Garga Samhita · Chapter 7.7

gurjarāṣṭra tathā cedideśa jayam
śrīnārada uvāca -
pradyumno'tha mahāvīryo jitvā māhiṣmatīpatim //
vikarṣanmahatīṃ senāṃ gurjarājaṃ samāyayau

gurjarasyādhipaṃ vīramṛṣyaṃ nāma mahābalam //
jagrāha senayā kārṣṇistuṃḍayāhiṃ yathāviraṭ

sadyastasmād‌baliṃ nītvā yādaveṃdro mahābalaḥ //
vikarṣanmahatīṃ senāṃ cedideśāṃstato yayau

damaghoṣaścedirājo vasudevasvasuḥ patiḥ //
śiśupālastasya putraḥ kṛṣṇaśatruḥ prakīrtitaḥ

ābhīyāya mahābuddhirdamaghoṣaṃ mahābalam //
natvā prāha mahābuddhimuddhavo buddhisattamaḥ

uddhava uvāca -
rājandehi baliṃ tasmā ugrasenāya bhūbhṛte //
vijitya nṛpatīn yo'sau rājasūyaṃ kariṣyati

śrīnārāda uvāca -
itthaṃ niśamya vacanaṃ damaghoṣasutaḥ khalaḥ //
sphuradoṣṭho manyuparaḥ prāhedaṃ sadasi tvaram

śiśupāla uvāca -
duratyayā kālagatiraho citramidaṃ jagat //
vidheḥ kālātmakasyāpi prājāpatye bhavetkaliḥ

kva rājahaṃsaḥ kākaḥ kva kva mūrkhaḥ kva ca paṃḍitaḥ //
bhṛtyā vijeṣyanti nṛpaṃ cakravartinamīśvaram

yayātiśāpādyadavo bhraṣṭarājyapadāḥ smṛtāḥ //
rājyaṃ svalpaṃ jalaṃ prāpya procchalaṃtyāpagā iva

avaṃśasaṃbhavo rājā mūrkhaputro hi paṃḍitaḥ //
nirdhanaśca dhanaṃ prāpya tṛṇavanmanyate jagat

ugrasenaḥ katidinai rājatvaṃ samupāgataḥ //
maṃtriṇā vāsudevena pūjitaḥ sa balānnṛpaḥ

tasya maṃtrī vāsudevo jarāsaṃdhabhayād‍drutam //
mathurāṃ svapurīṃ tyaktvā samudraṃ śaraṇaṃ gataḥ

ābhīrasyāpi nandasya pūrvaṃ putraḥ prakīrtitaḥ //
vasudevo manyate taṃ matputro'yaṃ gatatrapaḥ

vasudevād‌gauravarṇādayaṃ śyāmaḥ kuto'bhavat //
pitāmaho'pi gauraśca duḥkhahāsyamidaṃ vacaḥ

pradyumnaṃ tatsutaṃ jitvā sabalaṃ yādavaiḥ saha //
kuśasthalīṃ gamiṣyāmi mahīṃ kartumayādavīm

śrīnārada uvāca -
ityuktvā dhanurādāya tūṇau cākṣayasāyakau //
gaṃtumabhyudyataṃ vīkṣya cedirājastamabravīt

damaghoṣa uvāca -
śṛṇu putra pravakṣyāmi krodhaṃ mā kuru mā kuru //
akasmādācaretkāryaṃ na siddhiṃ viṃdate hyasau

dharmārthakāmamokṣāṇāṃ sādhanaṃ na kṣamāsamam //
tasmātsāma prakartavyaṃ sāmno na sadṛśaṃ sukham

dānena rājate sāma dānaṃ satkriyayā punaḥ //
satkriyāpi tathā yogyaṃ guṇaṃ saṃprekṣya rājate

yādavāścedipāścaiva jñātisaṃbaṃdhinaḥ smṛtāḥ //
cedipānāṃ ca vṛṣṇīnāṃ kaliṃ necchāmi tatvataḥ

śrīnārada uvāca -
śiśupālo bodhito'pi damaghoṣeṇa dhīmatā //
novāca kiñcidvimanāstūṣṇiṃbhūto mahākhalaḥ

śrutiśravāścediparājarājñī
svasā śubhā śūrasutasya rājan //
sametya putraṃ śiśupālasaṃjñaṃ
pratyāha samyagvinayānvitā sā

śrutiśravā uvāca -
mā putra khedaṃ kurutātkadāci-
nmābhūtkaliścedipayādavānām //
te mātulo'yaṃ kila śūrasūnu-
rbhrātā ca te tatsuta eva kṛṣṇaḥ //

tasyātmajā ye'tra samāgatāste
pradyumnamukhyāḥ śataśo mahāṃtaḥ //
saṃpūjanīyāśca mayā bhavad‌bhiḥ
saṃlālanīyā na hi yuddhayogyāḥ

ahaṃ gamiṣyāmi sahārdracittā
netuṃ tvayā tāta samāgatāṃstān //
drṣṭuṃ cirotkaṇṭhamanā mahotsavai-
rnaitādṛśo'yaṃ samayaḥ kadācit

śiśupāla uvāca -
mama śatrū rāmakṛṣṇau yadavaḥ śatravaśca me //
ghātayiṣyāmi tānsarvān yairahaṃ tu tiraskṛtaḥ

purā vai kuṃḍinapure yābhyāṃ me helanaṃ kṛtam //
vivāho varito me vai rāmakṛṣṇāvarī mama

yadi teṣāṃ yādavānāṃ yuvāṃ pakṣaṃ kariṣyathaḥ //
tadā tvāṃ saha pitrā ca nigṛhya nigaḍairdṛḍhaiḥ

kārāgāre kārayāmi kaṃsaḥ svapitarau yathā //
anyathā ced‌vadhiṣyāmi śapatho me tu durghaṭaḥ

śrīnārada uvāca -
tadvacaḥ paruṣaṃ śrutvā tūṣṇīṃ yāte'tha cedipe //
tadvacaḥ svabalaṃ prāpya prāha sarvaṃ yathoditam

vāhinī dhvajinī caiva pratimākṣauhiṇīyutā //
caturdhā śiśupālasya senā yuktā babhūva ha

bahulāśva uvāca -
vāhinyādyāśca yā senāstatsaṃkhyāṃ vada me prabho //
ṛṣayo hi prajānaṃti bhūtaṃ bhavyaṃ bhavatparam

śrīnārada uvāca -
śataṃ dvipānāṃ rathināṃ sahasraṃ śatasaṃyutam //
ayutaṃ turagāṇāṃ ca pattīnāṃ lakṣameva ca

senāyā lakṣaṇaṃ svalpaṃ dviguṇaṃ caturaṃgiṇī //
catuḥśataṃ dvipānāṃ ca rathānāmayutaṃ tathā

caturlakṣaṃ hayānāṃ ca pattīnāmekakoṭayaḥ //
lohakaṃcukasaṃyuktāḥ samarthabalavāhanāḥ

śastrāstrajñā yatra śūrā vāhinī sā budhaiḥ smṛtā //
vāhinyā dviguṇībhutā dhvajinī sā prakīrtitā

dhvajinyā dviguṇī jñeyā pṛtanāṃ kathitā purā //
sasāhaso'pi śūraḥ syātsāmaṃtaḥ śataśūrabhṛt

sāmantānāṃ śataṃ bibhratsa gajī kathito mṛdhe //
samare sārathiṃ cāśvān rathaṃ rakṣed‌rathī ca yaḥ

senāṃ rakṣiti yo bāṇaiḥ kathyate sa mahārathī //
svasenāṃ rakṣayañśatrūnsūdayan raṇamaṃḍale

yo'kṣauhiṇyā samaṃ yuddhyetsadā so'tirathī smṛtaḥ

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
gurjararāṣṭrācedideśagamanaṃ nāma saptamo'dhyāyaḥ