Garga Samhita · Chapter 8.8

balabhadrakhaṇḍaḥ - aṣṭamo'dhyāyaḥ
dvārakālīlāvarṇanam -
prāḍ‌vipāka uvāca
atha yuvarāja dhārtarāṣṭra tayordvārakālīlā saṃkṣepeṇa śṛṇutāt //
tataḥ kaṃsasya pārokṣyaṃ sauhṛdaṃ kurvataṃ samāgataṃ jarāsaṃdhaṃ jitvā
dvārakākhyaṃ samudre durgaṃ nirmāya tatraikarātreṇa jñātīnsamādhāya
mucakuṃdadṛśā kālaṃ ghātayitvā punaśca rāmakṛṣṇau
pravarṣaṇādrimetya tasmād‍dvārakāyāṃ jagmatuḥ

atha brahmalokātsamāgato raivataḥ sutāṃ rat‍nayutāṃ vidhivad‌balaśāline
balabhadrāya datvā tapaḥ kartuṃ badaryākhyaṃ vanaṃ gatavān

atha śrīkṛṣṇaḥ śatrūṇāṃ paśyatāṃ kuṃḍinapurād‌rukmiṇīṃ
jahāra tathā jāṃbavatīṃ satyabhāmāṃ kāliṃdīṃ mitraviṃdāṃ
nāgnijitīṃ bhadrāṃ lakṣmaṇāṃ ca bhaumaṃ hatvā
ṣoḍaśasahasraṃ śataṃ ca rājakanyā uvāha

rājan bhīṣmakakanyāyāṃ rukmiṇyāṃ śrīkṛṣṇasya
putraḥ prathamaṃ kāmadevāvatāraḥ pitṛsamasuṃdara āsīt //
tasmādaniruddhaḥ surajyeṣṭhāvatāro'bhūt

athaikadograsenarājasūyādhvare nāgavallīṃ gṛhītvā
digvijayārthī nirgataḥ pradyumno yādavairbhrātṛbhiḥ saha
jaṃbūdvīpe navakhaṇḍavijayaṃ kurvan kāmadughanadasamīpe
vasaṃtamālatīpurādhiśena pataṃgena gaṃdharvarājena yuyudhe

tatra gadāyuddhe gadāmādāya gado baladevānujo gadādharaṃ
svagadayā pataṅga tatāḍa // so'pi taṃ hṛdi caujasā
jaghānetthaṃ tayorgadāyuddhaṃ ghaṭikādvayaṃ babhūva// tataḥ
pataṃgagadāprahāreṇa gado yuddhe kṣaṇaṃ mūrcchāṃ jagāma

tadā hāhākāre jāte koṭimārtaṃḍasannibho balabhadra
āvirbhūtvā gaṃdharvāṇāṃ sarvaṃ balaṃ halāgreṇa samākṛṣya
tadupari kliṣṭamuśalatāḍanaṃ cakāra // tena yugapatsarvaṃ
sainyaṃ sabhaṭadviparathaṃ cūrṇībabhūva

atha pataṃgo'pi viratho bhayabhītastasmātpurīṃ gatvā
punaryoddhuṃ yādavaiḥ senāvyūhaṃ cakāra // tacchrutvā kruddho
balabhadro gaṃdharvāṇāṃ mahāpurīṃ śatayojanavistīrṇāṃ
vasaṃtamālatīnāmnīṃ sarvāṃ halena saṃvidārya sahasā
kāmadughe nade saṃkarṣaṇo vicakarṣa

atha ha vāva patitairgṛhairhāhākāre jāte tiryakpotamivāghūrṇāṃ
samastāṃ nagarīṃ vīkṣya gaṃdharvaigaṃdhaveśaḥ pataṃgaḥ kṛtāṃjalirdharṣito
viśvakarmakṛtānāṃ vimānānāṃ dvilakṣaṃ gajānāṃ caturlakṣaṃ
cāśvaśatārbudaṃ ca divyānāṃ rat‍nānāṃ bhāraṃ daśaśatārbudaṃ ca baliṃ
nītvā balaśāline balāya dattvā pradakṣiṇīkṛtya praṇanāma

atha tathā sāṃbamokṣārthaṃ balabhadra ihāgato bhavatāṃ paśyatāṃ
puramidaṃ halāgreṇa saṃvidārya śrīgaṃgāṃ sākṣātsaṃkarṣaṇo vicakarṣa //
tathaiva nāgakanyābhirgopībhirnirmite rāsamaṃḍale kālindiṃ halāgreṇa vicakarṣa

athaikadā dvivido nāma vānaraḥ sugrīvasacivo bhaumasakho nāradena prerito
hariṃ yoddhukāmo'vataradraivatakācalametya balena ghaṭikācatuṣṭayaṃ yuyudhe //
drumadaṇḍaśilāmuṣṭibhirvinighnantaṃ taṃ balabhadro musalena mūrdhni nijaghāna //
punarna mṛtaṃ muṣṭinā ghātayitvā palāyaṃtaṃ bhujadaṃḍābhyāṃ gṛhītvā
raivatakācalapṛṣṭhe pātayitvācyutāgrajo dṛḍhena muṣṭinā hṛdi taṃ tatāḍa //
tatpatanena saṭaṃkaḥ śaileṃdraḥ kamaṃḍaluriva cakaṃpe

atha ha vāva rājannadya bhavatāṃ pāṃḍavaiḥ saha yuddhodyamaṃ śrutvā
tīrthābhiṣekavyājena brāhmaṇairnāgaraiḥ sahitaḥ purādvinirgato
dvārakāṃ pradakṣiṇīkṛtya siddhāśramaprabhāsayoḥ snātvā paścimāyāṃ
diśi sarasvatīpratisrotaḥ saiṃdhavāraṇyajaṃbūmārgotpalāvartā-
rbudahemavaṃtasiṃdhūnupaspṛśya pṛthag‌biṃdusarastritakūpasudarśanātritauśanasāgneya-
vāyavasaudāsaguhatīrthaśrāddhadevādīni tīrthāni snātvottarasyāṃ diśi
kailāsakaravīramahāyogagaṇeśakauberaprāgjyotiṣaraṃgavallī-
sītārāmakṣetracaitradeśavasaṃtatilakādaśārṇabhadrākūrmatīrthapuṣpamālā-
citravanacaṃdrakāṃtānaiḥśreyasamanuparvatacakṣuḥkāmaśālinīkāmavanavedakṣetra-
sītāpṛthutīrtha-tapobhūmilīlāvatīvedanagaragāṃdharvaśakrabhīmarathī-
śrījāhnavīkāliṃdīharidvārakurukṣetramathurāpuṣkareṣu snātvā
punastasmācchāṃbhalaṃ saukaraṃ prāpya cānyāni kurvan
tīrthāni sākṣātsaṃkarṣaṇo naimiṣāraṇyaṃ jagāma

taṃ samāgataṃ vīkṣya śaunakādayo munayaḥ samutthāya vavaṃdire cārcayan

tatra vedavyāsaśiṣyaṃ romaharṣaṇamapratyutthāyinaṃ vīkṣya karasthena
kuśāgreṇa taṃ jaghāneti tadā hāhetivādino munīn vīkṣya lokapāvano'pi
lokasaṃgrahārtha dvādaśa māsān tīrthasnānena viśuddhaye mano dadhe

tatrelvalasuto balvalo nāma daitya upāvṛte parvaṇi
pāṃsuvarṣaṇapracaṃḍena vāyunā pūyaśoṇitaviṇmūtrasurāmāṃsadurgandhena
samāgataḥ khe dṛṣṭo'bhūt // atha lalajjihvaṃ vajrāṃgaṃ
bhinnakajjalāṃjanacayakṛṣṇaṃ taptatāmraśmaśrubhayaṃkaraṃ
brahmaśāṃtaye halāgreṇa samākṛṣya gaganānmusalena mūrdhni balabhadrastaṃ
tatāḍa // tattāḍanenākāśātso'pi kamaṃḍaluriva vyasuḥ papāta

atha prasannā munayo'pi rāmaṃ saṃstutyāvitathāśiṣaḥ
prayujya vṛtraghnaṃ vibudhā ivābhyaṣiṃcan tairabhyanujñātaḥ
sarayūkauśikīmānasasarovaragaṃḍakīgautamīṣu
snātvāyodhyānaṃdigrāmabarhiṣmatībrahmāvartādīnyupaspṛśya
tīrtharājaṃ prayāgaṃ jagāma // tatrāyutagajadānaṃ cakāra

tataścitrakūṭavindhyācalakāśīvipāśāśoṇamithilāgayādiṣu
snātvā gaṃgāsāgarasaṃgamaṃ jagāma // tatra suvarṇa śṛṅgāmbarasaṃyuktaṃ
pṛthak suvarṇarat‍nabhārasahitaṃ gavāṃ koṭiśataṃ brāhmaṇebhyaḥ prādāt //
tataḥ kramaśo dakṣiṇasyāṃ diśi mahendrādrisaptagodāvarīveṇīpaṃpābhīmarathī-
skaṃdakṣetraśrīśailarveṃkaṭakāṃcīkāverīśrīraṃgarṣabhādrisamudrasetukṛta-
mālātāmraparṇīmalayācalakulācaladakṣiṇasiṃdhuphālgunapaṃcāpsaro-
gokarṇaśūrpārakātāpīpayoṣṇīnirvindhyādaṇḍakarevā-
māhiṣmatyavaṃtikādīni tīrthāni sākṣātsaṃkarṣaṇaḥ kariṣyati sma //
tatastvatsahāyārthaṃ viśasane cāgamiṣyati

idaṃ balabhadracaritraṃ pavitraṃ sarvapāpābhiharaṇaṃ tīrthayātrāvarṇanaṃ nitarāṃ
mayā varṇitaṃ sarvamaṃgalakāraṇaṃ kauraveṃdra kiṃ bhūyaḥ śrotumicchasi

iti śrīgargasaṃhitāyāṃ balabhadrakhaṇḍe prāḍ‌vipākaduryodhanasaṃvāde
dvārakālīlāvarṇanaṃ nāmāṣṭamo'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā