Garga Samhita · Chapter 1.11

kṛṣṇacandrajanmavarṇanam
śrīnārada uvāca -
paripūrṇatamaḥ sākṣācchrīkṛṣṇo bhagavān svayam /
viveśa vasudevasya manaḥ pūrvaṃ parātparaḥ

sūryenduvahnisaṃkāśo vasudevo mahāmanāḥ /
babhūvātyantamahasā sākṣād‌yajña ivāparaḥ

devakyāmāgate kṛṣṇe sarveṣāmabhayaṃkare /
rarāja tena sā gehe ghane saudāminī yathā

tejovatīṃ ca tāṃ vīkṣya kaṃsaḥ prāha bhayāturaḥ /
prāpto'yaṃ prāṇahantā me pūrvameṣā na cedṛśī

jātamātraṃ haniṣyāmītyuktvā''ste bhayavihvalaḥ /
paśyansarvatra ca hariṃ pūrvaśatruṃ vicintayan

aho vairānubandhena sākṣātkṛṣṇo'pi dṛśyate /
tasmādvairaṃ prakurvanti kṛṣṇaprāptyarthamāsurāḥ

atha brahmādayo devā munīndrairasmadādibhiḥ /
śaurigehopari prāptāḥ stavaṃ cakruḥ praṇamya tam

devā ūcuḥ -
yajjāgarādiṣu bhaveṣu paraṃ hyahetu-
rhetuḥ svidasya vicaranti guṇāśrayeṇa /
naitadviśanti mahadindriyadevasaṃghā-
stasmai namo'gnimiva vistṛtavisphuliṃgāḥ

naiveśituṃ prabhurayaṃ balināṃ balīyān
māyā na śabda uta no viṣayīkaroti /
tad‌brahma pūrṇamamṛtaṃ paramaṃ praśāntaṃ
śuddhaṃ parātparataraṃ śaraṇaṃ gatāḥ smaḥ

aṃśāṃśakāṃśakakalādyavatāravṛndai-
rāveśapūrṇasahitaiśca parasya yasya /
sargādayaḥ kila bhavanti tameva kṛṣṇaṃ
pūrṇātparaṃ tu paripūrṇatamaṃ natāḥ smaḥ

manvantareṣu ca yugeṣu gatāgateṣu
kalpeṣu cāṃśakalayā svavapurbibharṣi /
adyaiva dhāma paripūrṇatamaṃ tanoṣi
dharmaṃ vidhāya bhuvi maṃgalamātanoṣi

yad‌durlabhaṃ viśadayogibhirapyagamyaṃ
gamyaṃ dravad‌bhiramalāśayabhaktiyogaiḥ /
ānaṃdakaṃda caratastava mandayānaṃ
pādāravindamakarandarajo dadhāmaḥ

pūrvaṃ tathātra kamanīyavapuṣmayaṃ tvāṃ
kaṃdarpakoṭiśatamohanamad‌bhutaṃ ca /
golokadhāmadhiṣaṇadyutimādadhānaṃ
rādhāpatiṃ dharaṇidhuryadhanaṃ dadhāmaḥ

śrīnārada uvāca -
natvā hariṃ tadā devā brahmādyā munibhiḥ saha /
gāyantastaṃ praśaṃsantaḥ svadhāmāni yayurmudā

atha maithilarājendra janmakāle hareḥ sati /
aṃbaraṃ nirmalaṃ bhūtaṃ nirmalāśca diśo daśa

ujjvalāstārakā jātāḥ prasannaṃ bhūmimaṃḍalam /
nadā nadyaḥ samudrāśca prasannāpaḥ sarovarāḥ

sahasradalapadmāni śatapatrāṇi sarvataḥ /
vicakāni marutsparśaiḥ patad‌gandhirajāṃsi ca

teṣu nedurmadhukarā nadantaścitrapakṣiṇaḥ /
śītalā mandayānāśca gaṃdhāktā vāyavo vavuḥ

ṛddhā janapadā grāmā nagarā maṃgalāyanāḥ /
devā viprā nagā gāvo babhūvuḥ sukhasaṃvṛtāḥ

devadundubhayo nedurjayadhvanisamākulāḥ /
yatra tatra mahārāja sarveṣāṃ maṃgalaṃ param

vidyādharāśca gaṃdharvāḥ siddhakinnaracāraṇāḥ /
jaguḥ sunāyakā devāstuṣṭuvuḥ stutibhiḥ param

nanṛturdivi gandharvā vidyādharyyo mudānvitāḥ /
pārijātakamandāramālatīsumanāṃsi ca

mumucurdevamukhyāśca garjantaśca ghanā jale /
bhādre budhe kṛṣṇapakṣe dhātrarkṣe harṣaṇe vṛṣe /
karṇe'ṣṭamyāmarddharātre nakṣatreśamahodaye

andhakārāvṛte kāle devakyāṃ śaurimandire /
āvirāsīddhariḥ sākṣādaraṇyāmadhvare'gnivat

sphuradakṣavicitrahāriṇaṃ
vilasatkaustubharat‍nadhāriṇam /
paridhidyutinūpurāṃgadaṃ
dhṛtabālārkakirīṭakuṃḍalam

caladad‌bhutavanhikaṃkaṇaṃ
taḍidūrjitaguṇamekhalāñcitam /
madhubhṛd‌dhvanipadmamālinaṃ
navajāṃbūnadadivyavāsasam

sataḍit‌ghanadivyasaubhagaṃ
calanīlālakavṛndabhṛnmukham /
caladaṃśu tamoharaṃ paraṃ
śubhadaṃ sundaramaṃbujekṣaṇam

kṛtapatravicitramaṃḍanaṃ
satataṃ koṭimanojamohanam /
paripūrṇatamaṃ parātparaṃ
kalaveṇudhvanivādyatatparam

tamavekṣya sutaṃ yadūttamo
harijanmotsavaphullalocanaḥ /
atha viprajaneṣu cāśu vai
niyutaṃ sanmanasā gavāṃ dadau

harimānakaduṃdubhiḥ stavaiḥ
stavanaṃ taṃ praṇipatya vismitaḥ /
akaroduditaprabhūdayo
gatabhīḥ sūtigṛhe kṛtāṃjaliḥ

śrīvasudeva uvāca -
eko yaḥ prakṛtiguṇairanekadhāsi
hartā tvaṃ janaka utāsya pālakastvam /
nirliptaḥ sphaṭika ivādya dehavarṇai-
stasmai śrībhuvanapate namāmi tubhyam

edhaḥsu tvanala ivātra vartamāno
yo‍'ntastho bahirapi cāmbaraṃ yathā hi /
ādhāro dharaṇirivāsya sarvasākṣī
tasmai te nama iva sarvago nabhasvān

bhūbhārod‌bhaṭaharaṇārthameva jāto
godevadvijanijavatsapālako'si /
gehe me bhuvi puruṣottamottamastvaṃ
kaṃsānmāṃ bhuvanapate prapāhi pāpāt

śrīnārada uvāca -
paripūrṇatamaṃ sākṣācchrīkṛṣṇaṃ śyāmasundaram /
jñātvā natvātha taṃ prāha devakī sarvadevatā

śrīdevakyuvāca -
he kṛṣṇa he vigaṇitāṇḍapate pareśa
golokadhāmadhiṣaṇadhvaja ādideva /
pūrṇeśa pūrṇa paripūrṇatama prabho māṃ
tvaṃ pāhi parameśvara kaṃsapāpāt

śrīnārada uvāca -
tacchrutvā bhagavānkṛṣṇaḥ paripūrṇatamaḥ svayam /
sasmito devakīṃ śauriṃ prāha sa vṛjinārdanaḥ

śrībhagavānuvāca -
iyaṃ ca pṛśniḥ patidevatā ca
tvaṃ pūrvasarge sutapā prajārthī /
brahmājñayā divyatapo yuvābhyāṃ
kṛtaṃ paraṃ nirjalabhojanābhyām

kāleṣu manvantarake vyatīte
tapaḥ paraṃ tattapasaḥ prajārthī /
tadā prasanno yuvayorabhūvaṃ
varaṃ paraṃ brūta mayā tadoktam

śrutvā yuvābhyāṃ kathitaṃ tadaiva
bhūyātsutastvatsadṛśaḥ kilāvayoḥ /
tathāstu coktvātha gate mayi prajā-
patī hyabhūta svakṛtena dampatī

na matsamaḥ ko'pi suto jagatyalaṃ
vicārya tadvāmabhavaṃ pareśvaraḥ /
śrīpṛśnigarbho bhuvi viśrutaḥ puna-
rdvitīyakāle'hamupendravāmanaḥ

tathā'bhavaṃ hyadyatame parātparo
nītvā'tha māṃ prāpaya nandamandiram
ato na bhūyād‌bhayamaugrasenataḥ
sutāṃ samādāya sukhī bhaviṣyathaḥ

śrīnārada uvāca -
tūṣṇīṃ bhūtvā haristatra tad‌bhūyaḥ paśyatostayoḥ /
dṛśyaṃ hyaprakaṭaṃ kṛtvā bālo'bhūtkau yathā naṭaḥ

preṃkhe dhṛtvā'tha taṃ śauriryāvad‌gantuṃ samudyataḥ /
tavād‌vraje nandapat‍nyāṃ yogamāyā'jani svataḥ

tayā śayāne viśvasmin rakṣakeṣu svapatsu ca /
dvāra ud‌ghāṭitāḥ sarvāḥ prasphuṭacchṛṅ‌khalārgalāḥ

nirgate vasudeve ca mūrdhni śrīkṛṣṇaśobhite /
sūryodaye yathā sadyastamonāśo'bhavatsvataḥ

ghaneṣu vyomni varṣatsu sahasravadanaḥ svarāṭ /
nivārayandīrghaphaṇairāsāraṃ śaurimanvagāt

ūrmyāvartākulāvegaiḥ siṃhasarpādivāhinī /
sadyo mārgaṃ dadau tasmai kālindī saritāṃ varā

nandavrajaṃ sametyāsau prasuptaṃ sarvataḥ param /
śiśuṃ yaśodāśayane nidhāyāśu dadarśa tām

tatsutāṃ samupādāya punargehājjagāma saḥ /
tīrtvā śrīyamunāṃ śauriḥ svāgāre pūrvavatsthitaḥ

sutaṃ sutāṃ vā jātaṃ cājñātvā gopī yaśomatī /
pariśrāntā svaśayane suṣvāpānandanidrayā

atha bāladhvaniṃ śrutvā rakṣakāḥ samupasthitāḥ /
ūcuḥ kaṃsāya vīrāya gatvā tad‌rājamandiram

sūtīgṛhaṃ tvaraṃ prāgātkaṃso vai bhayakātaraḥ /
svasātha bhrātaraṃ prāha rudatī dīnavatsatī

śrīdevakyuvāca -
sutāmekāṃ dehi me tvaṃ putreṣu pramṛteṣu ca /
striyaṃ hantuṃ na yogyo'si bhrātastvaṃ dīnavatsalaḥ

te'nujāhaṃ hatasutā kārāgāre nipātitā /
dātumarhasi kalyāṇa kalyāṇīṃ tanujāṃ ca me

śrīnārada uvāca -
aśrumukhyā mohitayā samācchādyātmajāṃ bahu /
prārthito'ṅ‌kādvinirbhartsya tāṃ sa ācicchide khalaḥ

kusaṅganirataḥ pāpaḥ khalo yadukulādhamaḥ /
svasuḥ sutāṃ śilāpṛṣṭhe gṛhītvāṃghryornyapātayat

kaṃsahastātsamutpatya tvaraṃ sā cāṃbare gatā /
śatapatre rathe divye sahasrahayasevite

cāmarāṃdolite śubhre sthitādṛśyata divyadṛk /
sāyudhāṣṭabhujā māyā pārṣadaiḥ parisevitā /
śatasūryapratīkāśā kaṃsamāha ghanasvanā

śrīyogamāyovāca -
paripūrṇatamaḥ sākṣācchrīkṛṣṇo bhagavān svayam /
jātaḥ kva vā tu te hantā vṛthā dīnāṃ dunoṣi vai

śrīnārada uvāca -
ityuktvā taṃ tato devī gatā vindhyācale girau /
yogamāyā bhagavatī bahunāmā babhūva ha

atha kaṃso vismito'bhūcchrutvā māyāvacaḥ param /
devakīṃ vasudevaṃ ca mocayāmāsa bandhanāt

kaṃsa uvāca -
pāpo'haṃ pāpakarmāhaṃ khalo yadukulādhamaḥ /
yuṣmatputraprahantāraṃ kṣamadhvaṃ me kṛtaṃ bhuvi

he svasaḥ śṛṇu me śaure manye kālakṛtaṃ tvidam /
yena niścālyamāno vā vāyuneva ghanāvaleḥ

viśvasto'haṃ devavākye devāste'pi mṛṣāgiraḥ /
na jānāmi kva me śatrurjātaḥ kau kathito'nayā

śrīnārada uvāca -
itthaṃ kaṃsastadaṃghryośca patito'śrumukho rudan /
cakāra sevāṃ paramāṃ sauhṛdaṃ darśayaṃstayoḥ

aho śrīkṛṣṇacandrasya paripūrṇatamaprabhoḥ /
dānadakṣaiḥ kaṭākṣaiśca kinna syād‌bhūmimaṃḍale

prātaḥkāle tadā kaṃsaḥ pralaṃbādīnmahāsurān /
samāhūya khalastebhyo'vadaduktaṃ ca māyayā

kaṃsa uvāca -
jāto me hyaṃtakṛtad‌bhūmau kathito yogamāyayā /
anirdaśānnirdaśāṃśca śiśūnyūyaṃ haniṣyatha

daityā ūcuḥ -
sajjasya dhanuṣo yuddhe bhavatā dvaṃdvayodhinā /
ṭaṃkāreṇod‌gatā devā manyase taiḥ kathaṃ bhayam

goviprasādhuśrutayo devā dharmādayaḥ pare /
viṣṇośca tanavo hyeṣāṃ nāśe daityabalaṃ smṛtam

jāto yadi mahāviṣṇuste śatruryo mahītale /
ayaṃ caitad‌vadhopāyo gavādīnāṃ vihiṃsanam

itthaṃ mahod‌bhaṭā duṣṭā daiteyāḥ kaṃsanoditāḥ /
dudruvuḥ khaṃ gavādibhyo jaghnurjātāṃśca bālakān

āsamudrād‌bhūmitale viśaṃtaśca gṛhe gṛhe /
kāmarūpadharā daityāśceruḥ sarpā ivābhavan

utpathā ud‌bhaṭā daityāstatrāpi kaṃsanoditāḥ /
kapiḥ surāpo'lihato bhūtagrasta ivābhavan

vaideha maithila narendra upendrabhakta
dharmiṣṭhamukhya sutapo janaka pratāpin /
etatsatāṃ ca bhuvi helanamaṃga rājan
sarvaṃ chinatti bahulāśva catuṣpadārthān

iti śrīgargasaṃhitāyāṃ golokakhaṇḍe nāradabahulāśvasaṃvāde
śrīkṛṣṇacandrajanmavarṇanaṃ nāma ekādaśo'dhyāyaḥ