Garga Samhita · Chapter 2.21

rāsakrīḍā varṇanam -
śrīnārada uvāca -
itthaṃ kuṃdavane ramye mālatīnāṃ vane śubhe /
āmrāṇāṃ nāgaraṃgāṇāṃ niṃbūnāṃ saghane vane

dāḍimīnāṃ ca drākṣāṇāṃ badāmānāṃ vane nṛpa /
kadambānāṃ śrīphalānāṃ kuṭajānāṃ tathaiva ca

vaṭānāṃ panasānāṃ ca pippalānāṃ vane śubhe /
tulasīkovidārāṇāṃ ketakīkadalīvane

karillakuñjabakulamandārāṇāṃ vane hariḥ /
carankāmavanaṃ prāgād‌rājan vrajavadhūvṛtaḥ

tatraiva parvate kṛṣṇo nanāda muralī kalam /
mūrcchitā vihvalā jātāstannādena vrajāṃganāḥ

manojabāṇabhinnāṃgāḥ ślathannīvyaḥ suraiḥ saha /
kaśmalaṃ prayayū rājan vimāneṣvamarāṃganāḥ

caturvidhā jīvasaṃghāḥ sthāvarairmohamāsthitāḥ /
nadyo nadāḥ sthirībhūtāḥ parvatā dravatāṃ gatāḥ

tatpādacihnasaṃyukto giriḥ kāmavane'bhavat /
tasya darśanamātreṇa naro yāti kṛtārthatām

atha gopīgaṇaiḥ sākaṃ śrīkṛṣṇo rādhikāpatiḥ /
naṃdīśvarabṛhatsānutaṭe rāsaṃ cakāra ha /
tatra gopyo'timāninyo babhūvurmaithileśvara /
tāstyaktvā rādhayā sārdhaṃ tatraivāntardadhe hariḥ

gopyaśca sarvā virahāturā bhṛśaṃ
kṛṣṇaṃ vinā maithila nirjane vane /
tā babhramuścāśrukalākulākṣyo
yathā hariṇyaścakitā itastataḥ

kṛṣṇaṃ hyapaśyantya iti vyathāṃ gatā
yathā kariṇyaḥ kariṇaṃ vane vane /
yathā kuraryaḥ kuraraṃ vrajāṃganāḥ
sarvā rudantyo virahāturā bhṛśam

unmattavad‌vṛkṣalatākadambakaṃ
sarvā militvā ca pṛthagvane vane /
papracchurārānnṛpa naṃdanaṃdanaṃ
kutra sthitaṃ taṃ vadatāśu bhūruhāḥ

śrīkṛṣṇa kṛṣṇeti girā vadantyaḥ
śrīkṛṣṇapādāṃbujalagnamānasāḥ /
śrīkṛṣṇarūpāstu babhūvuraṃganāḥ
citraṃ na peśaskṛtametya kīṭavat

śrīpādukādhaḥsthalagopigopyaḥ
śrīpādukābjaṃ śaranaṃ prapannāḥ

tatastu tatprasādena tatpadārcanadarśanāt /
dadṛśurgāṃ tadā gopyo bhagavatpāda cihnitām

śrībahulāśva uvāca -
rādheśo rādhayā sārdhaṃ saṃketavaṭamāviśat /
priyāyāḥ kabarīpuṣparacanāṃ sa cakāra ha

śrīnārada uvāca -
śrīkṛṣṇo rādhayā sārdhaṃ saṃketavaṭamāviśat /
citrapatrāvalīḥ kṛṣṇa pūrṇendumukhamaṃḍale

evaṃ kṛṣṇo bhadravanaṃ khadirāṇāṃ vanaṃ mahat /
bilvānāṃ ca vanaṃ paśyan kokilākhyaṃ vanaṃ gataḥ

gopyaḥ kṛṣṇaṃ vicinvantyo dadṛśustatpadāni ca /
yavacakradhvajacchatraiḥ svastikāṅkuśabindubhiḥ

aṣṭakoṇena vajreṇa padmenābhiyutāni ca /
nīlaśaṅkhaghaṭairmatsyatrikoṇeṣūrdhvadhārakaiḥ

dhanurgokhuracandrārddhaśobhitāni mahātmanaḥ /
tatpadānyanusāreṇa vrajantyo gopikāstataḥ

tad‌rajaḥ satataṃ nītvā dhṛtvā mūrdhni vrajāṃganāḥ /
padānyanyāni dadṛśuranyacihnānvitāni ca

ketupadmātapatraiśca yavenāthordhvarekhayā /
cakracaṃdrārdhāṃkuśakairbiṃdubhiḥ śobhitāni ca

lavaṃgalatikābhiśca vicitrāṇi videharāṭ /
gadāpāṭhīnaśaṃkhaiśca girirājena śaktibhiḥ

siṃhāsanarathābhyāṃ ca biṃdudvayayutāni ca /
vīkṣya prāhū rādhikayā gato'sau naṃdanaṃdanaḥ

paśyatyastatpādapadmaṃ kokilākhyaṃ vanaṃ gatāḥ /
gopīkolāhalaṃ śrutvā rādhikāṃ prāha mādhavaḥ

koṭicaṃdrapratīkāśe rādhe sarpa tvaraṃ priye /
āgatā gopikāḥ sarvāstvāṃ neṣyanti hi sarvataḥ

tadā mānavatī rādhā bhūtvā prāha ramāpatim /
rūpayauvanakauśalyaśīlagarvasamanvitā

rādhovāca -
calituṃ na samarthā'haṃ mandirānnā vinirgatā /
sukumārī svedayuktā kathaṃ māṃ nayasi priya

nāraca uvāca -
iti vākyaṃ tataḥ śrutvā śrīkṛṣṇo rādhikeśvaraḥ /
pītāṃbareṇa divyena vāyuṃ tasyai cakāra ha

hastaṃ gṛhītvā tāmāha gaccha rādhe yathāsukham /
kṛṣṇenāpi tadā proktā na yayau tena vai punaḥ

pṛṣṭhaṃ dattvā'tha haraye tūṣṇīṃbhūtā sthitā punaḥ /
priyāṃ mānavatīṃ rādhāṃ prāha kṛṣṇaḥ satāṃ priyaḥ

śrībhagavānuvāca -
vihāya gopīriha kāmayānā
bhajāmyahaṃ mānini cetasā tvām /
yatte priyaṃ tatprakaromi rādhe
me skaṃdhamāruhya sukhaṃ vrajāśu

śrīnārada uvāca -
evaṃ priyāṃ priyatamaḥ skaṃdhayānepsitāṃ nṛpa /
vihāyāntardadhe kṛṣṇo svacchandagatirīśvaraḥ

gatamānā kīrtisutā bhagavad‌virahāturā /
uccai ruroda rājendra kokilākhye vane pare

tadaiva yūthāḥ saṃprāptā gopīnāṃ maithileśvara /
tad rodanaṃ duḥkhataraṃ śrutvā jagmustrapāturāḥ

kāścittāṃ makaraṃdaiśca snāpayāṃcakrurīśvarīm /
caṃdanāguru kastūrī kuṅkumadravasīkaraiḥ

vāyuṃ cakrustadaṃgeṣu vyajanāndolacāmaraiḥ /
āśvāsya vāgbhiḥ paramāṃ nānā'nunayakovidaiḥ

tanmukhānmānino mānaṃ śrutvā kṛṣṇasya gopikāḥ /
mānavaṃtyo maithilendra vismayaṃ paramaṃ yayuḥ

iti śrīgargasaṃhitāyāṃ vṛndāvanakhaṇḍe
rāsakrīḍāvarṇanaṃ nāmaikaviṃśo'dhyāyaḥ