Dharmasūtra · Chapter 10

dvijātīnām adhyayanam ijyā dānam |

brāhmanasyādhikāḥ pravacanayājanapratigrahāḥ |

pūrveṣu niyamas tu |

ācāryajñātipriyagurudhanavidyāniyameṣu brahmaṇaḥsaṃpradānam anyatra yathoktāt |

kṛṣivāṇijye vāsvayaṃkṛte |

kusīdaṃ ca |

rājño 'dhikaṃ rakṣaṇaṃ sarvabhūtānām |

nyāyyadaṇḍatvam |

bibhṛyād brāhmaṇāñ śrotriyān |

nirutsāhāṃś ca brāhmaṇān |

akarāṃś ca |

upakurvāṇāṃś ca |

yogaś ca vijaye |

bhaye viśeṣeṇa |

caryā ca rathadhanurbhyām |

saṅgrāme saṃsthānam anivṛttiś ca |

na doṣo hiṃsāyām āhave |

anyatravyaśvasārathyāyudhakṛtāñjaliprakīrṇakeśaparāṅmukhopaviṣṭasthalavṛkṣādhirūḍhadūtagobrāhmaṇavādibhyaḥ |

kṣatriyaś ced anyas tam upajīvet tadvṛttyā |

jetā labheta sāṃgrāmikaṃ vittam |

vāhanaṃ tu rājñaḥ |

uddhāraś cāpṛthagjaye |

anyat tu yathārhaṃ bhājayed rājā |

rājño balidānaṃ karṣakairdaśamam aṣṭamaṃ ṣaṣṭhaṃ vā |

paśuhiraṇyayor apy eke pañcāśadbhāgaḥ |

viṃśatibhāgaḥ śulkaḥ paṇye |

mūlaphalapuṣpauṣadhamadhumāṃsatṛnendhanānāṃṣaṣṭhaḥ |

tadrakṣaṇadharmitvāt |

teṣu tu nityayuktaḥ syāt |

adhikena vṛttiḥ |

śilpino māsi māsy ekaikaṃ karma kuryuḥ |

etenātmanopajīvino vyākhyātāḥ |

naucakrīvantaś ca |

bhaktaṃ tebhyo dadyāt |

paṇyaṃ vaṇigbhir arthāpacayena deyam |

pranaṣṭam asvāmikam adhigamya rājñe prabrūyuḥ |

vikhyāpya saṃvatsaraṃ rājñā rakṣyam |

ūrdhvam adhigantuś caturthaṃ rājñaḥ śeṣaḥ |

svāmī rikthakrayasaṃvibhāgaparigrahādhigameṣu |

brāhmaṇasyādhikaṃ labdham |

kṣatriyasya vijitam |

nirviṣṭaṃ vaiśyaśūdrayoḥ |

nidhyadhigamo rājadhanam |

brāhmaṇasyābhirūpasya |

abrāhmaṇo 'py ākhyātā ṣaṣṭhaṃ labhetety eke |

caurahṛtam apajitya yathāsthānam gamayet |

kośād vā dadyāt |

rakṣyaṃ bāladhanam ā vyavahāraprāpaṇāt |

samāvṛtter vā |

vaiśyasyādhikaṃ kṛṣivaṇikpāśupālyakusīdam |

śūdraś caturtho varṇa ekajātiḥ |

tasyāpi satyam akrodhaḥ śaucam |

ācamanārthe pāṇipādaprakṣālanam evaike |

śrāddhakarma |

bhṛtyabharaṇam |

svadāravṛttiḥ |

paricaryā cottareṣām |

tebhyo vṛttiṃ lipseta |

jīrṇāny upānacchatravāsaḥkūrcādīni |

ucchiṣṭāśanam |

śilpavṛttiś ca |

yaṃ cāryam āśrayed bhartavyas tena kṣīṇo 'pi |

tena cottaraḥ |

tadartho 'sya nicayaḥ syāt |

anujñāto 'sya namaskāro mantraḥ |

pākayajñaiḥ svayaṃ yajetety eke |

sarve cottarottaraṃ paricareyuḥ |

āryānāryayor vyatikṣepe karmaṇaḥ sāmyaṃ |