ગર્ગસંહિતા · અધ્યાય 10.45

અશ્વમેધખણ્ડઃ - પઞ્ચચત્વારિંશોઽધ્યાયઃ
રાસક્રીડા -
ગોપ્ય ઊચુઃ
અધરબિમ્બવિડંબિતવિદ્રુમં મધુરવેણુનિનાદવિનોદિતમ્ ॥
કમલકોમલનીલમુખાંબુજં તમપિ ગોપકુમારમુપાસ્મહે

શ્યામલં વિપિનકેલિલમ્પટં કોમલં કમલપત્રલોચનમ્ ॥
કામદં વ્રજવિલાસિનીદૃશાં શીતલં મતિહરં ભજામહે

તં વિસંચલિતલોચનાંચલં સામિકુડ્‌મલિતકોમલાધરમ્ ॥
વંશવલ્ગિતકરાંગુલીમુખં વેણુનાદરસિકં ભજામહે

ઈષદંકુરિતદંતકુંડલં ભૂષણં ભુવનમંગલશ્રિયમ્ ॥
ઘોષસૌરભમનોહરં હરેર્વેષમેવ મૃગયામહે વયમ્

અસ્તુઃ નિત્યમરવિંદલોચનઃ શ્રેયસે હિ તુ સુરાર્ચિતાકૃતિઃ ॥
યસ્ય પાદસરસીરુહામૃતં સેવ્યમાનમનિશં મુનીશ્વરૈઃ

ગોપકૈ રચિતમલ્લસંગરં સંગરે જિતવિદગ્ધયૌવનમ્ ॥
ચિંતયામિ મનસા સદૈવતં દૈવતં નિખિલયોગિનામપિ

ઉલ્લસન્નવપયોદમેવ તં ફૂલ્લતામરસલોચનાંચલમ્ ॥
બલ્લવીહૃદયપશ્યતોહરં પલ્લવાધરમુપાસ્મહે વયમ્

યદ્ધનંજયરથસ્ય મણ્ડનં ખંડનં તદપિ સઞ્ચિતૈનસામ્ ॥
જીવનં શ્રુતિગિરાં સદામલં શ્યામલં મનસિ મેઽસ્તુ તન્મહઃ

ગોપિકાસ્તનવિલોલલોચનપ્રાંતલોચનપરંપરાવૃતમ્ ॥
બાલકેલિરસલાલસં ભ્રમં માધવં તમનિશં વિભાવયે

નીલકણ્ઠકૃતપિચ્છશેખરં નીલમેઘતુલિતાંગવૈભવમ્ ॥
નીલપંકજપલાશલોચનં નીલકુંતલધરં ભજામહે

ઘોષયોષિદનુગીતવૈભવં કોમલસ્વરિતવેણુનિઃસ્વનમ્ ॥
સારભૂતમભિરામસંપદાં ધામ તામરસલોચનં ભજે

મોહનં મનસિ શાર્ઙ્ગિણં પરં નિર્ગતં કિલ વિહાય માનિનીઃ ॥
નારદાદિમુનિભિશ્ચ સેવિતં નંદગોપતનયં ભજામહે

શ્રીહરિસ્તુ રમણીભિરાવૃતો યસ્તુ વૈ જયતિ રાસમણ્ડલે ॥
રાધયા સહ વને ચ દુઃખિતાસ્તં પ્રિયં હિ મૃગયામહે વયમ્

દેવદેવ વ્રજરાજનન્દન દેહિ દર્શનમલં ચ નો હરે ॥
સર્વદુઃખહરણં ચ પૂર્વવત્સંનિરીક્ષ્ય તવ શુલ્કદાસિકાઃ

ક્ષિતિતલોદ્ધરણાય દધાર યઃ સકલયજ્ઞવરાહવપુઃ પરમ્ ॥
દિતિસુતં વિદદાર ચ દંષ્ટ્રયા સ તુ સદોદ્ધરણાય ક્ષમોઽસ્તુ નઃ

મનુમતાદ્રુચિજો દિવિજૈઃ સહ વસુ દુદોહ ધરામપિ યઃ પૃથુઃ ॥
શ્રુતિમપાદ્‌ધૃતમત્સ્યવપુઃ પરં સ શરણં કિલ નોઽસ્ત્વશુભક્ષણે

અવહદબ્ધિમહો ગિરિમૂર્જિતં કમઠરૂપધરઃ પરમસ્તુ યઃ ॥
અસુહરં નૃહરિઃ તમદંડયત્સ ચ હરિઃ પરમં શરણં ચ નઃ

નૃપ બલિં છલયન્દલયન્નરીન્મુનિજનાનનુગૃહ્ય ચચાર યઃ ॥
કુરુપુરં ચ હલેન વિકર્ષયન્યદુવરઃ સ ગતિર્મમ સર્વથા

વ્રજપશૂન્ગિરિરાજમથોદ્ધરન્વ્રજપગોપજનં ચ જુગોપ યઃ ॥
દ્રુપદરાજસુતાં કુરુકશ્મલાદ્‌ભવતુ તચ્ચરણાબ્જરતિશ્ચ નઃ

વિષમહાગ્નિમહાસ્ત્રવિપદ્‌ગણાત્સકલપાંડુસુતાઃ પરિરક્ષિતાઃ ॥
યદુવરેણ પરેણ ચ યેન વૈ ભવતુ તચ્ચરણઃ શરણં ચ નઃ

માલાં બર્હિમનોજ્ઞકુન્તલભરાં વન્યપ્રસૂનોષિતાં
શૈલેયાગુરુક્લૃપ્તચિત્રતિલકાં શશ્વન્મનોહારિણીમ્ ॥
લીલાવેણુરવામૃતૈકરસિકાં લાવણ્યલક્ષ્મીમયીં
બાલાં બાલતમાલનીલવપુષં વંદામહે દેવતામ્

ગર્ગ ઉવાચ -
ઇતિ સ્ત્રીભી રુદંતીભી રેવતીરમણાનુજઃ ॥
આવિર્બભૂવ ચાહૂતસ્તાસાં મધ્યે ચ ભક્તિતઃ

ઇતિ શ્રીગર્ગસંહિતાયાં હયમેધખણ્ડે
રાસક્રીડાયાં પઞ્ચચત્વારિંશોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા