Devi Bhagavata Purana · Chapter 9.44

svadhopākhyānavarṇanam
śrīnārāyaṇa uvāca
śṛṇu nārada vakṣyāmi svadhopākhyānamuttamam /
pitṝṇāṃ ca tṛptikaraṃ śrāddhāntaphalavardhanam

sṛṣṭerādau pitṛgaṇānsasarja jagatāṃ vidhiḥ /
caturaśca mūrtimatastrīṃśca tejaḥsvarūpiṇaḥ

dṛṣṭvā saptapitṛgaṇān sukharūpānmanoharān /
āhāraṃ sasṛje teṣāṃ śrāddhaṃ tarpaṇapūrvakam

snānaṃ tarpaṇaparyantaṃ śrāddhaṃ tu devapūjanam /
āhnikaṃ ca trisandhyāntaṃ viprāṇāṃ ca śrutau śrutam

nityaṃ na kuryādyo viprastrisandhyaṃ śrāddhatarpaṇam /
baliṃ vedadhvaniṃ so'pi viṣahīno yathoragaḥ

devīsevāvihīnaśca śrīhareranivedyabhuk /
bhasmāntaṃ sūtakaṃ tasya na karmārhaśca nārada

brahmā śrāddhādikaṃ sṛṣṭvā jagāma pitṛhetave /
na prāpnuvanti pitaro dadati brāhmaṇādayaḥ

sarve ca jagmuḥ kṣudhitāḥ khinnāstu brahmaṇaḥ sabhām /
sarvaṃ nivedanaṃ cakrustameva jagatāṃ vidhim

brahmā ca mānasīṃ kanyāṃ sasṛje ca manoharām /
rūpayauvanasampannāṃ śatacandranibhānanām

vidyāvatīṃ guṇavatīmatirūpavatīṃ satīm /
śvetacampakavarṇābhāṃ rat‍nabhūṣaṇabhūṣitām

viśuddhāṃ prakṛteraṃśāṃ sasmitāṃ varadāṃ śubhām /
svadhābhidhāṃ ca sudatīṃ lakṣmīlakṣaṇasaṃyutām

śatapadmapadanyastapādapadmaṃ ca bibhratīm /
pat‍nīṃ pitṝṇāṃ padmāsyāṃ padmajāṃ padmalocanām

pitṛbhyaśca dadau brahmā tuṣṭebhyastuṣṭirūpiṇīm /
brāhmaṇānāṃ copadeśaṃ cakāra gopanīyakam

svadhāntaṃ mantramuccārya pitṛbhyo deyamityapi /
krameṇa tena viprāśca pitre dānaṃ daduḥ purā

svāhā śastā devadāne pitṛdāne svadhā smṛtā /
sarvatra dakṣiṇā śastā hataṃ yajñamadakṣiṇam

pitaro devatā viprā munayo manavastathā /
pūjāṃ cakruḥ svadhāṃ śāntāṃ tuṣṭuvuḥ paramādarāt

devādayaśca santuṣṭāḥ paripūrṇamanorathāḥ /
viprādayaśca pitaraḥ svadhādevīvareṇa ca

ityevaṃ kathitaṃ sarvaṃ svadhopākhyānameva ca /
sarveṣāṃ ca tuṣṭikaraṃ kiṃ bhūyaḥ śrotumicchasi

nārada uvāca
svadhāpūjāvidhānaṃ ca dhyānaṃ stotraṃ mahāmune /
śrotumicchāmi yat‍nena vada vedavidāṃvara

śrīnārāyaṇa uvāca
dhyānaṃ ca stavanaṃ brahman vedoktaṃ sarvamaṅ‌galam /
sarvaṃ jānāsi ca kathaṃ jñātumicchasi vṛddhaye

śaratkṛṣṇatrayodaśyāṃ maghāyāṃ śrāddhavāsare /
svadhāṃ sampūjya yat‍nena tataḥ śrāddhaṃ samācaret

svadhāṃ nābhyarcya yo vipraḥ śrāddhaṃ kuryādahaṃmatiḥ /
na bhavetphalabhāksatyaṃ śrāddhasya tarpaṇasya ca

brahmaṇo mānasīṃ kanyāṃ śaśvatsusthirayauvanām /
pūjyāṃ vai pitṛdevānāṃ śrāddhānāṃ phaladāṃ bhaje

iti dhyātvā śilāyāṃ vā hyathavā maṅ‌gale ghaṭe /
dadyātpādyādikaṃ tasyai mūleneti śrutau śrutam

oṃ hrīṃ śrīṃ klīṃ svadhādevyai svāheti ca mahāmune /
samuccārya tu sampūjya stutvā tāṃ praṇamed‌ dvijaḥ

stotraṃ śṛṇu muniśreṣṭha brahmaputra viśārada /
sarvavāñchāpradaṃ nṝṇāṃ brahmaṇā yatkṛtaṃ purā

śrīnārāyaṇa uvāca
svadhoccāraṇamātreṇa tīrthasnāyī bhavennaraḥ /
mucyate sarvapāpebhyo vājapeyaphalaṃ labhet

svadhā svadhā svadhetyevaṃ yadi vāratrayaṃ smaret /
śrāddhasya phalamāpnoti baleśca tarpaṇasya ca

śrāddhakāle svadhāstotraṃ yaḥ śṛṇoti samāhitaḥ /
sa labhecchrāddhasambhūtaṃ phalameva na saṃśayaḥ

svadhā svadhā svadhetyevaṃ trisandhyaṃ yaḥ paṭhennaraḥ /
priyāṃ vinītāṃ sa labhetsādhvīṃ putraguṇānvitām

pitṝṇāṃ prāṇatulyā tvaṃ dvijajīvanarūpiṇī /
śrāddhādhiṣṭhātṛdevī ca śrāddhādīnāṃ phalapradā

nityā tvaṃ satyarūpāsi puṇyarūpāsi suvrate /
āvirbhāvatirobhāvau sṛṣṭau ca pralaye tava

ॐ svastiśca namaḥ svāhā svadhā tvaṃ dakṣiṇā tathā /
nirūpitāścaturvedaiḥ praśastāḥ karmiṇāṃ punaḥ

karmapūrtyarthamevaitā īśvareṇa vinirmitāḥ /
ityevamuktvā sa brahmā brahmaloke svasaṃsadi

tasthau ca sahasā sadyaḥ svadhā sā''virbabhūva ha /
tadā pitṛbhyaḥ pradadau tāmeva kamalānanām

tāṃ samprāpya yayuste ca pitaraśca praharṣitāḥ /
svadhāstotramidaṃ puṇyaṃ yaḥ śṛṇoti samāhitaḥ /
sa snātaḥ sarvatīrtheṣu vāñchitaṃ phalamāpnuyāt

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
nārāyaṇanāradasaṃvāde svadhopākhyānavarṇanaṃ nāma catuścatvāriśo'dhyāyaḥ