Devi Bhagavata Purana · Chapter 9.20

śaṅ‌khacūḍena saha devānāṃ saṅgrāmodyogavarṇanam
śrīnārāyaṇa uvāca
brahmā śivaṃ saṃniyojya saṃhāre dānavasya ca /
jagāma svālayaṃ tūrṇaṃ yathāsthānaṃ surottamāḥ

candrabhāgānadītīre vaṭamūle manohare /
tatra tasthau mahādevo devavistārahetave

dūtaṃ kṛtvā citrarathaṃ gandharveśvaramīpsitam /
śīghraṃ prasthāpayāmāsa śaṅ‌khacūḍāntikaṃ mudā

sarveśvarājñayā śīghraṃ yayau tannagaraṃ param /
mahendranagarotkṛṣṭaṃ kuberabhavanādhikam

pañcayojanavistīrṇaṃ dairghye tad dviguṇaṃ bhavet /
sphaṭikākāramaṇibhirnirmitaṃ yānaveṣṭitam

saptabhiḥ parikhābhiśca durgamābhiḥ samanvitam /
jvaladagninibhaiḥ śaśvatkalpitaṃ rat‍nakoṭibhiḥ

yuktaṃ ca vīthīśatakairmaṇivedivicitritaiḥ /
parito vaṇijāṃ saudhairnānāvastuvirājitaiḥ

sindūrākāramaṇibhirnirmitaiśca vicitritaiḥ /
bhūṣitaṃ bhūṣitairdivyairāśramaiḥ śatakoṭibhiḥ

gatvā dadarśa tanmadhye śaṅ‌khacūḍālayaṃ param /
atīva valayākāraṃ yathā pūrṇendumaṇḍalam

jvaladagniśikhāktābhiḥ parikhābhiścatasṛbhiḥ /
taddurgamaṃ ca śatrūṇāmanyeṣāṃ sugamaṃ sukham

atyuccairgaganasparśimaṇiśṛṅ‌gavirājitam /
rājitaṃ dvādaśadvārairdvārapālasamanvitam

maṇīndrasāranirmāṇaiḥ śobhitaṃ lakṣamandiraiḥ /
śobhitaṃ rat‍nasopānai rat‍nastambhavirājitam

tad dṛṣṭvā puṣpadanto'pi varaṃ dvāraṃ dadarśa saḥ /
dvāre niyuktaṃ puruṣaṃ śūlahastaṃ ca sasmitam

tiṣṭhantaṃ piṅ‌galākṣaṃ ca tāmravarṇaṃ bhayaṅ‌karam /
kathayāmāsa vṛttāntaṃ jagāma tadanujñayā

atikramya ca taddvāraṃ jagāmābhyantaraṃ punaḥ /
na ko'pi rakṣati śrutvā dūtarūpaṃ raṇasya ca

gatvā so'bhyantaradvāraṃ dvārapālamuvāca ha /
raṇasya sarvavṛttāntaṃ vijñāpayata māciram

sa ca taṃ kathayitvā ca dūto gantumuvāca ha /
sa gatvā śaṅ‌khacūḍaṃ taṃ dadarśa sumanoharam

rājamaṇḍalamadhyasthaṃ svarṇasiṃhāsane sthitam /
maṇīndraracitaṃ divyaṃ rat‍nadaṇḍasamanvitam

rat‍nakṛtrimapuṣpaiśca praśastaiḥ śobhitaṃ sadā /
bhṛtyena mastakanyastaṃ svarṇacchatraṃ manoharam

sevitaṃ pārṣadagaṇai ruciraiḥ śvetacāmaraiḥ /
suveṣaṃ sundaraṃ ramyaṃ rat‍nabhūṣaṇabhūṣitam

mālyena lepanaṃ sūkṣmaṃ suvastraṃ dadhataṃ mune /
dānavendraiḥ parivṛtaṃ suveṣaiśca trikoṭibhiḥ

śatakoṭibhiranyaiśca bhramad‌bhirastrapāṇibhiḥ /
evaṃbhūtañca taṃ dṛṣṭvā puṣpadantaḥ savismayaḥ

uvāca sa ca vṛttāntaṃ yaduktaṃ śaṅ‌kareṇa ca /
puṣpadanta uvāca
rājendra śivabhṛtyo'haṃ puṣpadantābhidhaḥ prabho

yaduktaṃ śaṅ‌kareṇaiva tad bravīmi niśāmaya /
rājyaṃ dehi ca devānāmadhikāraṃ ca sāmpratam

devāśca śaraṇāpannā deveśaṃ śrīhariṃ param /
harirdattvāsya śūlaṃ ca tena prasthāpitaḥ śivaḥ

puṣpabhadrānadītīre vaṭamūle trilocanaḥ /
viṣayaṃ dehi teṣāṃ ca yuddhaṃ vā kuru niścitam

gatvā vakṣyāmi kiṃ śambhumatha tadvada māmapi /
dūtasya vacanaṃ śrutvā śaṅ‌khacūḍaḥ prahasya ca

prabhāte'haṃ gamiṣyāmi tvaṃ ca gacchetyuvāca ha /
sa gatvovāca taṃ tūrṇaṃ vaṭamūlasthamīśvaram

śaṅ‌khacūḍasya vacanaṃ tadīyaṃ tanmukhoditam /
etasminnantare skanda ājagāma śivāntikam

vīrabhadraśca nandī ca mahākālaḥ subhadrakaḥ /
viśālākṣaśca bāṇaśca piṅ‌galākṣo vikampanaḥ

virūpo vikṛtiścaiva maṇibhadraśca bāṣkalaḥ /
kapilākhyo dīrghadaṃṣṭro vikaṭastāmralocanaḥ

kālakaṇṭho balībhadraḥ kālajihnaḥ kuṭīcaraḥ /
balonmatto raṇaślāghī durjayo durgamastathā

aṣṭau ca bhairavā raudrā rudrāścaikādaśa smṛtāḥ /
vasavo'ṣṭau vāsavaśca ādityā dvādaśa smṛtāḥ

hutāśanaśca candraśca viśvakarmāśvinau ca tau /
kuberaśca yamaścaiva jayanto nalakūbaraḥ

vāyuśca varuṇaścaiva ludhaśca maṅ‌galastathā /
dharmaśca śanirīśānaḥ kāmadevaśca vīryavān

ugradaṃṣṭrā cogradaṇḍā koṭarā kaiṭabhī tathā /
svayaṃ cāṣṭabhujā devī bhadrakālī bhayaṅ‌karī

rat‍nendrasāranirmāṇavimānopari saṃsthitā /
raktavastraparīdhānā raktamālyānulepanā

nṛtyantī ca hasantī ca gāyantī susvaraṃ mudā /
abhayaṃ dadāti bhaktebhyo'bhayā sā ca bhayaṃ ripum

bibhratī vikaṭāṃ jihvāṃ sulolāṃ yojanāyatām /
śaṅ‌khacakragadāpadmakhaḍgacarmadhanuḥśarān

kharparaṃ vartulākāraṃ gambhīraṃ yojanāyatam /
triśūlaṃ gaganasparśi śaktiṃ ca yojanāyatām

mud‌garaṃ musalaṃ vajraṃ kheṭaṃ phalakamujjvalam /
vaiṣṇavāstraṃ vāruṇāstraṃ vāhneyaṃ nāgapāśakam

nārāyaṇāstraṃ gāndharvaṃ brahmāstraṃ gāruḍaṃ tathā /
parjanyāstraṃ pāśupataṃ jṛmbhaṇāstraṃ ca pārvatam

māheśvarāstraṃ vāyavyaṃ daṇḍaṃ sammohanaṃ tathā /
avyarthamastrakaṃ divyaṃ divyāstraśatakaṃ param

āgatya tatra tasthau ca yoginīnāṃ trikoṭibhiḥ /
sārdhaṃ ca ḍākinīnāṃ ca vikaṭānāṃ trikoṭibhiḥ

bhūtapretapiśācāśca kūṣmāṇḍā brahmarākṣasāḥ /
vetālā rākṣasāścaiva yakṣāścaiva tu kinnarāḥ

tābhiścaiva saha skandaḥ praṇamya candraśekharam /
pituḥ pārśve sahāyārthaṃ samuvāsa tadājñayā

atha dūte gate tatra śaṅ‌khacūḍaḥ pratāpavān /
uvāca tulasīṃ vārtāṃ gatvābhyantarameva ca

raṇavārtāṃ ca sā śrutvā śuṣkakaṇṭhoṣṭhatālukā /
uvāca madhuraṃ sādhvī hṛdayena vidūyatā

tulasyuvāca
he prāṇabandho he nātha tiṣṭha me vakṣasi kṣaṇam /
he prāṇādhiṣṭhātṛdeva rakṣa me jīvitaṃ kṣaṇam

bhuṃkṣva janma samāsādya yanme manasi vāñchitam /
paśyāmi tvāṃ kṣaṇaṃ kiñcillocanābhyāṃ ca sādaram

āndolayante prāṇā me mano dagdhaṃ ca santatam /
duḥsvapnaśca mayā dṛṣṭaścādyaiva carame niśi

tulasīvacanaṃ śrutvā bhuktyā pītvā nṛpeśvara /
uvāca vacanaṃ prājño hitaṃ satyaṃ yathocitam

śaṃkhacūḍa uvāca
kālena yojitaṃ sarvaṃ karmabhoganibandhanam /
śubha harṣaḥ sukhaṃ duḥkhaṃ bhayaṃ śokaśca maṅ‌galam

kāle bhavanti vṛkṣāśca skandhavantaśca kālataḥ /
krameṇa puṣpavantaśca phalavantaśca kālataḥ

teṣāṃ phalāni pakvāni prabhavantyeva kālataḥ /
te sarve phalitāḥ kāle pātaṃ yānti ca kālataḥ

kāle bhavanti viśvāni kāle naśyanti sundari /
kālātstraṣṭā ca sṛjati pātā pāti ca kālataḥ

saṃhartā saṃharetkāle krameṇa sañcaranti te /
brahmaviṣṇuśivādīnāmīśvaraḥ prakṛtiḥ parā

sraṣṭā pātā ca saṃhartā sa cātmā kālanartakaḥ /
kāle sa eva prakṛtiṃ svābhinnāṃ svecchayā prabhuḥ

nirmāya kṛtavānsarvānviśvasthāṃśca carācarān /
sarveśaḥ sarvarūpaśca sarvātmā parameśvaraḥ

janaṃ janena janitā janaṃ pāti janena yaḥ /
janaṃ janena harate taṃ devaṃ bhaja sāmpratam

yasyājñayā vāti vātaḥ śīghragāmī ca sāmpratam /
yasyājñayā ca tapanastapatyeva yathākṣaṇam

yathākṣaṇaṃ varṣatīndro mṛtyuścarati jantuṣu /
yathākṣaṇaṃ dahatyagniścandro bhramati śītavān

mṛtyormṛtyuṃ kālakālaṃ yamasya ca yamaṃ param /
vibhuṃ sraṣṭuśca sraṣṭāraṃ mātuśca mātṛkaṃ bhave

saṃhartāraṃ ca saṃhartustaṃ devaṃ śaraṇaṃ vraja /
ko vā bandhuśca keṣāṃ vā sarvabandhuṃ bhaja priye

ahaṃ ko vā ca tvaṃ kā vā vidhinā yojitaḥ purā /
tvayā sārdhaṃ karmaṇā ca punastena viyojitaḥ

ajñānī kātaraḥ śoke vipattau na ca paṇḍitaḥ /
sukhe duḥkhe bhramatyeva kālanemikrameṇa ca

nārāyaṇaṃ taṃ sarveśaṃ kāntaṃ yāsyasi niścitam /
tapaḥ kṛtaṃ yadarthaṃ ca purā badarikāśrame

mayā tvaṃ tapasā labdhā brahmaṇastu vareṇa ca /
haryarthe yattava tapo hariṃ prāpsyasi kāmini

vṛndāvane ca govindaṃ goloke tvaṃ labhiṣyasi /
ahaṃyāsyāmi tallokaṃ tanuṃ tyaktvā ca dānavīm

tatra drakṣyasi māṃ tvaṃ ca drakṣyāmi tvāṃ ca sāmpratam /
agamaṃ rādhikāśāpād‍bhārataṃ ca sudurlabham

punaryāsyāmi tatraiva kaḥ śoko me śṛṇu priye /
tvaṃ ca dehaṃ parityajya divyarūpaṃ vidhāya ca

tatkālaṃ prāpsyasi hariṃ mā kānte kātarā bhava /
ityuktvā ca dinānte ca tayā sārdhaṃ manoharam

suṣvāpa śobhane talpe puṣpacandanacarcite /
nānāprakāravibhavaṃ cakāra rat‍namandire

rat‍napradīpasaṃyukte strīrat‍naṃ prāpya sundarīm /
nināya rajanīṃ rājā kīḍākautukamaṅ‌galaiḥ

kṛtvā vakṣasi tāṃ kāntāṃ rudatīmatiduḥkhitām /
kṛśodarīṃ nirāhārā nimagnāṃ śokasāgare

punastāṃ bodhayāmāsa divyajñānena jñānavit /
purā kṛṣṇena yaddattaṃ bhāṇḍīre tattvamuttamam

sa ca tasyai dadau sarvaṃ sarvaśokaharaṃ param /
jñānaṃ samprāpya sā devī prasantavadanekṣaṇā

krīḍāṃ cakāra harṣeṇa sarvaṃ matveti naśvaram /
tau dampatī ca krīḍantau nimagnau sukhasāgare

pulakāñcitasarvāṅ‌gau mūrcchito nirjane mune /
aṅ‌gapratyaṅ‌gasaṃyuktau suprītau suratotsako

ekāṅ‌gau ca tathā tau dvau cārdhanārīśvaro yathā /
prāṇeśvaraṃ ca tulasī mene prāṇādhikaṃ param

prāṇādhikāṃ ca tāṃ mene rājā prāṇeśvarīṃ satīm /
tau sthitau sukhasuptau ca tandritau sundarau samau

suveṣau sukhasambhogādaceṣṭau sumanoharau /
kṣaṇaṃ sucetanau tau ca kathayantau rasāśrayāt

kathāṃ manoramāṃ divyāṃ hasantau ca kṣaṇaṃ punaḥ /
kṣaṇaṃ ca kelisaṃyuktau rasabhāvasamanvitau

surate viratirnāsti tau tadviṣayapaṇḍitau /
satataṃ jayayuktau dvau kṣaṇaṃ naiva parājitau

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
nārāyaṇanāradasaṃvāde śaṅ‌khacūḍena saha devānāṃ saṅgrāmodyogavarṇanaṃ nāma viṃśo'dhyāyaḥ