Devi Bhagavata Purana · Chapter 9.34

nānākarmavipākaphalavarṇanam
yama uvāca
chinatti jīvaṃ khaḍgena dayāhīnaḥ sudāruṇaḥ /
naraghātī hanti naramarthalobhena bhārate

asipatre vasetso'pi yāvadindrāścaturdaśa /
teṣu yo brāhmaṇān hanti śatamanvantaraṃ vaset

chinnāṅ‌gaḥ saṃvaset so'pi khaḍgadhāreṇa santatam /
anāhāraḥ śabdamuccairyamadūtena tāḍitaḥ

manthānaḥ śatajanmāni śatajanmāni sūkaraḥ /
kukkuṭaḥ sapta janmāni śṛgālaḥ saptajanmasu

vyāghraśca sapta janmāni vṛkaścaiva trijanmasu /
saptajanmasu maṇḍūko yamadūtena tāḍitaḥ

sa bhaved‍bhārate varṣe mahiṣaśca tataḥ śuciḥ /
grāmāṇāṃ nagarāṇāṃ vā dahanaṃ yaḥ karoti ca

kṣuradhāre vasetso'pi chinnāṅ‌gastriyugaṃ sati /
tataḥ preto bhavetsadyo vahnivaktro bhramanmahīm

saptajanmāmedhyabhojī kapotaḥ saptajanmasu /
tato bhavenmahāśūlī mānavaḥ saptajanmani

saptajanma galatkuṣṭhī tataḥ śuddho bhavennaraḥ /
parakarṇe mukhaṃ dattvā paranindāṃ karoti yaḥ

paradoṣe mahāślāghī devabrāhmaṇanindakaḥ /
sūcīmukhe vasetso'pi sūcīviddho yugatrayam

tato bhaved‌ vṛścikaśca sarpaśca saptajanmasu /
vajrakīṭaḥ saptajanma bhasmakīṭastataḥ param

tato bhavenmānavaśca mahāvyādhistataḥ śuciḥ /
gṛhiṇāṃ hi gṛhaṃ bhittvā vastusteyaṃ karoti yaḥ

gāśca chāgāṃśca meṣāṃśca yāti gokāmukhe ca saḥ /
tāḍito yamadūtena vasettatra yugatrayam

tato bhavetsaptajanma gojātirvyādhisaṃyutaḥ /
trijanmani meṣajātiśchāgajātistrijanmani

tato bhavenmānavaśca nityarogī daridrakaḥ /
bhāryāhīno bandhuhīnaḥ santāpī ca tataḥ śuciḥ

sāmānyadravyacauraśca yāti nakramukhaṃ ca saḥ /
tāḍito yamadūtena vasettatrābdakatrayam

tato bhavetsaptajanma gopatirvyādhisaṃyutaḥ /
tato bhavenmānavaśca mahārogī tataḥ śuciḥ

hanti gāśca gajāṃścaiva turagāṃśca nagāṃstathā /
sa yāti gajadaṃśaṃ ca mahāpāpī yugatrayam

tāḍito yamadūtena nāgadantena santatam /
sa bhaved‌gajajātiśca turagaśca trijanmani

gojātirmlecchajātiśca tataḥ śuddho bhavennaraḥ /
jalaṃ pibantīṃ tṛṣitāṃ gāṃ vārayati yaḥ pumān

narakaṃ gomukhākāraṃ kṛmitaptodakānvitam /
tatra tiṣṭhati santapto yāvanmanvantarāvadhi

tato naro'pi gohīno mahārogī daridrakaḥ /
saptajanmāntyajātiśca tataḥ śuddho bhavennaraḥ

gohatyāṃ brahmahatyāṃ ca karoti hyatideśikīm /
yo hi gacchatyagamyāṃ ca yaḥ strīhatyāṃ karoti ca

bhikṣuhatyāṃ mahāpāpī bhrūṇahatyāṃ ca bhārate /
kumbhīpāke vasetso'pi yāvadindrāścaturdaśa

tāḍito yamadūtena cūrṇyamānaśca santatam /
kṣaṇaṃ patati vahnau ca kṣaṇaṃ patati kaṇṭake

kṣaṇaṃ patettaptataile tapto yena kṣaṇaṃ kṣaṇam /
kṣaṇaṃ ca taptalohe ca kṣaṇaṃ ca taptatāmrake

gṛdhro janmasahasrāṇi śatajanmāni sūkaraḥ /
kākaśca sapta janmāni sarpaśca saptajanmasu

ṣaṣṭivarṣasahasrāṇi viṣṭhāyāṃ jāyate kṛmiḥ /
nānājanmasu sa vṛṣastataḥ kuṣṭhī daridrakaḥ

sāvitryuvāca
viprahatyā ca gohatyā kiṃvidhā cātidaiśikī /
kā vā nṛṇāmagamyā ca ko vā saṃdhyāvihīnakaḥ

adīkṣitaḥ pumānko vā ko vā tīrthapratigrahī /
dvijaḥ ko vā grāmayājī ko vā vipro'tha devalaḥ

śūdrāṇāṃ sūpakāraśca pramatto vṛṣalīpatiḥ /
eteṣāṃ lakṣaṇaṃ sarvaṃ vada vedavidāṃ vara

dharmarāja uvāca
śrīkṛṣṇe ca tadarcāyāmanyeṣāṃ prakṛtau sati /
śive ca śivaliṅ‌ge ca sūrye sūryamaṇau tathā

gaṇeśe vātha durgāyāmevaṃ sarvatra sundari /
yaḥ karoti bhedabuddhiṃ brahmahatyāṃ labhettu saḥ

svagurau sveṣṭadeve ca janmadātari mātari /
karoti bhedabuddhiṃ yo brahmahatyāṃ labhettu saḥ

vaiṣṇaveṣu ca bhakteṣu brāhmaṇeṣvitareṣu ca /
karoti bhedabuddhiṃ yo brahmahatyāṃ labhettu saḥ

viprapādodake caiva śālagrāmodake tathā /
karoti bhedabuddhiṃ yo brahmahatyāṃ labhettu saḥ

śivanaivedyake caiva harinaivedyake tathā /
karoti bhedabuddhiṃ yo brahmahatyāṃ labhettu saḥ

sarveśvareśvare kṛṣṇe sarvakāraṇakāraṇe /
sarvādye sarvadevānāṃ sevye sarvāntarātmani

māyayānekarūpe vāpyeka eva hi nirguṇe /
karotīśena bhedaṃ yo brahmahatyāṃ labhettu saḥ

śaktibhakte dveṣabuddhiṃ śaktiśāstre tathaiva ca /
dveṣaṃ yaḥ kurute martyo brahmahatyāṃ labhettu saḥ

pitṛdevārcanaṃ yo vā tyajedvedanirūpitam /
yaḥ karoti niṣiddhaṃ ca brahmahatyāṃ labhettu saḥ

yo nindati hṛṣīkeśaṃ tanmantropāsakaṃ tathā /
pavitrāṇāṃ pavitraṃ ca jñānānandaṃ sanātanam

pradhānaṃ vaiṣṇavānāṃ ca devānāṃ sevyamīśvaram /
ye nārcayanti nindanti brahmahatyāṃ labhanti te

ye nindanti mahādevīṃ kāraṇabrahmarūpiṇīm /
sarvaśaktisvarūpāṃ ca prakṛtiṃ sarvamātaram

sarvadevasvarūpāṃ ca sarveṣāṃ vanditāṃ sadā /
sarvakāraṇarūpāṃ ca brahmahatyāṃ labhanti te

kṛṣṇajanmāṣṭamīṃ rāmanavamīṃ ca supuṇyadām /
śivarātriṃ tathā caikādaśīṃ vāre ravestathā

pañca parvāṇi puṇyāni ye na kurvanti mānavāḥ /
labhanti brahmahatyāṃ te cāṇḍālādhikapāpinaḥ

ambuvācyāṃ bhūkhananaṃ jalaśaucādikaṃ ca ye /
kurvanti bhārate varṣe brahmahatyāṃ labhanti te

guruñca mātaraṃ tātaṃ sādhvīṃ bhāryāṃ sutaṃ sutām /
anindyāṃ yo na puṣṇāti brahmahatyāṃ labhettu saḥ

vivāho yasya na bhavenna paśyati sutaṃ tu yaḥ /
haribhaktivihīno yo brahmahatyāṃ labhettu saḥ

hareranaivedyabhojī nityaṃ viṣṇuṃ na pūjayet /
puṇyaṃ pārthivaliṅ‌gaṃ ca brahmahāsau prakīrtitaḥ

goprahāraṃ prakurvantaṃ dṛṣṭvā yo na nivārayet /
yāti goviprayormadhye gohatyā tu labhettu saḥ

daṇḍairgostāḍayenmūḍho yo vipro vṛṣavāhanaḥ /
dine dine govadhaṃ ca labhate nātra saṃśayaḥ

dadāti gobhya ucchiṣṭaṃ bhojayed‌ vṛṣavāhakam /
bhunakti vṛṣavāhānnaṃ sa gohatyāṃ labhed‌ dhruvam

vṛṣalīpatiṃ yājayedyo bhuṅ‌kte'nnaṃ tasya yo naraḥ /
gohatyāśatakaṃ so'pi labhate nātra saṃśayaḥ

pādaṃ dadāti vahnau yo gāśca pādena tāḍayet /
gehaṃ viśedadhautāṅ‌ghriḥ snātvā govadhamāpnuyāt

yo bhuṅ‌kte snigdhapādena śete snigdhāṅ‌ghrireva ca /
sūryodaye ca yo bhuṅ‌kte sa gohatyāṃ labhed‌ dhruvam

avīrānnaṃ ca yo bhuṅ‌kte yonijīvyasya ca dvijaḥ /
yastrisandhyāvihīnaśca gohatyā labhate ca saḥ

svabhartari ca deve vā bhedabuddhiṃ karoti yā /
kaṭūktyā tāḍayet kāntaṃ sā gohatyāṃ labhed‌ dhruvam

gomārgavarjanaṃ kṛtvā dadāti sasyameva vā /
taḍāge vā tu durge vā sa gohatyāṃ labhed‌ dhruvam

prāyaścitte govadhasya yaḥ karoti vyatikramam /
putralobhādathājñānātsa gohatyā labhed‌ dhruvam

rājake daivake yat‍nād‌ gosvāmī gāṃ na rakṣati /
duḥkhaṃ dadāti yo mūḍho gohatyāṃ sa labhed‌ dhruvam

prāṇino laṅghayedyo hi devārcāmanalaṃ jalam /
naivedyaṃ puṣpamannaṃ ca sa gohatyāṃ labhed‌ dhruvam

śaśvannāstīti yo vādī mithyāvādī pratārakaḥ /
devadveṣī gurudveṣī sa gohatyāṃ labhed‌ dhruvam

devatāpratimāṃ dṛṣṭvā guruṃ vā brāhmaṇaṃ sati /
sambhramānna namedyo hi sa gohatyā labhed‌ dhruvam

na dadātyāśiṣaṃ kopātpraṇatāya ca yo dvijaḥ /
vidyārthine ca vidyāṃ ca sa gohatyāṃ labhed‌ dhruvam

gohatyā viprahatyā ca kathitā cātideśikī /
gamyāṃ striyaṃ nṛṇāmeva nibodha kathayāmi te

svastrī gamyā ca sarveṣāmiti vedānuśāsanam /
agamyā ca tadanyā yā ceti vedavido viduḥ

sāmānyaṃ kathitaṃ sarvaṃ viśeṣaṃ śṛṇu sundari /
atyagamyā hi yā yāśca nibodha kathayāmi tāḥ

śūdrāṇāṃ viprapat‍nī ca viprāṇāṃ śūdrakāminī /
atyagamyā ca nindyā ca loke vede pativrate

śūdraśca brāhmaṇīṃ gatvā brahmahatyāśataṃ labhet /
tatsamaṃ brāhmaṇī cāpi kumbhīpākaṃ labhed‌ dhruvam

śūdrāṇāṃ viprapat‍nī ca viprāṇāṃ śūdrakāminī /
yadi śūdrā vrajedvipro vṛṣalīpatireva saḥ

sa bhraṣṭo viprajāteśca cāṇḍālātso'dhamaḥ smṛtaḥ /
viṣṭhāsamaśca tatpiṇḍo mūtraṃ tasya ca tarpaṇam

na pitṝṇāṃ surāṇāṃ ca taddattamupatiṣṭhati /
koṭijanmārjitaṃ puṇyaṃ tasyārcāttapasārjitam

dvijasya vṛṣalīlobhānnaśyatyeva na saṃśayaḥ /
brāhmaṇaśca surāpītirviḍbhojī vṛṣalīpatiḥ

taptamudrādagdhadehastaptaśūlāṅ‌kitastathā /
harivāsarabhojī ca kumbhīpākaṃ vrajed‌ dvijaḥ

gurupat‍nīṃ rājapat‍nīṃ sapat‍nīṃ mātaraṃ dhruvam /
sutāṃ putravadhūṃ śvaśrūṃ sagarbhāṃ bhaginīṃ satīm

sahodarabhrātṛjāyāṃ mātulānīṃ pituḥ prasūm /
mātuḥ prasūṃ tatsvasāraṃ bhaginīṃ bhrātṛkanyakām

śiṣyāṃ śiṣyasya pat‍nīṃ ca bhāgineyasya kāminīm /
bhrātuḥ putrapriyāṃ caivātyagamyā āha padmajaḥ

etāḥ kāmena kāntā yo vrajedvai mānavādhamaḥ /
sa mātṛgāmī vedeṣu brahmahatyāśataṃ vrajet

akarmārho'pyasaṃspṛśyo loke vede ca ninditaḥ /
sa yāti kumbhīpāke ca mahāpāpī suduṣkare

karotyaśuddhāṃ sandhyāṃ vā na sandhyāṃ vā karoti ca /
trisandhyaṃ varjayedyo vā sandhyāhīnaśca sa dvijaḥ

vaiṣṇavaṃ ca tathā śaivaṃ śāktaṃ sauraṃ ca gāṇapam /
yo'haṅ‌kārānna gṛhṇāti mantraṃ so'dīkṣitaḥ smṛtaḥ

pravāhamavadhiṃ kṛtvā yāvaddhastacatuṣṭayam /
tatra nārāyaṇaḥ svāmī gaṅ‌gāgarbhāntare vaset

tatra nārāyaṇakṣetre mṛto yāti hareḥ padam /
vārāṇasyāṃ badaryāṃ ca gaṅ‌gāsāgarasaṅ‌game

puṣkare hariharakṣetre prabhāse kāmarūsthale /
haridvāre ca kedāre tathā mātṛpure'pi ca

sarasvatīnadītīre puṇye vṛndāvane vane /
godāvaryāṃ ca kauśikyāṃ triveṇyāṃ ca himācale

eṣu tīrtheṣu yo dānaṃ pratigṛhṇāti kāmataḥ /
sa ca tīrthapratigrāhī kumbhīpāke prayāti saḥ

śūdrasevī śūdrayājī grāmayājīti kīrtitaḥ /
tathā devopajīvī ca devalaḥ parikīrtitaḥ

śūdrapākopajīvī yaḥ sūpakāra iti smṛtaḥ /
sandhyāpūjanahīnaśca pramattaḥ patitaḥ smṛtaḥ

uktaṃ sarvaṃ mayā bhadre lakṣaṇaṃ vṛṣalīpateḥ /
ete mahāpātakinaḥ kumbhīpākaṃ prayānti te /
kuṇḍānyanyāni ye yānti nibodha kathayāmi te

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
nārāyaṇanāradasaṃvāde sāvitryupākhyāne nānākarmavipākaphalavarṇanaṃ nāma catustriṃśo'dhyāyaḥ