Garga Samhita · Chapter 10.45

aśvamedhakhaṇḍaḥ - pañcacatvāriṃśo'dhyāyaḥ
rāsakrīḍā -
gopya ūcuḥ
adharabimbaviḍaṃbitavidrumaṃ madhuraveṇuninādavinoditam //
kamalakomalanīlamukhāṃbujaṃ tamapi gopakumāramupāsmahe

śyāmalaṃ vipinakelilampaṭaṃ komalaṃ kamalapatralocanam //
kāmadaṃ vrajavilāsinīdṛśāṃ śītalaṃ matiharaṃ bhajāmahe

taṃ visaṃcalitalocanāṃcalaṃ sāmikuḍ‌malitakomalādharam //
vaṃśavalgitakarāṃgulīmukhaṃ veṇunādarasikaṃ bhajāmahe

īṣadaṃkuritadaṃtakuṃḍalaṃ bhūṣaṇaṃ bhuvanamaṃgalaśriyam //
ghoṣasaurabhamanoharaṃ harerveṣameva mṛgayāmahe vayam

astuḥ nityamaraviṃdalocanaḥ śreyase hi tu surārcitākṛtiḥ //
yasya pādasarasīruhāmṛtaṃ sevyamānamaniśaṃ munīśvaraiḥ

gopakai racitamallasaṃgaraṃ saṃgare jitavidagdhayauvanam //
ciṃtayāmi manasā sadaivataṃ daivataṃ nikhilayogināmapi

ullasannavapayodameva taṃ phūllatāmarasalocanāṃcalam //
ballavīhṛdayapaśyatoharaṃ pallavādharamupāsmahe vayam

yaddhanaṃjayarathasya maṇḍanaṃ khaṃḍanaṃ tadapi sañcitainasām //
jīvanaṃ śrutigirāṃ sadāmalaṃ śyāmalaṃ manasi me'stu tanmahaḥ

gopikāstanavilolalocanaprāṃtalocanaparaṃparāvṛtam //
bālakelirasalālasaṃ bhramaṃ mādhavaṃ tamaniśaṃ vibhāvaye

nīlakaṇṭhakṛtapicchaśekharaṃ nīlameghatulitāṃgavaibhavam //
nīlapaṃkajapalāśalocanaṃ nīlakuṃtaladharaṃ bhajāmahe

ghoṣayoṣidanugītavaibhavaṃ komalasvaritaveṇuniḥsvanam //
sārabhūtamabhirāmasaṃpadāṃ dhāma tāmarasalocanaṃ bhaje

mohanaṃ manasi śārṅgiṇaṃ paraṃ nirgataṃ kila vihāya māninīḥ //
nāradādimunibhiśca sevitaṃ naṃdagopatanayaṃ bhajāmahe

śrīharistu ramaṇībhirāvṛto yastu vai jayati rāsamaṇḍale //
rādhayā saha vane ca duḥkhitāstaṃ priyaṃ hi mṛgayāmahe vayam

devadeva vrajarājanandana dehi darśanamalaṃ ca no hare //
sarvaduḥkhaharaṇaṃ ca pūrvavatsaṃnirīkṣya tava śulkadāsikāḥ

kṣititaloddharaṇāya dadhāra yaḥ sakalayajñavarāhavapuḥ param //
ditisutaṃ vidadāra ca daṃṣṭrayā sa tu sadoddharaṇāya kṣamo'stu naḥ

manumatādrucijo divijaiḥ saha vasu dudoha dharāmapi yaḥ pṛthuḥ //
śrutimapād‌dhṛtamatsyavapuḥ paraṃ sa śaraṇaṃ kila no'stvaśubhakṣaṇe

avahadabdhimaho girimūrjitaṃ kamaṭharūpadharaḥ paramastu yaḥ //
asuharaṃ nṛhariḥ tamadaṃḍayatsa ca hariḥ paramaṃ śaraṇaṃ ca naḥ

nṛpa baliṃ chalayandalayannarīnmunijanānanugṛhya cacāra yaḥ //
kurupuraṃ ca halena vikarṣayanyaduvaraḥ sa gatirmama sarvathā

vrajapaśūngirirājamathoddharanvrajapagopajanaṃ ca jugopa yaḥ //
drupadarājasutāṃ kurukaśmalād‌bhavatu taccaraṇābjaratiśca naḥ

viṣamahāgnimahāstravipad‌gaṇātsakalapāṃḍusutāḥ parirakṣitāḥ //
yaduvareṇa pareṇa ca yena vai bhavatu taccaraṇaḥ śaraṇaṃ ca naḥ

mālāṃ barhimanojñakuntalabharāṃ vanyaprasūnoṣitāṃ
śaileyāguruklṛptacitratilakāṃ śaśvanmanohāriṇīm //
līlāveṇuravāmṛtaikarasikāṃ lāvaṇyalakṣmīmayīṃ
bālāṃ bālatamālanīlavapuṣaṃ vaṃdāmahe devatām

garga uvāca -
iti strībhī rudaṃtībhī revatīramaṇānujaḥ //
āvirbabhūva cāhūtastāsāṃ madhye ca bhaktitaḥ

iti śrīgargasaṃhitāyāṃ hayamedhakhaṇḍe
rāsakrīḍāyāṃ pañcacatvāriṃśo'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā