Devi Bhagavata Purana · Chapter 9.47

maṅ‌galacaṇḍīmanasayorupākhyānavarṇanam
śrīnārāyaṇa uvāca
kathitaṃ ṣaṣṭhyupākhyānaṃ brahmaputra yathā''gamam /
devī maṅ‌galacaṇḍī ca tadākhyānaṃ niśāmaya

tasyāḥ pūjādikaṃ sarvaṃ dharmavaktreṇa yacchrutam /
śrutisammatameveṣṭaṃ sarveṣāṃ viduṣāmapi

dakṣā yā vartate caṇḍī kalyāṇeṣu ca maṅ‌galā /
maṅ‌galeṣu ca yā dakṣā sā ca maṅ‌galacaṇḍikā

pūjyā yā vartate caṇḍī maṅ‌galo'pi mahīsutaḥ /
maṅ‌galābhīṣṭadevī yā sā vā maṅ‌galacaṇḍikā

maṅ‌galo manuvaṃśyaśca saptadvīpadharāpatiḥ /
tasya pūjyābhīṣṭadevī tena maṅ‌galacaṇḍikā

mūrtibhedena sā durgā mūlaprakṛtirīśvarī /
kṛpārūpātipratyakṣā yoṣitāmiṣṭadevatā

prathame pūjitā sā ca śaṅ‌kareṇa parātparā /
tripurasya vadhe ghore viṣṇunā preritena ca

brahman brahmopadeśena durgatena ca saṅ‌kaṭe /
ākāśātpatite yāne daityena pātite ruṣā

brahmaviṣṇūpadiṣṭaśca durgāṃ tuṣṭāva śaṅ‌karaḥ /
sā ca maṅ‌galacaṇḍī yā babhūva rūpabhedataḥ

uvāca purataḥ śambhorbhayaṃ nāstīti te prabho /
bhagavānvṛṣarūpaśca sarveśaste bhaviṣyati

yuddhaśaktisvarūpāhaṃ bhaviṣyāmi na saṃśayaḥ /
māyātmanā ca hariṇā sahāyena vṛṣadhvaja

jahi daityaṃ svaśatruṃ ca surāṇāṃ padaghātakam /
ityuktvāntarhitā devī śambhoḥ śaktirbabhūva sā

viṣṇudattena śastreṇa jaghāna tamumāpatiḥ /
munīndra patite daitye sarve devā maharṣayaḥ

tuṣṭuvuḥ śaṅ‌karaṃ devaṃ bhaktinamrātmakandharāḥ /
sadyaḥ śirasi śambhośca puṣpavṛṣṭirbabhūva ha

brahmā viṣṇuśca santuṣṭo dadau tasmai śubhāśiṣam /
brahmaviṣṇūpadiṣṭaśca susnātaḥ śaṅ‌karastathā

pūjayāmāsa tāṃ bhaktyā devīṃ maṅ‌galacaṇḍikām /
pādyārghyācamanīyaiśca vastraiśca vividhairapi

puṣpacandananaivedyairbhaktyā nānāvidhairmune /
chāgairmeṣaiśca mahiṣairgavayaiḥ pakṣibhistathā

vastrālaṅ‌kāramālyaiśca pāyasaiḥ piṣṭakairapi /
madhubhiśca sudhābhiśca phalairnānāvidhairapi

saṅ‌gītairnartakairvādyairutsavairnāmakīrtanaiḥ /
dhyātvā mādhyandinoktena dhyānena bhaktipūrvakam

dadau dravyāṇi mūlena mantreṇaiva ca nārada /
ॐ hrīṃ śrīṃ klīṃ sarvapūjye devi maṅ‌galacaṇḍike

hūm̐ hūm̐ phaṭ svāhāpyekaviṃśākṣaro manuḥ /
pūjyaḥ kalpataruścaiva bhaktānāṃ sarvakāmadaḥ

daśalakṣajapenaiva mantrasiddhirbhaved‌ dhruvam /
dhyānaṃ ca śrūyatāṃ brahman vedoktaṃ sarvasammatam

devīṃ ṣoḍaśavarṣīyāṃ śaśvatsusthirayauvanām /
bimboṣṭhīṃ sudatīṃ śuddhāṃ śaratpadmanibhānanām

śvetacampakavarṇābhāṃ sunīlotpalalocanām /
jagaddhātrīṃ ca dātrīṃ ca sarvebhyaḥ sarvasampadām

saṃsārasāgare ghore jyotīrūpāṃ sadā bhaje /
devyāśca dhyānamityevaṃ stavanaṃ śrūyatāṃ mune

mahādeva uvāca
rakṣa rakṣa jaganmātardevi maṅ‌galacaṇḍike /
hārike vipadāṃ rāśerharṣamaṅ‌galakārike

harṣamaṅgaladakṣe ca harṣamaṅgaladāyike /
śubhe maṅgaladakṣe ca śubhe maṅ‌galacaṇḍike

maṅ‌gale maṅ‌galārhe ca sarvamaṅ‌galamaṅ‌gale /
satāṃ maṅ‌gade devi sarveṣāṃ maṅgalālaye

pūjye maṅ‌galavāre ca maṅ‌galābhīṣṭadevate /
pūjye maṅgalabhūpasya manuvaṃśasya santatam

maṅ‌galādhiṣṭhātṛdevi maṅ‌galānāṃ ca maṅ‌gale /
saṃsāramaṅ‌galādhāre mokṣamaṅ‌galadāyini

sāre ca maṅgalādhāre pāre ca sarvakarmaṇām /
pratimaṅ‌galavāre ca pūjye maṅgasukhaprade

stotreṇānena śambhuśca stutvā maṅ‌galacaṇḍikām /
pratimaṅ‌galavāre ca pūjāṃ dattvā gataḥ śivaḥ

prathame pūjitā devī śivena sarvamaṅ‌galā /
dvitīye pūjitā sā ca maṅ‌galena graheṇa ca

tṛtīte pūjitā bhadrā maṅ‌galena nṛpeṇa ca /
caturthe maṅ‌gale vāre sundarībhiḥ prapūjitā

pañcame maṅ‌galākāṅ‌kṣinarairmaṅ‌galacaṇḍikā /
pūjitā prativiśveṣu viśveśapūjitā sadā

tataḥ sarvatra sampūjyā babhūva parameśvarī /
devaiśca munibhiścaiva mānavairmanubhirmune

devyāśca maṅ‌gastotraṃ yaḥ śṛṇoti samāhitaḥ /
tanmaṅ‌galaṃ bhavettasya na bhavettadamaṅ‌galam /
vardhate putrapautraiśca maṅ‌galaṃ ca dine dine

śrīnārāyaṇa uvāca
uktaṃ dvayorupākhyānaṃ brahmaputra yathāgamam /
śrūyatāṃ manasā''khyānaṃ yacchrutaṃ dharmavaktrataḥ

sā ca kanyā bhagavatī kaśyapasya ca mānasī /
tenaiva manasā devī manasā yā ca dīvyati

manasā dhyāyate yā ca paramātmānamīśvaram /
tena sā manasā devī tena yogena dīvyati

ātmārāmā ca sā devī vaiṣṇavī siddhayoginī /
triyugaṃ ca tapastaptvā kṛṣṇasya paramātmanaḥ

jaratkāruśarīraṃ ca dṛṣṭvā yatkṣīṇamīśvaraḥ /
gopīpatirnāma cakre jaratkāruriti prabhuḥ

vāñchitaṃ ca dadau tasyai kṛpayā ca kṛpānidhiḥ /
pūjāṃ ca kārayāmāsa cakāra ca svayaṃ prabhuḥ

svarge ca nāgaloke ca pṛthivyāṃ brahmalokataḥ /
bhṛśaṃ jagatsu gaurī sā sundarī ca manoharā / ४४
jagad‌gaurīti vikhyātā tena sā pūjitā satī /
śivaśiṣyā ca sā devī tena śaivī prakīrtitā

viṣṇubhaktātīva śaśvadvaiṣṇavī tena kīrtitā /
nāgānāṃ prāṇarakṣitrī yajñe pārīkṣitasya ca

nāgeśvarīti vikhyātā sā nāgabhaginīti ca /
viṣaṃ saṃhartumīśā yā tena viṣaharī smṛtā

siddhayogaṃ harātprāpa tena sā siddhayoginī /
mahājñānaṃ ca yogaṃ ca mṛtasajjīvanīṃ parām

mahājñānayutāṃ tāṃ ca pravadanti manīṣiṇaḥ /
āstīkasya munīndrasya mātā sāpi tapasvinī

āstīkamātā vijñātā jagatyāṃ supratiṣṭhitā /
priyā munerjaratkārormunīndrasya mahātmanaḥ

yogino viśvapūjyasya jaratkārupriyā tataḥ /
jaratkārurjagad‌gaurī manasā siddhayoginī

vaiṣṇavī nāgabhaginī śaivī nāgeśvarī tathā /
jaratkārupriyāstīkamātā viṣahareti ca

mahājñānayutā caiva sā devī viśvapūjitā /
dvādaśaitāni nāmāni pūjākāle tu yaḥ paṭhet

tasya nāgabhayaṃ nāsti tasya vaṃśod‍bhavasya ca /
nāgabhīte ca śayane nāgagraste ca mandire

nāgaśobhe mahādurge nāgaveṣṭitavigrahe /
idaṃ stotraṃ paṭhitvā tu mucyate nātra saṃśayaḥ

nityaṃ paṭhedyastaṃ dṛṣṭvā nāgavargaḥ palāyate /
daśalakṣajapenaiva stotrasiddhirbhavennṛṇām

stotrasiddhirbhavedyasya sa viṣaṃ bhoktumīśvaraḥ /
nāgaiśca bhūṣaṇaṃ kṛtvā sa bhavennāgavāhanaḥ

nāgāsano nāgatalpo mahāsiddho bhavennaraḥ /
ante ca viṣṇunā sārdhaṃ krīḍatyeva divāniśam

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe nārāyaṇanāradasaṃvāde
maṅ‌galacaṇḍīmanasayorupākhyānavarṇanaṃ nāma saptacatvāriṃśo'dhyāyaḥ