Garga Samhita · Chapter 7.29

hiraṇyakhaṇḍavijayam
śrī nārada uvāca -
pradyumno'tha mahābāhurjitvā''rāduttarānkurun //
hiraṇmayaṃ nāma khaṃḍaṃ jetuṃ kārṣṇirjagāma ha

yatra sīmāgirirdīrghaḥ sroto nāma sphuraddyutiḥ //
tatra kūrmo hariḥ sākṣādaryamā yasya deśikaḥ

puṣpamālānadītīre nāmnā citravanaṃ mahat //
sapuṣpaphalabhārāḍhyaṃ kandamūlanidhiḥ svataḥ

vānarāḥ saṃti tatrāpi vaṃśajā nalanīlayoḥ //
nyastāḥ śrīrāmacandreṇa tretāyāṃ maithileśvara

sainyaghoṣaṃ ca taṃ śrutvā yuddhakāmā vinirgatāḥ //
pradyumnasainye cotpeturbhrūbhaṃgaiḥ krodhamūrcchitāḥ

nakhairdaṃtaiśca lāṃgūlairgajānaśvānnarānnṛpa //
lāṃgūlaiśca rathānbadhvā cikṣipuścāṃbare balāt

vijayadhvajanāthasya vijayaścārjunasya ca //
rathaṃ baddhvātha lāṃgūle kecidutpeturaṃbare

kapidhvajadhvaje sākṣātkapīṃdro bhagavānprabhuḥ //
krodhāḍhyaḥ phālgunasakhaḥ samagraṃ sarvato diśam

lāṃgūlena ca tānbaddhvā pātayāmāsa bhūtale //
tadā praharṣitāḥ sarve jñātvā śrīrāmakiṃkarāḥ

nemustaṃ sarvato rājan kṛtāṃjalipuṭāḥ śanaiḥ //
kecidāliṃganaṃ cakruḥ kecidutpeturojasā

keciccucuṃburlāṃgūlaṃ kecitpādaṃ ca vānarāḥ //
tānāliṃgya mahāvīrāḥ spṛṣṭvā satpāṇinā punaḥ

datvā''śiṣaṃ tatkuśalaṃ papracchāthāṃjanīsutaḥ //
natvā taṃ vānarāḥ sarve jagmuścitravanaṃ nṛpa

hanumānarjunasyāpi dhvaje hyaṃtaradhīyata //
makarākhyāttato deśātpradyumno mīnaketanaḥ

yayau vṛṣṇivaraiḥ sārddhaṃ dundubhīn vādayanmuhuḥ //
makarasya gireḥ pārśve dundubhidhvanibhistataḥ

madhubhakṣyā madhukarāḥ koṭiśaḥ prothitāḥ kila //
tairdaṃśitaṃ balaṃ sarvaṃ hasticītkārasaṃyutam

tadā kārṣṇirmahābāhuḥ pavanāstraṃ samādadhe //
tad‌vātatāḍītā rājangatāste'pi diśo daśa

tatra deśe janā rājan sarve vai makarānanāḥ //
tatastu ḍiṃḍibho deśastatra hastimukhā janāḥ

evaṃ deśāṃstataḥ paśyaṃstriśṛṅgaviṣayāngataḥ //
kārṣṇirdadarśa tatrāpi manuṣyā śṛṅgadhāriṇaḥ

triśṛṅgasya gireḥ pārśve nagarīṃ svarṇacarcikām //
hemasaudhamayīṃ divyāṃ rat‍naprākāramaṃḍitām

hiraṇyavarṇaiḥ puruṣaiḥ strījanaiśca taḍiddyubhiḥ //
nāgaiśca nāgakanyābhiḥ purīṃ bhogavatīmiva

candrakāṃtānadītīre śobhitāṃ maṃgalālayām //
kārṣṇiḥ samāyayau rājan yathā śakro'marāvatīm

tatra rājā mahāvīro nāmnā devasakho balī //
sa manmukhād‌balaṃ śrutvā baliṃ nītvā hiraṇmayam

pradyumnaṃ pūjayāmāsa bhaktyā paramayā punaḥ //
taṃ papraccha mahābāhuḥ pradyumno bhagavānhariḥ

candravatte kathaṃ śobhā sarveṣāṃ ca vadāśu me //
devasakhā uvāca -
aryamṇā pitṛpatinā kūrmarūpasya māpateḥ

aṅghrīprakṣalitau tena vāriṇābhūnmahānadī //
śvetaparvataśṛṅgāccāvataraṃtī yadūttama

pramedhākhyo manusuto gopālo guruṇā kṛtaḥ //
jaghāna kapilāṃ rātrāvasitāṃ siṃhaśaṃkayā

vasiṣṭhena tadā śaptaḥ śūdratvaṃ samupāgataḥ //
kuṣṭhena pīḍitatanuḥ paryaṭaṃstīrthamācaran

asyāṃ nadyāṃ yadā snāto galatkuṣṭhānmanoḥ sutaḥ //
mukto'bhūccandravattasya dehaśobhā babhūva ha

candrakāṃtā nadī ceyaṃ prasiddhā'bhūddhiraṇmaye //
tasyāṃ mukto yataḥ snātvā galatkuṣṭhānmanoḥ sutaḥ

tataḥ snānaṃ ca kartāro vayaṃ sarve nṛpottama //
rūpeṇa candratulyāḥ kau bhavāmo'tra na saṃśayaḥ

śrīnārada uvāca -
iti śrutvā mahābāhu pradyumno yādavaiḥ saha //
candrakāṃtāṃ nadīṃ snātvā dadau dānānyanekaśaḥ

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
hiraṇmayakhaṃḍavijayo nāmaikonatriṃśo'dhyāyaḥ