દેવી ભાગવત પુરાણ · અધ્યાય 9.33

નાનાકર્મવિપાકફલકથનમ્
ધર્મરાજ ઉવાચ
હરિસેવારતઃ શુદ્ધો યોગસિદ્ધો વ્રતી સતિ ।
તપસ્વી બ્રહ્મચારી ચ ન યાતિ નરકં ધ્રુવમ્

કટુવાચા બાન્ધવાંશ્ચ બલલેપેન યો નરઃ ।
દગ્ધાન્કરોતિ બલવાન્ વહ્નિકુણ્ડં પ્રયાતિ સઃ

સ્વગાત્રલોમમાનાબ્દં તત્ર સ્થિત્વા હુતાશને ।
પશુયોનિમવાપ્નોતિ રૌદ્રદગ્ધાં ત્રિજન્મનિ

બ્રાહ્મણં તૃષિતં તપ્તં ક્ષુધિતં ગૃહમાગતમ્ ।
ન ભોજયતિ યો મૂઢસ્તપ્તકુણ્ડં પ્રયાતિ સઃ

તત્ર તલ્લોમમાનં ચ વર્ષં સ્થિત્વા ચ દુઃખદે ।
તપ્તસ્થલે વહ્નિતલ્પે પક્ષી ચ સપ્તજન્મસુ

રવિવારે ચ સંક્રાન્ત્યામમાયાં શ્રાદ્ધવાસરે ।
વસ્ત્રાણાં ક્ષારસંયોગં કરોતિ કેવલં નરઃ

સ યાતિ ક્ષારકુણ્ડં ચ સૂત્રમાનાબ્દમેવ ચ ।
સ વ્રજેદ્‌રજકીં યોનિં સપ્તજન્મસુ ભારતે

મૂલપ્રકૃતિનિન્દાં યઃ કુરુતે માનવાધમઃ ।
વેદનિન્દાં શાસ્ત્રનિન્દાં પુરાણાનાં તથૈવ ચ

બ્રહ્મવિષ્ણુશિવાદીનાં તથા નિન્દાપરો જનઃ ।
ગૌરીવાણ્યાદિદેવીનાં તથા નિન્દાપરો જનઃ

તે સર્વે નિરયે યાન્તિ તસ્મિન્કુણ્ડે ભયાનકે ।
નાતઃ પરતરં કુણ્ડં દુઃખદં તુ ભવિષ્યતિ

તત્ર સ્થિત્વાનેકકલ્પં સર્પયોનિં વ્રજેત્પુનઃ ।
દેવીનિન્દાપરાધસ્ય પ્રાયશ્ચિત્તં ન વિદ્યતે

સ્વદત્તાં પરદત્તાં વા વૃત્તિં ચ સુરવિપ્રયોઃ ।
ષષ્ટિવર્ષસહસ્રાણિ વિટ્કુણ્ડં ચ પ્રયાતિ સઃ

તાવન્ત્યેવ ચ વર્ષાણિ વિડ્ભોજી તત્ર તિષ્ઠતિ ।
ષષ્ટિવર્ષસહસ્રાણિ વિટ્કૃમિશ્ચ પુનર્ભુવિ

પરકીયતડાગે ચ તડાગં યઃ કરોતિ ચ ।
ઉત્સજેદ્દૈવદોષેણ મૂત્રકુણ્ડં પ્રયાતિ સઃ

તદ્રેણુમાનવર્ષં ચ તદ્‍ભોજી તત્ર તિષ્ઠતિ ।
પુનઃ પૂર્ણશતાબ્દં ચ સ વૃષો ભારતે ભવેત્

એકાકી મિષ્ટમશ્નાતિ શ્લેષ્મકુણ્ડં પ્રયાતિ ચ ।
પૂર્ણમબ્દશતં ચૈવ તદ્‍ભોજી તત્ર તિષ્ઠતિ

તતઃ પૂર્ણશતાબ્દં ચ સ પ્રેતો ભારતે ભવેત્ ।
શ્લેષ્મમૂત્રપરં ચૈવ પૂયં ભુઙ્‌ક્તે તતઃ શુચિઃ

પિતરં માતરં ચૈવ ગુરું ભાર્યાં સુતં સુતામ્ ।
યો ન પુષ્ણાત્યનાથં ચ ગરકુણ્ડં પ્રયાતિ સઃ

પૂર્ણમબ્દશતં ચૈવ તદ્‍ભોજી તત્ર તિષ્ઠતિ ।
તતો વ્રજેદ્‌ભૂતયોનિં શતવર્ષં તતઃ શુચિઃ

દૃષ્ટ્વાતિથિં વક્રચક્ષુઃ કરોતિ યો હિ માનવઃ ।
પિતૃદેવાસ્તસ્ય જલં ન ગૃહ્ણન્તિ ચ પાપિનઃ

યાનિ કાનિ ચ પાપાનિ બ્રહ્મહત્યાદિકાનિ ચ ।
ઇહૈવ લભતે ચાન્તે દૂષિકાકુણ્ડમાવ્રજેત્

પૂર્ણમબ્દશતં ચૈવ તદ્‍ભોજી તત્ર તિષ્ઠતિ ।
તતો વ્રજેદ્‌ભૂતયોનિં શતવર્ષં તતઃ શુચિઃ

દત્ત્વા દ્રવ્યં ચ વિપ્રાય ચાન્યસ્મૈ દીયતે યદિ ।
સ તિષ્ઠતિ વસાકુણ્ડે તદ્‍ભોજી શતવત્સરમ્

કૃકલાસો ભવેત્સોઽપિ ભારતે સપ્તજન્મસુ ।
તતો ભવેન્મહારૌદ્રો દરિદ્રોઽલ્પાયુરેવ ચ

પુમાંસં કામિની વાપિ કામિનીં વા પુમાનથ ।
યઃ શુક્રં પાયયત્યેવ શુક્રકુણ્ડં પ્રયાતિ સઃ

પૂર્ણમબ્દશતં ચૈવ તદ્‍ભોજી તત્ર તિષ્ઠતિ ।
કૃમિયોનિં શતાબ્દં ચ વ્રજેદ્‌ભૂત્વા તતઃ શુચિઃ

સન્તાડ્ય ચ ગુરું વિપ્રં રક્તપાતં ચ કારયેત્ ।
સ ચ તિષ્ઠત્યસૃક્કુણ્ડે તદ્‍ભોજી શતવત્સરમ્

તતો લભેદ્વ્યાઘ્રજન્મ સપ્તજન્મસુ ભારતે ।
તતઃ શુદ્ધિમવાપ્નોતિ માનવશ્ચ ક્રમેણ હ

યોઽશ્રુ તત્યાજ ગાયન્તં ભક્તં દૃષ્ટ્વા સગદ્‌ગદમ્ ।
શ્રીકૃષ્ણગુણસઙ્‌ગીતે હસત્યેવ હિ યો નરઃ

સ વસેદશ્રુકુણ્ડે ચ તદ્‍ભોજી શતવર્ષકમ્ ।
તતો ભવેચ્ચ ચાણ્ડાલસ્ત્રિજન્મનિ તતઃ શુચિઃ

કરોતિ શઠતા તદ્વન્નિત્યં સુહૃદિ યો નરઃ ।
કુણ્ડં ગાત્રમલાનાં ચ સ પ્રયાતિ શતાબ્દકમ્

તતઃ સ ગાર્દભીં યોનિમવાપ્નોતિ ત્રિજન્મનિ ।
ત્રિજન્મનિ ચ શાર્ગાલીં તતઃ શુદ્ધો ભવેદ્‌ ધ્રુવમ્

બધિરં યો હસત્યેવ નિન્દત્યેવાભિમાનતઃ ।
સ વસેત્કર્ણવિટ્કુણ્ડે તદ્‍ભોજી શતવત્સરમ્

તતો ભવેત્સ બધિરો દરિદ્રઃ સપ્તજન્મસુ ।
સપ્તજન્મન્યઙ્‌ગહીનસ્તતઃ શુદ્ધિં લભેદ્‌ ધ્રુવમ્

લોભાત્સ્વભરણાર્થાય જીવિનં હન્તિ યો નરઃ ।
મજ્જાકુણ્ડે વસેત્સોઽપિ તદ્‍ભોજી લક્ષવત્સરમ્

તતો ભવેચ્ચ શશકો મીનશ્ચ સપ્તજન્મસુ ।
ત્રિજન્મનિ વરાહશ્ચ કુક્કુટઃ સપ્તજન્મસુ

એણાદયશ્ચ કર્મભ્યસ્તતઃ શુદ્ધિં લભેદ્‌ ધ્રુવમ્ ।
સ્વકન્યાપાલનં કૃત્વા વિક્રીણાતિ ચ યો નરઃ

અર્થલોભાન્મહામૂઢો માંસકુણ્ડં પ્રયાતિ સઃ ।
કન્યાલોમપ્રમાણાબ્દં તદ્‍ભોજી તત્ર તિષ્ઠતિ

તસ્ય દણ્ડપ્રહારં ચ કુર્વન્તિ યમકિઙ્‌કરાઃ ।
માંસભારં મૂર્ધ્નિ કૃત્વા રક્તભારં લિહેત્ક્ષુધા

તતો હિ ભારતે પાપી કન્યાવિટ્કૃમિગો ભવેત્ ।
ષષ્ટિવર્ષસહસ્રાણિ વ્યાધશ્ચ સપ્તજન્મસુ

ત્રિજન્મનિ વરાહશ્ચ કુક્કુટઃ સપ્તજન્મસુ ।
મણ્ડૂકો હિ જલૌકાશ્ચ સપ્તજન્મસુ ભારતે

સપ્તજન્મસુ કાકશ્ચ તતઃ શુદ્ધિં લભેદ્‌ ધ્રુવમ્ ।
વ્રતાનામુપવાસાનાં શ્રાદ્ધાદીનાં ચ સઙ્‌ગમે

કરોતિ યઃ ક્ષૌરકર્મ સોઽશુચિઃ સર્વકર્મસુ ।
સ ચ તિષ્ઠતિ કુણ્ડે ચ નખાદીનાઞ્ચ સુન્દરિ

તદ્દૈવદિનમાનાબ્દં તદ્‍ભોજી દણ્ડતાડિતઃ ।
સકેશં પાર્થિવં લિઙ્‌ગં યો વાર્ચયતિ ભારતે

સ તિષ્ઠતિ કેશકુણ્ડે મૃદ્રેણુમાનવર્ષકમ્ ।
તદન્તે યાવનીં યોનિં પ્રયાતિ હરકોપતઃ

શતાબ્દાચ્છુદ્ધિમાપ્નોતિ રાક્ષસઃ સ ભવેદ્‌ ધ્રુવમ્ ।
પિતૄણાં યો વિષ્ણુપદે પિણ્ડં નૈવ દદાતિ ચ

સ ચ તિષ્ઠત્યસ્થિકુણ્ડે સ્વલોમાબ્દં મહોલ્બણે ।
તતઃ સુયોનિં સમ્પ્રાપ્ય કુખઞ્જઃ સપ્તજન્મસુ

ભવેન્મહાદરિદ્રશ્ચ તતઃ શુદ્ધો હિ દેહતઃ ।
યઃ સેવતે મહામૂઢો ગુર્વિણીં ચ સ્વકામિનીમ્

પ્રતપ્તે તામ્રકુણ્ડે ચ શતવર્ષં સ તિષ્ઠતિ ।
અવીરાન્નં ચ યો ભુઙ્‌ક્તે ઋતુસ્નાતાન્નમેવ ચ

લોહકુણ્ડે શતાબ્દં ચ સ ચ તિષ્ઠતિ તપ્તકે ।
સ વ્રજેદ્‌રજકીં યોનિં કાકાનાં સપ્તજન્મસુ

મહાવ્રણી દરિદ્રશ્ચ તતઃ શુદ્ધી ભવેન્નરઃ ।
યો હિ ચર્માક્તહસ્તેન દેવદ્રવ્યમુપસ્મૃશેત્

શતવર્ષપ્રમાણં ચ ચર્મકુણ્ડે સ તિષ્ઠતિ ।
યઃ શૂદ્રેણાભ્યનુજ્ઞાતો ભુઙ્ક્તે શૂદ્રાન્નમેવ ચ

સ ચ તપ્તસુરાકુણ્ડે શતાબ્દં તિષ્ઠતિ દ્વિજઃ ।
તતો ભવેચ્છૂદ્રયાજી બ્રાહ્મણઃ સપ્તજન્મસુ

શૂદ્રશ્રાદ્ધાન્નભોજી ચ તતઃ શુદ્ધો ભવેદ્‌ધ રુવમ્ ।
વાગ્દુષ્ટઃ કટુકો વાચા તાડયેત્સ્વામિનં સદા

તીક્ષ્ણકણ્ટકકુણ્ડે સ તદ્‍ભોજી તત્ર તિષ્ઠતિ ।
તાડિતો યમદૂતેન દણ્ડેન ચ ચતુર્ગુણમ્

તતઃ ઉચ્ચૈઃશ્રવાઃ સપ્તજન્મસ્વેવ તતઃ શુચિ ।
વિષેણ જીવનં હન્તિ નિર્દયો યો હિ માનવઃ

વિષકુણ્ડે ચ તદ્‍ભોજી સહસ્રાબ્દં ચ તિષ્ઠતિ ।
તતો ભવેન્નૃઘાતી ચ વ્રણી ચ શતજન્મસુ

સપ્તજન્મસુ કુષ્ઠી ચ તતઃ શુદ્ધો ભવેદ્‌ ધુવમ્ ।
દણ્ડેન તાડયેદ્‌ ગાં હિ વૃષઞ્ચ વૃષવાહકઃ

ભૃત્યદ્વારા સ્વતન્ત્રો વા પુણ્યક્ષેત્રે ચ ભારતે ।
પ્રતપ્તે તૈલકુણ્ડેઽગ્નૌ તિષ્ઠતિ સ્મ ચતુર્યુગમ્

ગવાં લોમપ્રમાણાબ્દં વૃષો ભવતિ તત્પરમ્ ।
કુન્તેન હન્તિ યો જીવં વહ્નિલોહેન હેલયા

કુન્તકુણ્ડે વસેત્સોઽપિ વર્ષાણામયુતં સતિ ।
તતઃ સુયોનિં સમ્પ્રાપ્ય ચોદરે વ્યાધિસંયુતઃ

જન્મનૈકેન ક્લેશેન તતઃ શુદ્ધો ભવેન્નરઃ ।
યો ભુઙ્‌ક્તે ચ વૃથા માંસં માંસલોભી દ્વિજાધમઃ

હરેરનૈવેદ્યભોજી કૃમિકુણ્ડં પ્રયાતિ સઃ ।
સ્વલોમમાનવર્ષં ચ તદ્‍ભોજી તત્ર તિષ્ઠતિ

તતો ભવેન્મ્લેચ્છજાતિસ્ત્રિજન્મનિ તતો દ્વિજઃ ।
બ્રાહ્મણઃ શૂદ્રયાજી ચ શૂદ્રશ્રાદ્ધાન્નભોજકઃ

શૂદ્રાણાં શવદાહી ચ પૂયકુણ્ડે વસેદ્‌ ધ્રુવમ્ ।
યાવલ્લોમપ્રમાણાબ્દં યમદણ્ડેન સુવ્રતે

તાડિતો યમદૂતેન તદ્‍ભોજી તત્ર તિષ્ઠતિ ।
તતો ભારતમાગત્ય સ શૂદ્રઃ સપ્તજન્મસુ

મહારોગી દરિદ્રશ્ચ બધિરો મૂક એવ ચ ।
કૃષ્ણં પદ્મં ચ કે યસ્ય તં સર્પં હન્તિ યો નરઃ

સ્વલોમમાનવર્ષં ચ સર્પકુણ્ડં પ્રયાતિ સઃ ।
સર્પેણ ભક્ષિતઃ સોઽથ યમદૂતેન તાડિતઃ

વસેચ્ચ સર્પવિડ્ભોજી તતઃ સર્પો ભવેદ્‌ ધ્રુવમ્ ।
તતો ભવેન્માનવશ્ચ સ્વલ્પાયુર્દદ્રુસંયુતઃ

મહાક્લેશેન તન્મૃત્યુઃ સર્પેણ ભક્ષિતાદ્‌ ધ્રુવમ્ ।
વિધિપ્રદત્તજીવ્યાંશ્ચ ક્ષુદ્રજન્તૂંશ્ચ હન્તિ યઃ

સ દંશમશયોઃ કુણ્ડે જન્તુમાનાબ્દમેવ ચ ।
દિવાનિશં ભક્ષિતસ્તૈરનાહારશ્ચ શબ્દવાન્

હસ્તપાદાદિબદ્ધશ્ચ યમદૂતેન તાડિતઃ ।
તતો ભવેત્ક્ષુદ્રજન્તુર્જાતિશ્ચ યાવની ભવેત્

તતો ભવેન્માનવશ્ચ સોઽઙ્‌ગહીનસ્તતઃ શુચિઃ ।
યો મૂઢો મધુમશ્નાતિ હત્વા ચ મધુમક્ષિકાઃ

સ એવ ગારલે કુણ્ડે જીવમાનાબ્દકં વસેત્ ।
ભક્ષિતો ગરલૈર્દગ્ધો યમદૂતેન તાડિતઃ

તતો હિ મક્ષિકાજાતિસ્તતઃ શુદ્ધો ભવેન્નરઃ ।
દણ્ડં કરોત્યદણ્ડ્યે ચ વિપ્રે દણ્ડં કરોતિ ચ

સ કુણ્ડં વજ્રદંષ્ટ્રાણાં કીટાનાં યાતિ સત્વરમ્ ।
સ તલ્લોમપ્રમાણાબ્દં તત્ર તિષ્ઠત્યહર્નિશમ્

શબ્દકૃદ્‍ભક્ષિતસ્તૈસ્તુ યમદૂતેન તાડિતઃ ।
કરોતિ રોદનં ભદ્રે હાહાકારં ક્ષણે ક્ષણે

પુનઃ સૂકરયોનૌ ચ જાયતે સપ્તજન્મસુ ।
ત્રિજન્મનિ કાકયોનૌ તતઃ શુદ્ધો ભવેન્નરઃ

અર્થલોભેન યો મૂઢઃ પ્રજાદણ્ડં કરોતિ સઃ ।
વૃશ્ચિકાનાં ચ કુણ્ડં ચ તલ્લોમાબ્દં વસેદ્‌ ધ્રુવમ્

તતો વૃશ્ચિકજાતિશ્ચ સપ્તજન્મસુ ભારતે ।
તતો નરશ્ચાઙ્‌ગહીનો વ્યાધિશુદ્ધો ભવેદ્‌ ધ્રુવમ્

બ્રાહ્મણઃ શસ્ત્રધારી યો હ્યન્યેષાં ધાવકો ભવેત્ ।
સન્ધ્યાહીનશ્ચ યો વિપ્રો હરિભક્તિવિહીનકઃ

સ તિષ્ઠતિ સ્વલોમાબ્દં કુણ્ડેષુ ચ શરાદિષુ ।
વિદ્ધઃ શરાદિભિઃ શશ્વત્તતઃ શુદ્ધો ભવેન્નરઃ

કારાગારે સાન્ધકારે પ્રણિહન્તિ પ્રજાશ્ચ યઃ ।
પ્રમત્તઃ સ્વસ્ય દોષેણ ગોલકુણ્ડં પ્રયાતિ સઃ

સ પઙ્‌કતપ્તતોયાક્તં સાન્ધકારં ભયઙ્‌કરમ્ ।
તીક્ષ્ણદંષ્ટ્રૈશ્ચ કીટૈશ્ચ સંયુક્તં ગોલકુણ્ડકમ્

કીટૈર્વિદ્ધો વસેત્તત્ર પ્રજાલોમાબ્દમેવ ચ ।
તતો ભવેત્પ્રજાભૃત્યસ્તતઃ શુદ્ધો ભવેત્ક્રમાત્

સરોવરાદુત્થિતાંશ્ચ નક્રાદીન્હન્તિ યો નરઃ ।
નક્રકણ્ટકમાનાબ્દં નક્રકુણ્ડં પ્રયાતિ સઃ

તતો નક્રાદિજાતીયો ભવેન્નક્રાદિષુ ધ્રુવમ્ ।
તતઃ સદ્યો વિશુદ્ધો હિ દણ્ડેનૈવ પુનઃ પુનઃ

વક્ષઃ શ્રોણીસ્તનાસ્યઞ્ચ યઃ પશ્યતિ પરસ્ત્રિયાઃ ।
કામેન કામુકો યો હિ પુણ્યક્ષેત્રે ચ ભારતે

સ વસેત્કાકકુણ્ડે ચ કાકૈઃ સંચૂર્ણલોચનઃ ।
તતઃ સ્વલોમમાનાબ્દં ભવેદ્દગ્ધસ્ત્રિજન્મનિ

સ્વર્ણસ્તેયી ચ યો મૂઢો ભારતે સુરવિપ્રયોઃ ।
સ ચ મન્થાનકુણ્ડે વૈ સ્વલોમાબ્દં વસેદ્‌ ધ્રુવમ્

તાડિતો યમદૂતેન મન્થાનૈશ્છન્નલોચનઃ ।
તદ્વિડ્ભોજી ચ તત્રૈવ તતશ્ચાન્ધસ્ત્રિજન્મનિ

સપ્તજન્મ દરિદ્રશ્ચ મહાક્રૂરશ્ચ પાતકી ।
ભારતે સ્વર્ણકારશ્ચ સ ચ સ્વર્ણવણિક્ તતઃ

યો ભારતે તામ્રચૌરો લોહચૌરશ્ચ સુન્દરિ ।
સ ચ સ્વલોમમાનાબ્દં બીજકુણ્ડં પ્રયાતિ સઃ

તત્રૈવ બીજવિડ્ભોજી બીજૈશ્ચ છન્નલોચનઃ ।
તાડિતો યમદૂતેન તતઃ શુદ્ધો ભવેન્નરઃ

ભારતે દેવચૌરશ્ચ દેવદ્રવ્યાપહારકઃ ।
સ દુસ્તરે વજ્રકુણ્ડે સ્વલોમાબ્દં વસેદ્‌ ધ્રુવમ્

દેહદગ્ધોઽપિ તદ્વજ્રૈરનાહારશ્ચ શબ્દકૃત્ ।
તાડિતો યમદૂતૈશ્ચ તતઃ શુદ્ધો ભવેન્નરઃ

રૌપ્યગવ્યાંશુકાનાં ચ યશ્ચૌરઃ સુરવિપ્રયોઃ ।
તપ્તપાષાણકુણ્ડેચ સ્વલોમાબ્દં વસેદ્‌ ધ્રુવમ્

ત્રિજન્મનિ ચ કંસોઽપિ શ્વેતરૂપસ્ત્રિજન્મનિ ।
જન્મૈકં શ્વેતચિહ્નશ્ચ તતોઽન્યે શ્વેતપક્ષિણઃ

તતો રક્તવિકારી ચ શૂલી વૈ માનવો ભવેત્ ।
સપ્તજન્મસુ ચાલ્પાયુસ્તતઃ શુદ્ધો ભવેન્નરઃ

રૈતં કાંસ્યમયં પાત્રં યો હરેદ્દેવવિપ્રયોઃ ।
તીક્ષ્ણપાષાણકુણ્ડે ચ સ્વલોમાબ્દં વસેન્નરઃ

સ ભવેદશ્વજાતિશ્ચ ભારતે સપ્તજન્મસુ ।
તતોઽધિકાઙ્‌ગજાતિશ્ચ પાદરોગી તતઃ શુચિઃ

પુંશ્ચલ્યન્નં ચ યો ભદ્રે પુંશ્ચલીજીવ્યજીવિનઃ ।
સ્વલોમમાનવર્ષં ચ લાલાકુણ્ડે વસેદ્‌ ધ્રુવમ્

તાડિતો યમદૂતેન તદ્‍ભોજી તત્ર દુઃખિતઃ ।
તતશ્ચક્ષુઃશૂલરોગી તતઃ શુદ્ધઃ ક્રમેણ સઃ

મ્લેચ્છસેવી મસીજીવી યો વિપ્રો ભારતે ભુવિ ।
વસેત્સ્વલોમમાનાબ્દં મસીકુણ્ડે સ દુઃખભાક્

તાડિતો યમદૂતેન તદ્‍ભોજી તત્ર તિષ્ઠતિ ।
તતસ્ત્રિજન્મનિ ભવેત્કૃષ્ણવર્ણઃ પશુઃ સતિ

ત્રિજન્મનિ ભવેચ્છાગઃ કૃષ્ણવર્ણસ્ત્રિજન્મનિ ।
તતઃ સ તાલવૃક્ષશ્ચ તતઃ શુદ્ધો ભવેન્નરઃ

ધાન્યાદિસસ્યં તામ્બૂલં યો હરેત્સુરવિપ્રયોઃ ।
આસનં ચ તથા તલ્પં ચૂર્ણકુણ્ડે પ્રયાતિ સઃ

શતાબ્દં તત્ર નિવસેદ્યમદૂતેન તાડિતઃ ।
તતો ભવેન્મેષજાતિઃ કુક્કુટશ્ચ ત્રિજન્મનિ

તતો ભવેદ્વાનરશ્ચ કાસવ્યાધિયુતો ભુવિ ।
વંશહીનો દરિદ્રશ્ચ સ્વલ્પાયુશ્ચ તતઃ શુચિઃ

કરોતિ ચક્રં વિપ્રાણાં હૃત્વા દ્રવ્યં ચ યો જનઃ ।
સ વસેચ્ચક્રકુણ્ડે ચ શતાબ્દં દણ્ડતાડિતઃ

તતો ભવેન્માનવશ્ચ તૈલકારસ્ત્રિજન્મનિ ।
વ્યાધિયુક્તો ભવેદ્‌રોગી વંશહીનસ્તતઃ શુચિઃ

ગોધનેષુ ચ વિપ્રેષુ કરોતિ વક્રતાં પુમાન્ ।
પ્રયાતિ વક્રકુણ્ડં સ તિષ્ઠેદ્યુગશતં સતિ

તતો ભવેત્સ વક્રાઙ્‌ગો હીનાઙ્‌ગઃ સપ્તજન્મનિ ।
દરિદ્રો વંશહીનશ્ચ ભાર્યાહીનસ્તતઃ શુચિઃ

તતો ભવેદ્‌ ગૃધ્રજન્મા ત્રિજન્મનિ ચ સૂકરઃ ।
ત્રિજન્મનિ બિડાલશ્ચ મયૂરશ્ચ ત્રિજન્મનિ

નિષિદ્ધં કૂર્મમાંસં ચ બ્રાહ્મણો યો હિ ભક્ષતિ ।
કૂર્મકુણ્ડે વસેત્સોઽપિ શતાબ્દં કૂર્મભક્ષિતઃ

તતો ભવેત્કૂર્મજન્મા ત્રિજન્મનિ ચ સૂકરઃ ।
ત્રિજન્મનિ બિડાલશ્ચ મયૂરશ્ચ તતઃ શુચિઃ

ઘૃતં તૈલાદિકં ચૈવ યો હરેત્સુરવિપ્રયોઃ ।
સ યાતિ જ્વાલાકુણ્ડં ચ ભસ્મકુણ્ડં ચ પાતકી

તત્ર સ્થિત્વા શતાબ્દં ચ સ ભવેત્તૈલપાચિતઃ ।
સપ્તજન્મનિ મત્સ્યશ્ચ મૂષકશ્ચ તતઃ શુચિઃ

સુગન્ધિતૈલં ધાત્રીં વા ગન્ધદ્રવ્યાન્યદેવ વા ।
ભારતે પુણ્યવર્ષે ચ યો હરેત્સુરવિપ્રયોઃ

સ વસેદ્દગ્ધકુણ્ડે ચ ભવેદ્દગ્ધો દિવાનિશમ્ ।
સ્વલોમમાનવર્ષં ચ તતો દુર્ગન્ધિકો ભવેત્

દુર્ગન્ધિકઃ સપ્તજન્મ મૃગનાભિસ્ત્રિજન્મનિ ।
સપ્તજન્મસુ મન્થાનસ્તતો હિ માનવો ભવેત્

બલેનૈવ છલેનૈવ હિંસારૂપેણ વા સતિ ।
બલિષ્ઠશ્ચ હરેદ્‌ભૂમિં ભારતે પરપૈતૃકીમ્

સ વસેત્તપ્તસૂચિં ચ ભવેત્તાપી દિવાનિશમ્ ।
તપ્તતૈલે યથા જીવો દગ્ધો ભવતિ સન્તતમ્

ભસ્મસાન્ન ભવત્યેવ ભોગે દેહી ન નશ્યતિ ।
સપ્તમન્વન્તરં પાપી સન્તપ્તસ્તત્ર તિષ્ઠતિ

શબ્દં કરોત્યનાહારો યમદૂતેન તાડિતઃ ।
ષષ્ટિવર્ષસહસ્રાણિ વિટ્કૃમિશ્ચ ભવેત્તતઃ

તતો ભવેદ્‌ભૂમિહીનો દરિદ્રશ્ચ તતઃ શુચિઃ ।
તતઃ સ્વયોનિં સમ્પ્રાપ્ય શુભં કર્માચરેત્પુનઃ

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં નવમસ્કન્ધે
નાનાકર્મવિપાકફલકથનં નામ ત્રયસ્ત્રિંશોઽધ્યાયઃ