ગર્ગસંહિતા · અધ્યાય 4.13

માધુર્યખણ્ડઃ - ત્રયોદશોઽધ્યાયઃ
દેવનારીરૂપા-સખીગણોપાખ્યાનમ્ -
શ્રીનારદ ઉવાચ -
અથ દેવાંગનાનાં ચ ગોપીનાં વર્ણનં શૃણુ ।
ચતુષ્પદાર્થદં નૄણાં ભક્તિવર્ધનમુત્તમમ્

બભૂવ માલવે દેશે ગોપો નન્દો દિવસ્પતિઃ ।
ભાર્યાસહસ્રસંયુક્તો ધનવાન્ નીતિમાન્પરઃ

તીર્થયાત્રાપ્રસંગેન મથુરાયાં સમાગતઃ ।
નન્દરાજં વ્રજાધીશં શ્રુત્વા શ્રીગોકુલં યયૌ

મિલિત્વા ગોપરાજં સ દૃષ્ટ્વા વૃન્દાવનશ્રિયમ્ ।
નન્દરાજાજ્ઞયા તત્ર વાસં ચક્રે મહામનાઃ

યોજનદ્વયમાશ્રિત્ય ઘોષં ચક્રે ગવાં પુનઃ ।
મુદં પ્રાપ વ્રજે રાજન્ જ્ઞાતિભિઃ સ દિવસ્પતિઃ

તસ્ય દેવલવાક્યેન સર્વા દેવજનસ્ત્રિયઃ ।
જાતાઃ કન્યા મહાદિવ્યા જ્વલદગ્નિશિખોપમાઃ

શ્રીકૃષ્ણં સુન્દરં દૃષ્ટ્વા મોહિતાઃ કન્યકાશ્ચ તાઃ ।
દામોદરસ્ય પ્રાપ્ત્યર્થં ચક્રુર્માઘવ્રતં પરમ્

અર્ધોદયેઽર્કે યમુનાં નિત્યં સ્નાત્વા વ્રજાંગનાઃ ।
ઉચ્ચૈર્જગુઃ કૃષ્ણલીલાં પ્રેમાનન્દસમાકુલાઃ

તાસાં પ્રસન્નઃ શ્રીકૃષ્ણો વરં બ્રૂહીત્યુવાચ હ ।
તા ઊચુસ્તં પરં નત્વા કૃતાઞ્જલિપુટાઃ શનૈઃ

ગોપ્ય ઊચુઃ -
યોગીશ્વરાણાં કિલ દુર્લભસ્ત્વં
સર્વેશ્વરઃ કારણકારણોઽસિ ।
ત્વં નેત્રગામી ભવતાત્સદા નો
વંશીધરો મન્મથમન્મથાંગઃ

તથાઽસ્તુ ચોક્ત્વા હરિરાદિદેવઃ
તાસાં તુ યો દર્શનમાતતાન ।
ભૂયાત્સદા તે હૃદિ નેત્રમાર્ગે
તથા સ આહૂત ઇવાશુ ચિત્તે

પરિપૂર્ણતમઃ સાક્ષાચ્છ્રીકૃષ્ણો નાન્ય એવ હિ ।
એકકાર્યાર્થમાગત્ય કોટિકાર્યં ચકાર હ

પરિકરીકૃતપીતપટં હરિં
શિખિકિરીટનતીકૃતકંધરમ્ ।
લકુટવેણુકરં ચલકુંડલં
પટુતરં નતવેષધરં ભજે

ભક્ત્યૈવ વશ્યો હરિરાદિદેવઃ
સદા પ્રમાણં કિલ ચાત્ર ગોપ્યઃ ।
સાંખ્યં ચ યોગં ન કૃતં કદાપિ
પ્રેમ્ણૈવ યસ્ય પ્રકૃતિં ગતાઃ સ્યુઃ

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
દેવજનસ્ત્રી ઉપાખ્યાનં નામ ત્રયોદશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા