Garga Samhita · Chapter 9.9

mahāpūjāprakārakathanam
śrīvyāsa uvāca -
upacārasya maṃtrāṇi vedoktāni śubhāni ca //
tubhyaṃ vakṣyāmi rājeṃdra śṛṇuṣvaikāgramānasaḥ

athāvāhanam
golokadhāmādhipate ramāpate
goviṃda dāmodara dīnavatsala //
rādhāpate mādhava sātvatāṃ pate
siṃhāsane'sminmama saṃmukho bhava

athāsanam
śrīpadmarāgasphuradūrdhvapṛṣṭhaṃ
mahārhavaidūryakhacitpadābjam //
vaikuṇṭha vaikuṇṭhapate gṛhāṇa
pītaṃ taḍiddhāṭakakumbhakhaṇḍam

atha pādyam
paraṃ sthitaṃ nirmalaraukmapātre
samāhṛtaṃ biṃdusarovarāddhi //
yogeśa vedeśa jagannivāsa
gṛhāṇa pādyaṃ praṇamāmi pādau

atha arghyam
jalajacampakapuṣpasamanvitaṃ
vimalamarghyamanarghadarasthitam //
pratigṛhāṇa ramāramaṇa prabho
yadupate yadunātha yadūttama

atha snānam
kāśmīrapāṭīravimiśritena
sumallikośīravatā jalena //
snānaṃ kuru tvaṃ yadunātha deva
goviṃda gopālaka tīrthapāda

atha madhuparkasnānam
madhyāhnacaṃdrārkabhavaṃ malāpahaṃ
sitāṃgasaṃparkamanoharaṃ param //
gṛhāṇa viṣṇo madhuparkamenaṃ
saṃdṛśya pītāṃbara sātvatāṃ pate

atha vastram
vibho sarvataḥ prasphuratprojjvalaṃ ca
sphurad‌raśmiramyaṃ paraṃ durlabhaṃ ca //
svato nirmitaṃ padmakiṃjalkavarṇaṃ
gṛhaṇāṃbaraṃ deva pītāṃbarākhyam

atha yajñopavītam
suvarṇābhamāpītavarṇaṃ sumaṃtraiḥ
paraṃ prokṣitaṃ vedavinnirmitaṃ ca //
śubhaṃ paṃcakāryeṣu naimittikeṣu
prabho yajña yajñopavītaṃ gṛhāṇa

atha bhūṣaṇam
kanakarat‍namayaṃ mayanirmitaṃ
madanarukkadanaṃ sadanaṃ rucām //
uṣasi pūṣasuvarṇavibhūṣaṇaṃ
sakalalokavibhūṣaṇa gṛhyatām

atha gaṃdham
saṃdhyeṃduśobhaṃ bahumaṃgalaṃ śrī-
kāśmīrapāṭīrakapaṃkayuktam //
svamaṃḍanaṃ gandhacayaṃ gṛhāṇa
samastabhūmaṇḍalabhārahārin

athākṣatān
brahmāvarte brahmaṇā pūrvamuptān
brāhmaistoyaiḥ siṃcitānviṣṇunā ca //
rudreṇārād‌rakṣitān rākṣasebhyaḥ
sākṣād‍bhūmannakṣatāṃstvaṃ gṛhāṇa

atha puṣpāṇi
mandārasantānakapārijāta-
kalpadrumaśrīharicandanānām //
gṛhāṇa puṣpāṇi hare tulasyā
miśrāṇi sākṣānnavamaṃjarībhiḥ

atha dhūpam
lavaṃgapāṭīrajacūrṇamiśraṃ
manuṣyadevāsurasaukhyadaṃ ca //
sadyaḥ sugaṃdhīkṛtaharmyadeśaṃ
dvārāvatībhūpa gṛhāṇa dhūpam

atha dīpam
tamohāriṇaṃ jñānamūrtiṃ manojñaṃ
lasadvartikarpūrapūraṃ gavājyam //
jagannātha deva prabho viśvadīpa
sphurajjyotiṣaṃ dīpamukhyaṃ gṛhāṇa

atha naivedyam
rasaiḥ śarairbhedavidhivyavasthitaṃ
rasai rasāḍhyaṃ ca yaśomatīkṛtam //
gṛhāṇa naivedyamidaṃ surocakaṃ
gavyāmṛtaṃ sundara nandanandana

atha jalam
gaṃgottarīvegabalātsamud‍dhṛtaṃ
suvarṇapātreṇa himāṃśuśītalam //
sunirmalābhaṃ hyamṛtopamaṃ jalaṃ
gṛhāṇa rādhāvara bhaktavatsala

athācamanam
rādhāpate śrīvirajāpate prabho
śriyaḥ pate sarvapate ca bhūpate //
kaṃkolajātīphalapuṣpavāsitaṃ
paraṃ gṛhāṇācamanaṃ dayānidhe

atha tāṃbūlam
jātīphalailāsulavaṃganāga-
vallīdalaiḥ pūgaphalaiśca saṃyutam //
muktāsudhākhādirasārayuktaṃ
gṛhāṇa tāṃbūlamidaṃ rameśa

atha dakṣiṇā
nākapālavasupālamaulibhi-
rvaṃditāṃghriyugala prabho hare //
dakṣiṇāṃ parigṛhāṇa mādhava
lokadakṣa varadakṣiṇāya te

atha nīrājanam
prasphuratparamadīptimaṃgalaṃ
godhṛtāktanavapaṃcavartikam //
ārtikaṃ parigṛhāṇa cārtihan
puṇyakīrtiviśadīkṛtāvane

atha namaskāraḥ
namo'stvanaṃtāya sahasramūrtaye
sahasrapādākṣiśirorubāhave //
sahasranāmne puruṣāya śāśvate
sahasrakoṭīyugadhāriṇe namaḥ

atha pradakṣiṇā
samastatīrthayajñadānapūrtakādijaṃ phalam //
labhetparasya śāśvataṃ karoti yaḥ pradakṣiṇām

atha prārthanā
hare matsamaḥpātakī nāsti bhūmau
tathā tvatsamo nāsti pāpāpahārī //
iti tvaṃ ca matvā jagannātha deva
yathecchā bhavette tathā māṃ kuru tvam

atha stutiḥ
saṃjñānamātraṃ sadasatparaṃ maha-
cchaśvatpraśāṃtaṃ vibhavaṃ samaṃ mahat //
tvāṃ brahma vaṃde hi sudurgamaṃ paraṃ
sadā svadhāmnā paribhūtakaitavam

evaṃ saṃpūjya deveśamebhirmaṃtrairmahāmate //
praṇamya viṣṇuṃ sarvāṃgapūjāṃ kuryātprayat‍nataḥ

ॐ namo nārāyaṇāya puruṣāya mahātmane //
viśuddhasatvadhīsthāya mahāhaṃsāya dhīmahī

iti maṃtreṇa prāṇāyāmaṃ kṛtvā
ॐ viṣṇave madhusūdanāya vāmanāya trivikramāya
śrīdharāya hṛṣīkeśāya padmanābhāya dāmodarāya
saṃkarṣaṇāya vāsudevāya pradyumnāya aniruddhāya
adhokṣajāya puruṣottamāya śrīkṛṣṇāya namaḥ //
iti pādagulphajānūrukaṭyudarapṛṣṭhabhujākaṃdharakarṇa-
nāsikādharanetraśiraḥsu pṛthak pṛthak pūjayāmīti
sarvāṅgapūjāṃ kuryāt // tathā sakhīsakhaśaṃkhacakragadā-
padmāsidhanurbāṇahalamusalādīn tathā kaustubhavanamālā-
śrīvatsapītāṃbaranīlāṃbaravaṃśīvetrādīn tathā
tālāṃkagaruḍāṃkarathadārukasumatisārathigaruḍa-
kumudanaṃdasunaṃdacaṃḍamahābalakumudākṣādīn //
praṇavapūrveṇa caturthyantena namaḥsaṃyuktena nāmnā
tathā viṣvaksenaśivavidhidurgāvināyakadikpāla-
varuṇanavagrahamātṛkādīnmaṃtraiḥ pūjayet //
ॐ namo vāsudevāya namaḥ saṃkarṣaṇāya ca //
pradyumnāyāniruddhāya sātvatāṃ pataye namaḥ

iti maṃtreṇa śatamāhutīrjuhuyāt //
devaṃ pradakṣīṇīkṛtya mahābhogaṃ nidhāya ca //
praṇameddaṃḍavad‍bhūmau maṃtrametamudīrayet

dhyeyaṃ sadāparibhavaghnamabhīṣṭado'haṃ
tīrthāspadaṃ śivaviraṃcinutaṃ śaraṇyam //
bhṛtyārtihan praṇatapāla bhavābdhipotaṃ
vaṃde mahāpuruṣa te caraṇāraviṃdam

iti natvā hariM rājanpunarnīrājanaṃ hareḥ //
kārayedvidhivad‌bhakto haribhaktajanaiḥ saha

ghaṭīvādyaraṇad‍ghaṇṭākāṃsyavīṇādikīcakaiḥ //
karatālamṛdaṅgādyaiḥ kīrtanaṃ kārayed‍budhaḥ

nṛtyanti śrīhareragre bhaktā vai premavihvalāḥ //
jayadhvanisamāyuktāḥ satkathāgānatatparāḥ

punaḥ prabhuṃ namaskṛtya maṃdire tapanojjvale //
śayanaṃ kārayetsamyak śrīkṛṣṇasya mahātmanaḥ

evaṃ karoti śrīkṛṣṇasevāṃ yo lagnamānasaḥ //
praṇamaṃti ca taṃ rājandevatāḥ svargasaṃbhavāḥ

so'pi rājendra nāke'pi padaṃ dhṛtvā harerjanaḥ //
aṃte yāti paraṃ dhāma golokaṃ yogidurlabham

iti śrīkṛṣṇasevāyā vidhānaṃ varṇitaṃ mayā //
catuḥpadārthadaṃ nṝṇāṃ kiṃ bhūyaḥ śrotumicchasi

iti śrīgargasaṃhitāyāṃ vijñānakhaṃḍe śrīvyāsograsenasaṃvāde
śrīkṛṣṇasevāvidhānavarṇanaṃ nāma navamo'dhyāyaḥ