Dharmasūtra · Chapter 24
rahasyaṃ prāyaścittam avikhyātadoṣasya |
caturṛcaṃ taratsamandīty apsu japed apratigrāhyaṃpratijighṛkṣan pratigṛhya vā |
abhojyaṃ bubhukṣamāṇaḥ pṛthivīm āvapet |
ṛtvantarāramaṇa udakopasparśanāc chuddhim eke |
strīṣu |
payovrato vā daśarātraṃ ghṛtena dvitīyam adbhistṛtīyaṃ divādiṣv ekabhaktiko jalaklinnavāsā lomāni nakhāni tvacammāṃsaṃ śoṇitaṃ snāyvasthi majjānam iti homā ātmano mukhe mṛtyor āsyejuhomīty antataḥ sarveṣāṃ prāyaścittaṃ bhrūṇahatyāyāḥ |
athānyat |
ukto niyamaḥ |
agne tvaṃ pārayeti (RV 1,189.2) mahāvyāhṛtibhirjuhuyāt kūṣmāṇḍaiś cājyam |
tadvrata eva vā brahmahatyāsurāpānasteyagurutalpeṣuprāṇāyāmais tānto 'ghamarṣaṇaṃ japan samam aśvamedhāvabhṛthenedaṃca prāyaścittam |
sāvitrīṃ vā sahasrakṛtva āvartayan punītehaivātmānam |
antarjale vāghamarṣaṇaṃ trir āvartayansarvapāpebhyo vimucyate |
Original text: Dharmasūtra · Edition: Ganesa Sastrin Gokhale, Pune 1910, (Anandasrama Sanskrit Series, 61); with variants from: The Institutes of Gautama, ed.by A.F. Stenzler, London 1876. · Data entry Nobuyuki Watase · GRETIL (Göttingen) · CC BY-NC-SA 4.0