Garuda Purana · Chapter 2.17

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe śrīkṛṣṇagaruḍasaṃvāde pretayātrādinirūpaṇaṃ nāma ṣoḍaśo 'dhyāyaḥ
śrīgaruḍamāhāpurāṇam- 17
garuḍa uvāca /
eko me saṃśayo deva hṛdaye samprabādhate /
śramaṇāḥ kasya putrāśca kathaṃ yamapure sthitāḥ

mānuṣaiśca kṛtaṃ karma kasmājjānanti te prabho /
kathaṃ śṛṇvanti te sarve kasmājjñānaṃ samāgatam

kutra bhuñjanti deveśa krathayasva prasādataḥ /
pakṣirājavacaḥ śrutvā bhagavānvākyamabravīt

śrīkṛṣṇa uvāca /
śṛṇuṣva vacanaṃ satyaṃ sarveṣāṃ saukhyadāyakam /
tadahaṃ kathayiṣyāmi śravaṇānāṃ viceṣṭitam

ekībhūtaṃ yadā sarvaṃ jagatsthāvarajaṅgamam /
kṣīrodasāgare pūrvaṃ mayi supte jagatpatau

nābhisthojastapastepe varṣāṇi subahūnyapi /
ekībhūtaṃ jagatsṛṣṭaṃ bhūtagrāmacaturvidham

brahmaṇā nirmitaṃ pūrvaṃ viṣṇunā pālitaṃ tadā /
rudraḥ saṃhāramūrtiśca nirmito brahmaṇā tataḥ

vāyuḥ sarvagataḥ sṛṣṭaḥ sūryastejobhivṛddhimān /
dharmarājastataḥ sṛṣṭaścitraguptena saṃyuta)

sṛṣṭvaitadādikaṃ sarvaṃ tapastepe tu padmajaḥ /
gatāni bahuvarṣāṇi brahmaṇo nābhipaṅkaje

yoyo hi nirmitaḥ pūrvaṃ tattatkarma samācaret /
kasmiṃścitsamaye tatra brahmā lokasamanvitaḥ

rudro viṣṇustathā dharmaḥ śāsayanti vasundharām /
na jānīmo vayaṃ kiñcillokakṛtyamihocyatām

iti cintāparāḥ sarve devā vimamṛśustadā /
saṃcintya brahmaṇo mantraṃ vibudhaiḥ preritastadā

gṛhītvā puṣpapatrāṇi sosṛjaddvādaśātmajān /
tejorāśīnviśālākṣānbrahmaṇo vacanāttu te

yoyaṃ vadati lokesmiñchubhaṃ vā yadi vāśubham /
prāpayanti tataḥ śīghraṃ brahmaṇaḥ karṇagocaram

dūrācchravaṇavijñānaṃ dūrāddarśanagocaram /
sarve śṛṇvanti yatpakṣiṃstenaiva śravaṇā matāḥ

sthitvā caiva tathākāśe jantūnāṃ ceṣṭitaṃ ca yat /
tajjñātvā dharmarājāgre mṛtyukāle vadanti ca

dharmaṃ cārthaṃ ca kāmaṃ ca mokṣaṃ ca kathayanti te /
eko hi dharmamārgaśca dvitīyaścārthamārgakaḥ

aparaḥ kāmamārgaśca mokṣamārgaścaturthakaḥ /
uttamā dhamamārgeṇa vainateya prayānti hi

arthadātā vimānaistu aśvaiḥ kāmapradāyakaḥ /
haṃsayuktavimānaiśca mokṣākāṅkṣī visarpati

itaraḥ pādacāreṇa tvasipatravanāni ca /
pāṣāṇaiḥ kaṇṭakaiḥ kliṣṭaḥ pāśabaddho 'tha yāti vai

yaḥ kaścinmānuṣe loke śravaṇānpūjayediha /
vardhanyā jalapātrema pakvānnaparipūrṇayā

śravaṇānpūjayettatra mayā saha khageśvara /
tasyāhaṃ tatpradāsyāmi yatsurairapi durlabham

saṃbhojya brāhmaṇān bhaktyā tvekādaśa śubhāñchucīn /
dvādaśaṃ sakalatraṃ ca mama prītyai prapūjayet

devaiḥ sarvaiśca saṃpūjya svargaṃ yānti sukhepsayā /
taiḥ pūjitairaha tuṣṭaścitraguptena dharmarāṭ

taistuṣṭairmatpuraṃ yānti lokā dharmapārāyaṇāḥ /
śravaṇānāṃ ca māhātmyamutpattiṃ ceṣṭitaṃ śubham

śṛṇoti pakṣiśārdūla sa ca pāpairna lipyate /
iha loke sukhaṃ bhuktvā svargaloke mahīyate