Garbhāvakrāntyavadāna · Chapter 10

campopānte vimalanalinītīraparyantavasī
śāstā pūrvaṃ sakalabhuvanānugrahāya pravṛttah /
pṛṣṭaḥ sparśāvagatirucinā (?) bhikṣuṇānandanāmnā
garbhārambhāt prabhṛti janatājanmavṛttiṃ jagāda

śuklaiḥ kṛṣṇaiḥ śabalarucibhir dehināṃ karmasūtraiś
citraṃ loke bahutaradaśaṃ dṛśyate janmavastram /
jīrṇasyāpi vyasanamalinasnehalīnaḥ prayatnair
yasyātyantaṃ cirapariṇater naiva niryāti rāgaḥ

puṃsaḥ śukraṃ vigalitadhṛter ārtavaṃ yoṣitaś ca
sparśāveśavyatikarajuṣoḥ saṃgame saṃnipātāt /
ekībhūtaṃ vrajati niyamāt kasya cid bījabhāvaṃ
yo 'ntas tasmin bhavati sahasā saṃnikāṣe yathāgniḥ

rāgodgāraḥ sphaṭikaśakalaṃ megham ambhodhipāthaḥ
puṣpāmodas tilaṃ iva śanaiḥ kāñcanaṃ vāgnitāpaḥ /
so 'yaṃ garbhaṃ viśati niyatair apy asaṃlakṣyavṛttir
vāyur gandhair iva bahuvidhaiḥ karmabhir vāsyamānaḥ

tasmin sūkṣmakramapariṇatir mīnaparyuṣṭake (?) 'sau
nānākārapracuraracanācitrarūpo 'py alakṣyaḥ /
kaṃ cit kālaṃ vahati vikṛtiṃ nirvikārāyamāno
māyūrāṇḍe jalamaya iva vyaktabhaktir mayūraḥ

tatrādhānād ghanakalalatāśalyapeśyādyavasthās
tyaktvā tās tā jaṭharajanitenoṣmaṇā pacyamānaḥ /
pūrṇair māsair navabhir athavāvartakarmakramo 'sau
kleśaṃ bhuṅkte kim api viṣamaṃ duḥkhasaṃjñāprapannaḥ

kāle vṛntāt svayaṃ iva phalaṃ vicyutaṃ karmapākāt
tatkālotthair avihatajavaiḥ preritaḥ pūtivātaiḥ /
lakṣyābhyāsāyatanasacivair ācitaḥ karmabandhair
niryāty antaḥ śara iva dhanuryantraṇair yantramuktaḥ

uttānāsyaḥ saralarasanaś cūcukāgraṃ lihānaḥ
stanyaṃ mātuḥ pibati yad asau naiva karṇena nākṣṇā / janmābhyāsavyasanayatanāyāsasaṃvāsalinā
sā tasyāgre sakalakalanādeśini vāsanaiva

syūtair antar vividhaviṣayasvādasaṃpādabhedair
vyāptaḥ sūtair (?) bisalava iva vyaktatantupratānaiḥ /
mūdhaḥ so 'tha prakṛtisacivair indriyair dattasamjñaḥ
stanyālāpākṛtiparimalasparśanair vetti dhātrīm

hastākarṣaiḥ śayanavasanāgharṣaṇaiḥ pīḍyamānaḥ
sthāne sthāne taralitatanuḥ kīṭakair bhakṣyamāṇaḥ /
nityākrandī vacanavirahāt kāyikīṃ kleśaśailīṃ
kaṃ bobrūte viṣamavipadām āspadatvaṃ prayātaḥ

pīḍodvāntaiś churitavadanaḥ procchalatkṣīrapūrair
uttānorastalanipatitair ukṣito lakṣyate 'sau /
māyāvadhvāḥ smaraṇaharaṇaprauḍhakelīvilāse
hāseneva sphuritarucinā nirbharavyāptakāyaḥ

so 'tha prāpte lipiparicaye helayā dattahaste
saṃsāre 'sminn avicalitayā bandhalekhyakriyāsu /
janmāvartaṃ nijaṃ iva likhan dīrghaṃ oṃkāram ādau
varge varge vitarati matiṃ bhogasarge niviṣṭaḥ

prāptaprajñaḥ katham api galadbālabhāvapramohaḥ
kāmautsukyāt punar api pare yauvane naṣṭasaṃjñaḥ /
niḥsāreṣu vyasanavilasadmeghasaudāminīnāṃ
badhnāty āsthāṃ sthirataradhiyā yoṣitāṃ vibhrameṣu

vāci śrotraṃ vapur api calāliṅganeṣv aṅganānāṃ
ghrāṇaṃ vaktrāsavaparimale svādanaṃ tadrase ca /
pātre kurvan dṛśam api mukhe suptasarvakriyo 'sau
dhatte mātraṃ tanupariṇatāṃnīva sarvendriyāṇi

dveṣṭi snigdhaṃ paricitaparidveṣaśīlaḥ sa kāmī
vāñchaty anyāṃ navanavarasaḥ saprayatno 'nyakāmām /
ity anyonyānucitacaritālakṣyavailakṣyasākṣī
hāsyāyaiva prakṛtivirasaś citratantro 'sya kāmaḥ

alpādhāre viṣayajaladhau majjataḥ sajjataś ca
bhraṣṭasyāsya pratihatagateḥ kuñjarasyeva paṅke /
kiṃkartavyāvagatirahitā jāyate mohamūrcchā
nītasyāndhyaṃ katipayadinasthāyinā yauvanena

yāvatkālaṃ bhramati calati prīyate jṛmbhate 'sau
smeraṃ smeraṃ vadati madanāliṅgitair aṅgabhaṅgaiḥ /
tāvat tasyopari paripatary eva kālapramuktā
prāleyālīdhavalapalitacchadmanā vadhyamālā

kāle kāle kṣaṇakalanayā mohanidrāvaśena
prāptaṃ nāsmin vapuṣi sukṛtaṃ naiva dattaṃ na bhuktaṃ /
itthaṃ caurair iva sa muṣitaś cintayaty eva duḥkhāt
saṃmūḍhānāṃ anuśayaphalaḥ so 'vasādapramādaḥ

tasmin yāte lalitavanitāpuṣpavallīvasante
duṣkarmāptadraviṇatulayā yauvane svapnakalpe /
naṣṭāśeṣaprakṛtir akhilaiḥ kheditāṅgair viraktair
rājyabhraṃśe nṛpa iva sukhaṃ so 'tha śocaty atītaṃ

āyur nītaṃ na ca samucitaṃ yācakāyopanītaṃ
nāpy unnītaṃ diśi diśi yaśaḥ satpathaṃ na pratītaṃ
pītaṃ yācñāviṣam adhigataṃ sphītasaṃtāpaśītaṃ
bhītaṃ pāpāt kim api na mayā yat tad eva praṇītaṃ

kvāsau hemadrumaruciharā hāriṇī yauvanaśrīḥ
kāyaḥ kvāyaṃ kṛmihatataruprāyavicchāyapākaḥ /
dūrād etāḥ parihṛtadṛśāḥ koṇalīnaṃ taruṇyaḥ
śuṣkaṃ śītaṃ tarum iva vane vānaraṃ māṃ vadanti

so 'yaṃ kāyaḥ śrayati vilayaṃ naiva māyānikāyaḥ
srastāḥ sarve daśanamaṇayas te ca keśāḥ na doṣāḥ /
gātrotsāhe praharati marun naiva mohaprarohe
kṣīṇasyeyaṃ śayanaśaraṇasyāpi tṛṣṇākṣayā me

saṃcintyeti prasṛtaviṣamaśvāsahikkārdito (?) 'sau
sadyas tyaktuṃ ciraparicitām udyato lokayātrām /
mūkibhūtaḥ svajanavirahaṃ dhyāyati dhvastadhairyaḥ
śakticchedād ṛṇaṃ iva mahat prāptakālo daridraḥ

bhūmiṃ gehaṃ vasu parijanaṃ putradārādi cānyat
tāvat tāvat kalayati dhiyā prāṇaparyantakāle /
yāvaj janmany api punar asau snehamohānubandhais
tais tair antaḥ kṛtaparicayas tanmayībhāvam eti

duḥkhaṃ duḥsahapāpakarmajanitaṃ kumbhīsahasrāntare
bhuktvā rauravakālasūtranarakeṣv āvartate yoniṣu /
yad vā puṇyakalārjitaṃ sukhapadaṃ tat saṃkṣaye duḥkhadaṃ
sānāgāmiphalāptaye vimaladhīs tasmāt samādhīyatāṃ

iti bhīmabhavāmbhodhisaṃtāraṇakṛtavrataḥ /
samādideśa bhagavān sattvānāṃ kuśalāptaye