Devi Bhagavata Purana · Chapter 9.30

yamena karmavipākakathanam
sāvitryuvāca
prayānti svargamanyaṃ ca yenaiva karmaṇā yama /
mānavāḥ puṇyavantaśca tanme vyākhyātumarhasi

dharmarāja uvāca
annadānaṃ ca viprāya yaḥ karoti ca bhārate /
annapramāṇavarṣaṃ ca śivaloke mahīyate

annadānaṃ mahādānamanyebhyo'pi karoti yaḥ /
annadānapramāṇaṃ ca śivaloke mahīyate

annadānātparaṃ dānaṃ na bhūtaṃ na bhaviṣyati /
nātra pātraparīkṣā syānna kālaniyamaḥ kvacit

devebhyo brāhmaṇebhyo vā dadāti cāsanaṃ yadi /
mahīyate viṣṇuloke varṣāṇāmayutaṃ sati

yo dadāti ca viprāya divyāṃ dhenuṃ payasvinīm /
tallomamānavarṣaṃ ca viṣṇuloke mahīyate

caturguṇaṃ puṇyadine tīrthe śataguṇaṃ phalam /
dānaṃ nārāyaṇakṣetraṃ phalaṃ koṭiguṇaṃ bhavet

gāṃ yo dadāti viprāya bhārate bhaktipūrvakam /
varṣāṇāmayutaṃ caiva candraloke mahīyate

yaścobhayamukhīdānaṃ karoti brāhmaṇāya ca /
tallomamānavarṣaṃ ca viṣṇuloke mahīyate

yo dadāti brāhmaṇāya śvetacchatraṃ manoharam /
varṣāṇāmayutaṃ so'pi modate varuṇālaye

viprāya pīḍitāṅ‌gāya vastrayugmaṃ dadāti ca /
mahīyate vāyuloke varṣāṇāmayutaṃ sati

yo dadāti brāhmaṇāya śālagrāmaṃ savastrakam /
mahīyate sa vaikuṇṭhe yāvaccandradivākarau

yo dadāti brāhmaṇāya divyāṃ śayyāṃ manoharām /
mahīyate candraloke yāvaccandradivākarau

yo dadāti pradīpaṃ ca devebhyo brāhmaṇāya ca /
yāvanmanvantaraṃ so'pi vahniloke mahīyate

karoti gajadānaṃ ca yadi viprāya bhārate /
yāvadindro narastāvadindrasyārdhāsane vaset

bhārate yo'śvadānaṃ ca karoti brāhmaṇāya ca /
modate vāruṇe loke yāvadindrāścaturdaśa

prakṛṣṭāṃ śibikāṃ yo hi dadāti brāhmaṇāya ca /
modate vāruṇe loke yāvadindrāścaturdaśa

prakṛṣṭāṃ vāṭikā yo hi dadāti brāhmaṇāya ca /
mahīyate vāyuloke yāvanmanvantaraṃ sati

yo dadāti ca viprāya vyajanaṃ śvetacāmaram /
mahīyate vāyuloke varṣāṇāmayutaṃ dhruvam

dhānyaṃ rat‍naṃ yo dadāti cirañjīvī bhavetsudhīḥ /
dātā grahītā tau dvau ca dhruvaṃ vaikuṇṭhagāminau

satataṃ śrīharernāma bhārate yo japennaraḥ /
sa eva cirajīvī ca tato mṛtyuḥ palāyate

yo naro bhārate varṣe dolanaṃ kārayetsudhīḥ /
pūrṇimārajanīśeṣe jīvanmukto bhavennaraḥ

ihaloke sukhaṃ bhuktvā yātyante viṣṇumandiram /
niścitaṃ nivasettatra śatamanvantarāvadhi

phalamuttaraphalgunyāṃ tato'pi dviguṇaṃ bhavet /
kalpāntajīvī sa bhavedityāha kamalod‍bhavaḥ

tiladānaṃ brāhmaṇāya yaḥ karoti ca bhārate /
tilapramāṇavarṣaṃ ca modate śivamandire

tataḥ suyoniṃ samprāpya cirañjīvī bhavetsukhī /
tāmrapātrasya dānena dviguṇaṃ ca phalaṃ labhet

sālaṃkṛtāṃ ca bhogyāṃ ca savastrāṃ sundarīṃ priyām /
yo dadāti brāhmaṇāya bhārate ca pativratām

mahīyate candraloke yāvadindrāścaturdaśa /
tatra svarveśyayā sārdhaṃ modate ca divāniśam

tato gandharvaloke ca varṣāṇāmayutaṃ dhruvam /
divāniśaṃ kautukena corvaśyā saha modate

tato janmasahasraṃ ca prāpnoti sundarīṃ priyām /
satīṃ saubhāgyayuktāṃ ca komalāṃ priyavādinīm

pradadāti phalaṃ cāru brāhmaṇāya ca yo naraḥ /
phalapramāṇavarṣaṃ ca śakraloke mahīyate

punaḥ suyoniṃ samprāpya labhate sutamuttamam /
saphalānāṃ ca vṛkṣāṇāṃ sahasraṃ ca praśaṃsitam

kevalaṃ phaladānaṃ vā brāhmaṇāya dadāti ca /
suciraṃ svargavāsaṃ ca kṛtvā yāti ca bhārate

nānādravyasamāyuktaṃ nānāsasyasamanvitam /
dadāti yaśca viprāya bhārate vipulaṃ gṛham

suraloke vasetso'pi yāvanmanvantaraṃ śatam /
tataḥ suyoniṃ samprāpya sa mahādhanavānbhavet

yo naraḥ sasyasaṃyuktāṃ bhūmiṃ ca rucirāṃ sati /
dadāti bhaktyā viprāya puṇyakṣetre ca bhārate

mahīyate ca vaikuṇṭhe manvantaraśataṃ dhruvam /
punaḥ suyoniṃ samprāpya mahāṃśca bhūmipo bhavet

taṃ na tyajati bhūmiśca janmanāṃ śatakaṃ param /
śrīmāṃśca dhanavāṃścaiva putravāṃśca prajeśvaraḥ

yo vrajaṃ ca prakṛṣṭaṃ ca grāmaṃ dadyād‌ dvijāya ca /
lakṣamanvantaraṃ caiva vaikuṇṭhe sa mahīyate

punaḥ suyoniṃ samprāpya grāmalakṣasamanvitam /
na jahāti ca taṃ pṛthvī janmanāṃ lakṣameva ca

suprajaṃ ca prakṛṣṭaṃ ca pakvasasyasamanvitam /
nānāpuṣkariṇīvṛkṣaphalavallīsamanvitam

nagaraṃ yaśca viprāya dadāti bhārate bhuvi /
mahīyate sa kailāse daśalakṣendrakālakam

punaḥ suyoniṃ samprāpya rājendro bhārate bhavet /
nagarāṇāṃ ca niyutaṃ sa labhennātra saṃśayaḥ

dharā taṃ na jahātyeva janmanāmayutaṃ dhruvam /
paramaiśvaryaniyuto bhavedeva mahītale

nagarāṇāṃ ca śatakaṃ deśaṃ yo hi dvijātaye /
suprakṛṣṭaṃ madhyakṛṣṭaṃ prajāyuktaṃ dadāti ca

vāpītaḍāgasaṃyuktaṃ nānāvṛkṣasamanvitam /
mahīyate sa vaikuṇṭhe koṭimanvantarāvadhi

punaḥ suyoniṃ samprāpya jambudvīpapatirbhavet /
paramaiśvaryasaṃyukto yathā śakrastathā bhuvi

mahī taṃ na jahātyeva janmanāṃ koṭimeva ca /
kalpāntajīvī sa bhaved‌rājarājeśvaro mahān

svādhikāraṃ samagraṃ ca yo dadāti dvijātaye /
caturguṇaṃ phalaṃ cānte bhavettasya na saṃśayaḥ

jambudvīpaṃ yo dadāti brāhmaṇāya tapasvine /
phalaṃ śataguṇaṃ cānte bhavettasya na saṃśayaḥ

jambudvīpamahīdātuḥ sarvatīrthāni sevituḥ /
sarveṣāṃ tapasāṃ kartuḥ sarveṣāṃ vāsakāriṇaḥ

sarvadānapradātuśca sarvasiddheśvarasya ca /
astyeva punarāvṛttirna bhaktasya maheśituḥ

asaṃkhyabrahmaṇāṃ pātaṃ paśyanti bhuvaneśituḥ /
nivasanti maṇidvīpe śrīdevyāḥ parame pade

devīmantropāsakāśca vihāya mānavīṃ tanum /
vibhūtiṃ divyarūpaṃ ca janmamṛtyujarāharam

labdhvā devyāśca sārūpyaṃ devīsevāṃ ca kurvate /
paśyanti te maṇidvīpe sakhaṇḍaṃ lokasaṃkṣayam

naśyanti devāḥ siddhāśca viśvāni nikhilāni ca /
devībhaktā na naśyanti janmamṛtyujarāharāḥ

kārtike tulasīdānaṃ karoti haraye ca yaḥ /
yugatrayapramāṇaṃ ca modate harimandire

punaḥ suyoniṃ samprāpya haribhaktiṃ labhed‌ dhruvam /
jitendriyāṇāṃ pravaraḥ sa bhaved‍bhārate bhuvi

madhye yaḥ snāti gaṅ‌gāyāmaruṇodayakālataḥ /
yugaṣaṣṭisahasrāṇi modate harimandire

punaḥ suyoniṃ samprāpya viṣṇumantraṃ labhed‌ dhruvam /
tyaktvā ca mānuṣaṃ dehaṃ punaryāti hareḥ padam

nāsti tatpunarāvṛttirvaikuṇṭhācca mahītale /
karoti haridāsyaṃ ca tathā sārūpyameva ca

nityasnāyī ca gaṅ‌gāyāṃ sa pūtaḥ sūryavad‌bhuvi /
pade pade'śvamedhasya labhate niścitaṃ phalam

tasyaiva pādarajasā sadyaḥpūtā vasundharā /
modate sa ca vaikuṇṭhe yāvaccandradivākarau

punaḥ suyoniṃ samprāpya haribhaktiṃ labhed‌ dhruvam /
jīvanmukto'titejasvī tapasvipravaro bhavet

svadharmanirataḥ śuddho vidvāṃśca sa jitendriyaḥ /
mīnakarkaṭayormadhye gāḍhaṃ tapati bhāskaraḥ

bhārate yo dadātyeva jalameva suvāsitam /
sa modate ca kailāse yāvadindrāścaturdaśa

punaḥ suyoniṃ samprāpya rūpavāṃśca sukhī bhavet /
śivabhaktaśca tejasvī vedavedāṅ‌gapāragaḥ

vaiśākhe saktudānaṃ ca yaḥ karoti dvijātaye /
saktureṇupramāṇābdaṃ modate śivamandire

karoti bhārate yo hi kṛṣṇajanmāṣṭamīvratam /
śatajanmakṛtaṃ pāpaṃ mucyate nātra saṃśayaḥ

vaikuṇṭhe modate so'pi yāvadindrāścaturdaśa /
punaḥ suyoniṃ samprāpya kṛṣṇe bhaktiṃlabhed‌ dhruvam

ihaiva bhārate varṣe śivarātriṃ karoti yaḥ /
modate śivaloke sa saptamanvantarāvadhi

śivāya śivarātrau ca bilvapatraṃ dadāti yaḥ /
patramānayugaṃ tatra modate śivamandire

punaḥ suyoniṃ samprāpya śivabhaktiṃ labhed‌dhruvam /
vidyāvānputravāñchrīmān prajāvānbhūmimānbhavet

caitramāse'thavā māghe śaṅ‌karaṃ yo'rcayed‌vratī /
karoti nartanaṃ bhaktyā vetrapāṇirdivāniśam

māsaṃ vāpyardhamāsaṃ vā daśa sapta dināni ca /
dinamānayugaṃ so'pi śivaloke mahīyate

śrīrāmanavamīṃ yo hi karoti bhārate pumān /
saptamanvantaraṃ yāvanmodate viṣṇumandire

punaḥ suyoniṃ samprāpya rāmabhaktiṃ labhed‌dhruvam /
jitendriyāṇāṃ pravaro mahāṃśca dhanavānbhavet

śāradīyāṃ mahāpūjāṃ prakṛteryaḥ karoti ca /
mahiṣaiśchāgalairmeṣaiḥ khaḍgairbhekādibhiḥ sati

naivedyairupahāraiśca dhūpadīpādibhistathā /
nṛtyagītādibhirvādyairnānākautukamaṅ‌galam

śivaloke vasetso'pi saptamanvantarāvadhi /
punaḥ suyoniṃ samprāpya naro buddhiṃ ca nirmalām

atulāṃ śriyamāpnoti putrapautravivardhanīm /
mahāprabhāvayuktaśca gajavājisamanvitaḥ

rājarājeśvaraḥ so'pi bhavedeva na saṃśayaḥ /
tataḥ śuklāṣṭamīṃ prāpya mahālakṣmīṃ ca yo'rcayet

nityaṃ bhaktyā pakṣamekaṃ puṇyakṣetre ca bhārate /
dattvā tasyai prakṛṣṭāni copacārāṇi ṣoḍaśa

goloke ca vasetso'pi yāvadindrāścaturdaśa /
punaḥ suyoniṃ samprāpya rājarājeśvaro bhavet

kārtikīpūrṇimāyāṃ ca kṛtvā tu rāsamaṇḍalam /
gopānāṃ śatakaṃ kṛtvā gopīnāṃ śatakaṃ tathā

śilāyāṃ pratimāyāṃ ca śrīkṛṣṇaṃ rādhayā saha /
bhārate pūjayed‍bhaktyā copacārāṇi ṣoḍaśa

goloke vasate so'pi yāvadvai brahmaṇo vayaḥ /
bhārataṃ punarāgatya kṛṣṇe bhaktiṃ labhed‌dṛḍhām

krameṇa sudṛḍhāṃ bhaktiṃ labdhvā mantraṃ hareraho /
dehaṃ tyaktvā ca golokaṃ punareva prayāti saḥ

tataḥ kṛṣṇasya sārūpyaṃ pārṣadapravaro bhavet /
punastatpatanaṃ nāsti jarāmṛtyuharo bhavet

śuklāṃ vāpyathavā kṛṣṇāṃ karotyekādaśīṃ ca yaḥ /
vaikuṇṭhe modate so'pi yāvadvai brahmaṇo vayaḥ

bhārate punarāgatya kṛṣṇabhaktiṃ labhed‌dhruvam /
krameṇa bhaktiṃ sudṛḍhāṃ karotyekāṃ hareraho

dehaṃ tyaktvā ca golokaṃ punareva prayāti saḥ /
tataḥ kṛṣṇasya sārūpyaṃ samprāpya pārṣado bhavet

punastatpatanaṃ nāsti jarāmṛtyuharo bhavet /
bhādre ca śukladvādaśyāṃ yaḥ śakraṃ pūjayennaraḥ

ṣaṣṭivarṣasahasrāṇi śakraloke mahīyate /
ravivāre ca saṃkrāntyāṃ saptamyāṃ śuklapakṣake

sampūjyārkaṃ haviṣyānnaṃ yaḥ karoti ca bhārate /
mahīyate so'rkaloke yāvadindrāścaturdaśa

bhārataṃ punarāgatya cārogī śrīyuto bhavet /
jyeṣṭhakṛṣṇacaturdaśyāṃ sāvitrīṃ yo hi pūjayet

mahīyate brahmaloke saptamanvantarāvadhi /
punarmahīṃ samāgatya śrīmānatulavikramaḥ

cirajīvī bhavetso'pi jñānavānsampadā yutaḥ /
māghasya śuklapañcamyāṃ pūjayedyaḥ sarasvatīm

saṃyato bhaktito dattvā copacārāṇi ṣoḍaśa /
mahīyate maṇidvīpe yāvadbrahma divāniśam

samprāpya ca punarjanma sa bhavetkavipaṇḍitaḥ /
gāṃ suvarṇādikaṃ yo hi brāhmaṇāya dadāti ca

nityaṃ jīvanaparyantaṃ bhaktiyuktaśca bhārate /
gavāṃ lomapramāṇābdaṃ dviguṇaṃ viṣṇumandire

modate hariṇā sārdhaṃ krīḍākautukamaṅ‌galaiḥ /
tadante punarāgatya rājarājeśvaro bhavet

śrīmāṃśca putravānvidvāñjñānavānsarvataḥ sukhī /
bhojayedyo'pi miṣṭānnaṃ brāhmaṇebhyaśca bhārate

vipralomapramāṇābdaṃ modate viṣṇumandire /
tataḥ punarihāgatya sukhī ca dhanavānbhavet

vidvānsucirajīvī ca śrīmānatulavikramaḥ /
yo vakti vā dadātyeva harernāmāni bhārate

yugaṃ nāma pramāṇaṃ ca viṣṇuloke mahīyate /
tataḥ punarihāgatya sa sukhī dhanavānbhavet

yadi nārāyaṇakṣetre phalaṃ koṭiguṇaṃ bhavet /
nāmnā koṭiṃ hareryo hi kṣetre nārāyaṇe japet

sarvapāpavinirmukto jīvanmukto bhaved‌dhruvam /
na labhetsa punarjanma vaikuṇṭhe sa mahīyate

labhedviṣṇośca sārūpyaṃ na tasya patanaṃ bhavet /
viṣṇubhaktiṃ labhetso'pi viṣṇusārūpyamāpnuyāt

śivaṃ yaḥ pūjayennityaṃ kṛtvā liṅ‌gaṃ ca pārthivam /
yāvajjīvanaparyantaṃ sa yāti śivamandiram

mṛdo reṇupramāṇābdaṃ śivaloke mahīyate /
tataḥ punarihāgatya rājendro bhārate bhavet

śilāṃ ca pūjayennityaṃ śilātoyaṃ ca bhakṣati /
mahīyate ca vaikuṇṭhe yāvadvai brahmaṇaḥ śatam

tato labdhvā punarjanma haribhaktiṃ ca durlabhām /
mahīyate viṣṇuloke na tasya patanaṃ bhavet

tapāṃsi caiva sarvāṇi vratāni nikhilāni ca /
kṛtvā tiṣṭhati vaikuṇṭhe yāvadindrāścaturdaśa

tato labdhvā punarjanma rājendro bhārate bhavet /
tato mukto bhavetpaścātpunarjanma na vidyate

yaḥ snātvā sarvatīrtheṣu bhuvaḥ kṛtvā pradakṣiṇām /
sa tu nirvāṇatāṃ yāti na ca janma bhaved‌bhuvi

puṇyakṣetre bhārate ca yo'śvamedhaṃ karoti ca /
aśvalomamitābdaṃ ca śakrasyārdhāsanaṃ bhajet

caturguṇaṃ rājasūye phalamāpnoti mānavaḥ /
sarvebhyo'pi makhebhyo hi paro devīmakhaḥ smṛtaḥ

viṣṇunā ca kṛtaḥ pūrvaṃ brahmaṇā ca varānane /
śaṅ‌kareṇa maheśena tripurāsuranāśane

śaktiyajñaḥ pradhānaśca sarvayajñeṣu sundari /
nānena sadṛśo yajñastriṣu lokeṣu vidyate

dakṣeṇa ca kṛtaḥ pūrvaṃ mahānsaṃvādasaṃyutaḥ /
babhūva kalaho yatra dakṣaśaṅ‌karayoḥ sati

śepuśca nandinaṃ viprā nandī viprāṃśca kopataḥ /
yaddhetordakṣayajñaṃ ca babhañja candraśekharaḥ

cakāra devīyajñaṃ sa purā dakṣaḥ prajāpatiḥ /
dharmaśca kaśyapaścaiva śeṣaścāpi ca kardamaḥ

svāyambhuvo manuścaiva tatputraśca priyavrataḥ /
śivaḥ sanatkumāraśca kapilaśca dhruvastathā

rājasūyasahasrāṇāṃ phalamāpnoti niścitam /
devīyajñātparo yajño nāsti vede phalapradaḥ

varṣāṇāṃ śatajīvī ca jīvanmukto bhaved‌dhruvam /
jñānena tejasā caiva viṣṇutulyo bhavediha

devānāṃ ca yathā viṣṇurvaiṣṇavānāṃ ca nārada /
śāstrāṇāṃ ca yathā vedā varṇānāṃ brāhmaṇo yathā

tīrthānāṃ ca yathā gaṅ‌gā pavitrāṇāṃ śivo yathā /
ekādaśī vratānāṃ ca puṣpāṇāṃ tulasī yathā

nakṣatrāṇāṃ yathā candraḥ pakṣiṇāṃ garuḍo yathā /
yathā strīṇāṃ ca prakṛtī rādhā vāṇī vasundharā

śīghrāṇāṃ cendriyāṇāṃ ca cañcalānāṃ mano yathā /
prajāpatīnāṃ brahmā ca prajānāṃ ca prajāpatiḥ

vṛndāvanaṃ vanānāṃ ca varṣāṇāṃ bhārataṃ yathā /
śrīmatāṃ ca yathā śrīśca viduṣāṃ ca sarasvatī

pativratānāṃ durgā ca saubhāgyānāṃ ca rādhikā /
devīyajñastathā vatse sarvayajñeṣu bhāmini

aśvamedhaśatenaiva śakratvaṃ ca labhed‌dhruvam /
sahasreṇa viṣṇupadaṃ samprāptaḥ pṛthureva ca

snānaṃ ca sarvatīrthānāṃ sarvayajñeṣu dīkṣaṇam /
sarveṣāṃ ca vratānāṃ ca tapasāṃ phalameva ca

pāṭhe caturṇāṃ vedānāṃ prādakṣiṇyaṃ bhuvastathā /
phalabhūtamidaṃ sarvaṃ muktidaṃ śaktisevanam

purāṇeṣu ca vedeṣu cetihāseṣu sarvataḥ /
nirūpitaṃ sārabhūtaṃ devīpādāmbujārcanam

tadvarṇanaṃ ca taddhyānaṃ tannāmaguṇakīrtanam /
tatstotrasmaraṇaṃ caiva vandanaṃ japameva ca

tatpādodakanaivedyaṃ bhakṣaṇaṃ nityameva ca /
sarvasammatamityevaṃ sarvepsitamidaṃ sati

bhaja nityaṃ paraṃ brahma nirguṇaṃ prakṛtiṃ parām /
gṛhāṇa svāminaṃ vatse sukhaṃ vasa ca mandire

ayaṃ te kathitaḥ karmavipāko maṅ‌galo nṛṇām /
sarvepsitaḥ sarvamatastattvajñānapradaḥ paraḥ

iti śrīmaddevībhāgavate mahāpurāṇe'ṣṭādaśasāhasryā saṃhitāyāṃ
navamaskandhe yamena karmavipākakathanaṃ nāma triṃśo'dhyāyaḥ