ગર્ગસંહિતા · અધ્યાય 6.21

શ્રીનારદ ઉવાચ ॥
તૃતીયસ્યાપિ દુર્ગસ્ય પૂર્વદ્વારે મહાબલઃ ॥
રક્ષત્યહર્નિશં રાજન્હનૂમાનંજનીસુતઃ

તં પ્રેક્ષ્ય ભગવદ્ભક્તં હનૂમંતં મહાબલમ્ ॥
જાયતે ભગવદ્ભક્તો હનૂમાનનિવ માનવઃ

તથા વૈ દક્ષિણદ્વારં ચક્રં નામ સુદર્શનમ્।
રક્ષત્યહર્નિશં રાજઞ્છ્રીકૃષ્ણ ગતમાનસમ્

તસ્ય દર્શનમાત્રેણ ભવેદ્ભક્તો હરેઃ પરઃ ॥
ભક્તસ્યાપિ સદા રક્ષાં કરોતિ હિ સુદર્શનમ્

તથા વૈ પશ્ચિમં દ્વારં જાંબવાનૃક્ષરાડ્બલી ॥
રક્ષત્યહર્નિશં રાજન્ભગવદ્ભક્તિસંયુતઃ

તં પ્રેક્ષ્ય ભગવદ્ભક્તં જાંબવંતં મહાબલમ્ ॥
ચિરજીવી હરેર્ભક્તો ભવતીહ ચ માનવઃ

તથા વૈ ચોત્તરં દ્વારં વિષ્વક્સેનો મહાબલઃ ॥
રક્ષત્યહર્નિશં રાજઞ્છ્રીકૃષ્ણહૃદયો મહાન્

તસ્યદર્શનમાત્રેણ નરો યાતિ કૃતાર્થતામ્ ॥
શૃણુ રાજન્બહિર્દુર્ગાત્તીર્થં પિંડારકં સ્મૃતમ્

પિંડારકસ્ય માહાત્મ્યં શૃણુતાદ્રાજસત્તમ ॥
યસ્ય સ્મરણમાત્રેણ મહાપાપાત્પ્રમુચ્યતે

અર્થસિદ્ધેરિવ દ્વાર રૈવતાદ્રિસમુદ્રયોઃ॥
મધ્યે પિંડારકક્ષેત્રં તીર્થાનાં તીર્થમુત્તમુમ્

ક્રતુરાજં રાજસૂયં યદુરાજો મહાબલઃ ॥
ચકાર યત્ર વૈદેહ પરિપૂર્ણતમાજ્ઞયા

સર્વાણિ યત્ર તીર્થાનિ સમાહૂતાનિ સર્વતઃ ॥
નિવાસં ચક્રિરે રાજન્નુગ્રસેન ક્રતૂત્તમે

તેન પિંડારકં નામ સર્વતીર્થસ્ય પિંડતઃ ॥
તત્ર સ્નાત્વા નરઃ સદ્યો રાજસૂયફલં લભેત્

યત્રૈવ ત્રિદિનં સ્નાત્વા વ્રતી ભૂત્વા સમાહિતઃ ॥
બ્રાહ્મણેભ્યઃ સ્વર્ણદાનં દત્ત્વા યઃ પ્રણતો ભવેત્

ઇહૈવ નરદેવઃ સ્યાત્સ મહાત્મા ન સંશયઃ ॥
નિત્યં શૃણોતિ સતતં બન્દિવદ્ભિ યશઃસ્વયમ્

સુવર્ણરત્નવસ્ત્રાદ્યૈઃ સુચન્દ્રવદનૈઃ પરૈઃ ॥
સ્ત્રીસંઘૈઃ સેવિતો નિત્યં હૃષ્ટપુષ્ટો મહા બલઃ

અહોરાત્રં પ્રતાડ્યતે દ્વારિ દુન્દુભયો ઘનાઃ॥
કરીદ્રાણાં ચ ચીત્કારૈરશ્વહેષૈસ્સમન્વિતમ્

વિરાજતે રાજસંઘૈઃ પ્રેક્ષયન્પ્રાંગણાજિરમ ॥
રત્નપ્રાસાદનિચયં ધ્વજમણ્ડલમંડિતમ્

મત્તકુઞ્જરકર્ણાભ્યાં તાડિતા ભૃગમણ્ડલી ॥
અલંકરોતિ તદ્દ્વારં મંડિતં મંડલેશ્વરૈઃ ॥ ૧૯ ।
પિંડારકસ્નાનમૃતે કથં રાજ્યં ભવેદિહ ॥
અન્તે મોક્ષં કથં યાતિ નરઃ પાપયુતોપિ હિ

પિંડારકસ્નાનમૃતે ન શર્મ પિંડારકસ્નાનમૃતે ન કર્મ॥
પિંડારક સ્નાનમૃતે ન ધર્મઃ પિંડારકસ્નાનમૃતે ન વર્મ

પિંડારકસ્નાનમૃતે વિયોગી પિંડારકસ્નાનકરો વિયોગી ॥
પિંડારકસ્નાકરઃ સુભોગી પિંડારક સ્નાનકરો ન રોગી

દ્વારાવતીં માધવમાસમધ્યે પ્રદક્ષિણીકૃત્ય નમસ્કરોતિ ॥
સર્વા ઇહામુત્ર ચ સિદ્ધયોપિ વૈદેહ તત્પાણિતલે ભવન્તિ

તીર્થાપ્લુતોધઃશયનઃશુચિશ્ચ મૌની વ્રતી વાયવભોજનેન॥
આરભ્ય ચૈત્રી કિલ પૌર્ણમાસી યો માધવીમેત્ય કરોતિ યાત્રામ્

તત્પુણ્યસંખ્યાં ગદિતું ન શક્યશ્ચતુર્મુખો વેદમયો વિધાતા॥
યો મેઘધારાં ગણયેત્કદાચિત્કાલેન પુણ્યાનિ ન કૃષ્ણપુર્યાઃ ॥

યથા તિથીનાં હરિવાસરં ચ યથાહિ શેષો ફણિનાં ફણીન્દ્રઃ ॥
યથા ગરુત્માન્દિવિ પક્ષિણાં ચ યથા પુરાણેષુ ચ ભારતં ચ

યથા હિ દેવેષુ ચ દેવદેવઃ શ્રી વાસુદેવો યદુદેવદેવઃ ॥
તથા પુરી ક્ષેત્રસમસ્તમધ્યે દ્વારાવતી પુણ્યવતી પ્રશસ્તા

અહોતિ ધન્યા યદુમંડલીભિર્વિરાજતે ભૂમિતલે મનોહરા ॥
વૈકુણ્ઠલીલાધિકૃતા કુશસ્થલી યથા તડિદ્ભિર્જલદાવલિર્દિવિ

યત્રૈવ સાક્ષાત્પુરુષઃ પરેશ્વરો ધૃત્વા ચતુર્વ્યૂહમલં વિરાજતે॥
યસ્તૂગ્રસેનાય દદૌ નૃપેશતાં કૃષ્ણાય તસ્મૈ હરયે નમોનમઃ

યદા સ્વલોકં ભગવાન્ગમિષ્યતિ સંપ્લાવયિષ્યત્યથ તાં તદાર્ણવે॥
વૈદેહદિવ્યં હરિમંદિરં વિના તસ્મિન્નિવાસં ભગવાન્કરિષ્યતિ

શૃણ્વંતિ તત્રૈવ કલૌ જલધ્વનિં કૃષ્ણોક્તમિત્થં સસતં દિનેદિને ॥
ભવેદવિદ્યો યદિ વા સવિદ્યો યો બ્રાહ્મણો વૈ સ તુ મામકી તનુઃ

ભૂત્વાથ વિપ્રોબ્ધિતટાદગાધં ગત્વા ગૃહીત્વા પ્રતિમાં પરસ્ય॥
કૃત્વા પ્રતિંષ્ઠાં ચ વિધાય સૌધં કરિષ્યતે સ્થાપનમર્ક એષઃ

શ્રીદ્વારકાનાથમિતિ સ્વરૂપં પશ્યંતિ યે ભક્તજનાઃ કલૌ યુગે॥
ગચ્છંતિ તે વિષ્ણુપદં નૃદેવ યોગીશ્વરાણામપિ દુર્લભં યત્

ઇદં મયા તે કથિતં નૃદેવ માહાત્મ્યમેતત્કિલ કૃષ્ણપુર્યાઃ ॥
શૃણોતિ યઃ શ્રાવયતે ચ ભક્ત્યા શ્રીદ્વારકાવાસફલં લભેત્સઃ

શ્રીદ્વારકાયા નૃપખણ્ડમેતન્મયા તવાગ્રે કથિતં સુપુણ્યમ્॥
કીર્તિકુલંભક્તિમતીવ મુક્તિં દદાતિ રાજ્યં ચ સદૈવ શૃણ્વતામ્

ઇતિ શ્રીમદ્ગર્ગસહિતાયાં શ્રીદ્વારકાખણ્ડે નારદબહુલાશ્વસંવાદે તૃતીયદુર્ગે પિંડારક માહાત્મ્યંનામેકવિંશોઽધ્યાયઃ ॥
ઇતિ શ્રીદ્વારકાખંડઃ સમાપ્તઃ ॥
વર્ગઃ :ગર્ગ સંહિતા