Garga Samhita · Chapter 6.1

śrīgaṇeśāya namaḥ //
atha dvārakākhaṇḍaḥ//
kṛṣṇāya vāsudevāya devakīnandanāya ca //
nandagopakumārāya goviṃdāya namonamaḥ

bahulāśva uvāca//
śrutaṃ tavamukhādbrahmanmathurākhaṇḍamadbhutam //
vada māṃ dvārakākhaṇḍaṃ śrīkṛṣṇacaritāmṛtam

vivāhāḥ katiputrāśca kati pautrā ramāpateḥ //
sarvaṃ vada mahābuddhe dvārakāvāsakāraṇam

śrīnārada uvāca //
astiprāptī mahiṣyau dve mṛte kaṃse mahābale //
jarāsandhagṛhaṃ duḥkhājjagmaturmaithileśvara

tanmukhātkaṃsamaraṇaṃ śrutvā kruddho jarāsutaḥ //
ayādavīṃ mahīṃ kartumudyatobhūnmahābalaḥ

akṣauhiṇībhirviṃśatyā tisṛbhiścāpi saṃvṛtaḥ //
ramyāṃ madhupurīṃ rājannāyayau balavānnṛpaḥ

bhayāturāṃ purīṃ vīkṣya tatsenāṃ siṃdhunādinīm //
sabhāyāṃ bhagavānsākṣādbaladevamuvāca ha

sarvaṃ cāsya balaṃ rāma haṃtavyaṃ vai na saṃśayaḥ //
māgadhastu na haṃtavyo bhūyaḥ kartā balodyamam

jarāsaṃdhanimittena bhāraṃ vai bhūbhujāṃ bhuvaḥ //
sarvaṃ cātra hariṣyāmi kariṣyāmi priyaṃ satām

evaṃ vadati kṛṣṇe vai vaikuṇṭhācca rathau śubhau //
abhūtāmāgatau rājansarveṣāṃ paśyatāṃ ca tau

samāruhya ratho sadyo rāmakṛṣṇau mahābalau //
yādavānāṃ balaiḥ sūkṣmaistvaraṃ nijagmatuḥ purāt

yādavānāṃ māgadhānāṃ paśyadbhirdivijairdivi //
babhūva tumulaṃ yuddhamadbhutaṃ romaharṣaṇam

akṣauhiṇībhirdaśabhī rathārūḍho mahābalaḥ //
śrīkṛṣṇasya puraḥ pūrvaṃ yuddhe māgadheśvaraḥ

paṃcabhiścākṣauhiṇībhi dhārtarāṣṭraḥ suyodhanaḥ //
tisṛbhiśca mahāyuddhe vaṃganātho mahābalaḥ /
yuyodha yādavaiḥ sārddhaṃ jarāsaṃdhasahāyakṛt

paṃcabhiśca tathā rājanviṃdhyadeśādhipo balī // / १५ //
evamanyepi rājāno jarāsandhavaśānugāḥ //
prāṇaiḥ sāhāyyaṃ kurvaṃto jarāsaṃdhasya maithila

bāṇāṃdhakāre saṃjāte śatrusenāsamākule //
ṭaṃkāraṃ śārṅga dhanuṣaḥ śārṅgadhanvā cakāra ha

nanāda tena brahmāṃḍaṃ saptalokairbilaiḥ saha //
vicelurdiggajāstārā rājadbhūkhaṇḍamaṇḍalam

tadaiva badhirībhūtaṃ śatrūṇāṃ sainyamaṇḍalam //
utpataṃto hayā yuddhādgajāstu vimukhāstataḥ

dudrāva tadbalaṃ sarvaṃ ṭaṃkārādbhayavihvalam //
pratīpametya gavyūtiḥ punastatrā- jagāma ha

evaṃ śārṅga samuccārya taḍitpiṃgasphuratprabham //
bāṇaughaiśchādayāmāsa jarāsaṃdhabalaṃ hariḥ

cūrṇībhūtā rathā rājanbāṇaughaiḥ śārṅgadhanvanaḥ //
cūrṇacakrānipetuḥ kau hata sūtāśca nāyakāḥ

dvidhābhūtā gajā bāṇaiścalitā gajibhiḥ saha //
sāśvavāhāstathāśvāśca bāṇaiḥ saṃcchinnakaṃdharāḥ

tathā vīrā mahāyuddhe bhinnoraśchinnamastakāḥ //
viśīrṇakavacāḥ peturbāṇaughaiśchinnasaṃśayāḥ

adhomukhā ūrdhvamukhā- śchinnadehā nṛpātmajāḥ //
rejū raṇāṃgaṇe rājanbhāṃḍabyūhā ivāhatāḥ

kṣaṇamātreṇa tadyuddhe śatakrośavilaṃbitā //
āpagābhūnmahādurgā rudhirasrāva- saṃbhavā

dvipagrāhācoṣṭrakharakabandhāścādikacchapā //
śiśumārarathākeśaśaivālābhujasarpiṇī

karamīnā mauliratnahārakuṇḍala śarkarā //
śastraśuktiśchatraśaṃkhā cāmaradhvajasaikatā

rathāṃgāvartasaṃyuktā senādvayataṭāvṛtā //
śatayojanavistīrṇā babhau vaitaraṇī yathā

pramathā bhairavā bhūtā vetālā yoginīgaṇāḥ //
aṭṭahāsaṃ prakurvaṃto nṛtyato raṇamaṇḍale

pibaṃto rudhiraṃ śaśvatkapālena nṛpeśvara //
harasya muṇḍamālārthaṃ jagṛhuste śirāṃsi ca

siṃhārūḍhā bhadrakālī ḍākinīśatasaṃvṛtā //
pibaṃtī rudhiraṃ coṣṇaṃ sāṭṭahāsaṃ cakāra ha

vidyādharyaśca svargasthā gandharvyopsarasastathā //
kṣātradharmasthitānvīrānvavrire devarūpiṇaḥ

gṛhītvā tānkalirabhūttāsāṃ patyarthamaṃbare //
mamānurūpā neme ca iti tadgatacetasām

kecidvīrā dharmaparā raṇaraṃgānna cālitāḥ //
yayurviṣṇupadaṃ divyaṃ bhittvā mārtaṃḍamaṇḍalam

śeṣaṃ balaṃ samākṛṣya baladevo halena vai //
muśalenāhanatkuddhastrailokyabaladhārakaḥ

evaṃ sainye kṣayaṃ jāte jarāsaṃdhasya sarvataḥ //
suyodhano viṃdhyanātho vaṃganāthastathaiva ca

sarve vidudruvuryuddhādbhayabhītā itastataḥ //
jarāsandho mahāvīryo nāgāyutasamo bale

rathenāgatavānrājanbaladevasya saṃmukhe //
samākṛṣya halāgreṇa jarāsaṃdharathaṃ śubham

cūrṇayāmāsa sahasā muśalena yadūttamaḥ //
jarāsaṃdhopi viratho hatāśvo hatasārathiḥ

jagrāha balinandorbhyāṃ saṃtyaktaśastrasaṃhatiḥ //
tayoryuddhamabhūdghoraṃ bāhubhyāṃ raṇa maṇḍale

paśyatāṃ divadevānāṃ narāṇāṃ bhuvi maithila //
urasā śirasā caiva bāhubhyāṃ pādayoḥ pṛthak

yuyudhāte mallayuddhe siṃhāviva mahābalau//
tayośca yuddhyatoḥ sarvaṃ kṣuṇṇaṃ bhūkhaṇḍamaṃḍalam

sthālīva sahasā rājaṃścakaṃpe ghaṭikādvayam //
gṛhītvābhujadaṇḍābhyāṃ jarāsaṃdhaṃ yadūttamaḥ

bhūpṛṣṭhe pātayāmāsa kamaṃḍalumivārbhakaḥ //
rāmastadupari sthitvā haṃtuṃ śatruṃ jarāsutam

jagrāha musalaṃ ghoraṃ krodhapūritavigrahaḥ //
paripūrṇatamenātha śrīkṛṣṇena mahātmanā

nivāritastadaivāśu taṃ mumoca yadūttamaḥ //
tapase kṛtasaṃkalpo vrīḍitopi jarāsutaḥ

nivārito maṃtrimukhyairmāgadhānmāgadho yayau //
itthaṃ jitvā jarāsaṃdhaṃ mādhavo madhusūdanaḥ

āyodhanagataṃ vittaṃ sarvaṃ nītvā sukhāvaham //
yādavānagrataḥ kṛtvā baladevasamanvitaḥ

upagīyamānavijayaḥ sūtamāgadhabaṃdibhiḥ//
śaṃkhaduṃdubhinādena brahmaghoṣeṇa bhūyasā

viveśa mathurāṃ sākṣātparipūrṇatamaḥ svayam

samarcito maṃgalalājapuṣpaiḥ paśyanpurīṃ maṃgalakuṃbha yuktām //
pītāṃbaraḥ śyāmatanuḥ śubhāṃgaḥ sphuratkirīṭāṃgadakuṇḍalaprabhaḥ

śārṅgādi śastrāstradharo hasanmukhastālāṃkayukto garuḍadhvajassvayam// udyadvilolāśvarathaḥ surārcitaḥ sametya rājānamasau baliṃ dadau

iti śrīmadgargasaṃhitāyāṃ śrīdvārakākhaṇḍe nāradabahulāśvasaṃvāde jarāsandhaparājayo nāma prathamodhyāyaḥ