Devi Bhagavata Purana · Chapter 9.29

sāvitryupākhyāne karmavipākavarṇanam
śrīnārāyaṇa uvāca
sāvitrīvacanaṃ śrutvā jagāma vismayaṃ yamaḥ /
prahasya vaktumārebhe karmapākaṃ tu jīvinām

dharma uvāca
kanyā dvādaśavarṣīyā vatse tvaṃ vayasādhunā /
jñānaṃ te pūrvaviduṣāṃ jñānināṃ yogināṃ param

sāvitrīvaradānena tvaṃ sāvitrī kalā satī /
prāptā purā bhūbhṛtā ca tapasā tatsamā sute

yathā śrīḥ śrīpateḥ kroḍe bhavānī ca bhavorasi /
yathāditiḥ kaśyape ca yathāhalyā ca gautame

yathā śacī mahendre ca yathā candre ca rohiṇī /
yathā ratiḥ kāmadeve yathā svāhā hutāśane

yathā svadhā ca pitṛṣu yathā sandhyā divākare /
varuṇānī ca varuṇe yajñe ca dakṣiṇā yathā

yathā varāhe pṛthivī devasenā ca kārtike /
saubhāgyā supriyā tvaṃ ca tathā satyavataḥ priye

ayaṃ tubhyaṃ varo datto'pyaparaṃ ca yathepsitam /
śṛṇu devi mahābhāge dadāmi sakalepsitam

sāvitryuvāca
satyavata aurasānāṃ putrāṇāṃ śatakaṃ mama /
bhaviṣyati mahābhāga varametanmadīpsitam

matpituḥ putraśatakaṃ śvaśurasya ca cakṣuṣī /
rājyalābho bhavatvevaṃ varametanmadīpsitam

ante satyavatā sārdhaṃ yāsyāmi harimandiram /
samatīte lakṣavarṣe dehīdaṃ me jagatprabho

jīvakarmavipākaṃ ca śrotuṃ kautūhalaṃ mama /
viśvanistārabījaṃ ca tanme vyākhyātumarhasi

dharmarāja uvāca
bhaviṣyati mahāsādhvi sarvaṃ mānasikaṃ tava /
jīvakarmavipākaṃ ca kathayāmi niśāmaya

śubhānāmaśubhānāṃ ca karmaṇāṃ janma bhārate /
puṇyakṣetre ca nānyatra sarvaṃ ca bhuñjate janāḥ

surā daityā dānavāśca gandharvā rākṣasādayaḥ /
narāśca karmajanakā na sarve jīvinaḥ sati

viśiṣṭajīvinaḥ karma bhuñjate sarvayoniṣu /
śubhāśubhaṃ ca sarvatra svargeṣu narakeṣu ca

viśeṣato jīvinaśca bhramante sarvayoniṣu /
śubhāśubhaṃ bhuñjate ca karma pūrvārjitaṃ param

śubhena karmaṇā yāti svarlokādikameva ca /
karmaṇā cāśubhenaiva bhramanti narakeṣu ca

karmanirmūlane bhaktiḥ sā coktā dvividhā sati /
nirvāṇarūpā bhaktiśca brahmaṇaḥ prakṛteriha

rogī kukarmaṇā jīvaścārogī śubhakarmaṇā /
dīrghajīvī ca kṣīṇāyuḥ sukhī duḥkhī ca karmaṇā

andhādayaścāṅ‌gahīnāḥ karmaṇā kutsitena ca /
siddhyādikamavāpnoti sarvotkṛṣṭena karmaṇā

sāmānyaṃ kathitaṃ devi viśeṣaṃ śṛṇu sundari /
sudurlabhaṃ sugopyaṃ ca purāṇeṣu smṛtiṣvapi

durlabhā mānuṣī jātiḥ sarvajātiṣu bhārate /
sarvebhyo brāhmaṇaḥ śreṣṭhaḥ praśastaḥ sarvakarmasu

brahmaniṣṭho dvijaścaiva garīyān bhārate sati /
niṣkāmaśca sakāmaśca brāhmaṇo dvividhaḥ sati

sakāmājja pradhānaśca niṣkāmo bhakta eva ca /
karmabhogī sakāmaśca niṣkāmo nirupadravaḥ

sa yāti dehaṃ tyaktvā ca padaṃ yattannirāmayam /
punarāgamanaṃ nāsti teṣāṃ niṣkāmināṃ sati

sevante dvibhujaṃ kṛṣṇaṃ paramātmānamīśvaram /
golokaṃ prati te bhaktā divyarūpavidhāriṇaḥ

sakāmino vaiṣṇavāśca gatvā vaikuṇṭhameva ca /
bhārataṃ punarāyānti teṣāṃ janma dvijātiṣu

kāle gate ca niṣkāmā bhavantyeva krameṇa ca /
bhaktiṃ ca nirmalāṃ tebhyo dāsyāmi niścitaṃ punaḥ

brāhmaṇā vaiṣṇavāścaiva sakāmāḥ sarvajanmasu /
na teṣāṃ nirmalā buddhirviṣṇubhaktivivarjitāḥ

tīrthāśritā dvijā ye ca tapasyāniratāḥ sati /
te yānti brahmalokaṃ ca punarāyānti bhārate

svadharmaniratā ye ca tīrthānyatranivāsinaḥ /
vrajanti te satyalokaṃ punarāyānti bhārate

svadharmaniratā viprāḥ sūryabhaktāśca bhārate /
vrajanti te sūryalokaṃ punarāyānti bhārate

mūlaprakṛtibhaktā ye niṣkāmā dharmacāriṇaḥ /
maṇidvīpaṃ prayāntyeva punarāvṛttivarjitam

svadharme niratā bhaktāḥ śaivāḥ śāktāśca gāṇapāḥ /
te yānti śivalokaṃ ca punarāyānti bhārate

ye viprā anyadevejyāḥ svadharmaniratāḥ sati /
te yānti sarvalokaṃ ca punarāyānti bhārate

haribhaktāśca niṣkāmāḥ svadharmaniratā dvijāḥ /
te ca yānti harerlokaṃ kramād‍bhaktibalādaho

svadharmarahitā viprā devānyasevanāḥ sadā /
bhraṣṭācārāśca kāmāśca te yānti narakaṃ dhruvam

svadharmaniratā eva varṇāścatvāra eva ca /
bhavantyeva śubhasyaiva karmaṇaḥ phalabhoginaḥ

svakarmarahitā ye ca narakaṃ yānti te dhruvam /
bhārate na bhavantyeva karmaṇaḥ phalabhoginaḥ

svadharmaniratā eva varṇāścatvāra eva ca /
svadharmaniratā viprāḥ svadharmaniratāya ca

kanyāṃ dadati viprāya candralokaṃ prayānti te /
vasanti tatra te sādhvi yāvadindrāścaturdaśa

sālaṅ‌kṛtāyā dānena dviguṇaṃ phalamucyate /
sakāmā yānti tallokaṃ na niṣkāmāśca sādhavaḥ

te prayānti viṣṇulokaṃ phalasaṅ‌ghātavarjitāḥ /
gavyaṃ ca rajataṃ svarṇaṃ vastraṃ sarpiḥ phalaṃ jalam

ye dadatyeva viprebhyaścandralokaṃ prayānti te /
vasanti te ca talloke yāvanmanvantaraṃ sati

sucirātsuciraṃ vāsaṃ kurvanti tena te janāḥ /
ye dadati suvarṇāṃśca gāśca tāmrādikaṃ sati

te yānti sūryalokaṃ ca śucaye brāhmaṇāya ca /
vasanti te tatra loke varṣāṇāmayutaṃ sati

vipule suciraṃ vāsaṃ kurvanti ca nirāmayāḥ /
dadāti bhūmiṃ viprebhyo dhanāni vipulāni ca

sa yāti viṣṇulokaṃ ca śvetadvīpaṃ manoharam /
tatraiva nivasatyeva yāvaccandradivākarau

vipule vipulaṃ vāsaṃ karoti puṇyavānmune /
gṛhaṃ dadati viprāya ye janā bhaktipūrvakam

te yānti viṣṇulokaṃ ca suciraṃ sukhadāyakam /
gṛhareṇupramāṇaṃ ca viṣṇuloke mahattame

vipule vipulaṃ vāsaṃ kurvanti mānavāḥ sati /
yasmai yasmai ca devāya yo dadāti gṛhaṃ naraḥ

sa yāti tasya lokaṃ ca reṇumānābdameva ca /
saudhe caturguṇaṃ puṇyaṃ deśe śataguṇaṃ phalam

prakṛṣṭe dviguṇaṃ tasmādityāha kamalod‍bhavaḥ /
yo dadāti taḍāgaṃ ca sarvapāpāpanuttaye

sa yāti janalokaṃ ca reṇumānābdameva ca /
vāpyāṃ phalaṃ daśaguṇaṃ prāpnoti mānavaḥ sadā

sa tu vāpīpradānena taḍāgasya phalaṃ labhet /
dhanuścatuḥsahasreṇa darśyamānena niścitam

nyūnā vā tāvatī prasthe sā vāpī parikīrtitā /
daśavāpīsamā kanyā yadi pātre pradīyate

phalaṃ dadāti dviguṇaṃ yadi sālaṅ‌kṛtā bhavet /
yatphalaṃ ca taḍāge ca taduddhāre ca tatkalam

vāpyāśca paṅ‌koddharaṇe vāpītulyaphalaṃ labhet /
aśvatthavṛkṣamāropya pratiṣṭhāṃ yaḥ karoti ca

sa prayāti tapolokaṃ varṣāṇāmayutaṃ sati /
puṣpodyānaṃ yo dadāti sāvitri sarvabhūtaye

sa vased‌ dhruvaloke ca varṣāṇāmayutaṃ dhuvam /
yo dadāti vimānaṃ ca viṣṇave bhārate sati

viṣṇuloke vasetso'pi yāvanmanvantaraṃ param /
citrayukte ca vipule phalaṃ tasya caturguṇam

tasyārdhaṃ śibikādāne phalameva labhed‌ dhruvam /
yo dadāti bhaktiyukto haraye dolamandiram

viṣṇuloke vasetso'pi yāvanmanvantaraṃ śatam /
rājamārgaṃ saudhayuktaṃ yaḥ karoti pativrate

varṣāṇāmayutaṃ so'pi śakraloke mahīyate /
brāhmaṇebhyo'tha devebhyo dāne samaphalaṃ labhet

yaddhi dattaṃ ca tad‌bhuṅ‌kte na dattaṃ nopatiṣṭhate /
bhuktvā svargādijaṃ saukhyaṃ puṇyavāñjanma bhārate

labhedviprakuleṣveva krameṇaivottamādiṣu /
bhārate puṇyavānvipro bhuktvā svargādikaṃ phalam

punaḥ so'pi bhavedvipraścaivaṃ ca kṣatriyādayaḥ /
kṣatriyo vātha vaiśyo vā kalpakoṭiśatena ca

tapasā brāhmaṇatvaṃ ca na prāpnoti śrutau śrutam /
nābhuktaṃ kṣīyate karma kalpakoṭiśatairapi

avaśyameva bhoktavyaṃ kṛtaṃ karma śubhāśubham /
devatīrthasahāyena kāyavyūhena śudhyati /
etatte kathitaṃ kiñcit kiṃ bhūyaḥ śrotumicchasi

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
nārāyaṇanāradasaṃvāde sāvitryupākhyāne karmavipākavarṇanaṃ nāmaikonatriśo'dhyāyaḥ