ગણેશપુરાણમ્ · અધ્યાય 2.151.155

અધ્યાય ૧૫૧ પ્રારંભ :-
સૂત ઉવાચ ।
એવં શ્રુત્વા કથાં નિત્યં સોમકાન્તો મુનીશ્વરાત્ ।
શુષ્કાસ્ત્રમૂલે તત્પુણ્યં ન્યક્ષિપજ્જલતો નૃપઃ

ગતે સંવત્સરે ચૂતઃ પલ્લવૈઃ કુસુમૈઃ ફલૈઃ ।
શુશુભેઽતીવરુચિરઃ પુરાણશ્રુતિપુણ્યતઃ

સોમકાન્તો દિવ્યકાન્તિસ્ત્યક્ત્વા કુષ્ઠભવાં રુજમ્ ।
અક્ષતશ્ચાભવત્પૂતિગન્ધં ત્યક્ત્વા સુગન્ધવાન્

નિઃખેદઃ સુરભેર્ગન્ધાદ્દશદિક્ષુ પ્રસારિણઃ ।
દિવ્યદેહં સૂર્યકાન્તિં કોટિચન્દ્રનિભં નૃપમ્

દૃષ્ટ્વા વિસિસ્મિરે લોકાઃ કથમીદૃક્ ચ તાદૃશઃ ।
ગણેશાખ્યપુરાણસ્ય મહિમ્ના દોષહારિણા

ભૃગુરુવાચ।
સિદ્ધિસ્તે નૃપશાર્દૂલ પુરાણશ્રવણાદભૂત્ ।
વ્રજેદાનીં નિજં પુત્ર સામાત્યં જનમેવ ચ

ચિરોત્કણ્ઠં વર્ષમધ્યે દૃષ્ટ્વા હર્ષમવાપ્સ્યસિ।
સૂત ઉવાચ ।
એવમાકર્ણ્ય તદ્વાક્યં પાદયોર્ન્યપતન્મુનેઃ

આનન્દાર્ણવમગ્નઃ સ સોમકાન્તોઽવદદ્ભૃગુમ્ ।
રાજોવાચ ।
અદ્ભુતસ્તપસસ્તેઽદ્ય મહિમૈક્ષિ મયા મુને

પુરાણશ્રવણસ્યાપિ યેનાહં પતિતોઽપિ ચ ।
ગલત્કુષ્ઠો દિવ્યદેહો જાતો માતા પિતા મમ

અસ્યદેહસ્ય નિર્માતા ત્વમેવ મુનિસત્તમ।
નીરસશ્ચૂતવૃક્ષોઽપિ ફલપુષ્પયુતોઽભવત્

ત્યક્તું નેચ્છામ્યતોઽહં ત્વાં કિં મે પુત્રજનૈર્ભવેત્।
એવં નિશમ્ય તદ્વાક્યં ભૃગુઃ પુનરથાબ્રવીત્

ભૃગુરુવાચ ।
જન્માન્તરીયપુણ્યેન પુરાણશ્રવણં તવ ।
સંજાતં મન્મુખાદ્ધન્યં દુરિતં યેન તેઽનશત્

ગણેશસ્ય પુરાણસ્ય મહિમા કેન વર્ણ્યતે ।
ન માવિસ્મર ગચ્છ ત્વં જનેશ નગરં નિજમ્

એવં તયોઃ સંવદતોસ્તેજસોજ્વલદદ્ભુતમ્ ।
વિમાનં દદૃશે તાભ્યાં સૂર્યકોટિનિભં મહત્

ભૃગુરુવાચ ।
ત્વદર્થં યાનમાયાતમિદં નૃપ મહાદ્ભુતમ્ ।
ઇદમારુહય ગચ્છ ત્વં ગણનાથસ્ય સન્નિધિમ્

ન પ્રાપ્નુવન્ત્યનુષ્ઠાનાદ્વિમાનં યન્મુનીશ્વરાઃ।
તત્પુરાણશ્રવાદ્રાજંસ્ત્વયા પ્રાપ્તં ગણેશ્વરાત્

વિમાનં વદતોરેવં ભૂમણ્ડલમગાત્ક્ષણાત્ ।
વિનાયકગણૈર્યુક્તં ચતુર્બાહુવિરાજિતૈઃ

મુકુટાંગદહારાદિ ભૂષણૈરુપશોભિતૈઃ ।
દિવ્યચન્દનવસ્ત્રાદિપદ્મપરશુશોભિભિઃ

નૃત્યત્કિન્નરકન્યાભિર્મૃદંગનાલપાણિભિઃ ।
કિન્નરૈર્ગાયનૈર્યુક્તં દૃષ્ટ્વા રાજાઽબ્રવીત્પુનઃ

રાજોવાચ ।
શ્રુતાસીદ્બહુધા વાર્તા વિમાનાનાં મુનીશ્વર ।
તદ્દૃષ્ટં પુરતો બ્રહ્મંસ્તપોવીર્યબલાત્તવ

મહિમા શ્રૂયતે કર્ણૈર્બહુધા બહુવક્ત્રતઃ ।
અનુભૂતો મયા સોઽપિ પુરાણશ્રવણાત્તવ

એવં બ્રુવતિ ભૂપે તુ દૂતા ઉત્તીર્ય યાનતઃ ।
પ્રણિપત્યાખિલાઃ પ્રોચુઃ સોમકાન્તં નૃપં તદા

પરાત્પરેણ દેવેન તવ પુણ્યાત્સ્મૃતિઃ કૃતા ।
ગજાનનેન શુદ્ધાત્મન્પુરાણશ્રવણાદિના

વયં દૂતા આજ્ઞયાઽસ્ય વિમાનેન સમાગતાઃ ।
નેતું ત્વાં પુણ્યકીર્તિં ચ યાહિ લોકમનુત્તમમ્

તદ્દર્શનાજ્જન્મમૃતેર્મુક્તસ્તત્સન્નિધિં ગતઃ ।
સુખમાત્યન્તિકં તત્ર પ્રાપ્સ્યસે તત્પ્રસાદતઃ

નિશમ્ય દૂતવાક્યં તદ્દેહાતીત ઇવાભવત્ ।
રોમાંચાંચિતસર્વાંગ પ્રાહ ગદ્ગદયા ગિરા

પરાત્પરેણ દેવેન ચરાચરકૃતાઽમુના।
નિર્ગુણેન ગુણક્ષોભકારિણા વિશ્વયોનિના

દીનનાથેન ભો દૂતાઃ. સ્મૃતોઽહં કૃપયાઽનઘાઃ ।
બ્રહ્માદ્યા ન વિદુર્યં હિ ધ્યાત્વા ચ સનકાદયઃ

અનન્તગણપૂર્ણઃ સોઽપ્રેષયદ્યાનમુત્તમમ્ ।
નાનાવતારવાન્નાનારૂપી પરમમાયિકઃ

તેન મે સ્મરણં કસ્માત્કૃતમાશ્ચર્યકારકમ ।
એવમુક્ત્વા નમસ્કૃત્ય ભૃગું તં પ્રાહ ભૂમિપઃ

આજ્ઞયા તે ગમિષ્યામિ દૂતૈઃ સહ વિમાનગઃ ।
પ્રસાદાત્તે ચ દેવસ્ય ન માં વિસ્મર્તુમર્હસિ

સૂત ઉવાચ ।
નિશમ્ય ગદિતં તસ્ય ભૃગુઃ સંભ્રમવિહ્વલઃ ।
આનન્દાશ્રુઃ સરોમાંચઃ કણ્ઠે ધૃત્વા નૃપસ્ય સઃ

પ્રાહાહં નૃપતે વિપ્રોઽભાગ્યવાંસ્ત્વં મહાફલઃ।
ગણેશપુરગો ભૂત્વા ન માં વિસ્મર કર્હિચિત્

એવમુકત્વા બહિર્યાતૌ ધૃત્વા હસ્તાવુભાવપિ ।
નમસ્કૃત્ય વિમાનં તન્નૃપો મુનિવરં ચ તમ્

આરુહત્પરમપ્રીતો દૂતવાક્યાત્ત્વરાન્વિતઃ ।
દ્વાવમાત્યૌ સુધર્મા ચ રુરુહુર્યાનમુત્તમમ્

તતો દૂતાશ્ચ વાદ્યાનાં ઘોષૈર્વ્યાપ્તં દિગન્તરમ્ ।
વિમાનશોભાં વીક્ષ્યૈવ સોમકાન્તો નનન્દ હ

જન્માન્તરીયપુણ્યેન પ્રાપ્તમેતદમન્યત।
તતોઽસ્મિન્પશ્યતિ ભૃગૌ વિમાનં યાનમમ્બરે

સર્વોત્તમપદં પ્રાપ્તં મર્ત્યદેહેન વીક્ષ્ય ચ ।
વિસ્મયં પરમં પ્રાપ નત્વા દૂતાન્યયૌ પદં ૩૮ (૬૮૦૬)
ઇતિ શ્રીગણેશપુરાણે ક્રીડાખણ્ડે સોમકાન્તવિમાનપ્રાપ્તિવર્ણનં નામૈકપંચાશદધિકશતતમોઽધ્યાયઃ

અધ્યાય ૧૫૨ પ્રારંભઃ-
સૂત ઉવાચ ।
ઉપરિષ્ટાદ્દદર્શાથ નૃપો દૈવપુરં નિજમ્ ।
જહર્ષ ગોપુરાદાલશોભાં દૃષ્ટ્વાથ કાઞ્ચનીમ્

તતઃ સુધર્મા સસ્માર સભાં રમ્યાં સમીક્ષ્ય હ ।
નિજં પુત્રં સ્નેહવશાત્પ્રાહ ગદ્ગદભાષિણી

હેમકણ્ઠો મમ સુતો ભદ્રાસનગતો ભવેત્।
પિત્રોર્માર્ગં પ્રતીક્ષન્સ જાતે સંવત્સરેઽધુના

સ્વામિન્કૃપાનિધે તસ્ય દર્શનં દાતુમર્હસિ।
સ્ત્રિયો વાક્યં નિશમ્યૈવં શુશોચ નૃપતિસ્તદા

નૃપ ઉવાચ ।
હેમકણ્ઠો મમ સુતો જીવન્સ્યાદ્વા મૃતો ભવેત્ ।
ઉક્તમાસીન્મયા ચાસ્મૈ વત્સરાદ્દર્શનં ભવેત્

અનૃતાત્કુત્ર ગચ્છેયં નોક્તમાસીત્કદાચન ।
ન તત્ર ગન્તું નો હાતું શક્તોઽહં પરમં પદમ્

વિરુદ્ધં કથમેતદ્ધિ ઘટેતેત્યરુદદ્ભૃશમ્ ।
દૃષ્ટ્વા દૂતાસ્તયોઃ શોકમબ્રુવન્રાજસત્તમમ્

યુવયો રોદનં શ્રુત્વા કૃપા નઃ સમુપાગતા।
ક્ષણમુત્તારયામોઽત્ર દૃષ્ટ્વા તં યાત સત્વરમ્

જાતે ભવત્સમાધાને સંતોષો નઃ પરો ભવેત્ ।
તત ઉત્તારયામાસુર્દૂતા દેવપુરાદુદક્

વિમાનં તદ્ગણેશસ્ય પુરાણશ્રવણાગતમ્ ।
નગરં પ્રભયા વ્યાપ્તં વાદ્યઘોષૈશ્ચ નાદિતમ્

સુબલો જ્ઞાનગમ્યશ્ચ નમસ્કૃત્ય નૃપં ગણાન્ ।
ઈયતુર્હેમકણ્ઠં તં સર્વવૃત્તાન્તમીરિતુમ

ક્ષણાદ્ભદ્રાસનગતં હેમકણ્ઠમપશ્યતામ્ ।
સન્નદ્ધૈર્વીરમુખ્યૈશ્ચ પરિવીતં મહાબલૈઃ

અમાત્યનાગરૈર્યુક્તમીક્ષન્તં નૃત્યમુત્તમમ્ ।
તદમાત્યો જ્ઞાનગમ્યં સુબલં સમપશ્યતામ્

ઉત્તસ્થુઃ સર્વવીરાશ્વ સામાત્યો હેમકણ્ઠકઃ ।
આલિંગનાય તે સર્વે તયોઃ પ્રાપુઃ સસંભ્રમમ

તેષામાલિંગને જાતે તતો નૃપસુતો યયૌ ।
હર્ષેણ મહતા યુક્તઃ સરોમાંચોઽબ્રવીચ્ચ તૌ

મમ માતા પિતાઽમાત્યૌ ક્ષેમયુક્તૌ ન વા ક્વચિત્ ।
ત્યક્ત્વા તૌ પિતરૌ યાતો યુવામેકાકિનૌ કથમ્

એવમુક્ત્વા સ્વાસને તાવુપવેશ્ય પ્રપૂજ્ય ચ ।
વસ્ત્રચન્દનભૂષાદિફલતામ્બૂલકાંચનૈઃ

તયોર્વિના મમ પ્રાણાઃ કણ્ઠમાત્રાવલમ્બિનઃ ।
અહર્નિશં તયોર્ધ્યાનં નાન્યસ્ય મમ માનસે

પિતા મે પ્રાવદત્પૂર્વમેકદા દર્શનં પુનઃ ।
દાસ્યામીતિ કથં તચ્ચાનૃતં વાક્યં કરિષ્યતિ

તાવૂચતુઃ ।
મા કુરુષ્વ વૃથા ચિન્તાં પિત્રોસ્તે કુશલં નૃપ ।
તયોઃ પુણ્યપ્રભાવં કો જાનાતિ ભુવનત્રયે

અનુજ્ઞાં ભવતો ગૃહય નિર્ગતા નગરાદ્વયમ્ ।
ચત્વારોઽપિ પિતુસ્તેઽભૂત્સૌકુમાર્યાદિકં મહત્

ક્ષુધયા પીડિતોઽત્યન્તં રક્તસ્રાવિ પદામ્બુજમ્ ।
કન્દમૂલૈઃ ફલૈસ્તૃપ્તિર્ન ચાસીત્તસ્ય ભૂપતેઃ

માતુસ્તેઽપિ તથાવસ્થા ચેલતુર્ન પદં તદા ।
ભ્રમદ્ભિર્બહુધા પશ્ચાદ્દૃષ્ઠં ચારુ સરો મહત્

શીતલં વૃક્ષવલ્લીભિસ્તત્ર સુષ્વાપ ભૂમિપઃ।
સુધર્મા પાદસંવાહં ચકાર શ્રમકર્ષિતા

આવાં તુ કન્દમૂલાર્થે યાતસ્તત્રાયયૌ મુનિઃ।
ચ્યવનો મુનિશાર્દૂલો જલાર્થે તૌ દદર્શ હ

તયોર્હાર્દં સ ગૃહ્યૈવ નિજમાશ્રમમાયયૌ ।
તત આવાં સમાયાતૌ ગૃહ્ય મૂલફલં બહુ

સર્વે તદાશ્રમે યાતા મુનિના પૂજિતા ભૃશમ્ ।
ભોજિતાઃ ષડ્રસૈશ્ચાન્નૈર્વિશ્રાન્તિં પરમાં ગતાઃ

તતઃકથાપ્રસંગોઽભૂન્મુનિના ચ નૃપેણ ચ ।
સર્વં ચાકથયદ્રાજા વૃત્તાન્તં મુનયે તદા

તતો મુનિર્ધ્યાનબલાત્પૂર્વ જન્માસ્ય સંજગૌ।
દુરિતં તચ્છમોપાયમબ્રવીત્કરુણાયુતઃ

દુરિતશ્રવણે ચાસ્ય સંત્રાસો નૌ નૃપાભવત્ ।
સ સંદિગ્ધમના યાવત્તાવદ્દેહાદ્વિનિર્ગતાઃ

પક્ષિણઃ શ્વેતવર્ણાસ્તમારબ્ધા ભક્ષિતું નૃપમ્ ।
તેષાં ચંચુપ્રહારેણ વિહ્વલઃ પતિતો નૃપઃ

રક્ષ રક્ષેતિ કારુણ્યાત્પ્રોક્તઃ પ્રાર્તનયા મુનિઃ ।
તસ્ય પ્રેક્ષણમાત્રેણ પક્ષિણોઽન્તર્દધુઃ ક્ષણાત્

સ તુ હસ્તયુગં બદ્ધ્વા તસ્થૌ મુનિમુખો નૃપઃ ।
મહજ્જ્ઞાત્વા નૃપૈનઃ સ શ્રાવયામાસ ભક્તિતઃ

ગણેશસ્ય પુરાણં યદ્વર્ષમાત્રં કૃપાનિધિઃ ।
અષ્ટોત્તરશતેનાદૌ દેવનામ્ના પ્રસિચ્ય ચ

તદંગાત્પુરુષં ઘોરં નિષ્કાશ્યતપસો બલાત્ ।
વ્યોમકેશો લલજ્જિહ્વો વ્યાકુલઃ ક્ષુધયા ભૃશમ્

ભક્ષ્યં યયાચે સ ભૃગું સોઽવદત્તં પુરસ્થિતમ્ ।
ભક્ષયસ્વામ્રવૃક્ષં ત્વં મહાન્તં શુષ્કમેવ ચ

તેન સ્પૃષ્ટો આમ્રવૃક્ષો ભસ્મસાદભવત્ક્ષણાત્ ।
તતસ્તં ધીવરં પ્રાહ ભક્ષયસ્વેત્યસૌ મુનિઃ

તતો નૃપં મુનિઃ પ્રાહ પુરાણશ્રવણં મહત્ ।
શ્રેયો નિક્ષિપ નિત્યં ત્વમસ્મિન્ભસ્મનિ ભૂમિપ

યાવચ્ચૂતસ્ય વૃક્ષોઽત્ર ભવેદન્યો યથા પુરા ।
તતસ્ત્વમપિ રાજેન્દ્ર દિવ્યદેહો ભવિષ્યસિ

તથૈવ સ નૃપશ્ચક્રે સ્નાત્વા શ્રુત્વા કથાં બહુ ।
ન્યક્ષિપત્ત્યહં શ્રેયસ્તસ્મિન્મસ્માનિ ભક્તિતઃ

સંવત્સરાન્તે વૃક્ષોઽસૌ ભવન્નૃપ યથા પુરા ।
ગણેશસ્ય પુરાણે તુ સમાપ્તે ફલપુષ્પવાન્

નૃપોઽપિ દિવ્યકાન્તિઃ સ શશિસૂર્યનિભોઽભવત્ ।
યાવન્નૃપો મુનિં સ્તૌતિ વિમાનં તાવદાગતમ્

નૃત્યગીતસમાયુક્તં વાદ્યઘોષનિનાદિતમ્ ।
ગણેશદૂતસંયુક્તમાશ્રમાન્તિકમાસ્થિતમ્

યચ્છોભાં પશ્યતોર્નાથ દૃશો નૌ સફલાભવન્ ।
અતિપુણ્યાત્પિતુસ્તે તે દૂતા દેવાજ્ઞયા નૃપમ્

ન્યક્ષિપન્યાનમધ્યે નૌ નૃપેક્ષણપ્રણોદિતાઃ ।
સુધર્મા ચ મુનેરાજ્ઞાં ગૃહ્ય યાતા વિમાનગા

દૃષ્ટં દેવપુરં યાવત્તાવત્વત્સ્મૃતિરાગતા।
અત ઉત્તારિતં યાનં ઉત્તરે નગરાન્નૃપ

દિદૃક્ષયા પિતૃભ્યાં તે તૌ યાતૌ ત્વાં નિવેદિતુમ્ ।
તયોઃ શીઘ્રં દર્શનાય યાહિ નો ચેદ્ગમિષ્યતિ

તયોર્વાક્યં નિશમ્યેત્થં હેમકણ્ઠત્વરાન્વિતઃ ।
રોમાંચાશ્રુસમાયુક્તો ધાવમાનઃ શ્રુતાખિલઃ

યયૌ તદ્દર્શનોત્સુક્યાત્પુરસ્કૃત્ય તદા તુ તૌ।
વિશીર્ણભૂષણગણો નાગરૈઃ સેવકૈર્વૃતઃ

ગલદશ્રુઃ ક્ષણાત્પ્રાપ વિમાનં ગણસંકુલમ્ ૨.૧૫૨.૫૦ (૬૮૫૬)
ઇતિ શ્રીગણેશપુરાણે ક્રીડાખણ્ડે હેમકણ્ઠદર્શનં નામ દ્વિપંચાશદુત્તરશતતમોઽધ્યાયઃ

અધ્યાય ૧૫૩ પ્રારંભઃ-
સૂત ઉવાચ ।
તદમાત્યાશ્ચ ચત્વારઃ સોમકાન્તં પુરો યયુઃ ।
પ્રણિપત્યાખિલાન્પ્રોચુરાગતસ્તે સુતો નૃપ

સર્વવીરૈર્નાગરિકૈરિન્દ્રઃ સુરગણૈરિવ ।
વૃતો હર્ષેણ શોકેન દૃષ્ટ્વાન્યાનમેવ ચ

એવં નિવેદિતોઽમાત્યૈઃ સોઽપિ શીઘ્રં સમાગતઃ ।
આબાલવનિતાવૃદ્ધૈઃ સેવકૈશ્ચ સમન્વિતઃ

દૃષ્ટ્વા શોભાં વિમાનસ્ય સર્વ આનન્દનિર્ભરાઃ।
તન્મધ્યે સોમકાન્તં તે દૃષ્ટ્વા નેમુર્ધરાતલે

યુક્તં દૂતૈર્ગણેશસ્ય કાન્તયાપ્યતિકાન્તયા ।
તત ઉત્તીર્ય યાનાત્સ આલિલિંગ સુતં મુદા

આનન્દાશ્રૂણિ મુંચંતૌ સરોમાંચાવુભાવપિ ।
વિદેહાવિવ સંજાતૌ ન કિંચિદૂચતુઃ ક્ષણમ્

તત ઊચે પિતા પુત્રં સ્નેહેન વત્સરાગતમ્ ।
ત્વામેવ નિત્યં ધ્યાયામિ સત્પુત્રં વંશભૂષણમ્ ।
ન ત્વયા સદૃશં પશ્યે પુત્રેષુર્જનવર્તિષુ ।
તતઃ સુધર્મા સસ્નેહા ધાવમાના સુતં યયૌ ।
આલિલિંગ મુદા યુક્તા ગલદશ્રૂ ઉભાવપિ ।
તત ઊચે સુતં માતા ચિરદૃષ્ટોઽસિ બાલક ।
ન મે સુખં કિંચિદભૂત્તાદુત્કણ્ઠિતચેતસઃ ।
ઇદાનીં તે મુખં દૃષ્ટ્વા સાનન્દં મે મનોઽભવત્ ।
વિયોગેન ચ તે દેહો મમ જાતઃ કૃશો ભૃશમ્ ।
તત આલિંગનં ચક્રુર્નાગરા નામધારકાઃ ।
કેચિત્પ્રદક્ષિણાં ચક્રુઃ કેચિત્પાદૌ તદાઽસ્પૃશન્ ।
કેચિચ્ચ દર્શનાદેવ પ્રતિયાતાઃ પુરં પ્રતિ ।
તત ઊચે નૃપઃ સર્વાન્ભૃગુણાઽનુગ્રહાન્મમ ।
ગણેશસ્ય પુરાણં યચ્છ્રાવિતં પાપનાશનમ્

અભવં તેન નિષ્પાપો દિવ્યદેહો વિમાનગઃ।
સર્વેષાં દર્શનં જાતં પુનર્યાસ્યામિ યાનગઃ

કૃપાવતા ગણેશેન યાનં મે પ્રેષિતં ભુવિ ।
રાજ્યં ચ પરિભુક્તં મે સ્વેચ્છયા સંપદઃ સુત

ધામ યાસ્યામિ પરમં પ્રસાદાદ્ભૃગુસંભવાત્ ।
એવં તે શુશ્રુવુર્વાણી સોમકાન્તસમીરિતામ્

રુરુદુઃ સુસ્વરં સર્વે પતિતા ભુવિ કેચન ।
શ્રેણીમુખ્યાસ્તતઃ પ્રોચુઃ સોમકાન્તં કૃપાનિધિમ્

નો વિના જગતીપાલ કથં યાસ્યસિ ધામ તત્ ।
પ્રાણાંસ્ત્યક્ત્વા વયં સર્વે યાસ્યામોઽપ્યનુ તે નૃપ

હત્યા ત્વન્મસ્તકે રાજન્સર્વેષાં નો ભવિષ્યતિ ।
નનઃ પુણ્યં તથા યેન દ્રક્ષ્યામસ્તં ગુણેશ્વરમ્

તવ પ્રસાદાદ્દેવસ્ય યાસ્યામો લોકમુત્તમમ્ ।
ન સંસારે સુખં કિંચિદાયુનાશો વૃથાઽત્ર હિ

અસ્માકં ન ભવેત્કિંચિત્સાધનં ધામસાધનમ્ ।
તતોઽવદદ્ધેમકણ્ઠો જનકં વાક્યમાદૃતઃ

કથં ત્યક્ત્વાઽર્ભકં તાત યાસિ દ્રષ્ટું ગજાનનમ્ ।
મમ રાજ્યેન કો હેતુરાજ્ઞયા તવ વત્સરમ્

પાલિતં રાજ્યમખિલં નેચ્છેદાનીં મમાપિ ચ ।
શપથસ્ત તથા રાજન્નતો નેતું મમાર્હસિ

સોમકાન્ત ઉવાચ ।
સર્વેષામેવ સંદ્રષ્ટુમિચ્છા દેવપદામ્બુજમ્ ।
અહં ચ પરવાનત્ર કથં કાર્યં મયા જનાઃ

ભવત્સ્નેહેન શોચામિ પુત્રસ્નેહાદ્વિશેષતઃ ।
અતએવોર્ધ્વગં યાનમુત્તાર્ય દ્રષ્ટુમાગતઃ

સૂત ઉવાચ ।
તતઃ શોચત્સુ લોકેષુ સોમકાન્તે રુદત્યપિ ।
પુત્રે ચ દેવદૂતાનાં દયા પ્રાદુરભૂત્તદા

તે ઊચુઃ સોમકાન્તં તં ધન્યો રાજન્યતો જનાઃ ।
ત્વયિ સંકલ્પિતપ્રાણા યથા ત્વં જગદીશ્વરે

અતઃ સર્વાન્ગૃહીત્વૈવ યામઃ શીઘ્રં ગજાનનમ્।
રાજોવાચ ।
યદિ સર્વા પુરી નીતા તદા કીર્તિર્દૃઢા મમ

ભવિષ્યતિ રસાયાં મે નાન્યથા તુ ભવિષ્યતિ ।
સૂત ઉવાચ ।
એવમુક્ત્વા પુરાણસ્ય ગણેશસ્ય શ્રવોદ્ભવમ્

પૂજ્યં હસ્તે જલે નૈષાં દદૌ રાજા તદાજ્ઞયા ।
તોયે હસ્તે ગતે લોકા નિષ્પાપાઃ પુણ્યમૂર્તયઃ

આબાલવનિતાવૃદ્ધા રુરુહુર્યાનમુત્તમમ્ ।
ગણેશસ્ય તુ યે દૂતાસ્તતોઽગુરૂર્ધ્વમાર્ગતઃ

તતઃ કેચિન્નરાઃ પાપા યૈર્નાપિ ચ જલં કરે ।
તે પુનર્નગરે યાતાઃ શશંસુઃ શેષિતં જનમ્

તતો દદૃશિરે સર્વે ઉર્ધ્વગં નગરં બહુ ।
ઊચુઃ પરસ્પરં શેષા દ્રવ્યલાભેન તોષિણઃ

નાનાવ્યવસાયરતા બભૂવુર્હષ્ટમાનસાઃ ।
કાંશ્ચિત્પલાયનપરાન્દૂતા દણ્ડપ્રહારિણઃ

બલાદ્ગૃહીત્વા પ્રાક્ષિપન્યાનમધ્યેતિકૌતુકાત્ ।
નાનામિષેણ જગ્મુર્યે તાંસ્તથૈવ નિચિક્ષિપુઃ

ઉપવિષ્ટા મધ્યદેશે રાજપત્નીસુતાદયઃ ।
અમાત્યાઃ પરિતો લોકા નાગરા વિવિશુઃ સુખમ્

મયૂરેશમયૂરેશ જય ત્વમિતિ ઘોષિણઃ ।
વાદ્યત્સુ દેવવાદ્યેષુ નૃત્યત્યપ્સરસાં ગણે

પ્રતિનાદેન ગર્જન્તિ મણ્ડલાનિ દિશામપિ ।
અતિવેગેન તે પ્રાપ્તા ગણેશસ્ય પદં શુભમ્

સુષમાં પરિપશ્યન્તો વિસ્મયેનાબ્રુવન્નિતિ ।
અહો મહત્પુણ્યમસ્ય યેન દૃષ્ટો ગજાનનઃ

સમીપતાં યયુઃ સર્વે રાજા સાયુજ્યમાપ ચ।
સૂત ઉવાચ ।
એવં વઃ કથિતા વિપ્રા ગણેશસ્ય પુરાણના

કથા સર્વજનસ્યાપિ શ્રવણાત્પાપનાશનિ ।
શૃણુધ્વં દેવદૂતેભ્યો વિમાને પૃષ્ટવાન્નૃપઃ ।
તત્સર્વં ભવતાં વિપ્રાઃ કથયામિ કથાનકમ્ ૩૫ (૬૮૯૧)
ઇતિ શ્રી ગણેશપુરાણે ક્રીડાખણ્ડે સોમકાન્તસ્ય દેવપદપ્રાપ્તિવર્ણનં નામ ત્રિપંચાશદુત્તરશતતમોઽધ્યાયઃ

અધ્યાય ૧૫૪ પ્રારંભ :-
ઋષય ઊચુઃ ।
કિં પૃષ્ટં સોમકાન્તેન વિમાનવર્તિનાઽનઘ ।
તદ્વયં શ્રોતુમિચ્છામો વદ સર્વમશેષતઃ

સૂત ઉવાચ ।
ગચ્છતા વ્યોમમાર્ગેણ પૃષ્ટા દૂતા મહાત્મના ।
વારાણસીસ્થિતાનાં તુ ગણેશાનાં મહાત્મનામ્

નામાનિ પરિવારાણાં તાનિ નઃ શૃણુતાનઘાઃ ।
રાજોવાચ ।
દૂતા વદન્તુ કૃપયા વિશ્વેશપરિવારગાન્

ગણેશાન્મમ કાર્ત્સ્ન્યેન સ્મરણાત્સર્વસિદ્ધિદાન્ ।
દૂતા ઊચુઃ ।
કથયામઃ સમાસેન વિશ્વેશાવરણે ગતાન્

ગણેશાન્ક્રમશો રાજઞ્શૃણુ સર્વભયાપહાન્ ।
દુર્ગા વિનાયકોઽથાર્ક ભીમચણ્ડી વિનાયકઃ

દેહલીગણપશ્ચાથ તથોદ્દણ્ડવિનાયકઃ ।
પાશપાણિઃ સર્વવિઘ્ન હરણોઽથ વિનાયકઃ

પ્રથમાવરણે સિદ્ધસિદ્ધિરૂપો વિનાયકઃ ।
લમ્બોદરઃ કૂટદન્તઃ શૂલટંક વિનાયકઃ

કૂષ્માણ્ડાખ્યશ્ચતુર્થશ્ચ પંચમો મુણ્ડસંજ્ઞકઃ।
વિકટદ્વિજસંજ્ઞસ્તુ રાજપુત્રવિનાયકઃ

પ્રણવાખ્યોઽથાપરશ્ચ દ્વિતીયાવરણે સ્થિતાઃ ।
વક્રતુણ્ડ એકદન્તત્રિમુખશ્ચ વિનાયકઃ

પંચાસ્યશ્ચાપરશ્ચાત્ર હેરમ્બશ્ચ વિનાયકઃ

મોદકપ્રિય ઇત્યેવ તૃતીયાવરણે સ્થિતાઃ ।
વિનાયકોઽભયપ્રદઃ સિંહતુણ્ડવિનાયકઃ

કુણિતાક્ષશ્ચાપરશ્ચ ક્ષિપ્રપ્રસાદસંજ્ઞકઃ ।
ચિન્તામણિરિતિ ખ્યાતો દન્તહસ્તવિનાયકઃ

પ્રચંડશ્ચાપ્યપરશ્ચોદ્દણ્ડમુણ્ડવિનાયકૌ ।
ચતુર્થાવરણે જ્ઞેયા અષ્ટાવેતે વિનાયકાઃ

સ્થૂલદન્તો દ્વિતીયસ્તુ કલિપ્રિયવિનાયકઃ ।
ચતુર્દન્તો દ્વિતુણ્ડાખ્યો જ્યેષ્ઠો ગજવિનાયકઃ

કાલાખ્યશ્ચ તથા જ્ઞેયો માર્ગેશાલયોપરોઽપિ ચ ।
પંચમાવરણે જ્ઞેયા અષ્ટાવેતે વિનાયકાઃ

મણિકર્ણિવિનાયક આશાસૃષ્ટિવિનાયકઃ ।
યક્ષાખ્યો ગજકર્ણાખ્યશ્ચિત્રઘણ્ટવિનાયકઃ

સુમંગલશ્ચ મિત્રાખ્ય એતે ષષ્ઠે વિનાયકાઃ ।
મોદઃ પ્રમોદઃ સુમુખો દુર્મુખશ્ચ વિનાયકઃ

ગણપાખ્યોથાપરશ્ચ તથા જ્ઞાન વિનાયકઃ ।
સપ્તમાવરણે જ્ઞેયા તસ્થા દ્વારવિનાયકાઃ

અવિમુક્તોઽષ્ટમો યત્ર મોક્ષદોઽથ વિનાયકઃ ।
અન્યો ભગીરથાખ્યો હિ હરિશ્ચન્દ્રવિનાયકઃ

કપર્દીતિ પરો જ્ઞેયસ્તથા બિન્દુવિનાયકઃ ।
એતેષાં સ્મરણં નિત્યં સર્વકામફલપ્રદમ્

પ્રાતરુત્થાય યશ્ચૈતાન્પઠતે શુદ્ધમાનસઃ ।
ન તસ્ય વિઘ્ના વિઘ્નં હિ કુર્વન્તિ સર્વકર્મસુ

એકૈકનામ્ના રાજેન્દ્ર દૂર્વાભિસ્તન્દુલૈરપિ ।
તિલૈઃ શમીદલૈશ્ચૈતાન્પૂજયેદ્ભક્તિમાન્નરઃ

અસાધ્યં સાધયેત્કાર્યં સર્વત્ર વિજયી ભવેત્ ।
આયુષ્યં પુષ્ટિમારોગ્યં પ્રાપ્નુયાદ્ધનમુત્તમમ્

ઇદં તે કથિતં સર્વં યદ્ધિ પૃષ્ટં ત્વયા નૃપ ।
તૂષ્ણીં યયુર્દેવદૂતાસ્તતો ધામ નિજં મુદા

સૂત ઉવાચ ।
ઇદં તત્કથિતં વિપ્રા વિશ્વેશાવરણં મયા।
ઇદાનીં કથયિષ્યામિ પુરાણસ્ય ફલશ્રુતિમ્ ૨૫ (૬૯૧૬)
ઇતિ શ્રી ગણેશપુરાણે ક્રીડાખણ્ડે ષટ્પંચાશદ્વિનાયકવર્ણનં નામ ચતુઃપંચાશદુત્તરશતતમોઽધ્યાયઃ

અધ્યાય ૧૫૫ પ્રારંભઃ –
સૂત ઉવાચ ।
જન્મમૃતિઃ ન ચ સ્યાતાં પુરાણસ્યાસ્ય સંશ્રયાત્ ।
એકશોબહુશશ્ચેત્સ્યાદ્યદ્યસ્ય શ્રવણં દ્વિજાઃ

ન શક્નુતામલં વક્તું શેષપદ્માસનાવપિ ।
યો દદાતિ કુરુક્ષેત્રે સોમસૂર્યગ્રહે નરઃ

હેમભારસહસ્રાણિ વિપ્રેભ્યો ભક્તિભાવતઃ ।
તદસ્ય શ્રવણાત્પુણ્યં પ્રાપ્નુયાદ્ભક્તિમાન્નરઃ

યજ્ઞાનાં સાંગજાતાનાં સર્વેષાં દક્ષિણાવતામ્।
ફલં કસ્તુલયામાસ પુરાણશ્રવણસ્ય ચ

પુરાણશ્રણસ્યાસ્ય પુણ્યં તસ્માદ્વિશેષવત્।
વ્રતાનાં જલદાનાનાં તત્ર કા ગણના મતા

કોટિકન્યાપ્રદાનાનાં ગોદાનાનાં સહસ્રશઃ ।
તત્પુણ્યં કોટિગુણિતં શ્રવણાદસ્ય જાયતે

ચતુર્ણામપિ વેદાનાં સાંગાનાં પઠનાત્સદા ।
શાસ્ત્રાણાં વ્યાકૃતેર્વાપિ સદા સત્સેવનાદપિ

તત્પુણ્યં કોટિગુણિતં તદસ્ય શ્રવણાદ્ભવેત્ ।
ભારતસ્ય પુરાણસ્ય સંપૂર્ણસ્ય શ્રવાદપિ ।
યત્પુણ્યં કોટિગુણિતં તદસ્ય શ્રવણાદ્ભવેત્

યસ્ય ગેહે ગણેશસ્ય પુરાણં લિખિતં ભવેત્ ।
ન તત્ર રાક્ષસા ભૂતાઃ પ્રેતાશ્ચ પૂતનાદયઃ

ગ્રહા બાલગ્રહા નૈવ પીડાં કુર્વન્તિ કર્હિચિત્ ।
તદ્ગૃહં હિ ગણેશેન રક્ષ્યતે સર્વદા સ્વયમ્

ઇદં પુરાણં શૃણુયાત્પૂજયેદ્વા સમાહિતઃ ।
તસ્ય દર્શનતઃ પૂતા ભવન્તિ પતિતા નરાઃ

બ્રહ્માદીનાં મુનીનાં સ માન્યો ભવતિ માનવઃ।
ક્રુદ્ધો દહેત્સ ભુવનં તુષ્ટશ્ચેન્દ્રપદં દદેત્

અષ્ટસિદ્ધીઃ સમાપ્નોતિ શ્રવણાત્પ્રત્યહં નરઃ ।
ન દારિદ્ર્યં સમાપ્નોતિ ન સંકષ્ટં નરઃ ક્વચિત્

ઈપ્સિતં સમવાપ્નોતી પદ્માદીંશ્ચ નિધીનપિ ।
કલ્પદ્રુમઃ કામધેનુર્નિધિશ્ચિન્તામણિસ્તથા

તસ્ય વશ્યત્વમભ્યેતિ સોઽપિ વન્દ્યો ભવત્યપિ ।
જારણં મારણં સ્તમ્ભં ઉચ્ચાટનમથાપિ ચ

અસ્ય સ્મરણમાત્રેણ નિરસ્તં સ્યાત્ક્ષણેન હ।
ગણેશનિકટં સ્થિત્વા પુરાણં શૃણુયાન્નરઃ

મહાપાપાદ્વિનિર્મુક્તઃ સ્ત્રીબાલહત્યયાપિ ચ ।
સાન્નિધ્યમાપ્નુયાદન્તે ગણેશસ્ય ન સંશયઃ

શૂદ્રોઽપિ મધ્યે સંસ્થાપ્ય બ્રાહ્મણાન્શૃણુયાદિદમ્ ।
ક્રમેણ લભતે વર્ણાન્વૈશ્યક્ષત્રદ્વિજાહ્યામ્

નિત્યનૈમિત્તિકર્મભ્યશ્ચ્યુતો યઃ શૃણુયાદિદમ્ ।
કર્મસાદ્ગુણ્યમાપ્નોતિ ગણેશસ્ય પ્રસાદતઃ

ભાદ્રે શુક્લચતુર્થ્યાં યઃ કૃત્વા મૂર્તિં મહીમયીમ્ ।
મણ્ડપે તોરણે રમ્યે સંપૂજ્ય પરમાદરાત્

પુરાણં શૃણુયાત્સદ્યસ્તસ્ય તુષ્ટો વિનાયકઃ ।
દદાતિ નિખિલાન્કામાનન્તે મોક્ષં ચ વિઘ્નપઃ

સ્તોત્રાણ્યત્ર ચ ખ્યા યાવન્તિ તાવન્તિ પ્રત્યહં નરઃ।
પઠતે યદિ યો ભવત્યા સ સિદ્ધઃ સ્યાન્ન સંશયઃ

અસાધ્યમપિ યત્કિંચિત્તેષાં પાઠાલ્લભેન્નરઃ ।
અનુષ્ઠાનવિધાનેન માસમાત્રં જપેત્તુ યઃ

બ્રાહ્મણાન્ભોજયેદ્ભક્ત્યા સોઽપિ તન્મયતામિયાત્ ।
ઋષય ઊચુઃ ।
કથમસ્ય શ્રવાત્પુણ્યં કેન પ્રાપ્તં પુરાઽનધ

તન્નઃ શંસ મહાભાગ પૃચ્છતાં સૂતનન્દન ।
સૂત ઉવાચ ।
શૃણ્વન્તુ મુનયઃ પૂર્વં કશ્ચિન્મૂકોઽભવન્મુનિઃ

બ્રહ્મલોકં ગતોઽકસ્માલ્લોમશોઽપિ યદૃચ્છયા।
નમસ્કૃત્ય ચ લોકેશમુપવિષ્ટસ્તદાજ્ઞયા

પૂજિતઃ પરયા ભક્ત્યા લોમશોઽથાબ્રવીદ્વિધિમ ।
લોમશ ઉવાચ ।
વ્યાસાય કથિતં દેવ પુરાણં પુણ્યવર્દ્ધનમ્

ગણેશસ્ય મહાભાગ તન્મે વક્તુમિહાર્હસિ ।
બ્રહ્મોવાચ ।
શૃણુ લોમશ યત્નેન સર્વપાપહરં શુભમ્

પુરાણં હિ ગણેશસ્ય કામમોક્ષપ્રદં નૃણામ્।
સૂત ઉવાચ ।
તતઃ સ કથયામાસ બ્રહ્મા સ્વીયેન યામતઃ

લોમશાય ગણેશસ્ય પુરાણં કામમોક્ષદમ્ ।
મૂકેન નાદલુબ્ધેન શ્રુતં ભક્ત્યાઽખિલં તુ તત્

તતઃ સ વાગીશ્વરવત્પ્રોવાચ ભારતીં મુનિઃ ।
અધીત્ય પાઠતઃ કૃત્વા શ્રાવયામાસ ચેતરામ્

ભુક્ત્વા ભોગાન્યથા કામાન્પુત્રાન્પૌત્રાનવાપ્ય ચ।
અન્તે જગામ પરમં ધામ ગાણેશ્વરં શુભમ્

પુનઃ શૃણ્વન્તુ મુનય ઇતિહાસં પુરાતનમ્ ।
ઇક્ષ્વાકુકુલસંભૂતો રાજા શુદ્ધાત્મકઃ શુચિઃ

યજ્વા દાનપ્રદો નિત્યં સ્વાધ્યાયપરમોરિહા ।
આખ્યાતા સર્વધર્માણાં પ્રજાનાં પાલને રતઃ ।
ષષ્ઠાંશભાગી લોકાનાં માન્યઃ પ્રિયતરોપિ ચ

વિખ્યાતસ્ત્રિષુ લોકેષ ગોપ્તા સંવરણાભિધઃ।
અનપત્યઃ સ પુત્રાર્થે પુત્રીયામિષ્ટિમાહરત્

સાંગા સદક્ષિણામન્નદાનૈઃ સુવિહિતાં તતઃ ।
ન લેભે સંતતિં રાજા હરિવંશમથાશૃણોત્

પૂજયિત્વા દ્વિજાનન્તે વાચકં પરિતોષ્ય ચ ।
વસ્ત્રધેનુહિરણ્યાદ્યૈ રત્નમૂલફલાદિભિઃ

તતોઽપિ નાભવત્પુત્રો દૈવાન્મૂકસ્તુ તદ્ગૃહમ્ ।
સમાયાતસ્તુ વિખ્યાતો ગણેશાખ્યપુરાણવિત

સ્થાપિતં પ્રાર્થયિત્વા ચ રાજ્ઞા સંવરણેન સઃ।
શ્રુત્વા પુરાણં તદ્વક્ત્રાદ્ગણેશાખ્યં મુદા નૃપઃ

તદન્તે તોષયામાસ મૂકં તં દ્વિજપુંગવમ્ ।
રત્નમુક્તાફલૈર્વસ્ત્રૈર્ભૂષણૈર્હેમનિર્મિતૈઃ

લેભે તતઃ કુમારં સ ગણેશે તત્પરોઽભવત્ ।
ભુક્ત્વાનેકસુખાન્યાપ ગાણેશં પદમુત્તમમ્

ભગિની તસ્ય વન્ધ્યાસીત્ત્રિંશદ્વર્ષા રજસ્વલા ।
યથાકાલં ભવત્યવ શ્રુત્વા તસ્યાથ સંતતિમ્

ગણેશાખ્યપુરાણસ્ય શ્રવાજ્જાતાં ચ તં મુનિમ્ ।
આકાર્યં પરિશુશ્રાવ પુરાણં તન્મુખાચ્છુભમ્

લેભે પુત્રં મહાશૂરં ગણેશભજને રતા ।
પુત્રાન્પૌત્રાન્સમાવાપ્ય ભુક્ત્વા ભોગાન્મનોહરાન્

જગામ સા ગણેશસ્ય નિજધામોવસાનતઃ ।
સગરસ્ય તુ પુત્રાણામેકઃ પઙગુરભૂત્સુતઃ

તેનાપીદં શ્રુતં પુણ્યં પુરાણં લોમશાત્પુરા।
ભક્ત્યા દ્વાદશવર્ષેણ વિનીતેનાથ ભક્તિત:

સંતોષ્ય લોમશં દ્રવ્યૈસ્તતોઙ્ઘ્રિ સમવાપ સ: ।
વિજયં પુષ્ટિમાયુષ્યં પ્રાણાન્તે ધામતત્પરઃ

અષ્ટાદશપુરાણાનાં શ્રવણે યત્ફલં લભેત્।
તદેકસ્ય પુરાણસ્ય ગણેશસ્ય શ્રુતેર્ભવેત્

કાકવન્ધ્યા બહુસુતા શ્રવણાદસ્ય જાયતે।
સ્રવદ્ગર્ભા ભવેદ્વિપ્રા દૃઢગર્ભા ભવત્યપિ

મૂકો વાગીશતાં યાતિ શ્રવણાન્મુનિપુંગવાઃ ।
વેદાધ્યયનસંપન્નો માન્યોઽપિ દ્વિજપુંગવઃ

શૂદ્રો વૈશ્યત્વમાપ્નોતિ વૈશ્યઃ ક્ષત્રિયતામિયાત્ ।
ક્ષત્રિયો દ્વિજતાં યાતિ સ્મરણાદપ્યમુષ્ય હ

કન્યાં તુ લભતે ચાસ્યાપ્યેકાધ્યાયસ્ય સંશ્રવાત્ ।
ગુણવન્તં કુલીનં ચ પતિં સાધું ધનાન્વિતમ્

જાત્યન્ધો લભતે દૃષ્ટિં પુરાણસ્યાસ્ય સંશ્રયાત્ ।
સર્વતીર્થષુ યઃ સ્નાયાદ્દદ્યાદ્દાનાનિ સર્વશઃ

તત્ફલં સમવાપ્નોતિ ભક્ત્યા યઃ શૃણુયાદિદમ્ ।
પંચાગ્નિસાધનં ગ્રીષ્મે હેમન્તે જલવાસનમ્

વર્ષાસ્વાકાશવાસં યઃ કુરુતે બહુવત્સરમ્ ।
તત્ફલં પ્રાપ્નુયાન્મર્ત્ય સંશ્રુતેઽધ્યાયપંચકે

અગ્નિહોત્રં સદા યસ્તુ સેવતે ભક્તિમાન્નરઃ ।
તત્ફલં હિ પુરાણસ્ય શ્રવણાદસ્ય જાયતે

એકાંગુપ્ઠેન યસ્તિષ્ઠેદ્વર્ષાણામયુતં નરઃ ।
દશાધ્યાયશ્રુતેરસ્ય પુરાણસ્ય તથા ફલમ્

લભતે માનવો ભક્ત્યા નિશ્ચિતં નાત્ર સંશયઃ ।
આજન્મમરણાન્નિત્યં શૃણુયાન્માનવો ભુવિ

પુરાણં તુ ગણેશસ્ય ચક્રવર્તી ભવેત્તુ સઃ ।
આજન્મમરણાદ્યસ્તુ કાશીવાસં કરોતિ યઃ

તત્પુણ્યં લભતે મર્ત્યો ગણેશસ્ય પુરાણતઃ ।
સહસ્રં માઘમાસાન્યઃ પ્રયાગે સ્નાતિ માનવઃ

તત્ફલં લભતે મર્ત્યઃ પુરાણસ્યાસ્ય સંશ્રવાત્ ।
ગોમતીસંગમે તદ્વત્સ્નાનં ભક્ત્યા કરોતિ યઃ

તત્ફલં કોટિગુણિતં લભતે ચાસ્ય સંશ્રવાત્ ।
ગણેશસ્ય પુરાણં યઃ શૃણુયાદ્ભક્તિમાન્નરઃ

ન ભયં તસ્ય શૂલાત્તુ વજ્રાચ્ચ ચક્રિચક્રતઃ ।
ઇદં વઃ કથિતં સર્વં પુરાણં ચ સવિસ્તરમ્

સંપૂર્ણો મહિમા વક્તું ન શક્યો વર્ષકોટિભિઃ ।
બ્રાહ્મણા ષણ્મુખેનાપિ શેષેણાપિ મુનીશ્વરાઃ

યુષ્માભિઃ પરિપૃષ્ટં યત્સર્વપાપપ્રણાશનમ્ ।
સર્વં કામપ્રદં ભુક્તિમુક્તિદં પુણ્યવર્ધનમ્

ગણેશસ્ય પરેશસ્ય નાનાલીલાધરસ્ય વ ।
વક્તૃસ્રોસ્રોરઘહરં કિમન્યચ્છ્રોતુમિચ્છથ ૬૬ (૬૯૮૬) (૧૧૦૭૯)
ઇતિ શ્રીગણેશપુરાણે ક્રીડાખણ્ડે ફલશ્રુતિનિરૂપણં નામ પંચપંચાશદુત્તરશતતમોઽધ્યાયઃ