Garuda Purana · Chapter 1.185

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe vaidyaśāstre caturaśītyadhikaśatatamo 'dhyāyaḥ
śrīgaruḍamahāpurāṇam- 185 /
hariruvāca /
āṃ gaṇapataye iti ayaṃ gaṇapaternmantro dhanavidyāpradāyakaḥ

imamaṣṭasahasrañca japtvā baddhvā śikhāṃ tataḥ /
vyavahāre jayaḥ syācca śataṃ jāpānnṛṇāṃ priyaḥ

tilānāṃ tu ghṛtāktānāṃ kṛṣṇānāṃ rudra homayet /
aṣṭottarasahasrantu rājā vaśyastribhirdinaiḥ

aṣṭamyāñca caturdaśyāmupoṣyābhyarcya vighnarāṭ /
tilākṣatānāṃ juhuyādaṣṭottarasahasrakam /
apājitaḥ syādyuddhe ca sarve tañca siṣevire

japtvā cāṣṭasahasrantu tataścāṣṭaśatena hi /
śikhāṃ baddhvā rājakule vyavahāre jayo bhavet

hrīṅkāraṃ savisargañca prātaḥ kāle narastu yaḥ /
strīṇāṃ lalāṭe vinyasya vaśatāṃ nayati dhruvam

susamāhitacittena vinyasya pramadālaye /
sotkāmāṃ kāminīṃ kuryānnātra kāryā vicāraṇā

juhuyādayutaṃ yastu śuciḥ prayatamānasaḥ /
dṛṣṭimātre sadā tasya vaśyamāyānti yoṣitaḥ

manaḥ śilāpatrakañca sagorocanakuṅkumam /
kṛta ebhiśca tilake vaśyamāyānti yoṣitaḥ

bhṛṅgarāṭ sahadevā ca vacā śvetāparājitā /
tenaiva tilakaṃ kṛtvā trailokyaṃ vaśatāṃ nayet

gorocanā mīnapittamābhyāñca kṛtavartikaḥ /
yaḥ pumāṃstilakaṃ kuryādvāmahastakaniṣṭhayā /
sa karoti vaśe sarvaṃ trailokyaṃ nātra saṃśayaḥ

gorocanā mahādeva ! dhātuśoṇitabhāvitā /
etairvaitilakaṃ kṛtvā sā naraṃ yaṃ nirīkṣate /
tatkṣaṇāttaṃ vaśe kuryā nnātra kāryā vicāraṇā

nāgeśvarañca śaileyaṃ tvakpatrañca harītakī /
candanaṃ kuṣṭhasūkṣmailāraktaśālisamanvitā

etairdhūpo vaśakaraḥ smarabāṇaiḥ smārārdanaḥ /
ratikāle mahādeva pārvatīpriya śaṅkara

nijaśukraṃ gṛhī tvā tu vāmahastena yaḥ pumān /
kāminīcaraṇaṃ vāmaṃ liṃpetsa syātstriyāḥ priyaḥ

saindhavañca mahādeva pārāvatamalaṃ madhu /
ebhirlipte tu liṅge vai kāminīvaśakṛdbhavet

puṣpāṇi pañcaraktāni gṛhītvā yāni kāni ca /
tattulyañca priyaṅguñca peṣayedekayogataḥ /
anena liptaliṅgasya kāminīvaśatāmiyāt

hayagandhā ca mañjiṣṭhā mālatīkusumāni ca /
śvetasaṣarpa etaiśca liptaliṅgaḥ striyāḥ priyaḥ

mūlantu kākajaṅghāyā dugdhapītantu śoṣanut /
aśvagandhānāgabalāguḍamāṣaniṣeviṇaḥ /
rūpaṃ bhavedyathā tadvannavayauvanacāriṇām

lauhacūrṇasamāyuktaṃ triphalācūrṇameva vā /
madhunā sevitaṃ rudra pariṇāmākhyaśūlanut

kvathitodakapānantu śambūkakṣārakaṃ tathā /
mṛgaśṛṅgaṃ hyagnidagdhaṃ gavyājyena samanvitam /
pīta hṛtpṛṣṭhaśūlānāṃ bhavennāśakaraṃ śiva

hiṅgu sauvarcalaṃ śuṇṭhī vṛṣadhvaja mahauṣadham? /
ebhistu kvathitaṃ vāri pītaṃ vai sarvaśūlanut

apāmārgasya vai mūlaṃ sāmudralavaṇānvitam /
āsvādi tamajīrṇasya śūlasya syādvimardanam

vaṭarohāṅkuro rudra taṇḍulodakagharṣitaḥ /
pītaḥ satakro 'tīsāraṃ kṣayaṃ nayati śaṅkara

aṅkoṭamūlaṃ karṣārdhaṃ piṣṭaṃ taṇḍulavāriṇā /
sarvātīsāragrahaṇīṃ pītaṃ harati bhūtapa

marīcaśuṇṭhikuṭajatvakcūrṇañca guḍānvitam /
kramāttaddviguṇaṃ pītaṃ grahaṇīvyādhināśanam

śvetāparājitāmūlaṃ haridrāsikthataṇḍulāḥ /
apāmārgatrikaṭukameṣāñca vaṭikā śiva /
viṣūcikāmahāvyādhiṃ haratyeva na saṃśayaḥ

triphalāguru bhūteśa śilājatu harītakī /
ekaikameṣāṃ cūrṇantu madhunā ca vimiśritam /
pītaṃ sarvañca mehantu kṣayaṃ nayati śaṅkara

arkakṣīraprasthamekaṃ tilatailaṃ tathaiva ca /
manaḥ śilāmarīcānāṃ sindūrasya palaṃ palam

cūrṇaṃ kṛtvā tāmrapātre tvātapaiḥ śoṣayettataḥ /
pītaṃ snuhīgataṃ dugdhaṃ saindhavaṃ śūlanudbhavet

trikaṭutriphalānaktaṃ tilatailaṃ tathaiva ca /
manaḥ śilā nimbapatraṃ jātīpuṣpamajāpayaḥ

tanmūtraṃ saṅkhanābhiśca candanaṃ gharṣayettataḥ /
ebhiśca vartikāṃ kṛtvā tvakṣiṇī cāñjayettataḥ

naśyate paṭalaṃ kācaṃ puṣpañca timirādikam /
vibhītakasya vai cūrṇaṃ samadhu śvāsanāśanam

pippalītriphalācūrṇaṃ madhusaindhavasaṃyutam /
sarvarogajvaraśvāsaśoṣapīnasahṛdbhavet

devadārośca vai cūrṇaṃ ajāmatreṇa bhāvayet /
ekaviṃśativāraṃvaitvakṣiṇī tena cāñjayet /
rātryandhatā paṭalatā naśyennirlomatā tathā

pippalīketakaṃ rudra haridrāmalakaṃ vacā /
sarvākṣirogā naśyeyuḥ sakṣīrādañjanāttataḥ

kākajaṅghāśigrumūle mukhena vidhṛte śiva /
carvitvā dantakīṭānāṃ vināśo hi bhaveddhara