Garuda Purana · Chapter 1.187

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe ṣaḍaśītyadhikaśatatamo 'dhyāyaḥ
śrīgaruḍamahāpurāṇam- 187
hariruvāca /
hastikarṇapalāśasya patrāṇi? cūrṇayeddhara /
sarvarogavinirmuktaṃ cūrṇaṃ palaśataṃ śiva

sakṣīraṃ bhakṣītaṃ kuryātsaptāhena vṛṣadhvaja /
naraṃ śrutidharaṃ rudra mṛgendragativikramam

padmarāgapratīkāśaṃyuktaṃ daśaśatāyuṣā /
ṣoḍaśābdākṛtiṃ rudra satataṃ dugdhabhojanāt

madhusarpiḥsamāyuktaṃ dugdhamāyuṣkaraṃ bhavet /
tajjagdhaṃ madhunā sārdhaṃ daśavarṣa sahasriṇam

kuryānnaraṃ śrutidharaṃ pramadājanavallabham /
dadhnā nityaṃ bhakṣitantu vajradehakaraṃ bhavet

keśarājisamāyuktaṃ naraṃ varṣasahasriṇam /
tacca kāñjikasaṃyuktaṃ naraṃ kuryācca bhakṣitam

śatavarṣaṃ divyadehaṃ valīpalitavarjitam /
jagdhaṃ triphalayā kṣaudraṃ cakṣuṣmantaṃ karoti vai

andhaḥ paśyettu cūrṇasya sājyasyaiva tu bhakṣaṇāt /
mahiṣīkṣīrasaṃyuktastallepaḥ kṛṣṇakeśakṛt

khalvāṭasya ca vai keśā bhavanti vṛṣabhadhvaja /
tailayuktena cūrṇena valīpalitanāśanam

tadudvartanamātreṇa sarvarāgaḥ pramucyate /
sacchāgakṣīracūrṇena dṛṣṭiḥ syānmāsato 'ñjanāt

palāśasya ca bījāni śrāvaṇe vituṣāṇi ca /
gṛhītvā navanītena teṣāṃ cūrṇaṃ ca bhakṣayet

karṣārdhamekaṃ seveta natvā nityaṃ hariṃ prabhum /
purāṇaṣaṣṭidhānyasya pathyamambu pibanhara /
jīvedvarṣasahasrāṇi valīpalitavarjitaḥ

bhṛṅgarājasya vai mūlaṃ puṣyarkṣe tu samāhṛtam /
vidhāya tasya cūrṇaṃ vai sasauvīrañca bhakṣayetaṃ

māsamātraprayogeṇa valīpalitavarjitaḥ /
śatāni pañca jīvecca naro nāgabalo bhavet /
bhavecchrutidharo rudra puṣyarkṣe caiva bhakṣaṇāt