Garga Samhita · Chapter 10.59

aśvamedhakhaṇḍaḥ - ekonaṣaṣṭitamo'dhyāyaḥ
śrīkṛṣṇasahasranāma -
garga uvāca -
athograseno nṛpatiḥ putrasyāśāṃ virajya ca /
vyāsaṃ papraccha sandehaṃ jñātvā viśvaṃ manomayam

ugrasena uvāca -
brahmankena prakāreṇa hitvā ca jagataḥ sukham /
bhajetkṛṣṇaṃ paraṃbrahma tanme vyākhyātumarhasi

vyāsa uvāca -
tvadagre kathayiṣyāmi satyaṃ hitakaraṃ vacaḥ /
ugrasena mahārāja śṛṇuṣvaikāgramānasaḥ

sevanaṃ kuru rājendra rādhāśrīkṛṣṇayoḥ param /
nityaṃ sahasranāmabhyāmubhayorbhaktitaḥ kila

sahasranāma rādhāyā vidhirjānāti bhūpate /
śaṅ‌karo nāradaścaiva kecidvai cāsmadādayaḥ

ugrasena uvāca -
rādhikā nāmasāhasraṃ nāradācca purā śrutam /
ekānte divyaśibire kurukṣetre ravigrahe

na śrutaṃ nāmasāhasraṃ kṛṣṇasyākliṣṭakarmaṇaḥ /
vada tanme ca kṛpayā yena śreyo'hamāpnuyām

garga uvāca -
śrutvograsenavacanaṃ vedavyāso mahāmuniḥ /
praśasya taṃ prītamanā prāha kṛṣṇaṃ vilokayan

vyāsa uvāca -
śṛṇu rājanpravakṣyāmi sahasraṃ nāma sundaram /
purā svadhāmni rādhāyai kṛṣṇenānena nirmitam

śrībhagavānuvāca -
idaṃ rahasyaṃ kila gopanīyaṃ
datte ca hāniḥ satataṃ bhaveddhi /
mokṣapradaṃ sarvasukhapradaṃ śaṃ
paraṃ parārthaṃ puruṣārthadaṃ ca

rūpaṃ ca me kṛṣṇasahasranāma
paṭhettu mad‌rūpa iva prasiddhaḥ /
dātavyamevaṃ na śaṭhāya kutra
na dāmbhikāyopadiśetkadāpi

dātavyamevaṃ karuṇāvṛtāya
gurvaṃghribhaktipraparāyaṇāya /
śrīkṛṣṇabhaktāya satāṃ parāya
tathā madakrodhavivarjitāya

ॐ asya śrīkṛṣṇasahasranāmastotramaṃtrasya nārāyaṇaṛṣiḥ /
bhujaṅ‌gaprayātaṃ chandaḥ / śrīkṛṣṇacandro devatā /
vāsudevo bījaṃ / śrīrādhā śaktiḥ / manmathaḥ kīlakaṃ /
śrīpūrṇabrahmakṛṣṇacandrabhaktijanmaphalaprāptaye jape viniyogaḥ // //
chaṃdaḥ - śrībhujaṅ‌gaprayāta
atha dhyānam -
śikhimukuṭaviśeṣaṃ nīlapadmāṅ‌gadeśaṃ
vidhumukhakṛtakeśaṃ kaustubhāpītaveśam /
madhuraravakaleśaṃ śaṃ bhaje bhrātṛśeṣaṃ
vrajajanavaniteśaṃ mādhavaṃ rādhikeśam

iti dhyānam
harirdevakīnandanaḥ kaṃsahaṃtā
parātmā ca pītāmbaraḥ pūrṇadevaḥ /
rameśastu kṛṣṇaḥ pareśaḥ purāṇaḥ
sureśo'cyuto vāsudevaśca devaḥ

dharābhārahartā kṛtī rādhikeśaḥ
paro bhūvaro divyagolokanāthaḥ /
sudāmnastathā rādhikāśāpahetu-
rghṛṇī māninī mānado divyalokaḥ

lasad‌gopaveṣo hyajo rādhikātmā
calatkuṇḍalaḥ kuntalī kuntalasrak /
rathasthaḥ kadā rādhayā divyarat‍naḥ
sudhāsaudhabhūcāraṇo divyavāsāḥ

kadā vṛndakāraṇyacārī svaloke
mahārat‍nasiṃhāsanasthaḥ praśāntaḥ /
mahāhaṃsabhaiścāmarairvījyamāna-
ścalacchatramuktāvalīśobhamānaḥ

sukhī koṭikandarpalīlābhirāmaḥ
kvaṇannūpurālaṅkṛtāṃghriḥ śubhāṃghriḥ /
sujānuśca raṃbhāśubhoruḥ kṛśāṅ‌gaḥ
pratāpī bhuśuṇḍāsudordaṇḍakhaṇḍaḥ

japāpuṣpahastaśca śātodaraśrī-
rmahāpadmavakṣasthalaścandrahāsaḥ /
lasatkundadantaśca bimbādharaśrīḥ
śaratpadmanetraḥ kirīṭojjvalābhaḥ

sakhīkoṭibhirvartamāno nikuñje
priyārādhayā rāsasakto navāṅ‌gaḥ /
dharābrahmarudrādibhiḥ prārthitaḥ sad-
dharābhāradūrīkṛto'rthaṃ prajātaḥ

yadurdevakīsaukhyado bandhanacchit-
saśeṣo vibhuryogamāyī ca viṣṇuḥ /
vraje nandaputro yaśodāsutākhyo
mahāsaukhyado bālarūpaḥ śubhāṅ‌gaḥ

tathā pūtanā mokṣadaḥ śyāmarūpo
dayālustvanobhañjanaḥ pallavāṃghriḥ /
tṛṇāvarttasaṃhārakārī ca gopo
yaśodāyaśo viśvarūpapradarśī

tathā gargadiṣṭaśca bhāgyodayaśrī-
rlasad‌bālakeliḥ sarāmaḥ suvācaḥ /
kvaṇannūpuraiḥ śabdayugriṅ‌gamāṇa-
stathā jānuhastairvrajeśāṅ‌gaṇe vā

dadhispṛkca haiyaṅ‌gavīdugdhabhoktā
dadhisteyakṛd‌dugdhabhugbhāṇḍabhettā /
mṛdaṃ bhuktavāngopajo viśvarūpaḥ
pracaṇḍāṃśucaṇḍaprabhāmaṇḍitāṅ‌gaḥ

yaśodākarairbaṃdhanaṃ prāpta ādyo
maṇigrīvamuktiprado dāmabaddhaḥ /
kadā nṛtyamāno vraje gopikābhiḥ
kadā nandasannandakairlālyamānaḥ

kadā gopanandāṃkagopālarūpī
kalindāṅ‌gajākūlago varttamānaḥ /
ghanairmārutaiścchinnabhāṇḍīradeśe
gṛhīto varo rādhayā nandahastāt

nikuñje ca golokalokāgate'pi
mahārat‍nasaṅ‌ghaiḥ kadambāvṛte'pi /
tadā brahmaṇā rādhikāsadvivāhe
pratiṣṭhāṃ gataḥ pūjitaḥ sāmamaṃtraiḥ

rasī rāsayuṅ‌mālatīnāṃ vane'pi
priyārādhayā rādhitārthaṃ rameśaḥ /
dharānātha ānandadaḥ śrīniketo
vaneśo dhanī sundaro gopikeśaḥ

kadā rādhayā prāpito nandagehe
yaśodākarairlālito mandahāsaḥ /
bhayī kvāpi vṛndārakāraṇyavāsī
mahāmandire vāsakṛddevapūjyaḥ

vane vatsacārī mahāvatsahārī
bakāriḥ suraiḥ pūjito'ghārināmā /
vane vatsakṛd‌gopakṛd‌gopaveṣaḥ
kadā brahmaṇā saṃstutaḥ padmanābhaḥ

vihārī tathā tālabhugdhenukārī
sadā rakṣako goviṣārttipraṇāśī /
kalindāṅ‌gajākūlagaḥ kāliyasya
damī nṛtyakārī phaṇeṣvaprasiddhaḥ

salīlaḥ śamījñānadaḥ kāmapūra-
stathā gopayuggopa ānandakārī /
sthirī hyagnibhukpālako bālalīlaḥ
surāgaśca vaṃśīdharaḥ puṣpaśīlaḥ

pralambaprabhānāśako gauravarṇo
balo rohiṇījaśca rāmaśca śeṣaḥ /
balī padmanetraśca kṛṣṇāgrajaśca
dhareśaḥ phaṇīśastu nīlāmbarābhaḥ

mahāsaukhyado hyagnihāravrajeśaḥ
śaradgrīṣmavarṣākaraḥ kṛṣṇavarṇaḥ /
vraje gopikāpūjitaścīrahartā
kadambe sthitaścīradaḥ sundarīśaḥ

kṣudhānāśakṛdyajñapat‍nīmanaspṛk-
kṛpākārakaḥ kelikartāvanīśaḥ /
vraje śakrayāgapraṇāśī mitāśī
śunāsīramohaprado bālarūpī

gireḥpūjako nandaputro hyagadhraḥ
kṛpākṛcca govardhanoddhārināmā /
tathā vātavarṣāharo rakṣakaśca
vrajādhīśagopāṅ‌ganāśaṅ‌kitaḥ san

agendropari śakrapūjyaḥ stutaḥ prāṅ‌
mṛṣāśikṣako deva govindanāmā /
vrajādhīśarakṣākaraḥ pāśipūjyo-
'nujairgopajairdivyavaikuṇṭhadarśī

calaccāruvaṃśīkvaṇaḥ kāminīśo
vraje kāmīnīmohadaḥ kāmarūpaḥ /
rasākto rasī rāsakṛd‌rādhikeśo
mahāmohado māninīmānahārī

vihārī varo mānahṛdrādhikāṅgo
dharādvīpagaḥ khaṇḍacārī vanasthaḥ /
priyo hyaṣṭavakrarṣidraṣṭā sarādho
mahāmokṣadaḥ padmahārī priyārthaḥ

vaṭasthaḥ suraścandanāktaḥ prasakto
vrajaṃ hyāgato rādhayā mohinīṣu /
mahāmohakṛd‌gopikāgītakīrtī
rathasthaḥ paṭī duḥkhitākāminīśaḥ

vane gopikātyāgakṛtpādacihna-
pradarśī kalākāraḥ kāmamohī /
vaśī gopikāmadhyagaḥ peśavācaḥ
priyāprītikṛd‍rāsaraktaḥ kaleśaḥ

rasāraktacitto hyanantasvarūpaḥ
srajā saṃvṛto ballavīmadhyasaṃsthaḥ /
subāhuḥ supādaḥ suveśaḥ sukeśo
vrajeśaḥ sakhā vallabheśaḥ sudeśaḥ

kvaṇatkiṅ‌kiṇījālabhṛnnūpurāḍhyo
lasatkaṅ‌kaṇo hyaṅ‌gadī hārabhāraḥ /
kirīṭī calatkuṇḍalaścāṅ‌gulīya-
sphuratkaustubho mālatīmaṇḍitāṅ‌gaḥ

mahānṛtyakṛd‌rāsaraṅ‌gaḥ kalāḍhya-
ścaladdhārabho bhāminīnṛtyayuktaḥ /
kalindāṅ‌gajākelikṛtkuṃkumaśrīḥ
surairnāyikānāyakairgīyamānaḥ

sukhāḍhyastu rādhāpatiḥ pūrṇabodhaḥ
kaṭākṣasmitī valgitabhrūvilāsaḥ /
suramyo'libhiḥ kuntalālolakeśaḥ
sphurad‌barhakundasrajā cāruveṣaḥ

mahāsarpato nandarakṣāparāṃghriḥ
sadā mokṣadaḥ śaṅ‌khacūḍapraṇāśī /
prajārakṣako gopikāgīyamānaḥ
kakudmipraṇāśaprayāsaḥ surejyaḥ

kaliḥ krodhakṛtkaṃsamaṃtropadeṣṭā
tathākrūramaṃtropadeśī surārthaḥ /
balī keśihā puṣpavarṣo'malaśrī-
stathā nāradāddarśito vyomahantā

tathākrūrasevāparaḥ sarvadarśī
vraje gopikāmohadaḥ kūlavartī /
satī rādhikābodhadaḥ svapnakartā
vilāsī mahāmohanāśī svabodhaḥ

vraje śāpatastyaktarādhāsakāśo
mahāmohadāvāgnidagdhaḥ patiśca /
sakhībandhanānmohitākrūra ārāt-
sakhīkaṅ‌kaṇaistāḍitākrūrarakṣī

rathastho vraje rādhayā kṛṣṇacandraḥ
sugupto gamī gopakaiścārulīlaḥ /
jale'krūrasandarśito divyarūpo
didṛkṣuḥ purīmohinīcittamohī

tathā raṅ‌gakārapraṇāśī suvastraḥ
srajī vāyakaprītikṛnmālipūjyaḥ /
mahākīrtidaścāpi kubjāvinodī
sphuraccaṇḍakodaṇḍarugṇapracaṇḍaḥ

bhaṭārtipradaḥ kaṃsaduḥsvapnakārī
mahāmallaveṣaḥ karīndraprahārī /
mahāmātyahā raṅ‌gabhūmipraveśī
rasāḍhyo yaśaḥspṛgbalī vākpaṭuśrīḥ

mahāmallahā yuddhakṛtstrīvaco'rthī
dharānāyakaḥ kaṃsahantā yaduḥ prāk /
sadā pūjito hyugrasenaprasiddho
dharārājyado yādavairmaṇḍitāṅ‌gaḥ

guroḥ putrado brahmavidbrahmapāṭhī
mahāśaṅ‌khahā daṇḍadhṛkpūjya eva /
vraje hyuddhavapreṣito gopamohī
yaśodāghṛṇī gopikājñānadeśī

sadā snehakṛtkubjayā pūjitāṅ‌ga-
stathākrūragehaṃgamī maṃtravettā /
tathā pāṇḍavapreṣitā'krūra eva
sukhī sarvadarśī nṛpānandakārī

mahākṣauhiṇīhā jarāsandhamānī
nṛpo dvārakākārako mokṣakartā /
raṇī sārvabhaumastuto jñānadātā
jarāsandhasaṅ‌kalpakṛddhāvadaṃghriḥ

nagādutpataddvārikāmadhyavartī
tathā revatībhūṣaṇastālacihnaḥ /
yadū rukmiṇīhārakaścaidyavedya-
stathā rukmirūpapraṇāśī sukhāśī

anantaśca māraśca kārṣṇiśca kāmo
manojastathā śambarārī ratīśaḥ /
rathī manmatho mīnaketuḥ śarī ca
smaro darpako mānahā pañcabāṇaḥ

priyaḥ satyabhāmāpatiryādaveśo-
'tha satrājitapremapūraḥ prahāsaḥ /
mahārat‍nado jāmbavadyuddhakārī
mahācakradhṛkkhaḍgadhṛgrāmasaṃdhiḥ

vihārasthitaḥ pāṇḍavapremakārī
kalindāṅ‌gajāmohanaḥ khāṇḍavārthī /
sakhā phālgunaprītikṛnnagrakartā
tathā mitravindāpatiḥ krīḍanārthī

nṛpapremakṛd‌gojitaḥ saptarūpo-
'tha satyāpatiḥ pāribarhī yatheṣṭaḥ /
nṛpaiḥ saṃvṛtaścāpi bhadrāpatistu
vilāsī madhormāninīśo janeśaḥ

śunāsīramohāvṛtaḥ satsabhāryaḥ
satārkṣyo murāriḥ purīsaṅ‌ghabhettā /
suvīraḥśiraḥkhaṇḍano daityanāśī
śarī bhaumahā caṇḍavegaḥ pravīraḥ

dharāsaṃstutaḥ kuṇḍalacchatrahartā
mahārat‍nayug‌rājakanyābhirāmaḥ /
śacīpūjitaḥ śakrajinmānahartā
tathā pārijātāpahārī rameśaḥ

gṛhī cāmaraiḥ śobhito bhīṣmakanyā-
patirhāsyakṛnmāninīmānakārī /
tathā rukmiṇīvākpaṭuḥ premagehaḥ
satīmohanaḥ kāmadevāparaśrīḥ

sudeṣṇaḥ sucārustathā cārudeṣṇo-
'paraścārudeho balī cāruguptaḥ /
sutī bhadracārustathā cārucandro
vicāruśca cārū rathī putrarūpaḥ

subhānuḥ prabhānustathā candrabhānu-
rbṛhad‌bhānurevāṣṭabhānuśca sāmbaḥ /
sumitraḥ kratuścitraketustu vīro-
'śvaseno vṛṣaścitraguścandrabimbaḥ

viśaṅ‌kurvasuśca śruto bhadra ekaḥ
subāhurvṛṣaḥ pūrṇamāsastu somaḥ /
varaḥ śāntireva praghoṣo'tha siṃho
balo hyūrdhvagovardhanonnāda eva

mahāśo vṛkaḥ pāvano vahnimitraḥ
kṣudhirharṣakaścānilo'mitrajicca /
subhadro jayaḥ satyako vāma āyu-
ryaduḥ koṭiśaḥ putrapautraprasiddhaḥ

halī daṇḍadhṛg‌rukmihā cāniruddha-
stathā rājabhirhāsyago dyūtakartā /
madhurbrahmasūrbāṇaputrīpatiśca
mahāsundaraḥ kāmaputro balīśaḥ

mahādaityasaṃgrāmakṛd‌yādaveśaḥ
purībhañjano bhūtasaṃtrāsakārī /
mṛdhī rudrajid‌rudramohī mṛdhārthī
tathā skandajitkūpakarṇaprahārī

dhanurbhañjano bāṇamānaprahārī
jvarotpattikṛtsaṃstutastu jvareṇa /
bhujāchedakṛd‌bāṇasaṃtrāsakartā
mṛḍaprastuto yuddhakṛd‌bhūmibhartā

nṛgaṃ muktido jñānado yādavānāṃ
rathastho vrajapremapo gopamukhyaḥ /
mahāsundarīkrīḍitaḥ puṣpamālī
kalindāṅ‌gajābhedanaḥ sīrapāṇiḥ

mahādaṃbhihā pauṇḍramānaprahārī
śiraśchedakaḥ kāśirājapraṇāśī /
mahākṣauhiṇīdhvaṃsakṛccakrahastaḥ
purīdīpako rākṣasīnāśakartā

ananto mahīdhraḥ phaṇī vānarāriḥ
sphurad‌gauravarṇo mahāpadmanetraḥ /
kurugrāmatiryyaggato gauravārthaḥ
stutaḥ kauravaiḥ pāribarhī sasāmbaḥ

mahāvaibhavo dvārakeśo hyaneka-
ścalannāradaḥ śrīprabhādarśakastu /
maharṣistuto brahmadevaḥ purāṇaḥ
sadā ṣoḍaśastrīsahasrasthitaśca

//
gṛhī lokarakṣāparo lokarītiḥ
prabhurhyugrasenāvṛto durgayuktaḥ /
tathā rājadūtastato bandhabhettā
sthito nāradaprastutaḥ pāṇḍavārthī

nṛpairmantrakṛd‌hyuddhavaprītipūrṇo
vṛtaḥ putrapautraiḥ kurugrāmagantā /
ghṛṇī dharmarājastuto bhīmayuktaḥ
parānandado maṃtrakṛddharmajena

diśājid‌balī rājasūyārthakārī
jarāsandhahā bhīmasenasvarūpaḥ /
tathā viprarūpo gadāyuddhakartā
kṛpālurmahābandhanacchedakārī

nṛpaiḥ saṃstuto hyāgato dharmagehaṃ
dvijaiḥ saṃvṛto yajñasaṃbhārakartā /
janaiḥ pūjitaścaidyadurvākkṣamaśca
mahāmohado'reḥ śiraścchedakārī

mahāyajñaśobhākaraścakravartī
nṛpānandakārī vihārī surārī /
sabhāsaṃvṛto mānahṛtkauravasya
tathā śālvasaṃhārako yānahantā

sabhojaśca vṛṣṇirmadhuḥ śūraseno
daśārho yadurhyaṃdhako lokajicca /
dyumanmānahā varmadhṛgdivyaśastrī
svabodhaḥ sadā rakṣako daityahantā

tathā dantavaktrapraṇāśī gadā dhṛg-
jagattīrthayātrākaraḥ padmahāraḥ /
kuśī sūtahantā kṛpākṛtsmṛtīśo-
'malo balvalāṅ‌gaprabhākhaṇḍakārī

tathā bhīmaduryodhanajñānadātā-
paro rohiṇīsaukhyado revatīśaḥ /
mahādānakṛd‌vipradāridryahā ca
sadā premayukśrīsudāmnaḥ sahāyaḥ

tathā bhārgavakṣetragantā sarāmo-
'tha sūryoparāgaśrutaḥ sarvadarśī /
mahāsenayā cāsthitaḥ snānayukto
mahādānakṛnmitrasammelanārthī

tathā pāṇḍavaprītidaḥ kuntijārthī
viśālākṣamohapradaḥ śāntidaśca /
vaṭe rādhikārādhano gopikābhiḥ
sakhīkoṭibhī rādhikāprāṇanāthaḥ

sakhīmohadāvāgnihā vaibhaveśaḥ
sphuratkoṭikandarpalīlāviśeṣaḥ /
sakhīrādhikāduḥkhanāśī vilāsī
sakhīmadhyagaḥ śāpahā mādhavīśaḥ

śataṃ varṣavikṣepahṛnnandaputra-
stathā nandavakṣogataḥ śītalāṅ‌gaḥ /
yaśodāśucaḥ snānakṛd‌duḥkhahantā
sadāgopikānetralagno vrajeśaḥ

stuto devakīrohiṇībhyāṃ surendro
raho gopikājñānado mānadaśca /
tathā saṃstutaḥ paṭṭarājñībhirārād-
dhanī lakṣmaṇāprāṇanāthaḥ sadā hi

tribhiḥ ṣoḍaśastrīsahasrastutāṅ‌gaḥ
śuko vyāsadevaḥ sumantuḥ sitaśca /
bharadvājako gautamo hyāsuriḥ sad-
vasiṣṭhaḥ śatānanda ādyaḥ sarāmaḥ

muniḥ parvato nārado dhaumya indro-
'sito'trirvibhāṇḍaḥ pracetāḥ kṛpaśca /
kumāraḥ sanandastathā yājñavalkyo
ṛbhurhyaṅ‌girā devalaḥ śrīmṛkaṇḍaḥ

marīcī kratuścaurvako lomaśaśca
pulastyo bhṛgurbrahmarāto vasiṣṭhaḥ /
naraścāpi nārāyaṇo datta eva
tathā pāṇiniḥ piṅ‌galo bhāṣyakāraḥ

sakātyāyano viprapātañjaliścā-
tha gargo gururgīṣpatirgautamīśaḥ /
munirjājaliḥ kaśyapo gālavaśca
dvijaḥ saubhariścarṣyaśṛṅ‌gaśca kaṇvaḥ

dvitaścaikataścāpi jātūd‌bhavaśca
ghanaḥ kardamasyātmajaḥ kardamaśca /
tathā bhārgavaḥ kautsakaścāruṇastu
śuciḥ pippalādo mṛkaṇḍasya putraḥ

sapailaḥstathā jaiminiḥ satsumantu-
rvaro gāṅ‌galaḥ sphoṭagehaḥ phalādaḥ /
sadā pūjito brāhmaṇaḥ sarvarūpī
munīśo mahāmohanāśo'maraḥ prāk

munīśastutaḥ śaurivijñānadātā
mahāyajñakṛccābhṛtasnānapūjyaḥ /
sadā dakṣiṇādo nṛpaiḥ pāribarhī
vrajānandado dvārikāgehadarśī

mahājñānado devakīputradaścā-
suraiḥ pūjito'hīndrasenādṛtaśca /
sadā phālgunaprītikṛtsatsubhadrā-
vivāhe dvipāśvaprado mānayānaḥ

bhuvaṃ darśako maithilena prayukto
dvijenāśu rājñā sthito brāhmaṇaiśca /
kṛtī maithile lokavedopadeśī
sadāvedavākyaiḥ stutaḥ śeṣaśāyī

parīkṣāvṛto brāhmaṇaiścāmareṣu
bhṛguprārthito daityahā ceśarakṣī /
sakhā cārjunasyāpi mānaprahārī
tathā vipraputraprado dhāmagantā

vihārasthito mādhavībhiḥ kalāṅ‌go
mahāmohadāvāgnidagdhābhirāmaḥ /
yadurhyugraseno nṛpo'krūra eva
tathā coddhavaḥ śūrasenaśca śūraḥ

hṛdīkaśca satrājitaścāprameyo
gadaḥ sāraṇaḥ sātyakirdevabhāgaḥ /
tathā mānasaḥ sañjayaḥ śyāmakaśca
vṛko vatsako devako bhadrasenaḥ

nṛpo'jātaśatrurjayo mādriputro-
'tha bhīṣmaḥ kṛpo buddhicakṣuśca pāṇḍuḥ /
tathā śantanurdevabāhlīka evā-
tha bhūriśravāścitravīryo vicitraḥ

śalaścāpi duryodhanaḥ karṇa eva
subhadrāsuto viṣṇurātaḥ prasiddhaḥ /
sa janmejayaḥ pāṇḍavaḥ kauravaśca
tathā sarvatejā hariḥ sarvarūpī

vrajaṃ hyāgato rādhayā pūrṇadevo
varo rāsalīlāparo divyarūpī /
rathastho navadvīpakhaṇḍapradarśī
mahāmānado gopajo viśvarūpaḥ

sanandaśca nando vṛṣo vallabheśaḥ
sudāmārjunaḥ saubalastoka eva /
sa kṛṣṇoṃ'śukaḥ sadviśālarṣabhākhyaḥ
sutejasvikaḥ kṛṣṇamitro varūthaḥ

kuśeśo vaneśastu vṛndāvaneśa-
stathā māthureśādhipo gokuleśaḥ /
sadāgogaṇo gopatirgopikeśo-
'tha govardhano gopatiḥ kanyakeśaḥ

anādistu cātmā hariḥ pūruṣaśca
paro nirguṇo jyotirūpo nirīhaḥ /
sadā nirvikāraḥ prapañcātparaśca
sa satyastu pūrṇaḥ pareśastu sūkṣmaḥ

dvārakāyāṃ tathā cāśvamedhasya kartā
nṛpeṇāpi pautreṇa bhūbhārahartā /
punaḥ śrīvraje rāsaraṅ‌gasya kartā
harīrādhayā gopikānāṃ ca bhartā

sadaikastvanekaḥ prabhāpūritāṅ‌ga-
stathā yogamāyākaraḥ kālajicca /
sudṛṣṭirmahattattvarūpaḥ prajātaḥ
sakūṭastha ādyāṅ‌kuro vṛkṣarūpaḥ

vikārasthitaśca hyahaṅ‌kāra eva
sa vai kārakastaijasastāmasaśca /
namo diksamīrastu sūryaḥ praceto-
'śvivahniśca śakro hyupendrastu mitraḥ

śrutistvakca dṛgghrāṇajihvāgiraśca
bhujāmeḍhrakaḥ pāyuraṅ‌ghriḥ saceṣṭaḥ /
dharāvyomavārmārutaścaiva tejo-
'tha rūpaṃ raso gandhaśabdaspṛśaśca

sacittaśca buddhirvirāṭ kālarūpa-
stathā vāsudevo jagatkṛddhatāṅ‌gaḥ /
tathāṇḍe śayānaḥ saśeṣaḥ sahasra-
svarūpo ramānātha ādyo'vatāraḥ

sadā sargakṛtpadmajaḥ karmakartā
tathā nābhipadmod‌bhavo divyavarṇaḥ /
kavirlokakṛtkālakṛtsūryarūpo
nimeṣo bhavo vatsarānto mahīyān

tithirvāranakṣatrayogāśca lagno-
'tha māso ghaṭī ca kṣaṇaḥ kāṣṭhikā ca /
muhūrtastu yāmo grahā yāminī ca
dinaṃ carkṣamālāgato devaputraḥ

kṛto dvāparastu tritastatkalistu
sahasraṃ yugastatra manvantaraśca /
layaḥ pālanaṃ satkṛtistatparārdhaṃ
sadotpattikṛddvyakṣaro brahmarūpaḥ

tathā rudrasargastu kaumārasargo
muneḥ sargakṛddevakṛtprākṛtastu /
śrutistu smṛtiḥ stotramevaṃ purāṇaṃ
dhanurveda ijyātha gāndharvavedaḥ

vidhātā ca nārāyaṇaḥ satkumāro
varāhastathā nārado dharmaputraḥ /
muniḥ kardamasyātmajo datta eva
sa yajño'maro nābhijaḥ śrīpṛthuśca

sumatsyaśca kūrmaśca dhanvantariśca
tathā mohinī nārasiṃhaḥ pratāpī /
dvijo vāmano reṇukāputrarūpo
munirvyāsadevaḥ śrutistotrakartā

dhanurvedabhāgrāmacandrāvatāraḥ
sasītāpatirbhārahṛd‌rāvaṇāriḥ /
nṛpaḥ setukṛd‌vānarendraprahārī
mahāyajñakṛd‌rāghavendraḥ pracaṇḍaḥ

balaḥ kṛṣṇacandrastu kalkiḥ kaleśa-
stu buddhaḥ prasiddhastu haṃsastathāśvaḥ /
ṛṣīndro'jito devavaikuṇṭhanātho
hyamūrtiśca manvantarasyāvatāraḥ

gajoddhāraṇaḥ śrīmanurbrahmaputro
nṛpendrastu duṣyantajo dānaśīlaḥ /
sadṛṣṭaḥ śruto bhūta evaṃ bhaviṣyad‌-
bhavatsthāvaro jaṅ‌gamo'lpaṃ mahacca

iti śrībhujaṅ‌gaprayātena coktaṃ
hare rādhikeśasya nāmnāṃ sahasram /
paṭhed‌bhaktiyukto dvijaḥ sarvadā hi
kṛtārtho bhavetkṛṣṇacandrasvarūpaḥ

mahāpāparāśiṃ bhinatti śrutaṃ ya-
tsadā vaiṣṇavānāṃ priyaṃ maṅ‌galaṃ ca /
idaṃ rāsarākādine cāśvinasya
tathā kṛṣṇajanmāṣṭamīmadhya eva

tathā caitramāsasya rākādine vā-
tha bhādre ca rādhāṣṭamīsaddine vā /
paṭhed‌bhaktiyuktastvidaṃ pūjayitvā
caturdhā sumuktiṃ tanoti praśastaḥ

paṭhetkṛṣṇapuryāṃ ca vṛndāvane vā
vraje gokule vāpi vaṃśīvaṭe vā /
vaṭe vā kṣaye vā taṭe sūryaputryāḥ
sa bhakto'tha golokadhāma prayāti

bhajed‌bhaktibhāvācca sarvatra bhūmau
hariṃ kutra cānena gehe vane vā /
jahāti kṣaṇaṃ no haristaṃ ca bhaktaṃ
suvaśyo bhavenmādhavaḥ kṛṣṇacandraḥ

sadā gopanīyaṃ sadā gopanīyaṃ
sadā gopanīyaṃ prayat‍nena bhaktaiḥ /
prakāśyaṃ na nāmnāṃ sahasraṃ hareśca
na dātavyamevaṃ kadā lampaṭāya

idaṃ pustakaṃ yatra gehe'pi tiṣṭhed-
vased‌rādhikānātha ādyastu tatra /
tathā ṣaḍguṇāḥ siddhayo dvādaśāpi
guṇaistriṃśatairlakṣaṇaistu prayānti

iti śrīmad‌gargasaṃhitāyāmaśvamedhakhaṇḍe
śrīkṛṣṇasahasranāmavarṇanaṃ nāmaikonaṣaṣṭitamo'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā