Devi Bhagavata Purana · Chapter 9.37

nānānarakakuṇḍavarṇanam
sāvitryuvāca
dharmarāja uvāca
pūrṇendumaṇḍalākāraṃ sarvaṃ kuṇḍaṃ ca vartulam /
nimnaṃ pāṣāṇabhedaiśca pācitaṃ bahubhiḥ sati

na naśvaraṃ cāpralayaṃ nirmitaṃ ceśvarecchayā /
kleśadaṃ pātakānāṃ ca nānārūpaṃ tadālayam

jvaladaṅ‌gārarūpaṃ ca śatahastaśikhānvitam /
paritaḥ krośamānaṃ ca vahnikuṇḍaṃ prakīrtitam

mahāśabdaṃ prakurvad‌‍bhiḥ pāpibhiḥ paripūritam /
rakṣitaṃ mama dūtaiśca tāḍitaiścāpi santatam

prataptodakapūrṇaṃ ca hiṃsrajantusamanvitam /
mahāghoraṃ kākuśabdaṃ prahāreṇa dṛḍhena ca

krośārdhamānaṃ taddūtaistāḍitairmama pārṣadaiḥ /
taptakṣārodakaiḥ pūrṇaṃ punaḥ kākaiśca saṅ‌kulam

saṅ‌kulaṃ pāpibhiścaiva krośamānaṃ bhayānakam /
trāhīti śabdaṃ kurvad‌‍bhirmama dūtaiśca tāḍitaiḥ

pracalad‌bhiranāhāraiḥ śuṣkakaṇṭhoṣṭhatālukaiḥ /
viḍ‌bhireva kṛtaṃ pūrṇaṃ krośamānaṃ ca kutsitam

atidurgandhisaṃsaktaṃ vyāptaṃ pāpibhiranvaham /
tāḍitairmama dūtaiśca tadāhāraiḥ sudāruṇaiḥ

rakṣeti śabdaṃ kurvad‌bhistatkīṭaireva bhakṣitaiḥ /
taptamūtradravaiḥ pūrṇaṃ mūtrakīṭaiśca saṅ‌kulam

yuktaṃ mahāpātakibhistatkīṭairbhakṣitaiḥ sadā /
gavyūtimānaṃ dhvāntāktaṃ śabdakṛd‌bhiśca santatam

maddūtaistāḍitairghoraiḥ śuṣkakaṇṭhoṣṭhatālukaiḥ /
śleṣmapūrṇaṃ praśamitaṃ tatkīṭaiḥ pūritaṃ sadā

tad‍bhojibhiḥ pāpibhiśca veṣṭitaṃ veṣṭitaiḥ sadā /
krośārdhaṃ garakuṇḍaṃ ca garabhojibhiranvitam

garakīṭairbhakṣitaiśca pāpibhiḥ pūrṇameva ca /
tāḍitairmama dūtaiśca śabdakṛd‌bhiśca kampitaiḥ

sarpākārervajradaṃṣṭrai śuṣkakaṇṭhaiḥ sudāruṇaiḥ /
netrayormalapūrṇaṃ ca krośārdhaṃ kīṭasaṃyutam

pāpibhiḥ saṅ‌kulaṃ śaśvad‌bhramad‌bhiḥ kīṭabhakṣitaiḥ /
vasārasena sampūrṇaṃ krośaturyaṃ suduḥsaham

tad‍bhojibhiḥ pātakibhirmama dūtaiśca tāḍitaiḥ /
śukrakuṇḍaṃ krośamitaṃ śukrakīṭaiśca saṃyutam

pāpibhiḥ saṅ‌kulaṃ śaśvad‌ dravad‌bhiḥ kīṭabhakṣitaiḥ /
durgandhiraktapūrṇaṃ ca vāpīmānaṃ gabhīrakam

tad‍bhojibhiḥ pāpibhiśca saṅ‌kulaṃ kīṭabhakṣitam /
pūrṇaṃ netrāśrubhistaptaṃ bahupāpibhiranvitam

vāpīturyapramāṇaṃ ca rudad‌bhiḥ kīṭabhakṣitaiḥ /
nṛṇāṃ gātramalairyuktaṃ tad‍bhakṣaiḥ pāpibhiryutam

tāḍitairmama dūtaiśca vyagraiśca kīṭabhakṣitaiḥ /
karṇaviṭparipūrṇaṃ ca tad‍bhakṣaiḥ pāpibhirvṛtam

vāpīturyapramāṇaṃ ca bruvad‌bhiḥ kīṭabhakṣitaiḥ /
majjāpūrṇaṃ narāṇāṃ ca mahādurgandhisaṃyutam

mahāpātakibhiryuktaṃ vāpīturyapramāṇakam /
paripūrṇaṃ sigdhamāṃsairmama dūtaiśca tāḍitaiḥ

pāpibhiḥ saṅ‌kulaṃ caiva vāpīmānaṃ bhayānakam /
kanyāvikrayibhiścaiva tad‍bhakṣyaiḥ kīṭabhakṣitaiḥ

pāhīti śabdaṃ kurvad‌bhistrāsitaiśca bhayānakaiḥ /
vāpīturyapramāṇaṃ ca nakhādikacatuṣṭayam

pāpibhiḥ saṃyutaṃ śaśvanmama dūtaiśca tāḍitaiḥ /
prataptatāmrakuṇḍaṃ ca tāmroparyulmukānvitam

tāmrāṇāṃ pratimālakṣaiḥ prataptairvyāpṛtaṃ sadā /
pratyekaṃ pratimāśliṣṭaiḥ rudad‌bhiḥ pāpibhiryutam

gavyūtimānaṃ vistīrṇaṃ mama dūtaiśca tāḍitaiḥ /
prataptalohadhāraṃ ca jvavaladaṅ‌gārasaṃyutam

lohānāṃ pratimāśliṣṭaiḥ rudad‌bhiḥ pāpibhiryutam /
pratyekaṃ pratimāśliṣṭaiḥ śaśvatprajvalitairbhiyā

rakṣa rakṣeti śabdaṃ ca kurvad‌bhirdūtatāḍitaiḥ /
mahāpātakibhiryuktaṃ dvigavyūtipramāṇakam

bhayānakaṃ dhvāntayuktaṃ lohakuṇḍaṃ prakīrtitam /
carmakuṇḍaṃ taptasurākuṇḍaṃ vāpyardhameva ca

tad‍bhojipāpibhirvyāptaṃ mama dūtaiśca tāḍitaiḥ /
ataḥ śālmalikuṇḍaṃ ca vṛkṣakaṇṭakaśobhitam

lakṣapauruṣamānaṃ ca krośamānaṃ ca duḥkhadam /
dhanurmānaiḥ kaṇṭakaiśca sutīkṣṇaiḥ pariveṣṭitam

pratyekaṃ viddhagātraiśca mahāpātakibhiryutam /
vṛkṣāgrānnipatad‌bhiśca mama dūtaiśca pātitaiḥ

jalaṃ dehīti śabdaṃ ca kurvad‌bhiḥ śuṣkatālukaiḥ /
mahābhiyātivyagraiśca daṇḍaiḥ sambhagnamastakaiḥ

pracalad‌bhiryathā taptatailajīvibhireva ca /
viṣodaistakṣakāṇāṃ ca pūrvaṃ ca krośamānakam

tad‍bhakṣaiḥ pāpibhiryuktaṃ mama dūtaiśca tāḍite /
prataptatailapūrṇaṃ ca kīṭādiparivarjitam

mahāpātakibhiryuktaṃ dagdhāṅ‌gāraiśca veṣṭitam /
kākuśabdaṃ prakurvad‌bhiścalad‌bhirdūtapīḍitaiḥ

dhvāntayuktaṃ krośamānaṃ kleśadaṃ ca bhayānakam /
śūlākāraiḥ sutīkṣṇāgrairlohaśastraiśca veṣṭitam

śastratalpasvarūpañca kośaturyapramāṇakam /
veṣṭitaṃ tatpātakibhiḥ kuntaviddhaiśca veṣṭitaiḥ

tāḍitairmama dūtaiśca śuṣkakaṇṭhoṣṭhatālukaiḥ /
kīṭaiśca śaṅ‌kupramitaiḥ sarpamānairbhayaṅ‌karaiḥ

tīkṣṇadantaiśca vikṛtairvyāptaṃ dhvāntayutaṃ sati /
mahāpātakibhiryuktaṃ mama dūtaiśca tāḍite

dvigavyūtipramāṇaṃ ca pūyakuṇḍaṃ pracakṣate /
tad‍bhakṣyaiḥ prāṇibhiryuktaṃ mama dūtaiśca tāḍitaiḥ

tālavṛkṣapramāṇaiśca sarpakoṭibhirāvṛtam /
sarpaveṣṭitagātraiśca pāpibhiḥ sarpabhakṣitaiḥ

saṅ‌kulaṃ śabdakṛd‌bhiśca mama dūtaiśca tāḍitaiḥ /
kuṇḍatrayaṃ maśādīnāṃ pūrṇaṃ ca maśakādibhiḥ

sarvaṃ kośārdhamānaṃ ca mahāpātakibhiryutam /
hastapādādibaddhaiśca kṣatajaughena lohitaiḥ

hāheti śabdaṃ kurvad‌bhistāḍitairmama pārṣadaiḥ /
vajravṛścikayoḥ kuṇḍaṃ tābhyāṃ ca paripūritam

vāpyardhaṃ pāpibhiryuktaṃ vajravṛścikadaṃśitaiḥ /
kuṇḍatrayaṃ śarādīnāṃ taireva paripūritam

tairviddhaiḥ pāpibhiryuktaṃ vāpyardhaṃ raktalohitaiḥ /
taptatoyodakaiḥ pūrṇaṃ sadhvāntaṃ golakuṇḍakam

kīṭaiḥ śaṅ‌kusamānaiśca bhakṣitaiḥ pāpibhiryutam /
vāpyarthamānaṃ bhītaiśca pāpibhiḥ kīṭabhakṣitaiḥ

rudad‌bhiḥ krośamānaiśca mama dūtaiśca tāḍitaiḥ /
atidurgandhisaṃyuktaṃ duḥkhadaṃ pāpināṃ sadā

dāruṇairvikṛtākārairbhakṣitaṃ pāpibhiryutam /
vāpyardhaṃ paripūrṇaṃ ca jalasthairnakrakoṭibhiḥ

viṇmūtraśleṣmabhakṣaiśca saṃyutaṃ śatakoṭibhiḥ /
kākaiśca vikṛtākārairbhakṣitaiḥ pāpibhiryutam

manthānakuṇḍaṃ bījakuṇḍaṃ tābhyāṃ pūrṇaṃ dhanuḥśatam /
bhakṣitaiḥ pāpibhiryuktaṃ śabdakṛd‌bhiśca santatam

dhanuḥśataṃ jīvayuktaṃ pāpibhiḥ saṅ‌kulaṃ sadā /
śabdakṛd‌bhirvajradaṃṣṭraiḥ sāndradhvāntamayaṃ param

vāpīdviguṇamānaṃ ca taptaprastaranirmitam /
jvaladaṅ‌gārasadṛśaṃ calad‌bhiḥ pāpibhiryutam

kṣuradhāropamaistīkṣṇaiḥ pāṣāṇairnirmitaṃ param /
mahāpātakibhiryuktaṃ lālākuṇḍaṃ ca lohitaiḥ

krośamātraṃ ca gambhīraṃ mama dūtaiśca tāḍitaiḥ /
taptāñjanācalākāraiḥ paripūrṇaṃ dhanuḥśatam

calad‌bhiḥ pāpibhiryuktaṃ mama dūtaiśca tāḍitaiḥ /
pūrṇaṃ cūrṇadravaiḥ krośamānaṃ pāpibhiranvitam

tad‍bhojibhiḥ pradagdhaiśca mama dūtaiśca tāḍitaiḥ /
kuṇḍaṃ kulālacakraṃ ca ghūrṇamānañca santatam

sutīkṣṇaṃ ṣoḍaśāraṃ ca cūrṇitaiḥ pāpibhiryutam /
atīva vakraṃ nimnaṃ ca dvigavyūtipramāṇakam

kandarākāranirmāṇaṃ taptodaiśca samanvitam /
mahāpātakibhiryuktaṃ bhakṣitairjalajantubhiḥ

jvalad‌bhiḥ śabdakṛd‌bhiśca dhvāntayuktaṃ bhayānakam /
koṭibhirvikṛtākāraiḥ kacchapaiśca sudāruṇaiḥ

jalasthaiḥ saṃyutaṃ taiśca bhakṣitaiḥ pāpibhiryutam /
jvālākalāpaistejobhirnirmitaiḥ krośamānakam

śabdakṛd‌bhiḥ pātakibhiḥ saṃyutaṃ kleśadaṃ sadā /
krośamānañca gambhīraṃ taptabhasmabhiranvitam

śaśvajjvalad‌bhiḥ saṃyuktaṃ pāpibhirbhasmabhakṣitaiḥ /
taptapāṣāṇalohānāṃ samūhaiḥ paripūritaiḥ

pāpibhirdagdhagātraiśca yuktañca śuṣkatālukaiḥ /
krośamānaṃ dhvāntayuktaṃ gambhīramatidāruṇam

tāḍitaiśca pradagdhaiśca dagdhakuṇḍaṃ prakīrtitam /
atīvormiyutaṃ toyaṃ prataptakṣārasaṃyutam

nānāprakārairvirutairjalajantubhiranvitam /
dvigavyūtipramāṇaṃ ca gambhīraṃ dhvāntasaṃyutam

tad‍bhakṣyaiḥ pāpibhiryuktaṃ daṃśitairjalajantubhiḥ /
jvalad‌bhiḥ śabdakṛd‌bhiśca na paśyad‌bhiḥ parasparam

prataptasūcīkuṇḍañca kīrtitaṃ ca bhayānakam /
asīva dhārāpatrasyā'pyuccaistālataroradhaḥ

krośārdhamānaṃ kuṇḍaṃ ca patatpatrasamanvitam /
pāpināṃ raktapūrṇaṃ ca vṛkṣāgrātpatatāṃ dhruvam / ७२
paritrāhīti śabdaṃ ca kurvatāmasatāmapi /
gambhīraṃ dhvāntayuktaṃ ca raktakīṭasamanvitam

tadasīpatrakuṇḍaṃ ca kīrtitaṃ ca bhayānakam /
dhanuḥśatapramāṇaṃ ca kṣuradhārāstrasaṃyutam

pāpināṃ raktapūrṇaṃ ca kṣuradhāraṃ bhayānakam /
sūcīmukhāstrasaṃyuktaṃ pāpiraktaughapūratam

pañcāśaddhanurāyāmaṃ kleśadaṃ sūcikāmukham /
kasyacijjantubhedasya gokākhyasya mukhākṛti

kūparūpaṃ gabhīraṃ ca dhanurviṃśatpramāṇakam /
mahāpātakināṃ caiva mahatkleśapradaṃ param

tatkīṭabhakṣitānāṃ ca namrāsyānāṃ ca santatam /
kuṇḍaṃ nakramukhākāraṃ dhanuḥṣoḍaśamānakam

gambhīraṃ kūparūpaṃ ca pāpināṃ saṅ‌kulaṃ sadā /
dhanuḥśatapramāṇaṃ ca kīrtitaṃ gajadaṃśanam

dhanustriṃśatpramāṇaṃ ca kuṇḍaṃ ca gomukhākṛti /
pāpināṃ kleśadaṃ śaśvad‌ gomukhaṃ parikīrtitam

kālacakreṇa saṃyuktaṃ bhramamāṇaṃ bhayānakam /
kumbhākāraṃ dhvāntayuktaṃ dvigavyūtipramāṇakam

lakṣapauruṣamānaṃ ca gambhīraṃ vismṛtaṃ sati /
kutracittaptatailaṃ ca tāmrādikuṇḍameva ca

pāpināṃ ca pradhānaiśca mūrcchitaiḥ kṛmibhiryutam /
parasparaṃ ca naśyad‌bhiḥ śabdakṛd‌bhiśca santatam

tāḍitairyamadūtaiśca musalairmud‌garaistathā /
ghūrṇamānaiḥ patad‌bhiśca mūrcchitaiśca kṣaṇaṃ kṣaṇam

pātitairyamadūtaiśca rudantyasmātkṣaṇaṃ punaḥ /
yāvantaḥ pāpinaḥ santi sarvakuṇḍeṣu sundari

tataścaturguṇāḥ santi kumbhīpāke ca duḥkhade /
suciraṃ vadhyamānāste bhogadehā na naśvarāḥ

sarvakuṇḍapradhānaṃ ca kumbhīpākaṃ prakīrtitam /
kālanirmitasūtreṇa nibaddhā yatra pāpinaḥ

utthāpitāśca dūtaiśca kṣaṇameva nimajjitāḥ /
niḥśvāsabaddhāḥ suciraṃ tathā mohaṃ gatāḥ punaḥ

atīva kleśasaṃyuktā dehabhogena sundari /
prataptatoyayuktaṃ ca kālasūtraṃ prakīrtitam

avaṭaḥ kūpabhedaśca matsyodaḥ sa udāhṛtaḥ /
prataptatoyapūrṇaṃ ca caturviṃśatpramāṇakam

vyāptaṃ mahāpātakibhirvyādagdhāṅ‌gaiśca santatam /
maddūtaistāḍitaiḥ śaśvadavaṭodaṃ prakīrtitam

yatrodasparśamātreṇa sarvavyādhiśca pāpinām /
bhavedakasmātpatatāṃ yasminkuṇḍe dhanuḥśate

aruntudairbhakṣitaistu prāṇibhiryacca saṅ‌kulam /
hāheti śabdaṃ kurvad‌bhistadevāruntudaṃ viduḥ

taptapāṃsubhirākīrṇaṃ jvalad‌bhistuṣadagdhakaiḥ /
tad‍bhakṣaiḥ pāpibhiryuktaṃ pāṃsubhojairdhanuḥśatam

pātamātreṇa pāpī ca pāśena veṣṭito bhavet /
krośamātreṇa kuṇḍaṃ ca tatpāśaveṣṭanaṃ viduḥ

pātamātreṇa pāpī ca śūlena veṣṭito bhavet /
dhanurviṃśatpramāṇaṃ ca śūlaprotaṃ prakīrtitam

patatāṃ pāpināṃ yatra bhavedeva prakampanam /
atīva himatoyāktaṃ krośārdhaṃ ca prakampanam

dadatyeva hi me dūtā yatrolkāḥ pāpināṃ mukhe /
dhanurviṃśatpramāṇaṃ tadulkābhiśca susaṅ‌kulam

lakṣapauruṣamānaṃ ca gambhīraṃ ca dhanuḥśatam /
nānāprakārakṛmibhiḥ saṃyuktaṃ ca bhayānakam

atyandhakāravyāptaṃ ca kūpākāraṃ ca vartulam /
tad‍bhakṣyaiḥ pāpibhiryuktaṃ praṇaśyad‌bhiḥ parasparam

taptatoyapradagdhaiśca jvalad‌bhiḥ kīṭabhakṣitaiḥ /
dhvāntena cakṣuṣā cāndhairandhakūpaḥ prakīrtitaḥ

nānāprakāraśastraughairyatra viddhāśca pāpinaḥ /
dhanurviṃśatpramāṇaṃ ca vedhanaṃ tatprakīrtitam

daṇḍena tāḍitā yatra mama dūtaiśca pāpinaḥ /
dhanuḥṣoḍaśamānaṃ ca tatkuṇḍaṃ daṇḍatāḍanam

niruddhāśca mahājālairyathā mīnāśca pāpinaḥ /
dhanurviṃśatpramāṇaṃ ca jālarandhraṃ prakīrtitam

patatāṃ pāpināṃ kuṇḍe dehaścūrṇo bhavediha /
lohabandīnibaddhānāṃ koṭipauruṣamānakam

gambhīraṃ dhvāntasaṃyuktaṃ dhanurviṃśatpramāṇakam /
mūrcchitānāṃ jaḍānāṃ ca dehacūrṇaṃ prakīrtitam

dalitāḥ pāpino yatra mama dūtaiśca tāḍitāḥ /
dhanuḥṣoḍaśamānaṃ ca tatkuṇḍaṃ dalanaṃ smṛtam

patanenaiva pāpī ca śuṣkakaṇṭhoṣṭhatālukaḥ /
bālukāsu ca taptāsu dhanustriṃśatpramāṇakam

śatapauruṣamānaṃ ca gambhīraṃ dhvāntasaṃyutam /
śoṣaṇaṃ kuṇḍametaddhi pāpināṃ paraduḥkhadam

nānācarmakaṣāyodaparipūrṇaṃ dhanuḥśatam /
durgandhiyuktatad‍bhakṣyaiḥ prāṇibhiḥ saṅ‌kulaṃ kaṣam

śūrpākāramukhaṃ kuṇḍaṃ dhanurdvādaśamānakam /
taptalohabālukābhiḥ pūrṇaṃ pātakisaṃyutam

durgandhiyuktaṃ tad‍bhakṣyaiḥ pāpibhiḥ saṅ‌kulaṃ sati /
śūrpākāramukhaṃ kuṇḍaṃ dhanurdvādaśamātrakam

prataptabālukāpūrṇaṃ mahāpātakibhiryutam /
antaragniśikhānāṃ ca jvālāvyāptamukhaṃ sadā

dhanurviṃśatimātraṃ ca pramāṇaṃ yasya sundari /
jvālābhirdagdhagātraiśca pāpibhirvyāptameva ca

tanmahākleśadaṃ śaśvatkuṇḍaṃ jvālāmukhaṃ smṛtam /
pātamātrādyatra pāpī mūrcchito vai naro bhavet

tapteṣṭakābhyantaritaṃ vāpyardhaṃ jihmakuṇḍakam /
dhūmāndhakārasaṃyuktaṃ dhūmrāndhaiḥ pāpibhiryutam

dhanuḥśataṃ śvāsarandhrairdhūmrāndhaṃ parikīrtitam /
pātamātrādyatra pāpī nāgaiśca veṣṭito bhavet

dhanuḥśataṃ nāgapūrṇaṃ tannāgairveṣṭitaṃ bhavet /
ṣaḍaśīti ca kuṇḍāni mayoktāni niśāmaya /
lakṣaṇaṃ cāpi teṣāṃ ca kiṃ bhūyaḥ śrotumicchasi

iti śrīmaddevībhāgavate mahāpurāṇe'ṣṭādaptasāhasryāṃ saṃhitāyāṃ navamaskandhe
nārāyaṇanāradasaṃvāde nānānarakakuṇḍavarṇanaṃ nāma saptatriṃśo'dhyāyaḥ