Garga Samhita · Chapter 1.16

śrīkṛṣṇa-rādhikā vivāhavarṇanam
śrīnārada uvāca -
gāścārayan nandanamaṅkadeśe
saṃlālayan dūratamaṃ sakāśāt /
kaliṃdajātīrasamīrakaṃpitaṃ
naṃdo'pi bhāṃḍīravanaṃ jagāma

kṛṣṇecchayā vegataro'tha vāto
ghanairabhūnmeduramaṃbaraṃ ca /
tamālanīpadrumapallavaiśca
patad‌bhirejad‍‌bhiratīva bhāḥ kau

tadāṃdhakāre mahati prajāte
bāle rudatyaṃkagate'tibhīte /
naṃdo bhayaṃ prāpa śiśuṃ sa bibhra-
ddhariṃ pareśaṃ śaraṇaṃ jagāma

tadaiva koṭyarkasamūhadīpti-
rāgacchatīvācalatī diśāsu /
babhūva tasyāṃ vṛṣabhānuputrīṃ
dadarśa rādhāṃ navanaṃdarājaḥ

koṭīṃdubiṃbadyutimādadhānāṃ
nīlāṃbarāṃ suṃdaramādivarṇām /
maṃjīradhīradhvaninūpurāṇā-
mābibhratīṃ śabdamatīva maṃjum

kāṃcīkalākaṃkaṇaśabdamiśrāṃ
hārāṃgulīyāṃgadavisphuraṃtīm /
śrīnāsikāmauktikahaṃsikībhiḥ
śrīkaṃṭhacūḍāmaṇikuṃḍalāḍhyām

tattejasā dharṣita āśu naṃdo
natvātha tāmāha kṛtāṃjaliḥ san /
ayaṃ tu sākṣātpuruṣottamastvaṃ
priyāsya mukhyāsi sadaiva rādhe

guptaṃ tvidaṃ gargamukhena vedmi
gṛhāṇa rādhe nijanāthamaṃkāt /
enaṃ gṛhaṃ prāpaya meghabhītaṃ
vadāmi cetthaṃ prakṛterguṇāḍhyam

namāmi tubhyaṃ bhuvi rakṣa māṃ tvaṃ
yathepsitaṃ sarvajanairdurāpam /
śrīrādhovāva -
ahaṃ prasannā tava bhaktibhavā-
nmaddarśanaṃ durlabhameva naṃda

śrīnaṃda uvāca -
yadi prasannāsi tadā bhavenme
bhaktirdṛḍhā kau yuvayoḥ padābje /
satāṃ ca bhaktistava bhaktibhājāṃ
saṃgaḥ sadā me'tha yuge yuge ca

śrīnārada uvāca -
tathāstu coktvātha hariṃ karābhyāṃ
jagrāha rādhā nijanāthamaṃkāt /
gate'tha naṃde praṇate vrajeśe
tadā hi bhāṃḍīravanaṃ jagāma

golokalokācca purā samāgatā
bhūmirnijaṃ svaṃ vapurādadhānā /
yā padmarāgādikhacitsuvarṇā
babhūva sā tatkṣaṇameva sarvā

vṛṃdāvanaṃ divyavapurdadhānaṃ
vṛkṣairvaraiḥ kāmadughaiḥ sahaiva /
kaliṃdaputrī ca suvarṇasaudhaiḥ
śrīrat‍nasopānamayī babhūva

govardhano rat‍naśilāmayo'bhū-
tsuvarṇaśṛṅgaiḥ paritaḥ sphurad‌bhiḥ /
mattālibhirnirjharasuṃdarībhi-
rdarībhiruccāṃgakarīva rājan

tadā nikuṃjo'pi nijaṃ vapurdadha-
tsabhāyutaṃ prāṃgaṇadivyamaṃḍapam /
vasaṃtamādhuryadharaṃ madhuvratai-
rmayūrapārāvatakokiladhvanim

suvarṇarat‍nādikhacitpaṭairvṛtaṃ
patatpatākāvalibhirvirājitam /
saraḥ sphurad‌bhirbhramarāvalīḍhitai-
rvicarcitaṃ kāṃcanacārupaṃkajaiḥ

tadaiva sākṣātpuruṣottamottamo
babhūva kaiśoravapurghanaprabhaḥ /
pītāṃbaraḥ kaustubharat‍nabhūṣaṇo
vaṃśīdharo manmatharāśimohanaḥ

bhujena saṃgṛhya hasanpriyāṃ hari-
rjagāma madhye suvivāhamaṃḍapam /
vivāhasaṃbhārayutaḥ samekhalaṃ
sadarbhamṛd‌vārighaṭādimaṃḍitam

tatraiva siṃhāsana ud‌gate vare
parasparaṃ saṃmilitau virejatuḥ /
paraṃ bruvaṃtau madhuraṃ ca daṃpatī
sphuratprabhau khe ca taḍid‌ghanāviva

tadāṃbarād‌devavaro vidhiḥ prabhuḥ
samāgatastasya parasya saṃmukhe /
natvā tadaṃghrī hyuśatī girābhiḥ
kṛtāñjaliścāru caturmukho jagau

śrībrahmovāca -
anādimādyaṃ puruṣottamottamaṃ
śrīkṛṣṇacandraṃ nijabhaktavatsalam /
svayaṃ tvasaṃkhyāṃḍapatiṃ parātparaṃ
rādhāpatiṃ tvāṃ śaraṇaṃ vrajāmyaham

golokanāthastvamatīva līlo
līlāvatīyaṃ nijalokalīlā /
vaikuṃṭhanātho'si yadā tvameva
lakṣmīstadeyaṃ vṛṣabhānujā hi

tvaṃ rāmacaṃdro janakātmajeyaṃ
bhūmau haristvaṃ kamalālayeyam /
yajñāvatāro'si yadā tadeyaṃ
śrīdakṣiṇā strī pratipat‍nimukhyā

tvaṃ nārasiṃho'si ramā tadeyaṃ
nārāyaṇastvaṃ ca nareṇa yuktaḥ /
tadā tviyaṃ śāṃtiratīva sākṣā-
cchāyeva yātā ca tavānurūpā

tvaṃ brahma ceyaṃ prakṛtistaṭasthā
kālo yademāṃ ca viduḥ pradhānām /
mahānyadā tvaṃ jagadaṃkuro'si
rādhā tadeyaṃ saguṇā ca māyā

yadāṃtarātmā viditaścaturbhi-
stadā tviyaṃ lakṣaṇarūpavṛttiḥ /
yadā virāḍ‍dehadharastvameva
tadākhilaṃ vā bhuvi dhāraṇeyam

śyāmaṃ ca gauraṃ viditaṃ dvidhā maha-
stavaiva sākṣātpuruṣottamottama /
golokadhāmādhipatiṃ pareśaṃ
parātparaṃ tvāṃ śaraṇaṃ vrajāmyaham

sadā paṭhedyo yugalastavaṃ paraṃ
golokadhāmapravaraṃ prayāti saḥ /
ihaiva sauṃdaryasamṛddhisiddhayo
bhavaṃti tasyāpi nisargataḥ punaḥ

yadā yuvāṃ prītiyutau ca daṃpatī
parātparau tāvanurūparūpitau /
tathāpi lokavyavahārasaṅgrahā-
dvidhiṃ vivāhasya tu kārayāmyaham

śrīnārada uvāca -
tadā sa utthāya vidhirhutāśanaṃ
prajvālya kuṃḍe sthitayostayoḥ puraḥ /
śruteḥ karagrāhavidhiṃ vidhānato
vidhāya dhātā samavasthito'bhavat

sa vāhayāmāsa hariṃ ca rādhikāṃ
pradakṣiṇaṃ saptahiraṇyaretasaḥ /
tataśca tau taṃ praṇamayya vedavi-
ttau pāṭhayāmāsa ca saptamaṃtrakam

tato harervakṣasi rādhikāyāḥ
karaṃ ca saṃsthāpya hareḥ karaṃ punaḥ /
śrīrādhikāyāḥ kila pṛṣṭhadeśake
saṃsthāpya maṃtrāṃśca vidhiḥ prapāṭhayan

rādhā karābhyāṃ pradadau ca mālikāṃ
kiṃjalkinīṃ kṛṣṇagale'linādinīm /
hareḥ karābhyāṃ vṛṣabhānujā gale /
tataśca vahniṃ praṇamayya vedavit

saṃvāsayāmāsa supīṭhayośca tau
kṛtāṃjalī maunayutau pitāmahaḥ /
tau pāṭhayāmāsa tu paṃcamaṃtrakaṃ
samarpya rādhāṃ ca piteva kanyakām

puṣpāṇi devā vavṛṣustadā nṛpa
vidyādharībhirnanṛtuḥ surāṃganāḥ /
gaṃdharvavidyādharacāraṇāḥ kalaṃ
sakinnarāḥ kṛṣṇasumaṃgalaṃ jaguḥ

mṛdaṃgavīṇāmuruyaṣṭiveṇavaḥ
śaṃkhānakā duṃdubhayaḥ satālakāḥ /
nedurmuhurdevavarairdivi sthitai-
rjayetyabhūnmaṅgalaśabdamuccakaiḥ

uvāca tatraiva vidhiṃ hariḥ svayaṃ
yathepsitaṃ tvaṃ vada vipra dakṣiṇām /
tadā hariṃ prāha vidhiḥ prabho me
dehi tvadaṃghryornijabhaktidakṣiṇām

tathāstu vākyaṃ vadato vidhirhareḥ
śrīrādhikāyāśca padadvayaṃ śubham /
natvā karābhyāṃ śirasā punaḥ puna-
rjagāma gehaṃ praṇataḥ praharṣitaḥ

tato nikuṃjeṣu caturvidhānnaṃ
divyaṃ manojñaṃ priyayā pradattam /
jaghāsa kṛṣṇaḥ prahasanparātmā
kṛṣṇena dattaṃ kramukaṃ ca rādhā

tataḥ kareṇāpi karaṃ priyāyā
harirgṛhītvā pracacāla kuṃje /
jagāma jalpanmadhuraṃ prapaśyan
vṛṃdāvanaṃ śrīyamunāṃ latāśca

śrīmallatākuṃjanikuṃjamadhye
nilīyamānaṃ prahasaṃtameva /
vilokya śākhāṃtaritaṃ ca rādhā
jagrāha pītāṃbaramāvrajaṃtī

dudrāva rādhā harihastapadmā
jhaṃkāramaṃghryoḥ pratikurvatī kau /
nilīyamānā yamunānikuṃje
punarvrajaṃtī harihastamātrāt

yathā tamālaḥ kaladhautavallyā
ghano yathā caṃcalayā cakāsti /
nīlo'drirājo nikaṣāśmakhanyā
śrīrādhayā''dyastu tayā ramaṇyā

śrīrāsaraṃge janavarjite pare
reme harī rāsarasena rādhayā /
vṛṃdāvane bhṛṅgamayūrakūja-
llate caratyeva ratīśvaraḥ paraḥ

śrīrādhayā kṛṣṇahariḥ parātmā
nanarta govarddhanakaṃdarāsu /
mattāliṣu prasravaṇaiḥ sarobhi-
rvirājitāsu dyutimallatāsu

cakāra kṛṣṇo yamunāṃ sametya
varaṃ vihāraṃ vṛṣabhānuputryā /
rādhākarāllakṣadalaṃ sapadmaṃ
dhāvangṛhītvā yamunājaleṣu

rādhā hareḥ pītapaṭaṃ ca vaṃśīṃ
vetraṃ gṛhītvā sahasā hasaṃtī /
dehīti vaṃśīṃ vadato hareśca
jagāda rādhā kamalaṃ nu dehi

tasyai dadau devavaro'tha padmaṃ
rādhā dadau pītataṭaṃ ca vaṃśīm /
vetraṃ ca tasmai haraye tayoḥ puna-
rbabhūva līlā yamunātaṭeṣu

tataśca bhāṃḍīravane priyāyā-
ścakāra śṛṅgāramalaṃ manojñam /
patrāvalīyāvakakajjalādyaiḥ
puṣpaiḥ surat‍nairvrajagoparat‍naḥ

hareśca śṛṅgāramalaṃ prakartuṃ
samudyatā tatra yadā hi rādhā /
tadaiva kṛṣṇastu babhūva bālo
vihāya kaiśoravapuḥ svayaṃ hi

naṃdena dattaṃ śiśumeva yādṛśaṃ
bhūmau luṭhaṃtaṃ prarudaṃtamāyayau /
hariṃ vilokyāśu ruroda rādhikā
tanoṣi māyāṃ nu kathaṃ hare mayi

itthaṃ rudaṃtīṃ sahasā viṣaṇṇā-
mākāśavāgāha tadaiva rādhām /
śocaṃ nu rādhe iha mā kuru tvaṃ
manorathaste bhaviyā hi paścāt

śrutvātha rādhā hi hariṃ gṛhītvā
gatā''śu gehe vrajarājapat‍nyāḥ /
dattvā ca bālaṃ kila naṃdapat‍nyā
uvāca dattaḥ pathi te ca bhartrā

uvāca rādhāṃ nṛpa naṃdagehinī
dhanyā'si rādhe vṛṣabhānukanyake /
tvayā śiśurme parirakṣito bhayā-
nmeghāvṛte vyomni bhayāturo vane

saṃpūjitā ślāghitasad‌guṇā sā
sunaṃditā śrīvṛṣabhānuputrī /
tadā hyanujñāpya yaśomatīṃ sā
śanaiḥ svagehaṃ hi jagāma rādhā

itthaṃ harerguptakathā ca varṇitā
rādhāvivāhasya sumaṃgalāvṛtā /
śrutvā ca yairvā paṭhitā ca pāṭhitā
tānpāpavṛndā na kadā spṛśaṃti

iti śrīgargasaṃhitāyāṃ golokakhaṇḍe nāradabahulāśvasaṃvāde
śrīrādhikāvivāhavarṇanaṃ nāma ṣoḍaśo'dhyāyaḥ