḥ sākṣāt tārakaṃ brahmaniścayaḥ

gurusevā gayā proktā dehaḥ syādakṣayo vaṭaḥ /
tatpādaṃ viṣṇupādaṃ syāt tatra dattamanantakam

gurumūrti smarennityaṃ gururnāma sadā japet /
gurorājñāṃ prakurvīta guroranyaṃ na bhāvayet

guruvaktre sthitaṃ brahma prāpyate tatprasādataḥ /
gurordhyānaṃ sadā kuryāt kulastrī svapatiṃ yathā

svāśramaṃ ca svajātiṃ ca svakīrtiṃ puṣṭivardhanam /
etatsarvaṃ parityajya gurumeva samāśrayet

ananyāścintayanto ye sulabhaṃ paramaṃ sukham /
tasmātsarvaprayatnena gurorārādhanaṃ kuru

guruvaktre sthitā vidyā gurubhaktyā ca labhyate /
trailokye sphuṭavaktāro devarṣipitṛmānavāḥ

gukāraścāndhakāro hi rukārasteja ucyate /
ajñānagrāsakaṃ brahma gurureva na saṃśayaḥ

gukāro bhavarogaḥ syāt rukārastannirodhakṛt /
bhavarogaharatyācca gururityabhidhīyate

gukāraśca guṇātīto rūpātīto rukārakaḥ /
guṇarūpavihīnatvāt gururityabhidhīyate

gukāraḥ prathamo varṇo māyādiguṇabhāsakaḥ /
rukāro'sti paraṃ brahma māyābhrāntivimocanam

evaṃ gurupadaṃ śreṣṭhaṃ devānāmapi durlabham /
garuḍoragagandharvasiddhādisurapūjitam

dhruvaṃ dehi mumukṣūṇāṃ nāsti tattvaṃ guroḥ param /
gurorārādhanaṃ kuryāt svajīvatvaṃ nivedayet

āsanaṃ śayanaṃ vastraṃ vāhanaṃ bhūṣaṇādikam /
sādhakena pradātavyaṃ gurusantoṣakāraṇam

karmaṇā manasā vācā sarvadā''rādhayedgurum /
dīrghadaṇḍaṃ namaskṛtya nirlajjau gurusannidhau

śarīramindriyaṃ prāṇamarthasvajanabāndhavān /
ātmadārādikaṃ sarvaṃ sadgurubhyo nivedayet

gurureko jagatsarvaṃ brahmaviṣṇuśivātmakam /
guroḥ parataraṃ nāsti tasmātsaṃpūjayedgurum

sarvaśrutiśiroratnavirājitapadāṃbujam /
vedāntārthapravaktāraṃ tasmāt saṃpūjayedgurum

yasya smaraṇamātreṇa jñānamutpadyate svayam /
sa eva sarvasaṃpattiḥ tasmātsaṃpūjayedgurum

kṛmikoṭibhirāviṣṭaṃ durgandhakuladūṣitam /
anityaṃ duḥkhanilayaṃ dehaṃ viddhi varānane

saṃsāravṛkṣamārūḍhāḥ patanti narakārṇave /
yastānuddharate sarvān tasmai śrīgurave namaḥ

gururbrahmā gururviṣṇurgururdevo maheśvaraḥ /
gurureva paraṃ brahma tasmai śrīgurave namaḥ

ajñānatimirāndhasya jñānāñjanaśalākayā /
cakṣurunmīlitaṃ yena tasmai śrīgurave namaḥ

akhaṇḍamaṇḍalākāraṃ vyāptaṃ yena carācaram /
tatpadaṃ darśitaṃ yena tasmai śrīgurave namaḥ

sthāvaraṃ jaṅgamaṃ vyāptaṃ yatkiñcitsacarācaram /
tvaṃpadaṃ darśitaṃ yena tasmai śrīgurave namaḥ

cinmayaṃ vyāpitaṃ sarvaṃ trailokyaṃ sacarācaram /
asitvaṃ darśitaṃ yena tasmai śrīgurave namaḥ

nimiṣannimiṣārdhvādvā yadvākyādai vimucyate /
svātmānaṃ śivamālokya tasmai śrīgurave namaḥ

caitanyaṃ śāśvataṃ śāṃtaṃ vyomātītaṃ nirañjanam /
nādabindukalātītaṃ tasmai śrīgurave namaḥ

nirguṇaṃ nirmalaṃ śāntaṃ jaṃgamaṃ sthirameva ca /
vyāptaṃ yena jagatsarvaṃ tasmai śrīgurave namaḥ

sa pitā sa ca me mātā sa bandhuḥ sa ca devatā /
saṃsāramohanāśāya tasmai śrīgurave namaḥ

yatsattvena jagatsatyaṃ yatprakāśena bhāti tat /
yadānandena nandanti tasmai śrīgurave namaḥ

yasminsthitamidaṃ sarvaṃ bhāti yadbhānarūpataḥ /
priyaṃ putrādi yatprītyā tasmai śrīgurave namaḥ

yenedaṃ darśitaṃ tattvaṃ cittacaityādikaṃ tathā /
jāgratsvapnasuṣuptyādi tasmai śrīgurave namaḥ

yasya jñānamidaṃ viśvaṃ na dṛśyaṃ bhinnabhedataḥ /
sadaikarūparūpāya tasmai śrīgurave namaḥ

yasya jñātaṃ mataṃ tasya mataṃ yasya na veda saḥ /
ananyabhāvabhāvāya tasmai śrīgurave namaḥ

yasmai kāraṇarūpāya kāryarūpeṇa bhāti yat /
kāryakāraṇarūpāya tasmai śrīgurave namaḥ

nānārūpamidaṃ viśvaṃ na kenāpyasti bhinnatā /
kāryakāraṇarūpāya tasmai śrīgurave namaḥ

jñānaśaktisamārūḍhatattvamālāvibhūṣaṇe /
bhuktimuktipradātre ca tasmai śrīgurave namaḥ

anekajanmasaṃprāptakarmabandhavidāhine /
jñānānilaprabhāvena tasmai śrīgurave namaḥ

śoṣaṇaṃ bhavasindhośca dīpanaṃ kṣarasaṃpadām /
guroḥ pādodakaṃ yasya tasmai śrīgurave namaḥ

na guroradhikaṃ tattvaṃ na guroradhikaṃ tapaḥ /
na guroradhikaṃ jñānaṃ tasmai śrīgurave namaḥ

mannāthaḥ śrījagannātho madguruḥ śrījagadguruḥ /
mamātmā sarvabhūtātmā tasmai śrīgurave namaḥ

gururādiranādiśca guruḥ paramadaivatam /
gurumantrasamo nāsti tasmai śrīgurave namaḥ

eka eva paro bandhurviṣame samupasthite /
guruḥ sakaladharmātmā tasmai śrīgurave namaḥ

gurumadhye sthitaṃ viśvaṃ viśvamadhye sthito guruḥ /
gururviśvaṃ na cānyo'sti tasmai śrīgurave namaḥ

bhavāraṇyapraviṣṭasya diṅmohabhrāntacetasaḥ /
yena sandarśitaḥ panthāḥ tasmai śrīgurave namaḥ

tāpatrayāgnitaptanāmaśāntaprāṇināṃ bhuvi /
yasya pādodakaṃ gaṅgā tasmai śrīgurave namaḥ

ajñānasarpadaṣṭānāṃ prāṇināṃ kaścikitsakaḥ /
samyagjñānamahāmantravedinaṃ sadguru vinā

hetave jagatāmeva saṃsārārṇavasetave /
prabhave sarvavidyānāṃ śambhave gurave namaḥ

dhyānamūlaṃ gurormūtiḥr pūjāmūlaṃ guroḥ padam /
mantramūlaṃ gurorvākyaṃ muktimūlaṃ guroḥ kṛpā

saptasāgaraparyantaṃ tīrthasnānaphalaṃ tu yat /
gurupādapayobindoḥ sahasrāṃśena tatphalam

śive ruṣṭe gurustrātā gurau ruṣṭe na kaścana /
labdhvā kulaguru samyaggurumeva samāśrayet

madhulubdho yathā bhṛṅgaḥ puṣpātpuṣpāntaraṃ vrajet /
jñānalubdhastathā śiṣyo gurorguvarntaraṃ vrajet

vande gurupadadvandvaṃ vāṅmanātītagocaram /
śvetaraktaprabhābhinnaṃ śivaśaktyātmakaṃ param

gukāraṃ ca guṇātītaṃ rūkāraṃ rūpavarjitam /
guṇātītamarūpaṃ ca yo dadyāt sa guruḥ smṛtaḥ

atrinetraḥ śivaḥ sākṣāt dvibāhuśca hariḥ smṛtaḥ /
yo'caturvadano brahmā śrīguruḥ kathitaḥ priye

ayaṃ mayāñjalirbaddho dayāsāgarasiddhaye /
yadanugrahato jantuścitrasaṃsāramuktibhāk

śrīguroḥ paramaṃ rūpaṃ vivekacakṣuragrataḥ /
mandabhāgyā na paśyanti andhāḥ sūryodayaṃ yathā

kulānāṃ kulakoṭīnāṃ tārakastatra tatkṣaṇāt /
atastaṃ sadguru jñātvā trikālamabhivādayet

śrīnāthacaraṇadvandvaṃ yasyāṃ diśi virājate /
tasyāṃ diśi namaskuryād bhaktyā pratidinaṃ priye

sāṣṭāṅgapraṇipātena stuvannityaṃ guruṃ bhajet /
bhajanātsthairyamāpnoti svasvarūpamayo bhavet

dorbhyāṃ padbhyāṃ ca jānubhyāmurasā śirasā dṛśā /
manasā vacasā ceti praṇāmoṣṭāṅga ucyate

tasyai diśe satatamajjalireṣa nityam
prakṣipyatāṃ mukharitairmadhuraiḥ prasūnaiḥ /
jāgarti yatra bhagavān gurucakravartī
viśvasthitipralayanāṭakanityasākṣī

abhaistaiḥ kimu dīrghakālavimalairvyādipradairduṣkaraiḥ
prāṇāyāmaśatairanekakaraṇairduḥkhātmakairdujaryaiḥ /
yasminnabhyudite vinaśyati balī vāyuḥ svayaṃ tatkṣaṇāt
prāptuṃ tatsahajasvabhāvamaniśaṃ seveta caikaṃ gurum

jñānaṃ vinā muktipadaṃ labhyate gurubhaktitaḥ /
guroḥ prasādato nānyat sādhanaṃ gurumārgiṇām

yasmātparataraṃ nāsti neti netīti vai śrutiḥ /
manasā vacasā caiva satyamārādhayedgurum

guroḥ kṛpāprasādena brahmaviṣṇuśivādayaḥ /
sāmarthyamabhajan sarve sṛṣṭisthityantakarmaṇi

devakinnaragandharvāḥ pitṛyakṣāstu tumburuḥ /
munayo'pi na jānanti guruśuśrūṣaṇe vidhim

tārkikāśchāndasāścaiva daivajñāḥ karmaṭhāḥ priye /
laukikāste na jānanti gurutattvaṃ nirākulam

mahāhaṅkāragarveṇa tatovidyābalena ca /
bhramantyetasmin saṃsāre ghaṭīyantraṃ yathā punaḥ

yajñino'pi na muktāḥ syuḥ na muktā yoginastathā /
tāpasā api no muktā gurutattvātparāṅmukhāḥ

na muktāstu gandharvāḥ pitṛyakṣāstu cāraṇāḥ /
ṛṣayaḥ siddhadevādyā gurusevāparāṅmukhāḥ

//iti śrīskaṃdapurāṇe uttarakhaṃḍe umāmaheśvara saṃvāde
śrī gurugītāyāṃ prathamo'dhyāyaḥ //
//atha dvitīyo'dhyāyaḥ //
dhyānaṃ śruṇu mahādevi sarvānandapradāyakam /
sarvasaukhyakaraṃ caiva bhuktimuktipradāyakam

śrīmatparaṃ brahma guruṃ smarāmi
śrīmatparaṃ brahma guruṃ bhajāmi /
śrīmatparaṃ brahma guruṃ vadāmi
śrīmatparaṃ brahma guruṃ namāmi

brahmānandaṃ paramasukhadaṃ kevalaṃ jñānamūrtim
dvandvātītaṃ gaganasadṛśaṃ tattvamasyādilakṣyam /
ekaṃ nityaṃ vimalamacalaṃ sarvadhīsākṣibhūtam
bhāvātītaṃ triguṇarahitaṃ sadguruṃ taṃ namāmi

hṛdambuje karṇikamadhyasaṃsthe
siṃhāsane saṃsthitadivyamūrtim /
dhyāyedguruṃ candrakalāprakāśam
saccitsukhābhīṣṭavaraṃ dadhānam

śvetāmbaraṃ śvetavilepapuṣpam
muktāvibhūṣaṃ muditaṃ dvinetram /
vāmāṅkapīṭhasthitadivyaśaktim
mandasmitaṃ pūrṇakṛpānidhānam

jñānasvarūpaṃ nijabhāvayuktam ānandamānandakaraṃ prasannam /
yogīndramīḍyaṃ bhavarogavaidyam śrīmadguruṃ nityamahaṃ namāmi

vande gurūṇāṃ caraṇāravindam sandarśitasvātmasukhāmbudhīnām /
janasya yeṣāṃ gulikāyamānaṃ saṃsārahālāhalamohaśāntyai

yasmin sṛṣṭisthistidhvaṃsanigrahānugrahātmakam /
kṛtyaṃ pañcavidhaṃ śaśvat bhāsate taṃ guruṃ bhajet

pādābje sarvasaṃsāradāvakālānalaṃ svake /
brahmarandhre sthitāmbhojamadhyasthaṃ candramaṇḍalam

akathāditrirekhābje sahasradalamaṇḍale /
haṃsapārśvatrikoṇe ca smarettanmadhyagaṃ gurum

nityaṃ śuddhaṃ nirābhāsaṃ nirākāraṃ nirañjanam /
nityabodhaṃ cidānandaṃ guruṃ brahma namāmyaham

sakalabhuvanasṛṣṭiḥ kalpitāśeṣasṛṣṭiḥ
nikhilanigamadṛṣṭiḥ satpadārthaikasṛṣṭiḥ /
atadgaṇaparameṣṭiḥ satpadārthaikadṛṣṭiḥ
bhavaguṇaparameṣṭirmokṣamārgaikadṛṣṭiḥ

sakalabhuvanaraṅgasthāpanāstambhayaṣṭiḥ
sakaruṇarasavṛṣṭistattvamālāsamaṣṭiḥ /
sakalasamayasṛṣṭissaccidānandadṛṣṭiḥ
nivasatu mayi nityaṃ śrīgurordivyadṛṣṭiḥ

na guroradhikaṃ na guroradhikaṃ
na guroradhikaṃ na guroradhikam /
śivaśāsanataḥ śivaśāsanataḥ
śivaśāsanataḥ śivaśāsanataḥ

idameva śivamidameva śivam idameva śivamidameva śivam /
hariśāsanato hariśāsanato hariśāsanato hariśāsanataḥ

viditaṃ viditaṃ viditaṃ viditaṃ
vijanaṃ vijanaṃ vijanaṃ vijanam /
vidhiśāsanato vidhiśāsanato
vidhiśāsanato vidhiśāsanataḥ

evaṃvidhaṃ guruṃ dhyātvā jñānamutpadyate svayam /
tadā gurūpadeśena mukto'hamiti bhāvayet

gurūpadiṣṭamārgeṇa manaḥśuddhiṃ tu kārayet /
anityaṃ khaṇḍayetsarvaṃ yatkiñcidātmagocaram

jñeyaṃ sarvaṃ pratītaṃ ca jñānaṃ ca mana ucyate /
jñānaṃ jñeyaṃ samaṃ kuryānnānyaḥ panthā dvitīyakaḥ

kimatra bahunoktena śāstrakoṭiśatairapi /
durlabhā cittaviśrāntiḥ vinā gurukṛpāṃ parām

karuṇākhaḍgapātena chitvā pāśāṣṭakaṃ śiśoḥ /
samyagānandajanakaḥ sadguruḥ so'bhidhīyate

evaṃ śrutvā mahādevi gurunindāṃ karoti yaḥ /
sa yāti narakān ghorān yāvaccandradivākarau

yāvatkalpāntako dehastāvaddevi guruṃ smaret /
gurulopā na kartavyaḥ svacchando yadi vā bhavet

huṅkāreṇa na vaktavyaṃ prājñaśiṣyaiḥ kadācana /
guroragra na vaktavyamasatyaṃ tu kadācana

guruṃ tvaṃkṛtya huṃkṛtya gurusānnidhyabhāṣaṇaḥ /
araṇye nirjale deśe sambhaved brahmarākṣasaḥ

advaitaṃ bhāvayennityaṃ sarvāvasthāsu sarvadā /
kadācidapi no kuryāddvaitaṃ gurusannidhau

dṛśyavismṛtiparyantaṃ kuryād gurupadārcanam /
tādṛśasyaiva kaivalyaṃ na ca tadvyatirekiṇaḥ

api sampūrṇatattvajño gurutyāgi bhavedyadā /
bhavatyeva hi tasyāntakāle vikṣepamutkaṭam

gurukāryaṃ na laṅgheta nāpṛṣṭvā kāryamācaret /
na hyuttiṣṭheddiśe'natvā gurusadbhvaśobhitaḥ

gurau sati svayaṃ devi pareṣāṃ tu kadācana /
upadeśaṃ na vai kuryāt tathā cedrākṣaso bhavet

na gurorāśrame kuryāt duṣpānaṃ parisarpaṇam /
dīkṣā vyākhyā prabhutvādi gurorājñāṃ na kārayet

nopāśramaṃ ca paryakaṃ na ca pādaprasāraṇam /
nāṅgabhogādikaṃ kuryānna līlāmaparāmapi

gurūṇāṃ sadasadvāpi yaduktaṃ tanna laṃghayet /
kurvannājñāṃ divā rātrau dāsavannivasedguro

adattaṃ na gurordravyamupabhuñjīta karhicit /
datte ca raṃkavadgrāhyaṃ prāṇo'pyetena labhyate

pādukāsanaśayyādi guruṇā yadabhīṣṭitam /
namaskurvīta tatsarvaṃ pādābhyāṃ na spṛśet kvacit

gacchataḥ pṛṣṭhato gacchet gurucchāyāṃ na laṃghayet /
nolbaṇaṃ dhārayedveṣaṃ nālaṃkārāṃstatolbaṇān

gurunindākaraṃ dṛṣṭvā dhāvayedatha vāsayet /
sthānaṃ vā tatparityājyaṃ jihvāchedākṣamo yadi

nocchiṣṭaṃ kasyaciddeyaṃ gurorājñāṃ na ca tyajet /
kṛtsnamucchiṣṭamādāya havirvadbhakṣayetsvayam

nānṛtaṃ nāpriyaṃ caiva na garva nāpi vā bahu /
na niyogadharaṃ brūyāt gurorājñāṃ vibhāvayet

prabho devakuleśānāṃ svāmin rājan kuleśvara /
iti sambodhanairbhīto saccaredgurusannidhau

munibhiḥ pannagairvāpi surairvā śāpito yadi /
kālamṛtyubhayādvāpi guruḥ saṃtrāti pārvati

aśaktā hi surādyāśca hyaśaktāḥ munayastathā /
guruśāpopapannasya rakṣaṇāya ca kutracit

smṛtivedapurāṇānāṃ sārameva na saṃśayaḥ

satkāramānapūjārthaṃ daṇḍakāṣayadhāraṇaḥ /
sa saṃnyāsī na vaktavyaḥ saṃnyāsī jñānatatparaḥ

vijānanti mahāvākyaṃ guroścaraṇa sevayā /
te vai saṃnyāsinaḥ proktā itare veṣadhāriṇāḥ

nityaṃ brahma nirākāraṃ nirguṇaṃ satyaciddhanam /
yaḥ sākṣātkurute loke gurutvaṃ tasya śobhate

guruprasādataḥ svātmanyātmārāmanirīkṣaṇāt /
samatā muktimārgeṇa svātmajñānaṃ pravartate

ābrahmastambhaparyantaṃ paramātmasvarūpakam /
sthāvaraṃ jaṃgamaṃ caiva praṇamāmi jaganmayam

vandehaṃ saccidānandaṃ bhāvātītaṃ jagadgurum /
nityaṃ pūrṇaṃ nirākāraṃ nirguṇaṃ svātmasaṃsthitam

parātparataraṃ dhyāyennityamānandakārakam /
hṛdayākāśamadhyasthaṃ śuddhasphaṭikasannibham

sphāṭike sphāṭikaṃ rūpaṃ darpaṇe darpaṇo yathā /
tathātmani cidākāramānandaṃ so'hamityuta

aṃguṣṭhamātraṃ puruṣaṃ dhyāyecca cinmayaṃ hṛdi /
tatra sphurati yo bhāvaḥ śruṇu tatkathayāmi te

ajo'hamamaro'haṃ ca hyanādinidhano hyaham /
avikāraścidānando hyaṇīyānmahato mahān

apūrvamaparaṃ nityaṃ svayaṃjyotirnirāmayam /
virajaṃ paramākāśaṃ dhruvamānandamavyayam

agocaraṃ tathā'gamyaṃ nāmarūpavivarjitam /
niḥśabdaṃ tu vijānīyātsvabhāvādbrahma pārvati

yathā gandhasvabhāvāvatvaṃ karpūrakusumādiṣu /
śītoṣṇatvasvabhāvatvaṃ tathā brahmaṇi śāśvatam

yathā nijasvabhāvena kuṇḍalakaṭakādayaḥ /
suvarṇatvena tiṣṭhanti tathā'haṃ brahma śāśvatam

svayaṃ tathāvidho bhūtvā sthātavyaṃ yatrakutracit /
kīṭo bhṛṅga iva dhyānādyathā bhavati tādṛśaḥ

gurudhyānaṃ tathā kṛtvā svayaṃ brahmamayo bhavet /
piṇḍe pade tathā rūpe muktāste nātra saṃśayaḥ

śrīpārvatī uvāca /
piṇḍaṃ kiṃ tu mahādeva padaṃ kiṃ samudāhṛtam /
rūpātītaṃ ca rūpaṃ kiṃ etadākhyāhi śaṃkara

śrīmahādeva uvāca /
piṇḍaṃ kuṇḍalinī śaktiḥ padaṃ haṃsamudāhṛtam /
rūpaṃ binduriti jñeyaṃ rūpātītaṃ nirañjanam

piṇḍe muktāḥ pade muktā rūpe muktā varānane /
rūpātīte tu ye muktāste muktā nātra saṃśayaḥ

gururdhyānenaiva nityaṃ dehī brahmamayo bhavet /
sthitaśca yatra kutrāpi mukto'sau nātra saṃśayaḥ

jñānaṃ svānubhavaḥ śāntirvairāgyaṃ vaktṛtā dhṛtiḥ /
ṣaḍguṇaiśvaryayukto hi bhagavān śrīguruḥ priye

guruḥ śivo gururdevo gururbandhuḥ śarīriṇām /
gururātmā gururjīvo guroranyanna vidyate

ekākī nispṛhaḥ śāntaścintāsūyādivarjitaḥ /
bālyabhāvena yo bhāti brahmajñānī sa ucyate

na sukhaṃ vedaśāstreṣu na sukhaṃ mantrayantrake /
guroḥ prasādādanyatra sukhaṃ nāsti mahītale

cārvākavaiṣṇavamate sukhaṃ prābhākare na hi /
guroḥ pādāntike yadvatsukhaṃ vedāntasammatam

na tatsukhaṃ surendrasya na sukhaṃ cakravartinām /
yatsukhaṃ vītarāgasya munerekāntavāsinaḥ

nityaṃ brahmarasaṃ pītvā tṛpto yaḥ paramātmani /
indraṃ ca manyate tucchaṃ nṛpāṇāṃ tatra kā kathā

yataḥ paramakaivalyaṃ gurumārgeṇa vai bhavet /
gurubhaktirataḥ kāryā sarvadā mokṣakāṃkṣibhiḥ

eka evādvitīyo'haṃ guruvākyena niścitaḥ /
evamabhyasyatā nityaṃ na sevyaṃ vai vanāntaram

abhyāsānnimiṣeṇaivaṃ samādhimadhigacchati /
ājanmajanitaṃ pāpaṃ tatkṣaṇādeva naśyati

kimāvāhanamavyaktai vyāpakaṃ kiṃ visarjanam /
amūrto ca kathaṃ pūjā kathaṃ dhyānaṃ nirāmaye

gururviṣṇuḥ sattvamayo rājasaścaturānanaḥ /
tāmaso rudrarūpeṇa sṛjatyavati hanti ca

svayaṃ brahmamayo bhūtvā tatparaṃ nāvalokayet /
parātparataraṃ nānyat sarvagaṃ ca nirāmayam

tasyāvalokanaṃ prāpya sarvasaṃgavivarjitaḥ /
ekākī nispṛhaḥ śāntaḥ sthātavyaṃ tatprasādataḥ

labdhaṃ vā'tha na labdhaṃ vā svalpaṃ vā bahulaṃ tathā /
niṣkāmenaiva bhoktavyaṃ sadā saṃtuṣṭamānasaḥ

sarvajñapadamityāhurdehī sarvamayo bhuvi /
sadā'nandaḥ sadā śānto ramate yatrakutracit

yatraiva tiṣṭhate so'pi sa deśaḥ puṇyabhājanaḥ /
muktasya lakṣaṇaṃ devi tavāgre kathitaṃ mayā

upadeśastvayaṃ devi gurumārgeṇa muktidaḥ /
gurubhaktistathātyāntā kartavyā vai manīṣibhiḥ

nityayuktāśrayaḥ sarvo vedakṛtsarvavedakṛt /
svaparajñānadātā ca taṃ vande gurumīśvaram

yadyapyadhītā nigamāḥ ṣaḍaṃgā āgamāḥ priye /
adhyātmādīni śāstrāṇi jñānaṃ nāsti guruṃ vinā

śivapūjārato vāpi viṣṇupūjārato'thavā /
gurutattvavihīnaścettatsarvaṃ vyarthameva hi

śivasvarūpamajñātvā śivapūjā kṛtā yadi /
sā pūjā nāmamātraṃ syāccitradīpa iva priye

sarvaṃ syātsaphalaṃ karma gurudīkṣāprabhāvataḥ /
gurulābhātsarvalābho guruhīnastu bāliśaḥ

guruhīnaḥ paśuḥ kīṭaḥ pataṃgo vaktumarhati /
śivarūpaṃ svarūpaṃ ca na jānāti yatassvayam

tasmātsarvaprayatnena sarvasaṃgavivarjitaḥ /
vihāya śāstrajālāni gurumeva samāśrayet

nirastasarvasandeho ekīkṛtya sudarśanam /
rahasyaṃ yo darśayati bhajāmi gurumīśvaram

jñānahīno gurustyājyo mithyāvādi viḍambakaḥ /
svaviśrāntiṃ na jānāti paraśāntiṃ karoti kim

śilāyāḥ kiṃ paraṃ jñānaṃ śilāsaṃghapratāraṇe /
svayaṃ tartuṃ na jānāti paraṃ nistārayet katham

na vandanīyāste kaṣṭaṃ darśanādbhrāntikārakāḥ /
varjayetān gurun dūre dhīrāneva samāśrayet

pāṣaṇḍinaḥ pāparatāḥ nāstikā bhedabuddhayaḥ /
strīlampaṭā durācārāḥ kṛtaghnā bakavṛttayaḥ

karmabhraṣṭāḥ kṣamānaṣṭā nindyatarkeśca vādinaḥ /
kāminaḥ krodhinaścaiva hiṃsrāścaṇḍāḥ śaṭhāstathā

jñānaluptā na kartavyā mahāpāpāstathā priye /
ebhyo bhinno guruḥ sevyaḥ ekabhaktyā vicārya ca

śiṣyādanyatra deveśi na vadedyasya kasyacit /
narāṇāṃ ca phalaprāptau bhaktireva hi kāraṇam

gūḍho dṛḍhaśca prītaśca maunena susamāhitaḥ /
sakṛtkāmagatau vāpi pañcadhā gururīritaḥ

sarvaṃ gurumukhāllabdhaṃ saphalaṃ pāpanāśanam /
yadyadātmahitaṃ vastu tattaddravyaṃ na vañcayet

gurudevārpaṇaṃ vastu tena tuṣṭo'smi suvrate /
śrīguroḥ pādukāṃ mudrāṃ mūlamantraṃ ca gopayet

natāsmi te nātha padāravindaṃ
buddhīndriyāprāṇamanovacobhiḥ /
yaccintyate bhāvita ātmayuktau
mumukṣibhiḥ karmamayopaśāntaye

anena yadbhavetkāryaṃ tadvadāmi tava priye /
lokopakārakaṃ devi laukikaṃ tu vivarjayet

laukikāddharmato yāti jñānahīno bhavārṇave /
jñānabhāve ca yatsarvaṃ karma niṣkarma śāmyati

imāṃ tu bhaktibhāvena paṭhedvai śruṇuyādapi /
likhitvā yatpradānena tatsarvaṃ phalamaśnute

gurugītāmimāṃ devi hṛdi nityaṃ vibhāvaya /
mahāvyādhigatairduḥkhaiḥ sarvadā prajapenmudā

gurugītākṣaraikaikaṃ mantrarājamidaṃ priye /
anye ca vividhā mantrāḥ kalāṃ nāharnti ṣoḍaśīm

ananta phalamāpnoti gurugītā japena tu /
sarvapāpaharā devi sarvadāridryanāśinī

akālamṛtyuhartrī ca sarvasaṃkaṭanāśinī /
yakṣarākṣasabhūtādicoravyāghravighātinī

sarvopadravakuṣṭhādiduṣṭadoṣanivāriṇī /
yatphalaṃ gurusānnidhyāttatphalaṃ paṭhanādbhavet

mahāvyādhiharā sarvavibhūteḥ siddhidā bhavet /
athavā mohane vaśye svayameva japetsadā

kuśadūrvāsane devi hyāsane śubhrakambale /
upaviśya tato devi japedekāgramānasaḥ

śuklaṃ sarvatra vai proktaṃ vaśye raktāsanaṃ priye /
padmāsane japennityaṃ śāntivaśyakaraṃ param

vastrāsane ca dāridryaṃ pāṣāṇe rogasambhavaḥ /
medinyāṃ duḥkhamāpnoti kāṣṭhe bhavati niṣphalam

kṛṣṇājine jñānasiddhirmokṣaśrīvyārghracarmaṇi /
kuśāsane jñānasiddhiḥ sarvasiddhistu kambale

āgneyyāṃ karṣaṇaṃ caiva vāyavyāṃ śatrunāśanam /
naiṛrtyāṃ darśanaṃ caiva īśānyāṃ jñānameva ca

udaṅmukhaḥ śāntijapye vaśye pūrvamukhastathā /
yāmye tu māraṇaṃ proktaṃ paścime ca dhanāgamaḥ

mohanaṃ sarvabhūtānāṃ bandhamokṣakaraṃ param /
devarājñāṃ priyakaraṃ rājānaṃ vaśamānayet

mukhastambhakaraṃ caiva guṇānāṃ ca vivardhanam /
duṣkarmanāśanaṃ caiva tathā satkarmasiddhidam

prasiddhaṃ sādhayetkāryaṃ navagrahabhayāpaham /
duḥsvapnanāśanaṃ caiva susvapnaphaladāyakam

mohaśāntikaraṃ caiva bandhamokṣakaraṃ param /
svarūpajñānanilayaṃ gītāśāstramidaṃ śive

yaṃ yaṃ cintayate kāmaṃ taṃ taṃ prāpnoti niścayam /
nityaṃ saubhāgyadaṃ puṇyaṃ tāpatrayakulāpaham

sarvaśāntikaraṃ nityaṃ tathā vandhyā suputradam /
avaidhavyakaraṃ strīṇāṃ saubhāgyasya vivardhanam

āyurārogyamaiśvaryaṃ putrapautrapravardhanam /
niṣkāmajāpī vidhavā paṭhenmokṣamavāpnuyāt

avaidhavyaṃ sakāmā tu labhate cānyajanmani /
sarvaduḥkhamayaṃ vighnaṃ nāśayettāpahārakam

sarvapāpapraśamanaṃ dharmakāmārthamokṣadam /
yaṃ yaṃ cintayate kāmaṃ taṃ taṃ prāpnoti niścitam

kāmyānāṃ kāmadhenurvai kalpite kalpapādapaḥ /
cintāmaṇiścintitasya sarvamaṃgalakārakam

likhitvā pūjayedyastu mokṣaśriyamavāpnuyāt /
gurūbhaktirviśeṣeṇa jāyate hṛdi sarvadā

japanti śāktāḥ saurāśca gāṇapatyāśca vaiṣṇavāḥ /
śaivāḥ pāśupatāḥ sarve satyaṃ satyaṃ na saṃśayaḥ

//iti śrīskaṃdapurāṇe uttarakhaṃḍe umāmaheśvara saṃvāde
śrī gurugītāyāṃ dvitīyo'dhyāyaḥ //
//atha tṛtīyaḥ adhyāyaḥ //
atha kāmyajapasthānaṃ kathayāmi varānane /
sāgarānte saritīre tīrthe hariharālaye

śaktidevālaye goṣṭhe sarvadevālaye śubhe /
vaṭasya dhātryā mūle vā maṭhe vṛndāvane tathā

pavitre nirmale deśe nityānuṣṭhānato'pi vā /
nirvedanena maunena japametat samārabhet

jāpyena jayamāpnoti japasiddhiṃ phalaṃ tathā /
hīnaṃ karma tyajetsarvaṃ gahirtasthānameva ca

śmaśāne bilvamūle vā vaṭamūlāntike tathā /
siddhyanti kānake mūle cūtavṛkṣasya sannidhau

pītāsanaṃ mohane tu hyasitaṃ cābhicārike /
jñeyaṃ śuklaṃ ca śāntyarthaṃ vaśye raktaṃ prakīrtitam

japaṃ hīnāsanaṃ kurvat hīnakarmaphalapradam /
gurugītāṃ prayāṇe vā saṃgrāme ripusaṃkaṭe

japan jayamavāpnoti maraṇe muktidāyikā /
sarvakarmāṇi siddhyanti guruputre na saṃśayaḥ

gurumantro mukhe yasya tasya siddhyanti nānyathā /
dīkṣayā sarvakarmāṇi siddhyanti guruputrake

bhavamūlavināśāya cāṣṭapāśanivṛttaye /
gurugītāmbhasi snānaṃ tattvajñaḥ kurute sadā

sa evaṃ sadguruḥ sākṣāt sadasadbrahmavittamaḥ /
tasya sthānāni sarvāṇi pavitrāṇi na saṃśayaḥ

sarvaśuddhaḥ pavitro'sau svabhāvādyatra tiṣṭhati /
tatra devagaṇāḥ sarve kṣetrapīṭhe caranti ca

āsanasthāḥ śayānā vā gacchantastiṣṭhanto'pi vā /
aśvārūḍhā gajārūḍhāḥ suṣuptā jāgrato'pi vā

śucibhūtā jñānavanto gurugītā japanti ye /
teṣāṃ darśanasaṃsparṣāt divyajñānaṃ prajāyate

samudre vai yathā toyaṃ kṣīre kṣīraṃ jale jalam /
bhinne kumbhe yathākāśaṃ tathā''tmā paramātmani

tathaiva jñānavān jīvaḥ paramātmani sarvadā /
aikyena ramate jñānī yatra kutra divāniśam

evaṃvidho mahāyuktaḥ sarvatra vartate sadā /
tasmātsarvaprakāreṇa gurubhaktiṃ samācaret

gurusantoṣaṇādeva mukto bhavati pārvati /
aṇimādiṣu bhoktṛtvaṃ kṛpayā devi jāyate

sāmyena ramate jñānī divā vā yadi vā niśi /
evaṃvidho mahāmaunī trailokyasamatāṃ vrajet

atha saṃsāriṇaḥ sarve gurugītājapena tu /
sarvān kāmāṃstu bhuñjanti trisatyaṃ mama bhāṣitam

satyaṃ satyaṃ punaḥ satyaṃ dharmasāraṃ mayoditam /
gurugītāsamaṃ stotraṃ nāsti tattvaṃ guroḥ param

gururdevo gururdhamor gurau niṣṭhā paraṃ tapaḥ /
guroḥ parataraṃ nāsti trivāraṃ kathayāmi te

dhanyā mātā pitā dhanyo gotraṃ dhanyaṃ kulodbhavaḥ /
dhanyā ca vasudhā devi yatra syādgurubhaktatā

ākalpajanma koṭīnāṃ yajñavratatapaḥkriyāḥ /
tāḥ sarvāḥ saphalā devi gurūsantoṣamātrataḥ

śarīramindriyaṃ prāṇaścārthaḥ svajanabandhutā /
mātṛkulaṃ pitṛkulaṃ gurureva na saṃśayaḥ

mandabhāgyā hyaśaktāśca ye janā nānumanvate /
gurusevāsu vimukhāḥ pacyante narakeśucau

vidyā dhanaṃ balaṃ caiva teṣāṃ bhāgyaṃ nirarthakam /
yeṣāṃ gurūkṛpā nāsti adho gacchanti pārvatī

brahmā viṣṇuśca rudraśca devatāḥ pitṛkinnarāḥ /
siddhacāraṇayakṣāśca anye ca munayo janāḥ

gurubhāvaḥ paraṃ tīrthamanyarthaṃ nirarthakam /
sarvatīrthamayaṃ devi śrīguroścaraṇāmbujam

kanyābhogaratā mandāḥ svakāntāyāḥ parāṅmukhāḥ /
ataḥ paraṃ mayā devi kathitanna mama priye

idaṃ rahasyamaspaṣṭaṃ vaktavyaṃ ca varānane /
sugopyaṃ ca tavāgre tu mamātmaprītaye sati

svāmimukhyagaṇeśādyān vaiṣṇavādīṃśca pārvati /
na vaktavyaṃ mahāmāye pādasparśaṃ kuruṣva me

abhakte vañcake dhūrte pāṣaṇḍe nāstikādiṣu /
manasā'pi na vaktavyā gurugītā kadācana

guravo bahavaḥ santi śiṣyavittāpahārakāḥ /
tamekaṃ durlabhaṃ manye śiṣyahṛttāpahārakam

cāturyavān vivekī ca adhyātmajñānavān śuciḥ /
mānasaṃ nirmalaṃ yasya gurutvaṃ tasya śobhate

guravo nirmalāḥ śāntāḥ sādhavo mitabhāṣiṇaḥ /
kāmakrodhavinirmuktāḥ sadācārāḥ jitendriyāḥ

sūcakādiprabhedena guravo bahudhā smṛtāḥ /
svayaṃ samyak parīkṣyātha tattvaniṣṭhaṃ bhajetsudhīḥ

varṇajālamidaṃ tadvadbāhyaśāstraṃ tu laukikam /
yasmin devi samabhyastaṃ sa guruḥ sucakaḥ smṛtaḥ

varṇāśramocitāṃ vidyāṃ dharmādharmavidhāyinīm /
pravaktāraṃ guruṃ viddhi vācakaṃ tviti pārvati

pañcākṣaryādimantrāṇāmupadeṣṭā tu pārvati /
sa gururbodhako bhūyādubhayorayamuttamaḥ

mohamāraṇavaśyāditucchamantropadarśinam /
niṣiddhagururityāhuḥ paṇḍitāstattvadarśinaḥ

anityamiti nirdiśya saṃsāraṃ saṃkaṭālayam /
vairāgyapathadarśī yaḥ sa gururvihitaḥ priye

tattvamasyādivākyānāmupadeṣṭā tu pārvati /
kāraṇākhyo guruḥ prokto bhavaroganivārakaḥ

sarvasandehasandohanirmūlanavicakṣaṇaḥ /
janmamṛtyubhayaghno yaḥ sa guruḥ paramo mataḥ

bahujanmakṛtāt puṇyāllabhyate'sau mahāguruḥ /
labdhvā'muṃ na punaryāti śiṣyaḥ saṃsārabandhanam

evaṃ bahuvidhā loke guravaḥ santi pārvati /
teṣu sarvaprayatnena sevyo hi paramo guruḥ

niṣiddhaguruśiṣyastu duṣṭasaṃkalpadūṣitaḥ /
brahmapralayaparyantaṃ na punaryāti martyatām

evaṃ śrutvā mahādevī mahādevavacastathā /
atyantavihvalamanā śaṃkaraṃ paripṛcchati

pārvatyuvāca /
namaste devadevātra śrotavyaṃ kiṃcidasti me /
śrutvā tvadvākyamadhunā bhṛśaṃ syādvihvalaṃ manaḥ

svayaṃ mūḍhā mṛtyubhītāḥ sukṛtādviratiṃ gatāḥ /
daivānniṣiddhagurugā yadi teṣāṃ tu kā gatiḥ

śrī mahādeva uvāca /
śruṇu tattvamidaṃ devi yadā syādvirato naraḥ /
tadā'sāvadhikārīti procyate śrutimastakaiḥ

akhaṇḍaikarasaṃ brahma nityamuktaṃ nirāmayam /
svasmin sandarśitaṃ yena sa bhavedasyaṃ deśikaḥ

jalānāṃ sāgaro rājā yathā bhavati pārvati /
gurūṇāṃ tatra sarveṣāṃ rājāyaṃ paramo guruḥ

mohādirahitaḥ śānto nityatṛpto nirāśrayaḥ /
tṛṇīkṛtabrahmaviṣṇuvaibhavaḥ paramo guruḥ

sarvakālavideśeṣu svatantro niścalassukhī /
akhaṇḍaikarasāsvādatṛpto hi paramo guruḥ

dvaitādvaitavinirmuktaḥ svānubhūtiprakāśavān /
ajñānāndhatamaśchettā sarvajñaḥ paramo guruḥ

yasya darśanamātreṇa manasaḥ syāt prasannatā /
svayaṃ bhūyāt dhṛtiśśāntiḥ sa bhavet paramo guruḥ

siddhijālaṃ samālokya yogināṃ mantravādinām /
tucchākāramanovṛttiryasyāsau paramo guruḥ

svaśarīraṃ śavaṃ paśyan tathā svātmānamadvayam /
yaḥ strīkanakamohaghnaḥ sa bhavet paramo guruḥ

maunī vāgmīti tattvajño dvidhābhūcchṛṇu pārvati /
na kaścinmauninā lābho loke'sminbhavati priye

vāgmī tūtkaṭasaṃsārasāgarottāraṇakṣamaḥ /
yatosau saṃśayacchettā śāstrayuktyanubhūtibhiḥ

gurunāmajapāddevi bahujanmarjitānyapi /
pāpāni vilayaṃ yānti nāsti sandehamaṇvapi

śrīgurossadṛśaṃ daivaṃ śrīgurosadṛśaḥ pitā /
gurudhyānasamaṃ karma nāsti nāsti mahītale

kulaṃ dhanaṃ balaṃ śāstraṃ bāndhavāssodarā ime /
maraṇe nopayujyante gurureko hi tārakaḥ

kulameva pavitraṃ syāt satyaṃ svagurusevayā /
tṛptāḥ syussakalā devā brahmādyā gurutarpaṇāt

gurureko hi jānāti svarūpaṃ devamavyayam /
tajjñānaṃ yatprasādena nānyathā śāstrakoṭibhiḥ

svarūpajñānaśūnyena kṛtamapyakṛtaṃ bhavet /
tapojapādiakṃ devi sakalaṃ bālajalpavat

śivaṃ keciddhariṃ kecidvidhiṃ kecittu kecana /
śaktiṃ devamiti jñātvā vivadanti vṛthā narāḥ

na jānanti paraṃ tattvaṃ gurūdīkṣāparāṅmukhāḥ /
bhrāntāḥ paśusamā hyete svaparijñānavarjitāḥ

tasmātkaivalyasiddhyarthaṃ gurūmeva bhajetpriye /
gurūṃ vinā na jānanti mūḍhāstatparamaṃ padam

bhidyate hṛdayagranthiśchidyante sarvasaṃśayāḥ /
kṣīyante sarvakarmāṇi guroḥ karūṇayā śive

kṛtāyā gurubhaktestu vedaśāstrānusārataḥ /
mucyate pātakādghorādgurūbhakto viśeṣataḥ

duḥsaṃgaṃ ca parityajya pāpakarma parityajet /
cittacihnamidaṃ yasya dīkṣā vidhīyate

cittatyāganiyuktaśca krodhagarvavivarjitaḥ /
dvaitabhāvaparityāgī tasya dīkṣā vidhīyate

etallakṣaṇa saṃyuktaṃ sarvabhūtahite ratam /
nirmalaṃ jīvitaṃ yasya tasya dīkṣā vidhīyate

kriyayā cānvitaṃ pūrvaṃ dīkṣājālaṃ nirūpitam /
mantradīkṣābhirrdha sāṃgopāṃga śivoditam

kriyayā syādvirahitāṃ gurūsāyujyadāyinīm /
gurudīkṣāṃ vinā ko vā gurutvācārapālakaḥ

śakto na cāpi śakto vā daiśikāṃghrisamāśrayāt /
tasya janmāsti saphalaṃ bhogamokṣaphalapradam

atyantacittapakvasya śraddhābhaktiyutasya ca /
pravaktavyamidaṃ devi mamātmaprītaye sadā

rahasyaṃ sarvaśāstreṣu gītāśāstradaṃ śive /
samyakparīkṣya vaktavyaṃ sādhakasya madyātmanaḥ

satkarmaparipākācca cittaśuddhasya dhīmataḥ /
sādhakasyaiva vaktavyā gurugītā prayatnataḥ

nāstikāya kṛtaghnāya dāmbhikāya śaṭhāya ca /
abhaktāya vibhaktāya na vācyeyaṃ kadācana

strīlolupāya mūrkhāya kāmopahatacetase /
nindakāya na vaktavyā gurugītā svabhāvataḥ

sarva pāpapraśamanaṃ sarvopadravavārakam /
janmamṛtyuharaṃ devi gītāśāstramidaṃ śive

śrutisāramidaṃ devi sarvamuktaṃ samāsataḥ /
nānyathā sadgatiḥ puṃsāṃ vinā gurupadaṃ śive

bahujanmakṛtātpādayamartho na rocate /
janmabandhanivṛtyarthaṃ gurumeva bhajetsadā

ahameva jagatsarvamahameva paraṃ padam /
etajjñānaṃ yato bhūyāttaṃ guruṃ praṇamāmyaham

alaṃ vikalpairahameva kevalo mayi sthitaṃ viśvamidaṃ carācaram /
idaṃ rahasyaṃ mama yena darśitam sa vandanīyo gurureva kevalam

yasyāntaṃ nādimadhyaṃ na hi karacaraṇaṃ nāmagotraṃ na sūtram /
no jātirnaiva varṇo na bhavati puruṣo no napuṃsaṃ na ca strī

nākāraṃ no vikāraṃ na hi janimaraṇaṃ nāsti puṇyaṃ na pāpam /
no'tattvaṃ tattvamekaṃ sahajasamarasaṃ sadguruṃ taṃ namāmi

nityāya satyāya cidātmakāya navyāya bhavyāya parātparāya /
śuddhāya buddhāya nirañjanāya namo'sya nityaṃ guruśekharāya

saccidānandarūpāya vyāpine paramātmane /
namaḥ śrīgurunāthāya prakāśānandamūrtaye

satyānandasvarūpāya bodhaikasukhakāriṇe /
namo vedāntavedyāya gurave buddhisākṣiṇe

namaste nātha bhagavan śivāya gururūpiṇe /
vidyāvatārasaṃsiddhyai svīkṛtānekavigraha

navāya navarūpāya paramārthaikarūpiṇe /
sarvājñānatamobhedabhānave cidghanāya te

svatantrāya dayāklṛptavigrahāya śivātmane /
paratantrāya bhaktānāṃ bhavyānāṃ bhavyarūpiṇe

vivekināṃ vivekāya vimarśāya vimarśinām /
prakāśināṃ prakāśāya jñānināṃ jñānarūpiṇe

purastatpārśvayoḥ pṛṣṭhe namaskuryāduparyadhaḥ /
sadā maccittarūpeṇa vidhehi bhavadāsanam

śrīguruṃ paramānandaṃ vande hyānandavigraham /
yasya sannidhimātreṇa cidānandāya te manaḥ

namo'stu gurave tubhyaṃ sahajānandarūpiṇe /
yasya vāgamṛtaṃ hanti viṣaṃ saṃsārasaṃjñakam

nānāyuktopadeśena tāritā śiṣyamantatiḥ /
tatkṛtāsāravedena gurucitpadamacyutam

acyutāya manastubhyaṃ gurave paramātmane /
sarvatantrasvatantrāya cidghanānandamūrtaye

namocyutāya gurave vidyāvidyāsvarūpiṇe /
śiṣyasanmārgapaṭave kṛpāpīyūṣasindhave

omacyutāya gurave śiṣyasaṃsārasetave /
bhaktakāryaikasiṃhāya namaste citsukhātmane

gurunāmasamaṃ daivaṃ na pitā na ca bāndhavāḥ /
gurunāmasamaḥ svāmī nedṛśaṃ paramaṃ padam

ekākṣarapradātāraṃ yo guruṃ naiva manyate /
śvānayoniśataṃ gatvā cāṇḍāleṣvapi jāyate

gurutyāgādbhavenmṛtyurmantratyāgāddaridratā /
gurumantraparityāgī rauravaṃ narakaṃ vrajet

śivakrodhādgurustrātā gurukrodhācchivo na hi /
tasmātsarvaprayatnena gurorājñā na laṃghayet

saṃsārasāgarasamuddharaṇaikamantraṃ
brahmādidevamunipūjitasiddhamantram /
dāridryaduḥkhabhavarogavināśamantraṃ
vande mahābhayaharaṃ gururājamantram

saptakoṭīmahāmantrāścittavibhraṃśakārakāḥ /
eka eva mahāmantro gururityakṣaradvayam

evamuktvā mahādevaḥ pārvatīṃ punarabravīt /
idameva paraṃ tattvaṃ śruṇu devi sukhāvaham

gurutattvamidaṃ devi sarvamuktaṃ samāsataḥ /
rahasyamidamavyaktanna vadedyasya kasyacit

na mṛṣā syādiyaṃ devi maduktiḥ satyarūpiṇī /
gurugītāsamaṃ stotraṃ nāsti nāsti mahītale

gurugītāmimāṃ devi bhavaduḥkhavināśinīm /
gurudīkṣāvihīnasya purato na paṭhet kvacit

rahasyamatyantarahasyametanna pāpinā labhyamidaṃ maheśvari /
anekajanmārjitapuṇyapākādgurostu tattvaṃ labhate manuṣyaḥ

yasya prasādādahameva sarvaṃ
mayyeva sarvaṃ parikalpitaṃ ca /
itthaṃ vijānāmi sadātmarūpaṃ
gtasyāṃghripadmaṃ praṇato'smi nityam

ajñānatimirāndhasya viṣayākrāntacetasaḥ /
jñānaprabhāpradānena prasādaṃ kuru me prabho

//iti śrīgurugītāyāṃ tṛtīyo'dhyāyaḥ //
//iti śrīskaṃdapurāṇe uttarakhaṃḍe īśvarapārvatī
saṃvāde gurugītā samāpta //
//śrīgurudattātreyārpaṇamastu //