Garga Samhita · Chapter 8.9

balabhadrakhaṇḍaḥ - navamo'dhyāyaḥ
rāsakrīḍākathanam -
duryodhana uvāca -
muniśārdūla bhagavānbalabhadro nāgakanyābhi-
rgopībhiḥ kadā kāliṃdīkūle vijahāra

prāḍ‌vipāka uvāca -
ekadā dvārakānagarāddhitālāṃkaṃ rathamāsthāya surāndidṛkṣuḥ
paramutkaṃṭho nandarājagokulagogopālagopīgaṇasaṃkulaḥ
saṃkarṣaṇa āgataścirotkaṃṭhābhyāṃ nandarājayaśodābhyāṃ
pariṣvakto gopīgopālagobhirmilitvā
tatra dvau māsau vāsantikau cāvātsīt

atha ca yā nāgakanyāḥ pūrvoktāstā gopakanyā bhūtvā
balabhadraprāptyarthaṃ gargācāryād‌balabhadrapañcāṃgaṃ gṛhītvā tenaiva
siddhā babhūvuḥ // tābhirbaladeva ekadā prasannaḥ kālindīkūle
rāsamaṇḍalaṃ samārebhe // tadaiva caitrapūrṇimāyāṃ
pūrṇacandro'ruṇavarṇaḥ sampūrṇaṃ vanaṃ rañjayan vireje

śītalā mandayānāḥ kamalamakaraṃdareṇuvṛṃdasaṃvṛtāḥ
sarvato vāyavaḥ parivavuḥ // kaliṃdagirinandinī-
calallaharībhirānandadāyinī pulinaṃ vimalaṃ hyācitaṃ
cakāra // tathā ca kuñjaprāṃgaṇanikuñjapuñjaiḥ
sphurallalitapallavapuṣpaparāgairmayūrakokilapuṃskokila-
kūjitairmadhupamadhuradhvanibhirvrajabhūmirvibhrājamānā babhūva

tatra kvaṇad‌ghaṇṭikanūpuraḥ sphuranmaṇimayakaṭakakaṭisūtra-
keyūrahārakirīṭakuṃḍalayorupari kamalapatrairnīlāṃbaro
vimalakamalapatrākṣo yakṣībhiryakṣarāḍiva
gopībhirgoparāḍ‌rāsamaṇḍale reje

atha varuṇapreṣitā vāruṇī devī puṣpabhāragaṃdhalobhi-
miliṃdanāditavṛkṣakoṭarebhyaḥ pataṃtī sarvato vanaṃ
surabhīcakāra // tatpānamadavihvalaḥ kamalaviśālatāmrākṣo
makaradhvajāveśacalad‌dhuryyāṅgabhaṅgo vihārakhedaprasvedāṃbukaṇai-
rgalad‌gaṃḍasthalapatrabhaṅgo gajeṃdragatirgajendraśuṇḍādaṃḍasama-
dordaṃḍamaṇḍito gajībhirgajarājendra ivonmattaḥ siṃhāsane
nyastahalo musalapāṇiḥ koṭīṃdupūrṇamaṇḍalasaṃkāśaḥ
prod‌gamad‌rat‍namañjīrapracalanūpuraprakvaṇatkanakakiṃkiṇībhiḥ
kaṃkaṇasphurattāṭaṃkapuraṭahāraśrīkaṃṭhāṃgulīyaśiromaṇibhiḥ
praviḍaṃbinīkṛtasarpiṇīśyāmaveṇīkuntalalalita-
gaṃḍasthalapatrāvalibhiḥ sundarībhirbhagavān bhuvaneśvaro
vibhrājamāno virarāja atha ca reme

atha ha vāva kālindīkūlakāṃtāraparyaṭanavihāra-
pariśramodyatsvedabiṃduvyāptamukhāraviṃdaḥ snānārthaṃ
jalakrīḍārthaṃ yamunāṃ dūrātsa ājuhāva //
tatastvanāgatāṃ taṭinīṃ halāgreṇa kupito
vicakarṣa iti hovāca

adya māmavajñāya nāyāsi mayāhūtāpi musalena
tvāṃ kāmacāriṇīṃ śatadhā neṣya evaṃ nirbhartsitā sā
bhūribhītā yamunā cakitā tatpādayoḥ patitovāca

rāma rāma saṃkarṣaṇa balabhadra mahābāho tava paraṃ vikramaṃ
na jāne // yasyaikasminmūrdhni sarṣapavatsarvaṃ bhūkhaṇḍamaṇḍalaṃ
dṛśyate // tasya tava paramanubhāvamajānaṃtī prapannāṃ
māṃ bhoktuṃ yogyo'si // tvaṃ bhaktavatsalo'si

ityeva yācito balabhadro yamunāṃ tato vyamuñcatpunaḥ
kareṇubhiḥ karīva gopībhirgoparāḍ jale vijagāha //
punarjalādvinirgatya taṭasthāya balabhadrāya sahasā yamunā
copāyanaṃ nīlāṃbarāṇi hemarat‍namayabhūṣaṇāni divyāni
ca dadau ha vāva tāni gopīyūthāya pṛthak pṛthak vibhajya
svayaṃ nīlāṃbare vasitvā kāṃcanīṃ mālāṃ navarat‍namayīṃ
dhṛtvā maheṃdro vāraṇeṃdra iva balabhadro vireje

itthaṃ kauravendra yādavendrasya ramataḥ sarvā vāsantikīrniśā
vyatītā babhūvuḥ // bhagavato balabhadrasya hastināpuramiva
vīryaṃ sūcayatīva hyadyāpi ca kṛṣṭavartmanā yamunā vahati //
imāṃ rāmasya rāsakathāṃ yaḥ śrṛṇoti śrāvayati ca sa
sarvapāpapaṭalaṃ chitvā tasya parasparamānandapadaṃ pratiyāti //
kiṃ bhūya śrotumicchasi

iti śrīgargasaṃhitāyāṃ balabhadrakhaṇḍe prāḍ‌vipākaduryodhanasaṃvāde
rāmarāsakrīḍāvarṇanaṃ nāma navamo'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā