Garga Samhita · Chapter 2.17

rādhākṛṣṇasaṃgamaḥ -
śrībahulāśva uvāca -
rādhākṛṣṇasya caritaṃ śṛṇvato me mano mune /
na tṛptiṃ yāti śaradaḥ paṃkaje bhramaro yathā

rāseśvaryā kṛṣṇapat‍nyā tulasīsevane kṛte /
yad‍babhūva tato brahman tanme brūhi tapodhana

śrīnārada uvāca -
rādhikāyāśca vijñāya tulasīsevane tapaḥ /
prītiṃ parīkṣan śrīkṛṣṇo vṛṣabhānupuraṃ yayau

ad‌bhutaṃ gopikārūpaṃ calajjhaṃkāranūpuram /
kiṃkiṇīghaṇṭikāśabdamaṃgulīyakabhūṣitam

rat‍nakaṃkaṇakeyūra muktāhāravirājitam /
bālārkatāṭaṃkalasatkabarīpāśakauśalam

nāsāmauktikadivyābhaṃ śyāmakuntalasaṃkulam /
dhṛtvā'sau vṛṣabhānośca mandiraṃ sandadarśa ha

prākāraparikhāyuktaṃ caturdvārasamanvitam /
karīndraiḥ kaṃjalākārairdvāri dvāri manoharam

vāyuvegairmanovegaiścitravarṇaisturaṃgamaiḥ /
hāracāmarasaṃyuktaṃ prollasanmaṇḍapājiram

gavāṃ gaṇaiḥ savatsaiśca vṛṣairdharmadhurandharaiḥ /
gopālā yatra gāyante vaṃśīvetradharā nṛpa

vṛṣabhānuvarasyaivaṃ paśyan mandirakauśalam /
māyāyuvativeṣo'sau tato hyantaḥpuraṃ yayau

yatra koṭiravisphūrjatkapāṭastambhapaṃktayaḥ /
rat‍nājireṣu śobhante lalanārat‍nasaṃyutāḥ

vīṇātālamṛdaṃgādīn vādayantyo manoharāḥ /
puṣpayaṣṭisamāyuktā gāyantyo rādhikāguṇam

tasminnantaḥpure divyaṃ bhrājaccopavanaṃ mahat /
dāḍimīkundamandāraniṃbūnnatadrumāvṛtam

ketakīmālatīvṛṃdaiḥ mādhavībhiḥ virājitam /
tatra rādhānikuṃjo'sti kalpavṛkṣasugandhibhṛt

patanti yatra bhramarā madhumattā nṛpeśvara /
gandhāktaḥ śītalo vāyurmandagāmī vahatyalam

sahasradalapadmānāṃ rajo vikṣepayanmuhuḥ /
puṃskokilā kokilāśca mayūrāḥ sārasāḥ śukāḥ

kūjante madhuraṃ nādaṃ nikuṃjaśikhareṣu ca /
puṣpaśayyāsahasrāṇi jalakulyāḥ sahasraśaḥ

procchalanti sphuratsphārā yatra vai meghamandire /
bālārkakuṇḍaladharāḥ citravastrāmbarānanāḥ

vartante koṭiśo yatra sakhyastatkarmakauśalāḥ /
tanmadhye rādhikā rājñī bhramantī mandirājire

kāśmīrapaṃkasaṃyukte sūkṣmavastravirājite /
śirīṣapuṣpakṣitijadalairāgulphapūrake

mālatīmakarandānāṃ kṣarad‌bhirbindubhirvṛte /
koṭicaṃdrapratīkāśā tanvī komalavigrahā /
śanaiḥ śanaiḥ pādapadmaṃ cālayantī ca komalam

samāgatāṃ tāṃ maṇimandirājire
dadarśa rādhā vṛṣabhānunandinī /
yattejasā tallalanāhṛtatviṣo
jātāstvaraṃ caṃdramaseva tārakāḥ

vijñāya tad‌gauravamuttamaṃ maha-
dutthāya dorbhyāṃ parirabhya rādhikā /
divyāsane sthāpya sulokarītyā
jalādikaṃ cārhaṇamārabhacchubham

rādhovāca -
svāgataṃ te sakhi śubhe nāmadheyaṃ vadāśu me /
bhūribhāgyaṃ mamaivādya bhavatyā''gatayā svataḥ

tvatsamānaṃ divyarūpaṃ dṛśyate na hi bhūtale /
yatra tvaṃ vartase subhru pattanaṃ dhanyameva tat

vada devi savistāraṃ hetumāgamanasya ca /
mama yogyaṃ ca yatkāryaṃ vaktavyaṃ tattvayā khalu

kaṭākṣeṇa sudīptyā ca vacasā susmitena vai /
gatyā kṛtyā śrīpativaddṛśyate sāṃprataṃ mayā

nityaṃ śubhe me milanārthamāvraja
na cet svasaṃketamalaṃ vidhehi /
yenaiva saṃgo vidhinā bhaveddhi
vidhirbhavatyā sa sadā vidheyaḥ

ayi tvadātmā'tiparaṃ priyo me
tvadākṛtiḥ śrīvrajarājanandanaḥ /
yenaiva me devi hṛtaṃ tu ceta-
stvaya nanāndeva vadhūrdadhāmi tam

śrīnārada uvāca -
evaṃ rādhāvacaḥ śrutvā māyāyuvativeṣadhṛk /
uvāca bhagavān kṛṣṇo rādhāṃ kamalalocanām

śrībhagavānuvāca -
rambhoru nandanagare nandagehasya cottare /
gokule vasatirme'sti nāmnā'haṃ gopadevatā

tvad‌rūpaguṇamādhuryaṃ śrutaṃ me lalitāmukhāt /
tad‌draṣṭuṃ caṃcalāpāṅ‌gi tvad‌gṛhe'haṃ samāgatā

śrīmallavaṃgalatikāsphuṭamodinīnāṃ
guñjānikuñjamadhupa- dhvanikuñjapuñjam /
dṛṣṭaṃ śrutaṃ navanavaṃ tava kaṃjanetre
divyaṃ puraṃdarapure'pi na yatsamānam

śrīnārada uvāca -
evaṃ tayormelanaṃ tad‌babhūva mithileśvara /
prītiṃ parasparaṃ kṛtvā vane tatra virejatuḥ

hasantyau te ca gāyantyau puṣpakandukalīlayā /
paśyantyau vanavṛkṣāṃśca ceraturmaithileśvara

kalākauśala saṃpannāṃ rādhāṃ kamalalocanām /
girā madhurayā rājan prāhedaṃ gopadevatā

gopadevatovāca -
dūre vai nandanagaraṃ sandhyā jātā vrajeśvari /
prabhāte cāgamiṣyāmi tvatsakāśaṃ na saṃśayaḥ

śrīnārada uvāca -
śrutvā vacastasya tu tad‌vrajeśvarīṃ
nikṣipya sadyo nayanāṃbusantatim /
romāṃcaharṣod‌gamabhāvasaṃvṛtā
raṃbheva bhūmau patitā maruddhatā

śaṃkāgatāstatra sakhīgaṇāstvaraṃ
suvījayantyo vyajanairvyavasthitāḥ /
śrīkhaṇḍapuṣpa dravacarcitāṃ'śukāṃ
jagāda rādhāṃ nṛpa gopadevatā

gopadevatovāca -
prabhāte āgamiṣyāmi mā śokaṃ kuru rādhike /
gośca bhrāturgorasasya śapatho me na cedidam

śrīnārada uvāca -
evamuktvā harī rādhāṃ samāśvāsya nṛpeśvara /
māyāyuvativeṣo'sau yayau śrīnandagokulam

iti śrīgargasaṃhitāyāṃ vṛndāvanakhaṇḍe
rādhākṛṣṇasaṃgamo nāma saptadaśo'dhyāyaḥ