Dvāviṃśatyavadānakathā · Chapter 1

Oṃ namo bhagavate śrīguṇasāgarāya //
natvā śrīśākyaketuṃ suragaṇasahitaṃ devadevādhidevaṃ
saṃsārābdheḥ plavantaṃ sakalaguṇanidhiṃ gautamaṃ buddhanātham /
saṃsāre siṃhanādaṃ sakalabhayaharaṃ dharmacchatraṃ munīndraṃ
vakṣye 'haṃ dharmaratnaṃ munivarakathitaṃ sarvalokābhilāṣam // Dak_O.1 //
tadyathāśokabhūmīndraḥ kukkuṭārāmasaṃśritam /
upaguptaṃ punaḥ prāha dvāviṃśatikathotsukaḥ // Dak_O.2 //
bhadanta śrotum icchāmi caityasevākathāṃ śubhām /
apy evaṃ dharmapīyuṣaṃ tvanmukhāmbujanirgatam // Dak_O.3 //
iti vijñaptim ākarṇya upaguptaḥ samādiśat /
śṛṇv aśoka pravakṣyāmi dvāviṃśatyavadānakam // Dak_O.4 //
I. puṇyaprotsāhanakathā
viharati bhagavāñ chāstā saṃbuddho lokanāyakaḥ /
rājagṛhe mahodbhāse gṛddhakūṭe sukhālaye

mahatā bhikṣusaṃghena sārdhaṃ dvādaśabhiḥ śataiḥ /
mahadbhir bodhisattvaiś ca aśītyā ca sahasrakaiḥ

devadānavagandharvayakṣakiṃnaramānujaiḥ /
puraskṛtyārcitas tasthau pūrṇenduḥ khe grahair iva

bhāsayan mahatā dīptyā parṣadgaṇaṃ vilokayan /
trikālakalyāṇaṃ dharmaṃ dideśa parṣadāṃ punaḥ

ādau kalyāṇaṃ madhye kalyāṇaṃ paryavasāne kalyāṇaṃ svartham suvyañjanaṃ kevalaṃ paripūrṇaṃ pariśuddhaṃ paryavadātaṃ brahmacaryaṃ saṃprakāśayati sma //
tadāhānanda ātmajñaḥ kṛtāñjalipuṭo mudā /
sarvajñaṃ dharmarājaṃ taṃ natvā bhaktipuraḥsaraḥ

bhagavañ chrotum icchāmi narāṇāṃ hitakāmyayā /
dharmāṇām uttamaṃ dharmaṃ vada vādīndra vādirāṭ

iti saṃprārthite tena śākyasiṃhas tataḥ svayam /
samādhiṃ vidadhe tatra dharmasaṃdarśanaṃ varam

athāsya subhrūvivarād babhūva vinirgatā sā prahatāndhakārā /
sarvāsu dikṣu pratibhāsiteva madhyāhnasūryasya gabhastimālā

athāsya śiṣyāḥ parṣadbhir bhagavantam avākiran /
supuṣpair vāyunā ghūrṇā nagaṃ bālalatā iva

cacāla vasudhā sābdhi ḥ ṣaḍvikārātha sācalā /
papāta puṣpaṃ meghebhyo nedur vādyaṃ surarṣayaḥ

atha devagaṇāḥ sarve cāyānti gṛddhakūṭake /
brahmaśaṃkaraśakrāś ca hariḥ kāmeśvarādayaḥ

asurā ḥ khagagandharvā ḥ kiṃnarāś ca mahoragāḥ /
lokapālās tathānye 'pi dhṛtarāṣṭrādayas tathā

tatra pradakṣiṇīkṛtya bhagavantaṃ nipatya ca /
devāś cānye gaṇāḥ sarve pratasthur vismayāt puraḥ

atha śrībhagavāñ chāstā vyutthāya ca samādhinā /
parṣadgaṇaṃ samālokya prahasan tūṣṇīm abhūt tadā

athānando mahāvijñaḥ jñātvādhivāsanaṃ muneḥ /
āsanāt sahasotthāya bhagavantam uvāca saḥ

bhagavan pātum icchāmi tvanmukhāmbhojanirgatam /
vākpīyūṣaṃ tṛṣārto 'pi girijaṃ kam ivārditaḥ

kaś cin mahādhano loke vidvān bhogī ca bhāgyavān /
daridro vyādhito duḥkhī śilpavān ko 'pi bāliśaḥ

suraloke gataḥ kaś cin niraye cātidāruṇe /
kena karmavipākena tādṛk syād bhagavan katham

tat sarvaṃ brūhi vādīndra sarvalokahitārthaka /
mayi cānugrahaṃ kṛtvā bhavāmbhodhinimagnake

evam ukte 'tha bhagavān uvāca bhikṣusattamam /
sarvalokahitārthāya svaṃ prabhāvaṃ pradarśayan

mahābhāgeti sattvānāṃ yat tac ced dhṛdi rocate /
ṣaṭsu gatiṣu magnānāṃ tac chṛṇuṣva śubhāśubham

śrutapūrvaṃ mahābhāga sadasac ceti jīvinām /
caturyoniṣu saṃjātāḥ pṛthakkarmagatāḥ sadā

aṇḍajāḥ svedajā aupapādukāś ca jarāyujāḥ /
khagādyā aṇḍajāḥ proktā mānavādyā jarāyujāḥ

svedajāḥ kṛmikīṭādyā devādyā aupapādukāḥ /
dṛśyante karmaṇā caite vrataśīlena dhīmatā

teṣāṃ gativiśeṣeṇa jāyante prāṇinas tathā /
caturdvīpe mahotsāhe pūrvakarmavipākagāḥ

ṣaḍgatau saṃbhavā bhūtā adhamottamamadhyamāḥ /
bhikṣo karmavipākena gatis teṣāṃ pṛthak pṛthak

śubhāśubham idaṃ karma kāyavākcittajaṃ tataḥ /
phalaṃ bhukte janas tasya lokottare ca laukike

athāha punar ānando bhagavantaṃ jagadgurum /
pāpānāṃ mūlalokānāṃ vyaktayas tvaṃ pradarśaya

kāyavāṅmanasā karma kāni kāni kṛtāni ca /
yat sarvaṃ tad viśeṣaṃ ca vada me vādipuṃgava

bhagavān āha //
śubhāśubhaphalaṃ nṝṇāṃ yac chṛṇuṣva sphuṭaṃ tataḥ /
dharmeṇa prāpyate modam amodam aśubhodbhavam

punaś ca vistareṇa //
kāyaduścaritaṃ karma tridhā bhinnaṃ prakāśitam /
adattaprāṇātipātaḥ kāmamithyā tathaiva ca

vākduścaritaṃ karma caturvidhaṃ prakāśitam /
mṛṣāpiśunapāruṣyaṃ saṃbhinnety āha dhīmatā

manoduścaritaṃ karma tridhā bhinnaṃ vidur budhāḥ /
abhidhyā caiva vyāpādamithyādṛṣṭi trayovidhāḥ

yo dayāṃ saṃtyajed drohī paraprāṇivadhādinā /
tāḍanahiṃsakarmādiḥ prāṇipātas tad ucyate

paraviṣayalobhena anyāyena balena ca /
cauryāsatya-adharmeṇa adattagrahaṇaṃ viduḥ

vratinī dharmacāriṇyo 'śucī veśyā ḥ parastriyaḥ /
saṃbandhini prasaṅgādi kāmamithyā tad ucyate

viṣayeṣu ca lobheṣu sneheṣu ca bhayeṣu ca /
asatyena probodhāya mṛṣāvādas tad ucyate

svadoṣam guptavān yena paradoṣaḥ prakāśyate /
śāpayen marmadigdhena pāruṣyavacanaṃ viduḥ

durvṛttivyavahāreṇa bandhumitraṃ virudhyate /
svena ca guṇalabdhāya paiśunyaṃ vidadhā mataḥ

yasyāgre bhinnavādena paracittam adhīrayan /
parasparavidveṣaṃ syāt saṃbhinna vidadhā mata ḥ

paradravyādisaṃpatti ṃ lobhacittena tarkayan /
tad abhidhyā iti jñeyaṃ durjanaḥ parisevyate

paradehādisaṃpattau kucittena sa śāpayet /
amaṅgalaṃ bhavatv iti vyāpādo 'yaṃ sa ucyate

paratra pāpapuṇyaṃ na sukhaduḥkhaṃ na vidyate /
durbodhaśāstraṃ śrutvā ca mithyādṛṣṭi ḥ sa nāstikaḥ

evaṃ daśākuśalena pāpenaiva sa bāliśaḥ /
paratra yamadūtena nānāpīḍāṃ pratapyati

tasmāc coktaṃ mayānanda dehavṛkṣaphalodayam /
yena yena kṛtaṃ karma tena tena prabhuñjate

janmanāśajarāvīcau nimagnāḥ prāṇino hrade /
tasmād bhīyā mahābhīme bhujaṅge bhītimān iva

devāsuramanuṣyāś ca tiryakpretāś ca nārakāḥ /
ṣagatau jāyate tasmiñ śubhāśubhena karmaṇā

iti śrutvā athānando lokānām anuśocayan /
bhītasaṃsāradurvāra ḥ saṃharṣitatanuruhaḥ

athāsanāt samutthāya maitreyo damitendriyaḥ /
lokānāṃ ca hitārthāya avocaj jagatāṃ prabhum

bhagavan buddha vīreśa jagadānandavardhana /
dākṣiṇyam phalasaṃpūrṇaṃ bhāṣasva vividhaṃ varam

puṇyotsāhanaṃ śravaṇaṃ durlabhaṃ tyāgapuṇyayoḥ /
bimbasnānam tathā gandhaṃ chattram dhātvāvaropaṇam

maṇḍalaṃ bhojanaṃ pānaṃ vastraṃ puṣpādivarṇanam /
praṇāmojjvālikādīpaṃ vihāraṃ śayanāsanam

kṣetraṃ vicitraṃ caivāntam ity etā bahudhā bhṛśam /
kathā dvāviṃśati ḥ saṃkhyā vada me vādirāṭ prabho

śīlakṣānti ṃ tathā vīryaṃ dhyānaṃ prajñā tathaiva ca /
ṣaḍ eva pāramitā ḥ sarvā bhāṣasva bhagavan mune

bhagavān āha //
sādhu sādhu tva maitreya lokānāṃ hitakāraka /
puṇyotsāhakathāṃ bhavyāṃ śṛṇuṣva maitramānasa

mānuṣyaṃ samavāpya duṣkaraśatair labdhvā durāpaṃ kṣaṇaṃ
mṛtyau niṣpratikāradāruṇatare nityaṃ pura ḥ sthāyini /
pātheyaṃ damadānasaṃyamamayaṃ yair na prabhūtaṃ kṛtaṃ
saṃsārogramaruprapātapatitāḥ prāpsyanti duḥkhāni te

mānuṣyaṃ durlabhaṃ prāpya vidyutphenormibhaṅguram /
mānusye 'py akṣaṇaprāpte tadā puṇyaṃ kathaṃ smaret

mānuṣyatvaṃ samāsādya tara duḥkhamahānadīm /
puṇyam evātra kurvīta yataś cintāmaṇir nṛṇām

yasyānubhāvān mānuṣyaṃ prāptaṃ bhūyo 'pi sāṃpratam /
puṇyaṃ tad vardhayasveha yasmād dhetuḥ sukhasya te

mānuṣyaṃ yadupāśrayeṇa bhavatā labdhaṃ punaḥ sāṃprataṃ
rūpaudāryakulonnatiprabhṛtibhir yuktaṃ vicitrair guṇaiḥ /
tat puṇyaṃ suhṛd eka eva jagatāṃ bandhuś ca janmāntare
tasmāt tūrṇam idaṃ kuru tvam asakṛt sarvārthasaṃpatkaram

lakṣmīniketaṃ yadupāśrayeṇa prāpto 'si lokābhimataṃ prabhutvam /
tāny eva puṇyāni vivardhayethā na karṣaṇīyo hy upakāripakṣaḥ

viramata pāpataḥ kuruta puṇyam udārataraṃ
damayata durdama ṃ viṣayalolamanasturagam /
bhavata munīndravat parahitābhiratāḥ satataṃ
daśati na yāvad eva maraṇāhir asahyaviṣaḥ