Devi Bhagavata Purana · Chapter 9.9

bhūmistotravarṇanam
nārada uvāca
devyā nimeṣamātreṇa brahmaṇaḥ pāta eva ca /
tasya pātaḥ prākṛtikaḥ pralayaḥ parikīrtitaḥ

pralaye prākṛte coktā tatrādṛṣṭā vasundharā /
jalaplutāni viśvāni sarve līnāḥ parātmani

vasundharā tirobhūtā kutra vā sā ca tiṣṭhati /
sṛṣṭervidhānasamaye sāvirbhūtā kathaṃ punaḥ

kathaṃ babhūva sā dhanyā mānyā sarvāśrayā jayā /
tasyāśca janmakathanaṃ vada maṅ‌galakāraṇam

śrīnārāyaṇa uvāca
sarvādisṛṣṭau sarveṣāṃ janma devyā iti śrutiḥ /
āvirbhāvastirobhāvaḥ sarveṣu pralayeṣu ca

śrūyatāṃ vasudhājanma sarvamaṅ‌galakāraṇam /
vighnanighnakaraṃ pāpanāśanaṃ puṇyavardhanam

aho kecidvadantīti madhukaiṭabhamedasā /
babhūva vasudhā dhanyā tadviruddhamataḥ śṛṇu

ūcatustau purā viṣṇuṃ tuṣṭau yuddhena tejasā /
āvāṃ vadhyau na yatrorvī pāthasā saṃvṛteti ca

tayorjīvanakāle na pratyakṣā sābhavatsphuṭam /
tato babhūva medaśca maraṇānantaraṃ tayoḥ

medinīti ca vikhyātetyuktametanmataṃ śṛṇu /
jaladhautā kṛtā pūrvaṃ vardhitā medasā yataḥ

kathayāmi te tajjanma sārthakaṃ sarvamaṅ‌galam /
purā śrutaṃ yacchrutyuktaṃ dharmavaktrācca puṣkare

mahāvirāṭśarīrasya jalasthasya ciraṃ sphuṭam /
mano babhūva kālena sarvāṅ‌gavyāpakaṃ dhruvam

tacca praviṣṭaṃ sarveṣāṃ tallomnāṃ vivareṣu ca /
kālena mahatā paścād‌ babhūva vasudhā mune

pratyekaṃ pratilomnāṃ ca kūpeṣu saṃsthitā sadā /
āvirbhūtā tirobhūtā sajalā ca punaḥ punaḥ

āvirbhūtā sṛṣṭikāle tajjaloparyupasthitā /
pralaye ca tirobhūtā jalasyābhyantare sthitā

prativiśveṣu vasudhā śailakānanasaṃyutā /
saptasāgarasaṃyuktā saptadvīpasamanvitā

hemādrimerusaṃyuktā grahacandrārkasaṃyutā /
brahmaviṣṇuśivādyaiśca surairlokaistadājñayā

puṇyatīrthasamāyuktā puṇyabhāratasaṃyutā /
kāñcanībhūmisaṃyuktā saptasvargasamanvitā

pātālasaptaṃ tadadhastadūrdhvaṃ brahmalokataḥ /
dhruvalokaśca tatraiva sarvaṃ viśvaṃ ca tatra vai

evaṃ sarvāṇi viśvāni pṛthivyāṃ nirmitāni ca /
naśvarāṇi ca viśvāni sarvāṇi kṛtrimāṇi vai

pralaye prākṛte caiva brahmaṇaśca nipātane /
mahāvirāḍādisṛṣṭau sṛṣṭaḥ kṛṣṇena cātmanā

nityau ca sthitipralayau kāṣṭhākāleśvaraiḥ saha /
nityādhiṣṭhātṛdevī sā vārāhe pūjitā suraiḥ

munibhirmanubhirviprairgandharvādibhireva ca /
viṣṇorvarāharūpasya pat‍nī sā śrutisammatā

tatputro maṅ‌galo jñeyo ghaṭeśo maṅ‌galātmajaḥ /
nārada uvāca
pūjitā kena rupeṇa vārāhe ca surairmahī

vārāhe caiva vārāhī sarvaiḥ sarvāśrayā satī /
mūlaprakṛtisambhūtā pañcīkaraṇamārgataḥ

tasyāḥ pūjāvidhānaṃ cāpyadhaścordhvamanekaśaḥ /
maṅ‌galaṃ maṅ‌galasyāpi janma vāsaṃ vada prabho

śrīnārāyaṇa uvāca
vārāhe ca varāhaśca brahmaṇā saṃstutaḥ purā /
uddadhāra mahīṃ hatvā hiraṇyākṣaṃ rasātalam

jale tāṃ sthāpayāmāsa padmapatraṃ yathā hṛde /
tatraiva nirmame brahmā viśvaṃ sarvaṃ manoharam

dṛṣṭvā tadadhidevīṃ ca sakāmāṃ kāmuko hariḥ /
varāharūpī bhagavān koṭisūryasamaprabhaḥ

kṛtvā ratikalāṃ sarvāṃ mūrtiṃ ca sumanoharām /
krīḍāñcakāra rahasi divyavarṣamaharniśam

sukhasambhogasaṃsparśānmūrcchāṃ samprāpa sundarī /
vidagdhāyā vidagdhena saṅ‌gamo'tisukhapradaḥ

viṣṇustadaṅ‌gasaṃśleṣād‌ bubudhe na divāniśam /
varṣānte cetanāṃ prāpya kāmī tatyāja kāmukīm

pūrvarūpaṃ varāhaṃ ca dadhāra sa ca līlayā /
pūjāñcakāra tāṃ devīṃ dhyātvā ca dharaṇīṃ satīm

dhūpairdīpaiśca naivedyaiḥ sindūrairanulepanaiḥ /
vastraiḥ puṣpaiśca balibhiḥ sampūjyovāca tāṃ hariḥ

śrībhagavānuvāca
sarvādhārā bhava śubhe sarvaiḥ sampūjitā sukham /
munibhirmanubhirdevaiḥ siddhaiśca dānavādibhiḥ

ambuvācītyāgadine gṛhārambhe praveśane /
vāpītaḍāgārambhe ca gṛhe ca kṛṣikarmaṇi

tava pūjāṃ kariṣyanti madvareṇa surādayaḥ /
mūḍhā ye na kariṣyanti yāsyanti narakaṃ ca te

vasudhovāca
vahāmi sarvaṃ vārāharūpeṇāhaṃ tavājñayā /
līlāmātreṇa bhagavan viśvaṃ ca sacarācaram

muktāṃ śuktiṃ harerarcāṃ śivaliṅ‌gaṃ śivāṃ tathā /
śaṅ‌khaṃ pradīpaṃ yantraṃ ca māṇikyaṃ hīrakaṃ tathā

yajñasūtraṃ ca puṣpaṃ ca pustakaṃ tulasīdalam /
japamālāṃ puṣpamālāṃ karpūraṃ ca suvarṇakam

gorocanaṃ candanaṃ ca śālagrāmajalaṃ tathā /
etānvoḍumaśaktāhaṃ kliṣṭā ca bhagavañchṛṇu

śrībhagavānuvāca
dravyāṇyetāni ye mūḍhā arpayiṣyanti sundari /
yāsyanti kālasūtraṃ te divyaṃ varṣaśataṃ tvayi

ityevamuktvā bhagavān virarāma ca nārada /
babhūva tena garbheṇa tejasvī maṅ‌galagrahaḥ

pūjāñcakruḥ pṛthivyāśca te sarve cājñayā hareḥ /
kaṇvaśākhoktadhyānena tuṣṭuvuśca stavena te

dadurmūlena mantreṇa naivedyādikameva ca /
saṃstutā triṣu lokeṣu pūjitā sā babhūva ha

nārada uvāca
kiṃ dhyānaṃ stavanaṃ tasyā mūlamantraṃ ca kiṃ vada /
gūḍhaṃ sarvapurāṇeṣu śrotuṃ kautūhalaṃ mama

śrīnārāyaṇa uvāca
ādau ca pṛthivī devī varāheṇa ca pūjitā /
tato hi brahmaṇā paścāmṛjitā pṛthivī tadā

tataḥ sarvairmunīndraiśca manubhirmānavādibhiḥ /
dhyānaṃ ca stavanaṃ mantraṃ śṛṇu vakṣyāmi nārada

ॐ hrīṃ śrīṃ klīṃ vasudhāyai svāhetyanena
mantreṇa viṣṇunā pūjitā purā /
śvetapaṅ‌kajavarṇābhāṃ śaraccandranibhānanām

candanotkṣiptasarvāṅ‌gīṃ rat‍nabhūṣaṇabhūṣitām /
rat‍nādhārāṃ rat‍nagarbhāṃ rat‍nākarasamanvitām

vahniśuddhāṃśukādhānāṃ sasmitāṃ vanditāṃ bhaje /
dhyānenānena sā devī sarvaiśca pūjitābhavat

stavanaṃ śṛṇu viprendra kaṇvaśākhoktameva ca /
śrīnārāyaṇa uvāca
jaye jaye jalādhāre jalaśīle jalaprade

yajñasūkarajāye tvaṃ jayaṃ dehi jayāvahe /
maṅ‌gale maṅ‌galādhāre māṅ‌galye maṅ‌galaprade

maṅ‌galārthaṃ maṅ‌galeśe maṅ‌galaṃ dehi me bhave /
sarvādhāre ca sarvajñe sarvaśaktisamanvite

sarvakāmaprade devi sarveṣṭaṃ dehi me bhave /
puṇyasvarūpe puṇyānāṃ bījarūpe sanātani

puṇyāśraye puṇyavatāmālaye puṇyade bhave /
sarvasasyālaye sarvasasyāḍhye sarvasasyade

sarvasasyahare kāle sarvasasyātmike bhave /
bhūme bhūmipasarvasve bhūmipālaparāyaṇe

bhūmipānāṃ sukhakare bhūmiṃ dehi ca bhūmide /
idaṃ stotraṃ mahāpuṇyaṃ prātarutthāya yaḥ paṭhet

koṭijanmasu sa bhaved‌ balavānbhūmipeśvaraḥ /
bhūmidānakṛtaṃ puṇyaṃ labhyate paṭhanājjanaiḥ

bhūmidānaharātpāpānmucyate nātra saṃśayaḥ /
ambuvācībhūkaraṇapāpātsa mucyate dhruvam

anyakūpe kūpakhananapāpātsa mucyate dhruvam /
parabhūmiharātpāpānmucyate nātra saṃśayaḥ

bhūmau vīryatyāgapāpād‌bhūmau dīpādisthāpanāt /
pāpena mucyate so'pi stotrasya paṭhanānmune

aśvamedhaśataṃ puṇyaṃ labhate nātra saṃśayaḥ /
bhūmidevyā mahāstotraṃ sarvakalyāṇakārakam

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
navamaskandhe bhūmistotravarṇanaṃ nāma navamo'dhyāyaḥ