Garga Samhita · Chapter 10.46

aśvamedhakhaṇḍaḥ - ṣaṭcatvāriśo'dhyāyaḥ
rāsakrīḍā samāptiḥ -
garga uvāca -
kṛṣṇaṃ samāgataṃ dṛṣṭvā tāḥ samutthāya harṣitāḥ //
cakrurjayajayārāvaṃ gopyo duḥkhaṃ visṛjya ca

dṛṣṭvā saṃmūrcchitāṃ rādhāṃ gopibhiḥ prārthito hariḥ //
caitanyārthe vraje tatra cakāra muralīravam

notthitāṃ rādhikāṃ dṛṣṭvā śrīrādhāvallabho hariḥ //
tasyai saṃśrāvayāmāsa veṇugītaṃ punaḥ punaḥ

tataḥ samutthitā rādhā smṛtvā duḥkhaṃ viyogajam //
babhūva mūrcchitā rājanmādhavasya prapaśyataḥ

tataḥ kṛṣṇasya vacanātsadyaścandrānanā sakhī //
candrāvalīṃ pratyuvāca prasannā kṛṣṇaveṇunā

candrānanovāca -
kṛṣṇacandraḥ purā nirgato mānato hyāgataḥ so'pi rādhe yugāṃte punaḥ //
nāśayansarvaduḥkhāni te sannidhau saṃjagau veṇunā devakīnaṃdanaḥ

chuṃgachuṃge ninādaṃ mṛdaṃge kalaṃ vādyamāne surastrījanaiḥ sevitaḥ //
rāsaramyāṅgaṇe nṛtyakṛnmādhavaḥ saṃjagau veṇunā devakīnaṃdanaḥ

cārucāmīkarābhāsivāsā vibhurvaijayaṃtībharābhāsitorasthalaḥ //
naṃdavṛndāvane gopikāmadhyagaḥ saṃjagau veṇunā devakīnaṃdanaḥ

cārucaṃdrāvalīlocanācuṃbito gopagovṛndagopikāvallabhaḥ //
kaṃsavaṃśāṭavīdāhadāvānalaḥ saṃjagau veṇunā devakīnaṃdanaḥ

bālikātālikātālalīlālayāsaṅgasaṃdarśitabhrūlatāvibhramaḥ //
gopikāgītadattāvadhānaḥ svayaṃ saṃjagau veṇunā devakīnaṃdanaḥ

maulimālāṃgadaiḥ kiṃkiṇīkuṇḍalairbhūṣito naṃdano naṃdarājasya ca //
prītikṛtsundaro devi prītyā tava saṃjagau veṇunā devakīnaṃdanaḥ

pārijātaṃ samud‌dhṛtya rādhāvaro ropayāmāsa bhāmābhayādaṃgaṇe //
vallavīvṛndavṛndārikākāmukaḥ saṃjagau veṇunā devakīnaṃdanaḥ

ṛkṣarājaṃ vinirjitya nītvā maṇiṃ saṃdadau bhītavad‌bhūmināthāya ca //
so'pi rāse samāgatya rāseśvaro saṃjagau veṇunā devakīnaṃdanaḥ

garga uvāca -
iti śrutvā rādhikā tu mahimāṃ veṇūvādinaḥ //
prasannā hi samutthāya parirebhe priyaṃ priyā

vṛndāvaneśo goviṃdo reme vṛndāvane vane //
vṛndāvananivāsinyā paśyanvṛndāvanadrumān

tataḥ kṛṣṇaṃ ca jagṛhuḥ sarvato vrajayoṣitaḥ //
varṣākāle nṛpaśreṣṭha saudāminyo yathā ghanam

yāvatīstatra gopyaśca tāvad‌rūpadharo hariḥ //
yamunāpulinaṃ rājam̐stābhiḥ sākaṃ samāyayau

babhūvurmuditā nāryo yathā ca śrutayaḥ purā //
svavastraiḥ kṛṣṇacandrāya hyāsanaṃ tā acīklṛpan

śrīrādhāramaṇastasminnāsane saha rādhayā //
niṣasāda hyaho rājaṃstābhirbhaktyā vaśīkṛtaḥ

goloke yādṛśaṃ rūpaṃ darśayāmāsa tādṛśam //
gopīnāṃ rādhayā sārddhaṃ kṛṣṇaṃ trailokyamohanam

dṛṣṭvā gokulacandrasya surūpaṃ paramād‌bhutam //
svātmānaṃ nāvidangopyo brahmānandena nirvṛtāḥ

sthale kṛtvā vihāraṃ tu viveśa yamunājalam //
tābhīrbhaktyā vaśībhūto gopībhiḥ saha rādhayā

vārāṃ vihāraṃ bhagavānstrībhiḥ sārddhaṃ cakāra ha //
mandākinyāṃ yathā śakro hyapsarobhirvṛto divi

mādhavo mādhavīṃ rājan mādhavī mādhavaṃ jale //
anyonyaṃ tau siṣicatuḥ salile salilaistvaram

kabarīkeśapāśābhyāṃ pracyutaiḥ kusumairbabhau //
yamunācitravarṇaiśca yathoṣṇiṅ‌mudritā nṛpa

‌rā
vidyādharyo devapat‍nyaḥ puṣpavarṣaṃ pracakrire //
praślathadvastranīvyastā mohaṃ prāptāḥ smarāturāḥ

atha kṛṣṇo vārilīlāṃ kṛtvā vai līlayā yutaḥ //
jalānniṣkramya rājeṃdra giriṃ govardhanaṃ yayau

anujagmurgopikāstaṃ sahacaryo nṛpeśvara //
kāścidvyajanahastāśca kāściccāmaravāhakāḥ

kāścittāṃbūlahastāśca kāściddarpaṇavāhakāḥ //
kāścid‌bhūṣaṇahastāśca kāścitkusumavāhakāḥ

kāściccaṃdanahastāśca kāścid‌bhājanavāhakāḥ //
kāścidyāvakahastāśca kāścidaṃbaravāhakāḥ

kāścinmṛdaṃgahastāśca kāścitkāṃsyadharāśca vai //
murayaṣṭidharāḥ kāścitkāścidvīṇādharāḥ parāḥ

karatālakarāḥ kāścitkāścid‌gānaparāyaṇāḥ //
ṣaṭ‌triṃśad‌rāgarāgiṇyo vrajastrīrūpadhārakāḥ

golokād‌bhārate pūrvamāgatā rādhayā saha //
jagustā nanṛtustatra śrīrādheśvarasannidhau

nanarta madhye tāsāṃ ca kṛṣṇo madanamohanaḥ //
pragāyanveṇunā gītaṃ trilokīṃ mohayanhariḥ

vāditraiḥ kiṃkiṇībhiśca valayanūpurakaṃkaṇaiḥ //
gītairmiśritaśabdo'bhūttumulo rāsamaṃḍale

devāśca devapat‍nyaśca rāsaṃ dṛṣṭvā harerapi //
babhūvarmūrcchitā rājangagane smarapīḍitāḥ

caṃdrikāyāṃ tu candrasya caturaścaṃcalaścalan //
caṃdrāvalyā babhau caiva ghanaścaṃcala eva ca

rādhāyāstatra śṛṅgāraṃ sragbhiryāvakakajjalaiḥ //
cakre kamalapatrādyairgirau giridharo mahān

kuṃkumāgurukastūrīcandanādyaiśca rādhikā //
cakre kamalapatraṃ vai śrīkṛṣṇasyānane varam

tataśca sasmitā rādhā sasmitaṃ bhagavanmukham //
paśyantī nāgavallyāśca bīṭakaṃ pradadau mudā

priyāpradattaṃ tāṃbūlaṃ bubhuje naṃdanaṃdanaḥ //
kṛṣṇadattaṃ ca tāṃbūlaṃ cakhāda radhikā mudā

kṛṣṇacarvitatāṃbūlaṃ nītvā rādhā balātpunaḥ //
jaghāsa bhaktyā sā śīghraṃ satī patiparāyaṇā

priyācarvitatāṃbūlaṃ yayāce bhagavānhariḥ //
rādhā dadau na taṃ bhītā papāta tatpadāṃbuje

padmā padmāvatī naṃdī ānandī sukhadāyinī //
caṃdrāvalī caṃdrakalā vaṃdyā hyetā haripriyāḥ

vṛndāvane haristābhirvasaṃtartuprapūrite //
nānāprakāraṃ śṛṅgāraṃ sa cakāra manojavat

kāścitpibaṃti gopyastu śrīkṛṣṇasyādharāmṛtam //
kāścidvāliṃganaṃ cakruḥ kṛṣṇasya paramātmanaḥ

tataḥ kṛṣṇastu bhagavāngopīnāṃ kucakuṃkumaiḥ //
suvarṇavarṇo bhūtvā vai reje madanamohanaḥ

punargopījanaiḥ sārddhaṃ śrīgopījanavallabhaḥ //
rāsaṃ cakāra rājeṃdra sundare kadalīvane

evaṃ hemantarajanī gopīnāṃ rāsamaṇḍale //
vyatītā kṣaṇavadrājannityānaṃdena tatra vai

atha naṃdasya sadanaṃ rāsaṃ kṛtvā yayau hariḥ //
vṛṣabhānupuraṃ rādhā tathā gopyo gṛhānyayuḥ

na jānaṃti vraje gopā rāsavārtāṃ harerapi //
svānsvāndārānsvapārśvasthānmanyamānā nṛpeśvara

idaṃ śṛṅgāracaritaṃ rādhāmādhavayoḥ param //
ye paṭhaṃti ca śṛṇvanti te vrajiṣyaṃti cākṣaram

iti śrīgargasaṃhitāyāṃ hayamedhakhaṇḍe
rāsakrīḍāsaṃpūrtirnāma ṣaṭcatvāriśo'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā