Devi Bhagavata Purana · Chapter 9.33

nānākarmavipākaphalakathanam
dharmarāja uvāca
harisevārataḥ śuddho yogasiddho vratī sati /
tapasvī brahmacārī ca na yāti narakaṃ dhruvam

kaṭuvācā bāndhavāṃśca balalepena yo naraḥ /
dagdhānkaroti balavān vahnikuṇḍaṃ prayāti saḥ

svagātralomamānābdaṃ tatra sthitvā hutāśane /
paśuyonimavāpnoti raudradagdhāṃ trijanmani

brāhmaṇaṃ tṛṣitaṃ taptaṃ kṣudhitaṃ gṛhamāgatam /
na bhojayati yo mūḍhastaptakuṇḍaṃ prayāti saḥ

tatra tallomamānaṃ ca varṣaṃ sthitvā ca duḥkhade /
taptasthale vahnitalpe pakṣī ca saptajanmasu

ravivāre ca saṃkrāntyāmamāyāṃ śrāddhavāsare /
vastrāṇāṃ kṣārasaṃyogaṃ karoti kevalaṃ naraḥ

sa yāti kṣārakuṇḍaṃ ca sūtramānābdameva ca /
sa vrajed‌rajakīṃ yoniṃ saptajanmasu bhārate

mūlaprakṛtinindāṃ yaḥ kurute mānavādhamaḥ /
vedanindāṃ śāstranindāṃ purāṇānāṃ tathaiva ca

brahmaviṣṇuśivādīnāṃ tathā nindāparo janaḥ /
gaurīvāṇyādidevīnāṃ tathā nindāparo janaḥ

te sarve niraye yānti tasminkuṇḍe bhayānake /
nātaḥ parataraṃ kuṇḍaṃ duḥkhadaṃ tu bhaviṣyati

tatra sthitvānekakalpaṃ sarpayoniṃ vrajetpunaḥ /
devīnindāparādhasya prāyaścittaṃ na vidyate

svadattāṃ paradattāṃ vā vṛttiṃ ca suraviprayoḥ /
ṣaṣṭivarṣasahasrāṇi viṭkuṇḍaṃ ca prayāti saḥ

tāvantyeva ca varṣāṇi viḍbhojī tatra tiṣṭhati /
ṣaṣṭivarṣasahasrāṇi viṭkṛmiśca punarbhuvi

parakīyataḍāge ca taḍāgaṃ yaḥ karoti ca /
utsajeddaivadoṣeṇa mūtrakuṇḍaṃ prayāti saḥ

tadreṇumānavarṣaṃ ca tad‍bhojī tatra tiṣṭhati /
punaḥ pūrṇaśatābdaṃ ca sa vṛṣo bhārate bhavet

ekākī miṣṭamaśnāti śleṣmakuṇḍaṃ prayāti ca /
pūrṇamabdaśataṃ caiva tad‍bhojī tatra tiṣṭhati

tataḥ pūrṇaśatābdaṃ ca sa preto bhārate bhavet /
śleṣmamūtraparaṃ caiva pūyaṃ bhuṅ‌kte tataḥ śuciḥ

pitaraṃ mātaraṃ caiva guruṃ bhāryāṃ sutaṃ sutām /
yo na puṣṇātyanāthaṃ ca garakuṇḍaṃ prayāti saḥ

pūrṇamabdaśataṃ caiva tad‍bhojī tatra tiṣṭhati /
tato vrajed‌bhūtayoniṃ śatavarṣaṃ tataḥ śuciḥ

dṛṣṭvātithiṃ vakracakṣuḥ karoti yo hi mānavaḥ /
pitṛdevāstasya jalaṃ na gṛhṇanti ca pāpinaḥ

yāni kāni ca pāpāni brahmahatyādikāni ca /
ihaiva labhate cānte dūṣikākuṇḍamāvrajet

pūrṇamabdaśataṃ caiva tad‍bhojī tatra tiṣṭhati /
tato vrajed‌bhūtayoniṃ śatavarṣaṃ tataḥ śuciḥ

dattvā dravyaṃ ca viprāya cānyasmai dīyate yadi /
sa tiṣṭhati vasākuṇḍe tad‍bhojī śatavatsaram

kṛkalāso bhavetso'pi bhārate saptajanmasu /
tato bhavenmahāraudro daridro'lpāyureva ca

pumāṃsaṃ kāminī vāpi kāminīṃ vā pumānatha /
yaḥ śukraṃ pāyayatyeva śukrakuṇḍaṃ prayāti saḥ

pūrṇamabdaśataṃ caiva tad‍bhojī tatra tiṣṭhati /
kṛmiyoniṃ śatābdaṃ ca vrajed‌bhūtvā tataḥ śuciḥ

santāḍya ca guruṃ vipraṃ raktapātaṃ ca kārayet /
sa ca tiṣṭhatyasṛkkuṇḍe tad‍bhojī śatavatsaram

tato labhedvyāghrajanma saptajanmasu bhārate /
tataḥ śuddhimavāpnoti mānavaśca krameṇa ha

yo'śru tatyāja gāyantaṃ bhaktaṃ dṛṣṭvā sagad‌gadam /
śrīkṛṣṇaguṇasaṅ‌gīte hasatyeva hi yo naraḥ

sa vasedaśrukuṇḍe ca tad‍bhojī śatavarṣakam /
tato bhavecca cāṇḍālastrijanmani tataḥ śuciḥ

karoti śaṭhatā tadvannityaṃ suhṛdi yo naraḥ /
kuṇḍaṃ gātramalānāṃ ca sa prayāti śatābdakam

tataḥ sa gārdabhīṃ yonimavāpnoti trijanmani /
trijanmani ca śārgālīṃ tataḥ śuddho bhaved‌ dhruvam

badhiraṃ yo hasatyeva nindatyevābhimānataḥ /
sa vasetkarṇaviṭkuṇḍe tad‍bhojī śatavatsaram

tato bhavetsa badhiro daridraḥ saptajanmasu /
saptajanmanyaṅ‌gahīnastataḥ śuddhiṃ labhed‌ dhruvam

lobhātsvabharaṇārthāya jīvinaṃ hanti yo naraḥ /
majjākuṇḍe vasetso'pi tad‍bhojī lakṣavatsaram

tato bhavecca śaśako mīnaśca saptajanmasu /
trijanmani varāhaśca kukkuṭaḥ saptajanmasu

eṇādayaśca karmabhyastataḥ śuddhiṃ labhed‌ dhruvam /
svakanyāpālanaṃ kṛtvā vikrīṇāti ca yo naraḥ

arthalobhānmahāmūḍho māṃsakuṇḍaṃ prayāti saḥ /
kanyālomapramāṇābdaṃ tad‍bhojī tatra tiṣṭhati

tasya daṇḍaprahāraṃ ca kurvanti yamakiṅ‌karāḥ /
māṃsabhāraṃ mūrdhni kṛtvā raktabhāraṃ lihetkṣudhā

tato hi bhārate pāpī kanyāviṭkṛmigo bhavet /
ṣaṣṭivarṣasahasrāṇi vyādhaśca saptajanmasu

trijanmani varāhaśca kukkuṭaḥ saptajanmasu /
maṇḍūko hi jalaukāśca saptajanmasu bhārate

saptajanmasu kākaśca tataḥ śuddhiṃ labhed‌ dhruvam /
vratānāmupavāsānāṃ śrāddhādīnāṃ ca saṅ‌game

karoti yaḥ kṣaurakarma so'śuciḥ sarvakarmasu /
sa ca tiṣṭhati kuṇḍe ca nakhādīnāñca sundari

taddaivadinamānābdaṃ tad‍bhojī daṇḍatāḍitaḥ /
sakeśaṃ pārthivaṃ liṅ‌gaṃ yo vārcayati bhārate

sa tiṣṭhati keśakuṇḍe mṛdreṇumānavarṣakam /
tadante yāvanīṃ yoniṃ prayāti harakopataḥ

śatābdācchuddhimāpnoti rākṣasaḥ sa bhaved‌ dhruvam /
pitṝṇāṃ yo viṣṇupade piṇḍaṃ naiva dadāti ca

sa ca tiṣṭhatyasthikuṇḍe svalomābdaṃ maholbaṇe /
tataḥ suyoniṃ samprāpya kukhañjaḥ saptajanmasu

bhavenmahādaridraśca tataḥ śuddho hi dehataḥ /
yaḥ sevate mahāmūḍho gurviṇīṃ ca svakāminīm

pratapte tāmrakuṇḍe ca śatavarṣaṃ sa tiṣṭhati /
avīrānnaṃ ca yo bhuṅ‌kte ṛtusnātānnameva ca

lohakuṇḍe śatābdaṃ ca sa ca tiṣṭhati taptake /
sa vrajed‌rajakīṃ yoniṃ kākānāṃ saptajanmasu

mahāvraṇī daridraśca tataḥ śuddhī bhavennaraḥ /
yo hi carmāktahastena devadravyamupasmṛśet

śatavarṣapramāṇaṃ ca carmakuṇḍe sa tiṣṭhati /
yaḥ śūdreṇābhyanujñāto bhuṅkte śūdrānnameva ca

sa ca taptasurākuṇḍe śatābdaṃ tiṣṭhati dvijaḥ /
tato bhavecchūdrayājī brāhmaṇaḥ saptajanmasu

śūdraśrāddhānnabhojī ca tataḥ śuddho bhaved‌dha ruvam /
vāgduṣṭaḥ kaṭuko vācā tāḍayetsvāminaṃ sadā

tīkṣṇakaṇṭakakuṇḍe sa tad‍bhojī tatra tiṣṭhati /
tāḍito yamadūtena daṇḍena ca caturguṇam

tataḥ uccaiḥśravāḥ saptajanmasveva tataḥ śuci /
viṣeṇa jīvanaṃ hanti nirdayo yo hi mānavaḥ

viṣakuṇḍe ca tad‍bhojī sahasrābdaṃ ca tiṣṭhati /
tato bhavennṛghātī ca vraṇī ca śatajanmasu

saptajanmasu kuṣṭhī ca tataḥ śuddho bhaved‌ dhuvam /
daṇḍena tāḍayed‌ gāṃ hi vṛṣañca vṛṣavāhakaḥ

bhṛtyadvārā svatantro vā puṇyakṣetre ca bhārate /
pratapte tailakuṇḍe'gnau tiṣṭhati sma caturyugam

gavāṃ lomapramāṇābdaṃ vṛṣo bhavati tatparam /
kuntena hanti yo jīvaṃ vahnilohena helayā

kuntakuṇḍe vasetso'pi varṣāṇāmayutaṃ sati /
tataḥ suyoniṃ samprāpya codare vyādhisaṃyutaḥ

janmanaikena kleśena tataḥ śuddho bhavennaraḥ /
yo bhuṅ‌kte ca vṛthā māṃsaṃ māṃsalobhī dvijādhamaḥ

hareranaivedyabhojī kṛmikuṇḍaṃ prayāti saḥ /
svalomamānavarṣaṃ ca tad‍bhojī tatra tiṣṭhati

tato bhavenmlecchajātistrijanmani tato dvijaḥ /
brāhmaṇaḥ śūdrayājī ca śūdraśrāddhānnabhojakaḥ

śūdrāṇāṃ śavadāhī ca pūyakuṇḍe vased‌ dhruvam /
yāvallomapramāṇābdaṃ yamadaṇḍena suvrate

tāḍito yamadūtena tad‍bhojī tatra tiṣṭhati /
tato bhāratamāgatya sa śūdraḥ saptajanmasu

mahārogī daridraśca badhiro mūka eva ca /
kṛṣṇaṃ padmaṃ ca ke yasya taṃ sarpaṃ hanti yo naraḥ

svalomamānavarṣaṃ ca sarpakuṇḍaṃ prayāti saḥ /
sarpeṇa bhakṣitaḥ so'tha yamadūtena tāḍitaḥ

vasecca sarpaviḍbhojī tataḥ sarpo bhaved‌ dhruvam /
tato bhavenmānavaśca svalpāyurdadrusaṃyutaḥ

mahākleśena tanmṛtyuḥ sarpeṇa bhakṣitād‌ dhruvam /
vidhipradattajīvyāṃśca kṣudrajantūṃśca hanti yaḥ

sa daṃśamaśayoḥ kuṇḍe jantumānābdameva ca /
divāniśaṃ bhakṣitastairanāhāraśca śabdavān

hastapādādibaddhaśca yamadūtena tāḍitaḥ /
tato bhavetkṣudrajanturjātiśca yāvanī bhavet

tato bhavenmānavaśca so'ṅ‌gahīnastataḥ śuciḥ /
yo mūḍho madhumaśnāti hatvā ca madhumakṣikāḥ

sa eva gārale kuṇḍe jīvamānābdakaṃ vaset /
bhakṣito garalairdagdho yamadūtena tāḍitaḥ

tato hi makṣikājātistataḥ śuddho bhavennaraḥ /
daṇḍaṃ karotyadaṇḍye ca vipre daṇḍaṃ karoti ca

sa kuṇḍaṃ vajradaṃṣṭrāṇāṃ kīṭānāṃ yāti satvaram /
sa tallomapramāṇābdaṃ tatra tiṣṭhatyaharniśam

śabdakṛd‍bhakṣitastaistu yamadūtena tāḍitaḥ /
karoti rodanaṃ bhadre hāhākāraṃ kṣaṇe kṣaṇe

punaḥ sūkarayonau ca jāyate saptajanmasu /
trijanmani kākayonau tataḥ śuddho bhavennaraḥ

arthalobhena yo mūḍhaḥ prajādaṇḍaṃ karoti saḥ /
vṛścikānāṃ ca kuṇḍaṃ ca tallomābdaṃ vased‌ dhruvam

tato vṛścikajātiśca saptajanmasu bhārate /
tato naraścāṅ‌gahīno vyādhiśuddho bhaved‌ dhruvam

brāhmaṇaḥ śastradhārī yo hyanyeṣāṃ dhāvako bhavet /
sandhyāhīnaśca yo vipro haribhaktivihīnakaḥ

sa tiṣṭhati svalomābdaṃ kuṇḍeṣu ca śarādiṣu /
viddhaḥ śarādibhiḥ śaśvattataḥ śuddho bhavennaraḥ

kārāgāre sāndhakāre praṇihanti prajāśca yaḥ /
pramattaḥ svasya doṣeṇa golakuṇḍaṃ prayāti saḥ

sa paṅ‌kataptatoyāktaṃ sāndhakāraṃ bhayaṅ‌karam /
tīkṣṇadaṃṣṭraiśca kīṭaiśca saṃyuktaṃ golakuṇḍakam

kīṭairviddho vasettatra prajālomābdameva ca /
tato bhavetprajābhṛtyastataḥ śuddho bhavetkramāt

sarovarādutthitāṃśca nakrādīnhanti yo naraḥ /
nakrakaṇṭakamānābdaṃ nakrakuṇḍaṃ prayāti saḥ

tato nakrādijātīyo bhavennakrādiṣu dhruvam /
tataḥ sadyo viśuddho hi daṇḍenaiva punaḥ punaḥ

vakṣaḥ śroṇīstanāsyañca yaḥ paśyati parastriyāḥ /
kāmena kāmuko yo hi puṇyakṣetre ca bhārate

sa vasetkākakuṇḍe ca kākaiḥ saṃcūrṇalocanaḥ /
tataḥ svalomamānābdaṃ bhaveddagdhastrijanmani

svarṇasteyī ca yo mūḍho bhārate suraviprayoḥ /
sa ca manthānakuṇḍe vai svalomābdaṃ vased‌ dhruvam

tāḍito yamadūtena manthānaiśchannalocanaḥ /
tadviḍbhojī ca tatraiva tataścāndhastrijanmani

saptajanma daridraśca mahākrūraśca pātakī /
bhārate svarṇakāraśca sa ca svarṇavaṇik tataḥ

yo bhārate tāmracauro lohacauraśca sundari /
sa ca svalomamānābdaṃ bījakuṇḍaṃ prayāti saḥ

tatraiva bījaviḍbhojī bījaiśca channalocanaḥ /
tāḍito yamadūtena tataḥ śuddho bhavennaraḥ

bhārate devacauraśca devadravyāpahārakaḥ /
sa dustare vajrakuṇḍe svalomābdaṃ vased‌ dhruvam

dehadagdho'pi tadvajrairanāhāraśca śabdakṛt /
tāḍito yamadūtaiśca tataḥ śuddho bhavennaraḥ

raupyagavyāṃśukānāṃ ca yaścauraḥ suraviprayoḥ /
taptapāṣāṇakuṇḍeca svalomābdaṃ vased‌ dhruvam

trijanmani ca kaṃso'pi śvetarūpastrijanmani /
janmaikaṃ śvetacihnaśca tato'nye śvetapakṣiṇaḥ

tato raktavikārī ca śūlī vai mānavo bhavet /
saptajanmasu cālpāyustataḥ śuddho bhavennaraḥ

raitaṃ kāṃsyamayaṃ pātraṃ yo hareddevaviprayoḥ /
tīkṣṇapāṣāṇakuṇḍe ca svalomābdaṃ vasennaraḥ

sa bhavedaśvajātiśca bhārate saptajanmasu /
tato'dhikāṅ‌gajātiśca pādarogī tataḥ śuciḥ

puṃścalyannaṃ ca yo bhadre puṃścalījīvyajīvinaḥ /
svalomamānavarṣaṃ ca lālākuṇḍe vased‌ dhruvam

tāḍito yamadūtena tad‍bhojī tatra duḥkhitaḥ /
tataścakṣuḥśūlarogī tataḥ śuddhaḥ krameṇa saḥ

mlecchasevī masījīvī yo vipro bhārate bhuvi /
vasetsvalomamānābdaṃ masīkuṇḍe sa duḥkhabhāk

tāḍito yamadūtena tad‍bhojī tatra tiṣṭhati /
tatastrijanmani bhavetkṛṣṇavarṇaḥ paśuḥ sati

trijanmani bhavecchāgaḥ kṛṣṇavarṇastrijanmani /
tataḥ sa tālavṛkṣaśca tataḥ śuddho bhavennaraḥ

dhānyādisasyaṃ tāmbūlaṃ yo haretsuraviprayoḥ /
āsanaṃ ca tathā talpaṃ cūrṇakuṇḍe prayāti saḥ

śatābdaṃ tatra nivasedyamadūtena tāḍitaḥ /
tato bhavenmeṣajātiḥ kukkuṭaśca trijanmani

tato bhavedvānaraśca kāsavyādhiyuto bhuvi /
vaṃśahīno daridraśca svalpāyuśca tataḥ śuciḥ

karoti cakraṃ viprāṇāṃ hṛtvā dravyaṃ ca yo janaḥ /
sa vaseccakrakuṇḍe ca śatābdaṃ daṇḍatāḍitaḥ

tato bhavenmānavaśca tailakārastrijanmani /
vyādhiyukto bhaved‌rogī vaṃśahīnastataḥ śuciḥ

godhaneṣu ca vipreṣu karoti vakratāṃ pumān /
prayāti vakrakuṇḍaṃ sa tiṣṭhedyugaśataṃ sati

tato bhavetsa vakrāṅ‌go hīnāṅ‌gaḥ saptajanmani /
daridro vaṃśahīnaśca bhāryāhīnastataḥ śuciḥ

tato bhaved‌ gṛdhrajanmā trijanmani ca sūkaraḥ /
trijanmani biḍālaśca mayūraśca trijanmani

niṣiddhaṃ kūrmamāṃsaṃ ca brāhmaṇo yo hi bhakṣati /
kūrmakuṇḍe vasetso'pi śatābdaṃ kūrmabhakṣitaḥ

tato bhavetkūrmajanmā trijanmani ca sūkaraḥ /
trijanmani biḍālaśca mayūraśca tataḥ śuciḥ

ghṛtaṃ tailādikaṃ caiva yo haretsuraviprayoḥ /
sa yāti jvālākuṇḍaṃ ca bhasmakuṇḍaṃ ca pātakī

tatra sthitvā śatābdaṃ ca sa bhavettailapācitaḥ /
saptajanmani matsyaśca mūṣakaśca tataḥ śuciḥ

sugandhitailaṃ dhātrīṃ vā gandhadravyānyadeva vā /
bhārate puṇyavarṣe ca yo haretsuraviprayoḥ

sa vaseddagdhakuṇḍe ca bhaveddagdho divāniśam /
svalomamānavarṣaṃ ca tato durgandhiko bhavet

durgandhikaḥ saptajanma mṛganābhistrijanmani /
saptajanmasu manthānastato hi mānavo bhavet

balenaiva chalenaiva hiṃsārūpeṇa vā sati /
baliṣṭhaśca hared‌bhūmiṃ bhārate parapaitṛkīm

sa vasettaptasūciṃ ca bhavettāpī divāniśam /
taptataile yathā jīvo dagdho bhavati santatam

bhasmasānna bhavatyeva bhoge dehī na naśyati /
saptamanvantaraṃ pāpī santaptastatra tiṣṭhati

śabdaṃ karotyanāhāro yamadūtena tāḍitaḥ /
ṣaṣṭivarṣasahasrāṇi viṭkṛmiśca bhavettataḥ

tato bhaved‌bhūmihīno daridraśca tataḥ śuciḥ /
tataḥ svayoniṃ samprāpya śubhaṃ karmācaretpunaḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
nānākarmavipākaphalakathanaṃ nāma trayastriṃśo'dhyāyaḥ