Garga Samhita · Chapter 6.21

śrīnārada uvāca //
tṛtīyasyāpi durgasya pūrvadvāre mahābalaḥ //
rakṣatyaharniśaṃ rājanhanūmānaṃjanīsutaḥ

taṃ prekṣya bhagavadbhaktaṃ hanūmaṃtaṃ mahābalam //
jāyate bhagavadbhakto hanūmānaniva mānavaḥ

tathā vai dakṣiṇadvāraṃ cakraṃ nāma sudarśanam/
rakṣatyaharniśaṃ rājañchrīkṛṣṇa gatamānasam

tasya darśanamātreṇa bhavedbhakto hareḥ paraḥ //
bhaktasyāpi sadā rakṣāṃ karoti hi sudarśanam

tathā vai paścimaṃ dvāraṃ jāṃbavānṛkṣarāḍbalī //
rakṣatyaharniśaṃ rājanbhagavadbhaktisaṃyutaḥ

taṃ prekṣya bhagavadbhaktaṃ jāṃbavaṃtaṃ mahābalam //
cirajīvī harerbhakto bhavatīha ca mānavaḥ

tathā vai cottaraṃ dvāraṃ viṣvakseno mahābalaḥ //
rakṣatyaharniśaṃ rājañchrīkṛṣṇahṛdayo mahān

tasyadarśanamātreṇa naro yāti kṛtārthatām //
śṛṇu rājanbahirdurgāttīrthaṃ piṃḍārakaṃ smṛtam

piṃḍārakasya māhātmyaṃ śṛṇutādrājasattama //
yasya smaraṇamātreṇa mahāpāpātpramucyate

arthasiddheriva dvāra raivatādrisamudrayoḥ//
madhye piṃḍārakakṣetraṃ tīrthānāṃ tīrthamuttamum

kraturājaṃ rājasūyaṃ yadurājo mahābalaḥ //
cakāra yatra vaideha paripūrṇatamājñayā

sarvāṇi yatra tīrthāni samāhūtāni sarvataḥ //
nivāsaṃ cakrire rājannugrasena kratūttame

tena piṃḍārakaṃ nāma sarvatīrthasya piṃḍataḥ //
tatra snātvā naraḥ sadyo rājasūyaphalaṃ labhet

yatraiva tridinaṃ snātvā vratī bhūtvā samāhitaḥ //
brāhmaṇebhyaḥ svarṇadānaṃ dattvā yaḥ praṇato bhavet

ihaiva naradevaḥ syātsa mahātmā na saṃśayaḥ //
nityaṃ śṛṇoti satataṃ bandivadbhi yaśaḥsvayam

suvarṇaratnavastrādyaiḥ sucandravadanaiḥ paraiḥ //
strīsaṃghaiḥ sevito nityaṃ hṛṣṭapuṣṭo mahā balaḥ

ahorātraṃ pratāḍyate dvāri dundubhayo ghanāḥ//
karīdrāṇāṃ ca cītkārairaśvaheṣaissamanvitam

virājate rājasaṃghaiḥ prekṣayanprāṃgaṇājirama //
ratnaprāsādanicayaṃ dhvajamaṇḍalamaṃḍitam

mattakuñjarakarṇābhyāṃ tāḍitā bhṛgamaṇḍalī //
alaṃkaroti taddvāraṃ maṃḍitaṃ maṃḍaleśvaraiḥ // १९ /
piṃḍārakasnānamṛte kathaṃ rājyaṃ bhavediha //
ante mokṣaṃ kathaṃ yāti naraḥ pāpayutopi hi

piṃḍārakasnānamṛte na śarma piṃḍārakasnānamṛte na karma//
piṃḍāraka snānamṛte na dharmaḥ piṃḍārakasnānamṛte na varma

piṃḍārakasnānamṛte viyogī piṃḍārakasnānakaro viyogī //
piṃḍārakasnākaraḥ subhogī piṃḍāraka snānakaro na rogī

dvārāvatīṃ mādhavamāsamadhye pradakṣiṇīkṛtya namaskaroti //
sarvā ihāmutra ca siddhayopi vaideha tatpāṇitale bhavanti

tīrthāplutodhaḥśayanaḥśuciśca maunī vratī vāyavabhojanena//
ārabhya caitrī kila paurṇamāsī yo mādhavīmetya karoti yātrām

tatpuṇyasaṃkhyāṃ gadituṃ na śakyaścaturmukho vedamayo vidhātā//
yo meghadhārāṃ gaṇayetkadācitkālena puṇyāni na kṛṣṇapuryāḥ //

yathā tithīnāṃ harivāsaraṃ ca yathāhi śeṣo phaṇināṃ phaṇīndraḥ //
yathā garutmāndivi pakṣiṇāṃ ca yathā purāṇeṣu ca bhārataṃ ca

yathā hi deveṣu ca devadevaḥ śrī vāsudevo yadudevadevaḥ //
tathā purī kṣetrasamastamadhye dvārāvatī puṇyavatī praśastā

ahoti dhanyā yadumaṃḍalībhirvirājate bhūmitale manoharā //
vaikuṇṭhalīlādhikṛtā kuśasthalī yathā taḍidbhirjaladāvalirdivi

yatraiva sākṣātpuruṣaḥ pareśvaro dhṛtvā caturvyūhamalaṃ virājate//
yastūgrasenāya dadau nṛpeśatāṃ kṛṣṇāya tasmai haraye namonamaḥ

yadā svalokaṃ bhagavāngamiṣyati saṃplāvayiṣyatyatha tāṃ tadārṇave//
vaidehadivyaṃ harimaṃdiraṃ vinā tasminnivāsaṃ bhagavānkariṣyati

śṛṇvaṃti tatraiva kalau jaladhvaniṃ kṛṣṇoktamitthaṃ sasataṃ dinedine //
bhavedavidyo yadi vā savidyo yo brāhmaṇo vai sa tu māmakī tanuḥ

bhūtvātha viprobdhitaṭādagādhaṃ gatvā gṛhītvā pratimāṃ parasya//
kṛtvā pratiṃṣṭhāṃ ca vidhāya saudhaṃ kariṣyate sthāpanamarka eṣaḥ

śrīdvārakānāthamiti svarūpaṃ paśyaṃti ye bhaktajanāḥ kalau yuge//
gacchaṃti te viṣṇupadaṃ nṛdeva yogīśvarāṇāmapi durlabhaṃ yat

idaṃ mayā te kathitaṃ nṛdeva māhātmyametatkila kṛṣṇapuryāḥ //
śṛṇoti yaḥ śrāvayate ca bhaktyā śrīdvārakāvāsaphalaṃ labhetsaḥ

śrīdvārakāyā nṛpakhaṇḍametanmayā tavāgre kathitaṃ supuṇyam//
kīrtikulaṃbhaktimatīva muktiṃ dadāti rājyaṃ ca sadaiva śṛṇvatām

iti śrīmadgargasahitāyāṃ śrīdvārakākhaṇḍe nāradabahulāśvasaṃvāde tṛtīyadurge piṃḍāraka māhātmyaṃnāmekaviṃśo'dhyāyaḥ //
iti śrīdvārakākhaṃḍaḥ samāptaḥ //
vargaḥ :garga saṃhitā