Garga Samhita · Chapter 4.13

mādhuryakhaṇḍaḥ - trayodaśo'dhyāyaḥ
devanārīrūpā-sakhīgaṇopākhyānam -
śrīnārada uvāca -
atha devāṃganānāṃ ca gopīnāṃ varṇanaṃ śṛṇu /
catuṣpadārthadaṃ nṝṇāṃ bhaktivardhanamuttamam

babhūva mālave deśe gopo nando divaspatiḥ /
bhāryāsahasrasaṃyukto dhanavān nītimānparaḥ

tīrthayātrāprasaṃgena mathurāyāṃ samāgataḥ /
nandarājaṃ vrajādhīśaṃ śrutvā śrīgokulaṃ yayau

militvā goparājaṃ sa dṛṣṭvā vṛndāvanaśriyam /
nandarājājñayā tatra vāsaṃ cakre mahāmanāḥ

yojanadvayamāśritya ghoṣaṃ cakre gavāṃ punaḥ /
mudaṃ prāpa vraje rājan jñātibhiḥ sa divaspatiḥ

tasya devalavākyena sarvā devajanastriyaḥ /
jātāḥ kanyā mahādivyā jvaladagniśikhopamāḥ

śrīkṛṣṇaṃ sundaraṃ dṛṣṭvā mohitāḥ kanyakāśca tāḥ /
dāmodarasya prāptyarthaṃ cakrurmāghavrataṃ param

ardhodaye'rke yamunāṃ nityaṃ snātvā vrajāṃganāḥ /
uccairjaguḥ kṛṣṇalīlāṃ premānandasamākulāḥ

tāsāṃ prasannaḥ śrīkṛṣṇo varaṃ brūhītyuvāca ha /
tā ūcustaṃ paraṃ natvā kṛtāñjalipuṭāḥ śanaiḥ

gopya ūcuḥ -
yogīśvarāṇāṃ kila durlabhastvaṃ
sarveśvaraḥ kāraṇakāraṇo'si /
tvaṃ netragāmī bhavatātsadā no
vaṃśīdharo manmathamanmathāṃgaḥ

tathā'stu coktvā harirādidevaḥ
tāsāṃ tu yo darśanamātatāna /
bhūyātsadā te hṛdi netramārge
tathā sa āhūta ivāśu citte

paripūrṇatamaḥ sākṣācchrīkṛṣṇo nānya eva hi /
ekakāryārthamāgatya koṭikāryaṃ cakāra ha

parikarīkṛtapītapaṭaṃ hariṃ
śikhikirīṭanatīkṛtakaṃdharam /
lakuṭaveṇukaraṃ calakuṃḍalaṃ
paṭutaraṃ nataveṣadharaṃ bhaje

bhaktyaiva vaśyo harirādidevaḥ
sadā pramāṇaṃ kila cātra gopyaḥ /
sāṃkhyaṃ ca yogaṃ na kṛtaṃ kadāpi
premṇaiva yasya prakṛtiṃ gatāḥ syuḥ

iti śrīgargasaṃhitāyāṃ mādhuryakhaṇḍe śrīnāradabahulāśvasaṃvāde
devajanastrī upākhyānaṃ nāma trayodaśo'dhyāyaḥ

hariḥ ॐ tatsacchrīkṛṣṇārpaṇamastu //
vargaḥ :garga saṃhitā