Ganesha Purana · Chapter 2.151.155

adhyāya १५१ prāraṃbha :-
sūta uvāca /
evaṃ śrutvā kathāṃ nityaṃ somakānto munīśvarāt /
śuṣkāstramūle tatpuṇyaṃ nyakṣipajjalato nṛpaḥ

gate saṃvatsare cūtaḥ pallavaiḥ kusumaiḥ phalaiḥ /
śuśubhe'tīvaruciraḥ purāṇaśrutipuṇyataḥ

somakānto divyakāntistyaktvā kuṣṭhabhavāṃ rujam /
akṣataścābhavatpūtigandhaṃ tyaktvā sugandhavān

niḥkhedaḥ surabhergandhāddaśadikṣu prasāriṇaḥ /
divyadehaṃ sūryakāntiṃ koṭicandranibhaṃ nṛpam

dṛṣṭvā visismire lokāḥ kathamīdṛk ca tādṛśaḥ /
gaṇeśākhyapurāṇasya mahimnā doṣahāriṇā

bhṛguruvāca/
siddhiste nṛpaśārdūla purāṇaśravaṇādabhūt /
vrajedānīṃ nijaṃ putra sāmātyaṃ janameva ca

cirotkaṇṭhaṃ varṣamadhye dṛṣṭvā harṣamavāpsyasi/
sūta uvāca /
evamākarṇya tadvākyaṃ pādayornyapatanmuneḥ

ānandārṇavamagnaḥ sa somakānto'vadadbhṛgum /
rājovāca /
adbhutastapasaste'dya mahimaikṣi mayā mune

purāṇaśravaṇasyāpi yenāhaṃ patito'pi ca /
galatkuṣṭho divyadeho jāto mātā pitā mama

asyadehasya nirmātā tvameva munisattama/
nīrasaścūtavṛkṣo'pi phalapuṣpayuto'bhavat

tyaktuṃ necchāmyato'haṃ tvāṃ kiṃ me putrajanairbhavet/
evaṃ niśamya tadvākyaṃ bhṛguḥ punarathābravīt

bhṛguruvāca /
janmāntarīyapuṇyena purāṇaśravaṇaṃ tava /
saṃjātaṃ manmukhāddhanyaṃ duritaṃ yena te'naśat

gaṇeśasya purāṇasya mahimā kena varṇyate /
na māvismara gaccha tvaṃ janeśa nagaraṃ nijam

evaṃ tayoḥ saṃvadatostejasojvaladadbhutam /
vimānaṃ dadṛśe tābhyāṃ sūryakoṭinibhaṃ mahat

bhṛguruvāca /
tvadarthaṃ yānamāyātamidaṃ nṛpa mahādbhutam /
idamāruhaya gaccha tvaṃ gaṇanāthasya sannidhim

na prāpnuvantyanuṣṭhānādvimānaṃ yanmunīśvarāḥ/
tatpurāṇaśravādrājaṃstvayā prāptaṃ gaṇeśvarāt

vimānaṃ vadatorevaṃ bhūmaṇḍalamagātkṣaṇāt /
vināyakagaṇairyuktaṃ caturbāhuvirājitaiḥ

mukuṭāṃgadahārādi bhūṣaṇairupaśobhitaiḥ /
divyacandanavastrādipadmaparaśuśobhibhiḥ

nṛtyatkinnarakanyābhirmṛdaṃganālapāṇibhiḥ /
kinnarairgāyanairyuktaṃ dṛṣṭvā rājā'bravītpunaḥ

rājovāca /
śrutāsīdbahudhā vārtā vimānānāṃ munīśvara /
taddṛṣṭaṃ purato brahmaṃstapovīryabalāttava

mahimā śrūyate karṇairbahudhā bahuvaktrataḥ /
anubhūto mayā so'pi purāṇaśravaṇāttava

evaṃ bruvati bhūpe tu dūtā uttīrya yānataḥ /
praṇipatyākhilāḥ procuḥ somakāntaṃ nṛpaṃ tadā

parātpareṇa devena tava puṇyātsmṛtiḥ kṛtā /
gajānanena śuddhātmanpurāṇaśravaṇādinā

vayaṃ dūtā ājñayā'sya vimānena samāgatāḥ /
netuṃ tvāṃ puṇyakīrtiṃ ca yāhi lokamanuttamam

taddarśanājjanmamṛtermuktastatsannidhiṃ gataḥ /
sukhamātyantikaṃ tatra prāpsyase tatprasādataḥ

niśamya dūtavākyaṃ taddehātīta ivābhavat /
romāṃcāṃcitasarvāṃga prāha gadgadayā girā

parātpareṇa devena carācarakṛtā'munā/
nirguṇena guṇakṣobhakāriṇā viśvayoninā

dīnanāthena bho dūtāḥ. smṛto'haṃ kṛpayā'naghāḥ /
brahmādyā na viduryaṃ hi dhyātvā ca sanakādayaḥ

anantagaṇapūrṇaḥ so'preṣayadyānamuttamam /
nānāvatāravānnānārūpī paramamāyikaḥ

tena me smaraṇaṃ kasmātkṛtamāścaryakārakama /
evamuktvā namaskṛtya bhṛguṃ taṃ prāha bhūmipaḥ

ājñayā te gamiṣyāmi dūtaiḥ saha vimānagaḥ /
prasādātte ca devasya na māṃ vismartumarhasi

sūta uvāca /
niśamya gaditaṃ tasya bhṛguḥ saṃbhramavihvalaḥ /
ānandāśruḥ saromāṃcaḥ kaṇṭhe dhṛtvā nṛpasya saḥ

prāhāhaṃ nṛpate vipro'bhāgyavāṃstvaṃ mahāphalaḥ/
gaṇeśapurago bhūtvā na māṃ vismara karhicit

evamukatvā bahiryātau dhṛtvā hastāvubhāvapi /
namaskṛtya vimānaṃ tannṛpo munivaraṃ ca tam

āruhatparamaprīto dūtavākyāttvarānvitaḥ /
dvāvamātyau sudharmā ca ruruhuryānamuttamam

tato dūtāśca vādyānāṃ ghoṣairvyāptaṃ digantaram /
vimānaśobhāṃ vīkṣyaiva somakānto nananda ha

janmāntarīyapuṇyena prāptametadamanyata/
tato'sminpaśyati bhṛgau vimānaṃ yānamambare

sarvottamapadaṃ prāptaṃ martyadehena vīkṣya ca /
vismayaṃ paramaṃ prāpa natvā dūtānyayau padaṃ ३८ (६८०६)
iti śrīgaṇeśapurāṇe krīḍākhaṇḍe somakāntavimānaprāptivarṇanaṃ nāmaikapaṃcāśadadhikaśatatamo'dhyāyaḥ

adhyāya १५२ prāraṃbhaḥ-
sūta uvāca /
upariṣṭāddadarśātha nṛpo daivapuraṃ nijam /
jaharṣa gopurādālaśobhāṃ dṛṣṭvātha kāñcanīm

tataḥ sudharmā sasmāra sabhāṃ ramyāṃ samīkṣya ha /
nijaṃ putraṃ snehavaśātprāha gadgadabhāṣiṇī

hemakaṇṭho mama suto bhadrāsanagato bhavet/
pitrormārgaṃ pratīkṣansa jāte saṃvatsare'dhunā

svāminkṛpānidhe tasya darśanaṃ dātumarhasi/
striyo vākyaṃ niśamyaivaṃ śuśoca nṛpatistadā

nṛpa uvāca /
hemakaṇṭho mama suto jīvansyādvā mṛto bhavet /
uktamāsīnmayā cāsmai vatsarāddarśanaṃ bhavet

anṛtātkutra gaccheyaṃ noktamāsītkadācana /
na tatra gantuṃ no hātuṃ śakto'haṃ paramaṃ padam

viruddhaṃ kathametaddhi ghaṭetetyarudadbhṛśam /
dṛṣṭvā dūtāstayoḥ śokamabruvanrājasattamam

yuvayo rodanaṃ śrutvā kṛpā naḥ samupāgatā/
kṣaṇamuttārayāmo'tra dṛṣṭvā taṃ yāta satvaram

jāte bhavatsamādhāne saṃtoṣo naḥ paro bhavet /
tata uttārayāmāsurdūtā devapurādudak

vimānaṃ tadgaṇeśasya purāṇaśravaṇāgatam /
nagaraṃ prabhayā vyāptaṃ vādyaghoṣaiśca nāditam

subalo jñānagamyaśca namaskṛtya nṛpaṃ gaṇān /
īyaturhemakaṇṭhaṃ taṃ sarvavṛttāntamīrituma

kṣaṇādbhadrāsanagataṃ hemakaṇṭhamapaśyatām /
sannaddhairvīramukhyaiśca parivītaṃ mahābalaiḥ

amātyanāgarairyuktamīkṣantaṃ nṛtyamuttamam /
tadamātyo jñānagamyaṃ subalaṃ samapaśyatām

uttasthuḥ sarvavīrāśva sāmātyo hemakaṇṭhakaḥ /
āliṃganāya te sarve tayoḥ prāpuḥ sasaṃbhramama

teṣāmāliṃgane jāte tato nṛpasuto yayau /
harṣeṇa mahatā yuktaḥ saromāṃco'bravīcca tau

mama mātā pitā'mātyau kṣemayuktau na vā kvacit /
tyaktvā tau pitarau yāto yuvāmekākinau katham

evamuktvā svāsane tāvupaveśya prapūjya ca /
vastracandanabhūṣādiphalatāmbūlakāṃcanaiḥ

tayorvinā mama prāṇāḥ kaṇṭhamātrāvalambinaḥ /
aharniśaṃ tayordhyānaṃ nānyasya mama mānase

pitā me prāvadatpūrvamekadā darśanaṃ punaḥ /
dāsyāmīti kathaṃ taccānṛtaṃ vākyaṃ kariṣyati

tāvūcatuḥ /
mā kuruṣva vṛthā cintāṃ pitroste kuśalaṃ nṛpa /
tayoḥ puṇyaprabhāvaṃ ko jānāti bhuvanatraye

anujñāṃ bhavato gṛhaya nirgatā nagarādvayam /
catvāro'pi pituste'bhūtsaukumāryādikaṃ mahat

kṣudhayā pīḍito'tyantaṃ raktasrāvi padāmbujam /
kandamūlaiḥ phalaistṛptirna cāsīttasya bhūpateḥ

mātuste'pi tathāvasthā celaturna padaṃ tadā /
bhramadbhirbahudhā paścāddṛṣṭhaṃ cāru saro mahat

śītalaṃ vṛkṣavallībhistatra suṣvāpa bhūmipaḥ/
sudharmā pādasaṃvāhaṃ cakāra śramakarṣitā

āvāṃ tu kandamūlārthe yātastatrāyayau muniḥ/
cyavano muniśārdūlo jalārthe tau dadarśa ha

tayorhārdaṃ sa gṛhyaiva nijamāśramamāyayau /
tata āvāṃ samāyātau gṛhya mūlaphalaṃ bahu

sarve tadāśrame yātā muninā pūjitā bhṛśam /
bhojitāḥ ṣaḍrasaiścānnairviśrāntiṃ paramāṃ gatāḥ

tataḥkathāprasaṃgo'bhūnmuninā ca nṛpeṇa ca /
sarvaṃ cākathayadrājā vṛttāntaṃ munaye tadā

tato munirdhyānabalātpūrva janmāsya saṃjagau/
duritaṃ tacchamopāyamabravītkaruṇāyutaḥ

duritaśravaṇe cāsya saṃtrāso nau nṛpābhavat /
sa saṃdigdhamanā yāvattāvaddehādvinirgatāḥ

pakṣiṇaḥ śvetavarṇāstamārabdhā bhakṣituṃ nṛpam /
teṣāṃ caṃcuprahāreṇa vihvalaḥ patito nṛpaḥ

rakṣa rakṣeti kāruṇyātproktaḥ prārtanayā muniḥ /
tasya prekṣaṇamātreṇa pakṣiṇo'ntardadhuḥ kṣaṇāt

sa tu hastayugaṃ baddhvā tasthau munimukho nṛpaḥ /
mahajjñātvā nṛpainaḥ sa śrāvayāmāsa bhaktitaḥ

gaṇeśasya purāṇaṃ yadvarṣamātraṃ kṛpānidhiḥ /
aṣṭottaraśatenādau devanāmnā prasicya ca

tadaṃgātpuruṣaṃ ghoraṃ niṣkāśyatapaso balāt /
vyomakeśo lalajjihvo vyākulaḥ kṣudhayā bhṛśam

bhakṣyaṃ yayāce sa bhṛguṃ so'vadattaṃ purasthitam /
bhakṣayasvāmravṛkṣaṃ tvaṃ mahāntaṃ śuṣkameva ca

tena spṛṣṭo āmravṛkṣo bhasmasādabhavatkṣaṇāt /
tatastaṃ dhīvaraṃ prāha bhakṣayasvetyasau muniḥ

tato nṛpaṃ muniḥ prāha purāṇaśravaṇaṃ mahat /
śreyo nikṣipa nityaṃ tvamasminbhasmani bhūmipa

yāvaccūtasya vṛkṣo'tra bhavedanyo yathā purā /
tatastvamapi rājendra divyadeho bhaviṣyasi

tathaiva sa nṛpaścakre snātvā śrutvā kathāṃ bahu /
nyakṣipattyahaṃ śreyastasminmasmāni bhaktitaḥ

saṃvatsarānte vṛkṣo'sau bhavannṛpa yathā purā /
gaṇeśasya purāṇe tu samāpte phalapuṣpavān

nṛpo'pi divyakāntiḥ sa śaśisūryanibho'bhavat /
yāvannṛpo muniṃ stauti vimānaṃ tāvadāgatam

nṛtyagītasamāyuktaṃ vādyaghoṣanināditam /
gaṇeśadūtasaṃyuktamāśramāntikamāsthitam

yacchobhāṃ paśyatornātha dṛśo nau saphalābhavan /
atipuṇyātpituste te dūtā devājñayā nṛpam

nyakṣipanyānamadhye nau nṛpekṣaṇapraṇoditāḥ /
sudharmā ca munerājñāṃ gṛhya yātā vimānagā

dṛṣṭaṃ devapuraṃ yāvattāvatvatsmṛtirāgatā/
ata uttāritaṃ yānaṃ uttare nagarānnṛpa

didṛkṣayā pitṛbhyāṃ te tau yātau tvāṃ niveditum /
tayoḥ śīghraṃ darśanāya yāhi no cedgamiṣyati

tayorvākyaṃ niśamyetthaṃ hemakaṇṭhatvarānvitaḥ /
romāṃcāśrusamāyukto dhāvamānaḥ śrutākhilaḥ

yayau taddarśanotsukyātpuraskṛtya tadā tu tau/
viśīrṇabhūṣaṇagaṇo nāgaraiḥ sevakairvṛtaḥ

galadaśruḥ kṣaṇātprāpa vimānaṃ gaṇasaṃkulam २.१५२.५० (६८५६)
iti śrīgaṇeśapurāṇe krīḍākhaṇḍe hemakaṇṭhadarśanaṃ nāma dvipaṃcāśaduttaraśatatamo'dhyāyaḥ

adhyāya १५३ prāraṃbhaḥ-
sūta uvāca /
tadamātyāśca catvāraḥ somakāntaṃ puro yayuḥ /
praṇipatyākhilānprocurāgataste suto nṛpa

sarvavīrairnāgarikairindraḥ suragaṇairiva /
vṛto harṣeṇa śokena dṛṣṭvānyānameva ca

evaṃ nivedito'mātyaiḥ so'pi śīghraṃ samāgataḥ /
ābālavanitāvṛddhaiḥ sevakaiśca samanvitaḥ

dṛṣṭvā śobhāṃ vimānasya sarva ānandanirbharāḥ/
tanmadhye somakāntaṃ te dṛṣṭvā nemurdharātale

yuktaṃ dūtairgaṇeśasya kāntayāpyatikāntayā /
tata uttīrya yānātsa āliliṃga sutaṃ mudā

ānandāśrūṇi muṃcaṃtau saromāṃcāvubhāvapi /
videhāviva saṃjātau na kiṃcidūcatuḥ kṣaṇam

tata ūce pitā putraṃ snehena vatsarāgatam /
tvāmeva nityaṃ dhyāyāmi satputraṃ vaṃśabhūṣaṇam /
na tvayā sadṛśaṃ paśye putreṣurjanavartiṣu /
tataḥ sudharmā sasnehā dhāvamānā sutaṃ yayau /
āliliṃga mudā yuktā galadaśrū ubhāvapi /
tata ūce sutaṃ mātā ciradṛṣṭo'si bālaka /
na me sukhaṃ kiṃcidabhūttādutkaṇṭhitacetasaḥ /
idānīṃ te mukhaṃ dṛṣṭvā sānandaṃ me mano'bhavat /
viyogena ca te deho mama jātaḥ kṛśo bhṛśam /
tata āliṃganaṃ cakrurnāgarā nāmadhārakāḥ /
kecitpradakṣiṇāṃ cakruḥ kecitpādau tadā'spṛśan /
kecicca darśanādeva pratiyātāḥ puraṃ prati /
tata ūce nṛpaḥ sarvānbhṛguṇā'nugrahānmama /
gaṇeśasya purāṇaṃ yacchrāvitaṃ pāpanāśanam

abhavaṃ tena niṣpāpo divyadeho vimānagaḥ/
sarveṣāṃ darśanaṃ jātaṃ punaryāsyāmi yānagaḥ

kṛpāvatā gaṇeśena yānaṃ me preṣitaṃ bhuvi /
rājyaṃ ca paribhuktaṃ me svecchayā saṃpadaḥ suta

dhāma yāsyāmi paramaṃ prasādādbhṛgusaṃbhavāt /
evaṃ te śuśruvurvāṇī somakāntasamīritām

ruruduḥ susvaraṃ sarve patitā bhuvi kecana /
śreṇīmukhyāstataḥ procuḥ somakāntaṃ kṛpānidhim

no vinā jagatīpāla kathaṃ yāsyasi dhāma tat /
prāṇāṃstyaktvā vayaṃ sarve yāsyāmo'pyanu te nṛpa

hatyā tvanmastake rājansarveṣāṃ no bhaviṣyati /
nanaḥ puṇyaṃ tathā yena drakṣyāmastaṃ guṇeśvaram

tava prasādāddevasya yāsyāmo lokamuttamam /
na saṃsāre sukhaṃ kiṃcidāyunāśo vṛthā'tra hi

asmākaṃ na bhavetkiṃcitsādhanaṃ dhāmasādhanam /
tato'vadaddhemakaṇṭho janakaṃ vākyamādṛtaḥ

kathaṃ tyaktvā'rbhakaṃ tāta yāsi draṣṭuṃ gajānanam /
mama rājyena ko heturājñayā tava vatsaram

pālitaṃ rājyamakhilaṃ necchedānīṃ mamāpi ca /
śapathasta tathā rājannato netuṃ mamārhasi

somakānta uvāca /
sarveṣāmeva saṃdraṣṭumicchā devapadāmbujam /
ahaṃ ca paravānatra kathaṃ kāryaṃ mayā janāḥ

bhavatsnehena śocāmi putrasnehādviśeṣataḥ /
ataevordhvagaṃ yānamuttārya draṣṭumāgataḥ

sūta uvāca /
tataḥ śocatsu lokeṣu somakānte rudatyapi /
putre ca devadūtānāṃ dayā prādurabhūttadā

te ūcuḥ somakāntaṃ taṃ dhanyo rājanyato janāḥ /
tvayi saṃkalpitaprāṇā yathā tvaṃ jagadīśvare

ataḥ sarvāngṛhītvaiva yāmaḥ śīghraṃ gajānanam/
rājovāca /
yadi sarvā purī nītā tadā kīrtirdṛḍhā mama

bhaviṣyati rasāyāṃ me nānyathā tu bhaviṣyati /
sūta uvāca /
evamuktvā purāṇasya gaṇeśasya śravodbhavam

pūjyaṃ haste jale naiṣāṃ dadau rājā tadājñayā /
toye haste gate lokā niṣpāpāḥ puṇyamūrtayaḥ

ābālavanitāvṛddhā ruruhuryānamuttamam /
gaṇeśasya tu ye dūtāstato'gurūrdhvamārgataḥ

tataḥ kecinnarāḥ pāpā yairnāpi ca jalaṃ kare /
te punarnagare yātāḥ śaśaṃsuḥ śeṣitaṃ janam

tato dadṛśire sarve urdhvagaṃ nagaraṃ bahu /
ūcuḥ parasparaṃ śeṣā dravyalābhena toṣiṇaḥ

nānāvyavasāyaratā babhūvurhaṣṭamānasāḥ /
kāṃścitpalāyanaparāndūtā daṇḍaprahāriṇaḥ

balādgṛhītvā prākṣipanyānamadhyetikautukāt /
nānāmiṣeṇa jagmurye tāṃstathaiva nicikṣipuḥ

upaviṣṭā madhyadeśe rājapatnīsutādayaḥ /
amātyāḥ parito lokā nāgarā viviśuḥ sukham

mayūreśamayūreśa jaya tvamiti ghoṣiṇaḥ /
vādyatsu devavādyeṣu nṛtyatyapsarasāṃ gaṇe

pratinādena garjanti maṇḍalāni diśāmapi /
ativegena te prāptā gaṇeśasya padaṃ śubham

suṣamāṃ paripaśyanto vismayenābruvanniti /
aho mahatpuṇyamasya yena dṛṣṭo gajānanaḥ

samīpatāṃ yayuḥ sarve rājā sāyujyamāpa ca/
sūta uvāca /
evaṃ vaḥ kathitā viprā gaṇeśasya purāṇanā

kathā sarvajanasyāpi śravaṇātpāpanāśani /
śṛṇudhvaṃ devadūtebhyo vimāne pṛṣṭavānnṛpaḥ /
tatsarvaṃ bhavatāṃ viprāḥ kathayāmi kathānakam ३५ (६८९१)
iti śrī gaṇeśapurāṇe krīḍākhaṇḍe somakāntasya devapadaprāptivarṇanaṃ nāma tripaṃcāśaduttaraśatatamo'dhyāyaḥ

adhyāya १५४ prāraṃbha :-
ṛṣaya ūcuḥ /
kiṃ pṛṣṭaṃ somakāntena vimānavartinā'nagha /
tadvayaṃ śrotumicchāmo vada sarvamaśeṣataḥ

sūta uvāca /
gacchatā vyomamārgeṇa pṛṣṭā dūtā mahātmanā /
vārāṇasīsthitānāṃ tu gaṇeśānāṃ mahātmanām

nāmāni parivārāṇāṃ tāni naḥ śṛṇutānaghāḥ /
rājovāca /
dūtā vadantu kṛpayā viśveśaparivāragān

gaṇeśānmama kārtsnyena smaraṇātsarvasiddhidān /
dūtā ūcuḥ /
kathayāmaḥ samāsena viśveśāvaraṇe gatān

gaṇeśānkramaśo rājañśṛṇu sarvabhayāpahān /
durgā vināyako'thārka bhīmacaṇḍī vināyakaḥ

dehalīgaṇapaścātha tathoddaṇḍavināyakaḥ /
pāśapāṇiḥ sarvavighna haraṇo'tha vināyakaḥ

prathamāvaraṇe siddhasiddhirūpo vināyakaḥ /
lambodaraḥ kūṭadantaḥ śūlaṭaṃka vināyakaḥ

kūṣmāṇḍākhyaścaturthaśca paṃcamo muṇḍasaṃjñakaḥ/
vikaṭadvijasaṃjñastu rājaputravināyakaḥ

praṇavākhyo'thāparaśca dvitīyāvaraṇe sthitāḥ /
vakratuṇḍa ekadantatrimukhaśca vināyakaḥ

paṃcāsyaścāparaścātra herambaśca vināyakaḥ

modakapriya ityeva tṛtīyāvaraṇe sthitāḥ /
vināyako'bhayapradaḥ siṃhatuṇḍavināyakaḥ

kuṇitākṣaścāparaśca kṣipraprasādasaṃjñakaḥ /
cintāmaṇiriti khyāto dantahastavināyakaḥ

pracaṃḍaścāpyaparaścoddaṇḍamuṇḍavināyakau /
caturthāvaraṇe jñeyā aṣṭāvete vināyakāḥ

sthūladanto dvitīyastu kalipriyavināyakaḥ /
caturdanto dvituṇḍākhyo jyeṣṭho gajavināyakaḥ

kālākhyaśca tathā jñeyo mārgeśālayoparo'pi ca /
paṃcamāvaraṇe jñeyā aṣṭāvete vināyakāḥ

maṇikarṇivināyaka āśāsṛṣṭivināyakaḥ /
yakṣākhyo gajakarṇākhyaścitraghaṇṭavināyakaḥ

sumaṃgalaśca mitrākhya ete ṣaṣṭhe vināyakāḥ /
modaḥ pramodaḥ sumukho durmukhaśca vināyakaḥ

gaṇapākhyothāparaśca tathā jñāna vināyakaḥ /
saptamāvaraṇe jñeyā tasthā dvāravināyakāḥ

avimukto'ṣṭamo yatra mokṣado'tha vināyakaḥ /
anyo bhagīrathākhyo hi hariścandravināyakaḥ

kapardīti paro jñeyastathā binduvināyakaḥ /
eteṣāṃ smaraṇaṃ nityaṃ sarvakāmaphalapradam

prātarutthāya yaścaitānpaṭhate śuddhamānasaḥ /
na tasya vighnā vighnaṃ hi kurvanti sarvakarmasu

ekaikanāmnā rājendra dūrvābhistandulairapi /
tilaiḥ śamīdalaiścaitānpūjayedbhaktimānnaraḥ

asādhyaṃ sādhayetkāryaṃ sarvatra vijayī bhavet /
āyuṣyaṃ puṣṭimārogyaṃ prāpnuyāddhanamuttamam

idaṃ te kathitaṃ sarvaṃ yaddhi pṛṣṭaṃ tvayā nṛpa /
tūṣṇīṃ yayurdevadūtāstato dhāma nijaṃ mudā

sūta uvāca /
idaṃ tatkathitaṃ viprā viśveśāvaraṇaṃ mayā/
idānīṃ kathayiṣyāmi purāṇasya phalaśrutim २५ (६९१६)
iti śrī gaṇeśapurāṇe krīḍākhaṇḍe ṣaṭpaṃcāśadvināyakavarṇanaṃ nāma catuḥpaṃcāśaduttaraśatatamo'dhyāyaḥ

adhyāya १५५ prāraṃbhaḥ –
sūta uvāca /
janmamṛtiḥ na ca syātāṃ purāṇasyāsya saṃśrayāt /
ekaśobahuśaścetsyādyadyasya śravaṇaṃ dvijāḥ

na śaknutāmalaṃ vaktuṃ śeṣapadmāsanāvapi /
yo dadāti kurukṣetre somasūryagrahe naraḥ

hemabhārasahasrāṇi viprebhyo bhaktibhāvataḥ /
tadasya śravaṇātpuṇyaṃ prāpnuyādbhaktimānnaraḥ

yajñānāṃ sāṃgajātānāṃ sarveṣāṃ dakṣiṇāvatām/
phalaṃ kastulayāmāsa purāṇaśravaṇasya ca

purāṇaśraṇasyāsya puṇyaṃ tasmādviśeṣavat/
vratānāṃ jaladānānāṃ tatra kā gaṇanā matā

koṭikanyāpradānānāṃ godānānāṃ sahasraśaḥ /
tatpuṇyaṃ koṭiguṇitaṃ śravaṇādasya jāyate

caturṇāmapi vedānāṃ sāṃgānāṃ paṭhanātsadā /
śāstrāṇāṃ vyākṛtervāpi sadā satsevanādapi

tatpuṇyaṃ koṭiguṇitaṃ tadasya śravaṇādbhavet /
bhāratasya purāṇasya saṃpūrṇasya śravādapi /
yatpuṇyaṃ koṭiguṇitaṃ tadasya śravaṇādbhavet

yasya gehe gaṇeśasya purāṇaṃ likhitaṃ bhavet /
na tatra rākṣasā bhūtāḥ pretāśca pūtanādayaḥ

grahā bālagrahā naiva pīḍāṃ kurvanti karhicit /
tadgṛhaṃ hi gaṇeśena rakṣyate sarvadā svayam

idaṃ purāṇaṃ śṛṇuyātpūjayedvā samāhitaḥ /
tasya darśanataḥ pūtā bhavanti patitā narāḥ

brahmādīnāṃ munīnāṃ sa mānyo bhavati mānavaḥ/
kruddho dahetsa bhuvanaṃ tuṣṭaścendrapadaṃ dadet

aṣṭasiddhīḥ samāpnoti śravaṇātpratyahaṃ naraḥ /
na dāridryaṃ samāpnoti na saṃkaṣṭaṃ naraḥ kvacit

īpsitaṃ samavāpnotī padmādīṃśca nidhīnapi /
kalpadrumaḥ kāmadhenurnidhiścintāmaṇistathā

tasya vaśyatvamabhyeti so'pi vandyo bhavatyapi /
jāraṇaṃ māraṇaṃ stambhaṃ uccāṭanamathāpi ca

asya smaraṇamātreṇa nirastaṃ syātkṣaṇena ha/
gaṇeśanikaṭaṃ sthitvā purāṇaṃ śṛṇuyānnaraḥ

mahāpāpādvinirmuktaḥ strībālahatyayāpi ca /
sānnidhyamāpnuyādante gaṇeśasya na saṃśayaḥ

śūdro'pi madhye saṃsthāpya brāhmaṇānśṛṇuyādidam /
krameṇa labhate varṇānvaiśyakṣatradvijāhyām

nityanaimittikarmabhyaścyuto yaḥ śṛṇuyādidam /
karmasādguṇyamāpnoti gaṇeśasya prasādataḥ

bhādre śuklacaturthyāṃ yaḥ kṛtvā mūrtiṃ mahīmayīm /
maṇḍape toraṇe ramye saṃpūjya paramādarāt

purāṇaṃ śṛṇuyātsadyastasya tuṣṭo vināyakaḥ /
dadāti nikhilānkāmānante mokṣaṃ ca vighnapaḥ

stotrāṇyatra ca khyā yāvanti tāvanti pratyahaṃ naraḥ/
paṭhate yadi yo bhavatyā sa siddhaḥ syānna saṃśayaḥ

asādhyamapi yatkiṃcitteṣāṃ pāṭhāllabhennaraḥ /
anuṣṭhānavidhānena māsamātraṃ japettu yaḥ

brāhmaṇānbhojayedbhaktyā so'pi tanmayatāmiyāt /
ṛṣaya ūcuḥ /
kathamasya śravātpuṇyaṃ kena prāptaṃ purā'nadha

tannaḥ śaṃsa mahābhāga pṛcchatāṃ sūtanandana /
sūta uvāca /
śṛṇvantu munayaḥ pūrvaṃ kaścinmūko'bhavanmuniḥ

brahmalokaṃ gato'kasmāllomaśo'pi yadṛcchayā/
namaskṛtya ca lokeśamupaviṣṭastadājñayā

pūjitaḥ parayā bhaktyā lomaśo'thābravīdvidhima /
lomaśa uvāca /
vyāsāya kathitaṃ deva purāṇaṃ puṇyavarddhanam

gaṇeśasya mahābhāga tanme vaktumihārhasi /
brahmovāca /
śṛṇu lomaśa yatnena sarvapāpaharaṃ śubham

purāṇaṃ hi gaṇeśasya kāmamokṣapradaṃ nṛṇām/
sūta uvāca /
tataḥ sa kathayāmāsa brahmā svīyena yāmataḥ

lomaśāya gaṇeśasya purāṇaṃ kāmamokṣadam /
mūkena nādalubdhena śrutaṃ bhaktyā'khilaṃ tu tat

tataḥ sa vāgīśvaravatprovāca bhāratīṃ muniḥ /
adhītya pāṭhataḥ kṛtvā śrāvayāmāsa cetarām

bhuktvā bhogānyathā kāmānputrānpautrānavāpya ca/
ante jagāma paramaṃ dhāma gāṇeśvaraṃ śubham

punaḥ śṛṇvantu munaya itihāsaṃ purātanam /
ikṣvākukulasaṃbhūto rājā śuddhātmakaḥ śuciḥ

yajvā dānaprado nityaṃ svādhyāyaparamorihā /
ākhyātā sarvadharmāṇāṃ prajānāṃ pālane rataḥ /
ṣaṣṭhāṃśabhāgī lokānāṃ mānyaḥ priyataropi ca

vikhyātastriṣu lokeṣa goptā saṃvaraṇābhidhaḥ/
anapatyaḥ sa putrārthe putrīyāmiṣṭimāharat

sāṃgā sadakṣiṇāmannadānaiḥ suvihitāṃ tataḥ /
na lebhe saṃtatiṃ rājā harivaṃśamathāśṛṇot

pūjayitvā dvijānante vācakaṃ paritoṣya ca /
vastradhenuhiraṇyādyai ratnamūlaphalādibhiḥ

tato'pi nābhavatputro daivānmūkastu tadgṛham /
samāyātastu vikhyāto gaṇeśākhyapurāṇavita

sthāpitaṃ prārthayitvā ca rājñā saṃvaraṇena saḥ/
śrutvā purāṇaṃ tadvaktrādgaṇeśākhyaṃ mudā nṛpaḥ

tadante toṣayāmāsa mūkaṃ taṃ dvijapuṃgavam /
ratnamuktāphalairvastrairbhūṣaṇairhemanirmitaiḥ

lebhe tataḥ kumāraṃ sa gaṇeśe tatparo'bhavat /
bhuktvānekasukhānyāpa gāṇeśaṃ padamuttamam

bhaginī tasya vandhyāsīttriṃśadvarṣā rajasvalā /
yathākālaṃ bhavatyava śrutvā tasyātha saṃtatim

gaṇeśākhyapurāṇasya śravājjātāṃ ca taṃ munim /
ākāryaṃ pariśuśrāva purāṇaṃ tanmukhācchubham

lebhe putraṃ mahāśūraṃ gaṇeśabhajane ratā /
putrānpautrānsamāvāpya bhuktvā bhogānmanoharān

jagāma sā gaṇeśasya nijadhāmovasānataḥ /
sagarasya tu putrāṇāmekaḥ paṅagurabhūtsutaḥ

tenāpīdaṃ śrutaṃ puṇyaṃ purāṇaṃ lomaśātpurā/
bhaktyā dvādaśavarṣeṇa vinītenātha bhaktita:

saṃtoṣya lomaśaṃ dravyaistatoṅghri samavāpa sa: /
vijayaṃ puṣṭimāyuṣyaṃ prāṇānte dhāmatatparaḥ

aṣṭādaśapurāṇānāṃ śravaṇe yatphalaṃ labhet/
tadekasya purāṇasya gaṇeśasya śruterbhavet

kākavandhyā bahusutā śravaṇādasya jāyate/
sravadgarbhā bhavedviprā dṛḍhagarbhā bhavatyapi

mūko vāgīśatāṃ yāti śravaṇānmunipuṃgavāḥ /
vedādhyayanasaṃpanno mānyo'pi dvijapuṃgavaḥ

śūdro vaiśyatvamāpnoti vaiśyaḥ kṣatriyatāmiyāt /
kṣatriyo dvijatāṃ yāti smaraṇādapyamuṣya ha

kanyāṃ tu labhate cāsyāpyekādhyāyasya saṃśravāt /
guṇavantaṃ kulīnaṃ ca patiṃ sādhuṃ dhanānvitam

jātyandho labhate dṛṣṭiṃ purāṇasyāsya saṃśrayāt /
sarvatīrthaṣu yaḥ snāyāddadyāddānāni sarvaśaḥ

tatphalaṃ samavāpnoti bhaktyā yaḥ śṛṇuyādidam /
paṃcāgnisādhanaṃ grīṣme hemante jalavāsanam

varṣāsvākāśavāsaṃ yaḥ kurute bahuvatsaram /
tatphalaṃ prāpnuyānmartya saṃśrute'dhyāyapaṃcake

agnihotraṃ sadā yastu sevate bhaktimānnaraḥ /
tatphalaṃ hi purāṇasya śravaṇādasya jāyate

ekāṃgupṭhena yastiṣṭhedvarṣāṇāmayutaṃ naraḥ /
daśādhyāyaśruterasya purāṇasya tathā phalam

labhate mānavo bhaktyā niścitaṃ nātra saṃśayaḥ /
ājanmamaraṇānnityaṃ śṛṇuyānmānavo bhuvi

purāṇaṃ tu gaṇeśasya cakravartī bhavettu saḥ /
ājanmamaraṇādyastu kāśīvāsaṃ karoti yaḥ

tatpuṇyaṃ labhate martyo gaṇeśasya purāṇataḥ /
sahasraṃ māghamāsānyaḥ prayāge snāti mānavaḥ

tatphalaṃ labhate martyaḥ purāṇasyāsya saṃśravāt /
gomatīsaṃgame tadvatsnānaṃ bhaktyā karoti yaḥ

tatphalaṃ koṭiguṇitaṃ labhate cāsya saṃśravāt /
gaṇeśasya purāṇaṃ yaḥ śṛṇuyādbhaktimānnaraḥ

na bhayaṃ tasya śūlāttu vajrācca cakricakrataḥ /
idaṃ vaḥ kathitaṃ sarvaṃ purāṇaṃ ca savistaram

saṃpūrṇo mahimā vaktuṃ na śakyo varṣakoṭibhiḥ /
brāhmaṇā ṣaṇmukhenāpi śeṣeṇāpi munīśvarāḥ

yuṣmābhiḥ paripṛṣṭaṃ yatsarvapāpapraṇāśanam /
sarvaṃ kāmapradaṃ bhuktimuktidaṃ puṇyavardhanam

gaṇeśasya pareśasya nānālīlādharasya va /
vaktṛsrosroraghaharaṃ kimanyacchrotumicchatha ६६ (६९८६) (११०७९)
iti śrīgaṇeśapurāṇe krīḍākhaṇḍe phalaśrutinirūpaṇaṃ nāma paṃcapaṃcāśaduttaraśatatamo'dhyāyaḥ