godāvarīstotram · Chapter 1

// godāvarīstotram //
yā snānamātrāya narāya godā godānapuṇyādhidṛśiḥ kugodā//
godāsaraidā bhuvi saubhagodā godāvarī sā'vatu naḥ sugodā

yā gaupavastermuninā hṛtā'tra yā gautamena prathitā tato'tra//
yā gautamītyarthanarāśvagodā godāvarī sā'vatu naḥ sugodā

vinirgatā tryaṃbakamastakādyā snātuṃ samāyānti yato'pi kādyā//
kā''dyādhunī dṛtsatatapramodā godāvarī sā'vatu naḥ sugodā

gaṅgodgatiṃ rāti mṛtāya revā tapaḥphalaṃ dānaphalaṃ tathaiva//
varaṃ kurukṣetramapi trayaṃ yā godāvarī sā'vatu naḥ sugodā

siṃhe sthite vāgadhipe purodhaḥ siṃhe samāyāntyakhilāni yatra//
tīrthāni naṣṭākhilalokakhedā godāvarī sā'vatu naḥ sugodā

yadūrdhvaretomunivargalabhyaṃ tadyattaṭasthairapi dhāma labhyam//
abhyantarakṣālanapāṭavodā godāvarī sā'vatu naḥ sugodā

yasyāḥ sudhāspardhi payaḥ pibanti na te punarmātṛpayaḥ pibanti//
yasyāḥ pibanto'mbvamṛtaṃ hasanti godāvarī sā'vatu naḥ sugodā

saubhāgyadā bhāratavarṣadhātrī saubhāgyabhūtā jagato vidhātrī//
dhātrī prabodhasya mahāmahodā godāvarī sā'vatu naḥ sugodā

samāplutā mayā sā yā siṣeve pūrvasāgaram//
saptavaktraistapaḥ kṛṣṇasaptamyāṃ sati vāsare

saptasupterasuptā sā guptā sāgaramadhyataḥ//
godāvarī varīvarti na nidrāti kadācana

// iti śrī pa. pa. śrīvāsudevānandasarasvatīviracitaṃ godāvarīstotraṃ saṃpūrṇam //