Dharmasūtra · Chapter 15

atha śrāddham |

amāvāsyāyāṃ pitṛbhyo dadyāt |

pañcamīprabhṛtiṣu vāparapakṣasya |

yathāśraddhaṃ sarvasmin vā |

dravyadeśabrāhmaṇasaṃnidhāne vā kālaniyamaḥ |

śaktitaḥ prakarṣed guṇasaṃskāravidhir annasya |

navāvarān bhojayed ayujaḥ |

yathotsāhaṃ vā |

śrotriyān vāgrūpavayaḥśīlasaṃpannān |

yuvabhyo dānaṃ prathamam |

eke pitṛvat |

na ca tena mitrakarma kuryāt |

putrābhāve sapiṇḍā mātṛsapiṇḍāḥ śiṣyāś ca dadyuḥ |

tadabhāva ṛtvigācāryau |

tilamāṣavrīhiyavodakadānair māsaṃ pitaraḥprīṇanti | matsyahariṇaruruśaśakūrmavarāhameṣamāṃsaiḥsaṃvatsarāṇi|gavyapayaḥpāyasair dvādaśa varṣāṇi|vārdhrīṇasenamāṃsena kālaśākacchāgalohakhaḍgamāṃsair madhumiśraiś cānantyam |

na bhojayet stenaklībapatitanāstikatadvṛttivīrahāgredidhiṣupatistrīgrāmayājakājāpālotsṛṣṭāgnimadyapakucarakūṭasākṣiprātihārikān |

upapatiḥ |

yasya ca saḥ |

kuṇḍāśisomavikrayyagāradāhigaradāvakīrṇigaṇapreṣyāgamyāgāmihiṃsraparivittiparivettṛparyāhitaparyādhātṛtyaktātmadurbālakunakhiśyāvadantaśvitripaunarbhavakitavājaparājapreṣyaprātirūpikaśūdrāpatinirākṛtikilāsikusīdivaṇikśilpopajīvijyāvāditratālanṛtyagītaśīlān |

pitrā(pitṛ) vākāmena vibhaktān |

śiṣyāṃś caike sagotrāṃś ca |

bhojayed ūrdhvaṃ tribhyaḥ |

guṇavantam |

sadyaḥ śrāddhī śūdrātalpagas tatpurīṣe māsaṃnayati pitṛṛn |

tasmāt tadaham brahmacārī ca syāt |

śvacāṇḍālapatitāvekṣaṇe duṣṭam |

tasmāt pariśrite dadyāt |

tilair vā vikiret |

paṅktipāvano vā śamayet |

paṅktipāvanaḥ ṣaḍaṅgavij jyeṣṭhasāmikas triṇāciketastrimadhus trisuparṇaḥ pañcāgniḥ snātako mantrabrāhmaṇavid dharmajñobrahmadeyānusaṃtāna iti |

haviḥṣu caivam |

durbālādīn śrāddha ekaike |