Devi Bhagavata Purana · Chapter 9.13

gaṅ‌gopākhyānavarṇanam
nārada uvāca
kaleḥ pañcasahasrābde samatīte sureśvara /
kva gatā sā mahābhāga tanme vyākhyātumarhasi

śrīnārāyaṇa uvāca
bhārataṃ bhāratīśāpātsamāgatyeśvarecchayā /
jagāma tatra vaikuṇṭhe śāpānte punareva sā

bhāratī bhārataṃ tyaktvā tajjagāma hareḥ padam /
padmāvatī ca śāpānte gaṅ‌gā sā caiva nārada

gaṅ‌gā sarasvatī lakṣyīścaitāstisraḥ priyā hareḥ /
tulasīsahitā brahmaṃścatasraḥ kīrtitāḥ śrutau

nārada uvāca
kenopāyena sā devī viṣṇupādābjasambhavā /
brahmakamaṇḍalusthā ca śrutā śivapriyā ca sā

babhūva sā muniśreṣṭha gaṅ‌gā nārāyaṇapriyā /
aho kena prakāreṇa tanme vyākhyātumarhasi

śrīnārāyaṇa uvāca
purā babhūva goloke sā gaṅ‌gā dravarūpiṇī /
rādhākṛṣṇāṅ‌gasambhūtā tadaṃśā tatsvarūpiṇī

dravādhiṣṭhātṛdevī yā rūpeṇāpratimā bhuvi /
navayauvanasampannā sarvābharaṇabhūṣitā

śaranmadhyāhnapadmāsyā sasmitā sumanoharā /
taptakāñcanavarṇābhā śaraccandrasamaprabhā

snigdhaprabhātisusnigdhā śuddhasattvasvarūpiṇī /
supīnakaṭhinaśroṇiḥ sunitambayugaṃdharā

pīnonnataṃ sukaṭhinaṃ stanayugmaṃ suvartulam /
sucārunetrayugalaṃ sukaṭākṣaṃ suvaṃkrimam

vaṃkrimaṃ kabarībhāraṃ mālatīmālyasaṃyutam /
sindūrabindulalitaṃ sārdhaṃ candanabindubhiḥ

kastūrīpatrikāyuktaṃ gaṇḍayugmaṃ manoramam /
bandhūkakusumākāramadharoṣṭhaṃ ca sundaram

pakvadāḍimabījābhadantapaṃktisamujjvalam /
vāsasī vahniśuddhe ca nīvīyukte ca bibhratī

sā sakāmā kṛṣṇapārśve samuvāsa sulajjitā /
vāsasā mukhamācchādya locanābhyāṃ vibhormukham

nimeṣarahitābhyāṃ ca pibantī satataṃ mudā /
praphullavadanā harṣānnavasaṅ‌gamalālasā

mūrcchitā prabhurūpeṇa pulakāṅ‌kitavigrahā /
etasminnantare tatra vidyamānā ca rādhikā

gopītriṃśatkoṭiyuktā candrakoṭisamaprabhā /
kopenāraktapadmāsyā raktapaṅ‌kajalocanā

pītacampakavarṇābhā gajendramandagāminī /
amūlyarat‍nanirmāṇanānābhūṣaṇabhūṣitā

amūlyarat‍nakhacitamamūlyaṃ vahniśaucakam /
pītavastrasya yugalaṃ nīvīyuktaṃ ca bibhratī

sthalapadmaprabhāmuṣṭaṃ komalaṃ ca surañjitam /
kṛṣṇadattārghyasaṃyuktaṃ vinyasantī padāmbujam

rat‍nendrasāranirmāṇavimānādavaruhya sā /
sevyamānā ca ṛṣibhiḥ śvetacāmaravāyunā

kastūrībindubhiryuktaṃ candanena samanvitam /
dīptadīpaprabhākāraṃ sindūraṃ binduśobhitam

dadhatī bhālamadhye ca sīmantādhaḥsthalojjvale /
pārijātaprasūnānāṃ mālāyuktaṃ suvaṃkrimam

sucārukabarībhāraṃ kampayantī sukampitā /
sucārurāgasaṃyuktamoṣṭhaṃ kampayatī ruṣā

gatvovāsa kṛṣṇapārśve rat‍nasiṃhāsane śubhe /
sakhīnāṃ ca samūhaiśca paripūrṇā vibhoḥ priyā

tāṃ dṛṣṭvā ca samuttasthau kṛṣṇaḥ sādarapūrvakam /
sambhāṣya madhurālāpaiḥ sasmitaśca sasaṃbhramaḥ

praṇemuratisantrastā gopā namrātmakandharāḥ /
tuṣṭuvuste ca bhaktyā ca tuṣṭāva parameśvaraḥ

utthāya gaṅ‌gā sahasā stutiṃ bahu cakāra sā /
kuśalaṃ paripapraccha bhītātivinayena ca

namrabhāgasthitā trastā śuṣkakaṇṭhoṣṭhatālukā /
dhyānena śaraṇāyattā śrīkṛṣṇacaraṇāmbuje

tāṃ hṛtpadmasthitāṃ kṛṣṇo bhītāyai cābhayaṃ dadau /
babhūva sthiracittā sā sarveśvaravareṇa ca

ūrdhvasiṃhāsanasthāṃ ca rādhāṃ gaṅ‌gā dadarśa sā /
susnigdhāṃ sukhadṛśyāṃ ca jvalantīṃ brahmatejasā

asaṃkhyabrahmaṇaḥ kartrīmādisṛṣṭeḥ sanātanīm /
sadā dvādaśavarṣīyāṃ kanyābhinavayauvanām

viśvavṛnde nirupamāṃ rūpeṇa ca guṇena ca /
śāntāṃ kāntāmanantāṃ tāmādyantarahitāṃ satīm

śubhāṃ subhadrāṃ subhagāṃ svāmisaubhāgyasaṃyutām /
saundaryasundarīṃ śreṣṭhāṃ sarvāsu sundarīṣu ca

kṛṣṇārdhāṅ‌gāṃ kṛṣṇasamāṃ tejasā vayasā tviṣā /
pūjitāṃ ca mahālakṣmīṃ lakṣmyā lakṣmīśvareṇa ca

pracchādyamānāṃ prabhayā sabhāmīśasya suprabhām /
sakhīdattaṃ ca tāmbūlaṃ bhuktavantīṃ ca durlabham

ajanyāṃ sarvajananīṃ dhanyāṃ mānyāṃ ca māninīm /
kṛṣṇaprāṇādhidevīṃ ca prāṇapriyatamāṃ ramām

dṛṣṭvā rāseśvarīṃ tṛptiṃ na jagāma sureśvarī /
nimeṣarahitābhyāṃ ca locanābhyāṃ papau ca tām

etasminnantare rādhā jagadīśamuvāca sā /
vācā madhurayā śāntā vinītā sasmitā mune

rādhovāca
keyaṃ prāṇeśa kalyāṇī sasmitā tvanmukhāmbujam /
paśyantī sasmitaṃ pārśve sakāmā vakralocanā

mūrcchāṃ prāpnoti rūpeṇa pulakāṅ‌kitavigrahā /
vastreṇa mukhamācchādya nirīkṣantī punaḥ punaḥ

tvaṃ cāpi tāṃ saṃnirīkṣya sakāmaḥ sasmitaḥ sadā /
mayi jīvati goloke bhūtā durvṛttirīdṛśī

tvameva caiva durvṛttaṃ vāraṃ vāraṃ karoṣi ca /
kṣamāṃ karomi premṇā ca strījātiḥ snigdhamānasā

saṃgṛhyemāṃ priyāmiṣṭāṃ golokād‌ gaccha lampaṭa /
anyathā na hi te bhadraṃ bhaviṣyati vrajeśvara

dṛṣṭastvaṃ virajāyukto mayā candanakānane /
kṣamā kṛtā mayā pūrvaṃ sakhīnāṃ vacanādaho

tvayā macchabdamātreṇa tirodhānaṃ kṛtaṃ purā /
dehaṃ tatyāja virajā nadīrūpā babhūva sā

koṭiyojanavistīrṇā tato dairghye caturguṇā /
adyāpi vidyamānā sā tava satkīrtirūpiṇī

gṛhaṃ mayi gatāyāṃ ca punargatvā tadantike /
uccai ruroda viraje viraje ceti saṃsmaran

tadā toyātsamutthāya sā yogātsiddhayoginī /
sālaṅ‌kārā mūrtimatī dadau tubhyaṃ ca darśanam

tatastāṃ ca samākṣipya vīryādhānaṃ kṛtaṃ tvayā /
tato babhūvustasyāṃ ca samudrāḥ sapta eva ca

dṛṣṭastvaṃ śobhayā gopyā yuktaścampakakānane /
sadyo macchabdamātreṇa tirodhānaṃ kṛtaṃ tvayā

śobhā dehaṃ parityajya jagāma candramaṇḍale /
tatastasyāḥ śarīraṃ ca snigdhaṃ tejo babhūva ha

saṃvibhajya tvayā dattaṃ hṛdayena vidūyatā /
rat‍nāya kiñcitsvarṇāya kiñcinmaṇivarāya ca

kiñcitstrīṇāṃ mukhābjebhyaḥ kiñcidrājñe ca kiñcana /
kiñcitkisalayebhyaśca puṣpebhyaścāpi kiñcana

kiñcitkalebhyaḥ pakvebhyaḥ sasyebhyaścāpi kiñcana /
nṛpadevagṛhebhyaśca saṃskṛtebhyaśca kiñcana

kiñcinnūtanapatrebhyo dugdhebhyaścāpi kiñcana /
dṛṣṭastvaṃ prabhayā gopyā yukto vṛndāvane vane

sadyo macchabdamātreṇa tirodhānaṃ kṛtaṃ tvayā /
prabhā dehaṃ parityajya jagāma sūryamaṇḍale

tatastasyāḥ śarīraṃ ca tīvraṃ tejo babhūva ha /
saṃvibhajya tvayā dattaṃ premṇā prarudatā purā

visṛṣṭaṃ cakṣuṣoḥ kṛṣṇa lajjayā mad‍bhayena ca /
hutāśanāya kiñcicca yakṣebhyaścāpi kiñcana

kiñcitpuruṣasiṃhebhyo devebhyaścāpi kiñcana /
kiñcidviṣṇujanebhyaśca nāgebhyo'pi ca kiñcana

brāhmaṇebhyo munibhyaśca tapasvibhyaśca kiñcana /
strībhyaḥ saubhāgyayuktābhyo yaśasvibhyaśca kiñcana

tattu dattvā ca sarvebhyaḥ pūrvaṃ praruditaṃ tvayā /
śāntigopyā yutastvaṃ ca dṛṣṭo'si rāsamaṇḍale

vasante puṣpaśayyāyāṃ mālyavāṃścandanokṣitaḥ /
rat‍napradīpairyukte ca rat‍nanirmāṇamandire

rat‍nabhūṣaṇabhūṣāḍhyo rat‍nabhūṣitayā saha /
tayā dattaṃ ca tāmbūlaṃ bhuktavāṃśca purā vibho

sadyo macchabdamātreṇa tirodhānaṃ kṛtaṃ tvayā /
śāntirdehaṃ parityajya bhiyā līnā tvayi prabho

tatastasyāḥ śarīraṃ ca guṇaśreṣṭhaṃ babhūva ha /
saṃvibhajya tvayā dattaṃ premṇā prarudatā purā

viśve tu vipine kiñcidbrahmaṇe ca mayi prabho /
śuddhasattvasvarūpāyai kiñcillakṣmyai purā vibho

tvanmantropāsakebhyaśca śāktebhyaścāpi kiñcana /
tapasvibhyaśca dharmāya dharmiṣṭhebhyaśca kiñcana

mayā pūrvaṃ ca tvaṃ dṛṣṭo gopyā ca kṣamayā saha /
suveṣayukto mālāvān gandhacandanacarcitaḥ

rat‍nabhūṣitayā gandhacandanokṣitayā saha /
sukhena mūrcchitastalpe puṣpacandanacarcite

śliṣṭo nidritayā sadyaḥ sukhena navasaṅ‌gamāt /
mayā prabodhitā sā ca bhavāṃśca smaraṇaṃ kuru

gṛhītaṃ pītavastraṃ ca muralī ca manoharā /
vanamālākaustubhaścāpyamūlyaṃ rat‍nakuṇḍalam

paścātpradattaṃ premṇā ca sakhīnāṃ vacanādaho /
lajjayā kṛṣṇavarṇo'bhūd‍bhavān pāpena yaḥ prabho

kṣamā dehaṃ parityajya lajjayā pṛthivīṃ gatā /
tatastasyāḥ śarīraṃ ca guṇaśreṣṭhaṃ babhūva ha

saṃvibhajya tvayā dattaṃ premṇā prarudatā punaḥ /
kiñciddattaṃ viṣṇave ca vaiṣṇavebhyaśca kiñcana

dhārmikebhyaśca dharmāya durbalebhyaśca kiñcana /
tapasvibhyo'pi devebhyaḥ paṇḍitebhyaśca kiñcana

etatte kathitaṃ sarvaṃ kiṃ bhūyaḥ śrotumicchasi /
tvad‌guṇaṃ caiva bahuśo na jānāmi paraṃ prabho

ityevamuktvā sā rādhā raktapaṅ‌kajalocanā /
gaṅ‌gāṃ vaktuṃ samārebhe namrāsyāṃ lajjitāṃ satīm

gaṅ‌gā rahasyaṃ vijñāya yogena siddhayoginī /
tirobhūya sabhāmadhye svajalaṃ praviveśa sā

rādhā yogena vijñāya sarvatrāvasthitāṃ ca tām /
pānaṃ kartuṃ samārebhe gaṇḍūṣātsiddhayoginī

gaṅ‌gā rahasyaṃ vijñāya yogena siddhayoginī /
śrīkṛṣṇacaraṇāmbhoje viveśa śaraṇaṃ yayau

goloke sā ca vaikuṇṭhe brahmalokādike tathā /
dadarśa rādhā sarvatra naiva gaṅ‌gāṃ dadarśa sā

sarvatra jalaśūnyaṃ ca śuṣkapaṅ‌kaṃ ca golakam /
jalajantusamūhaiśca mṛtadehaiḥ samanvitam

brahmaviṣṇuśivānantadharmendrendudivākarāḥ /
manavo munayaḥ sarve devasiddhatapasvinaḥ

golokaṃ ca samājagmuḥ śuṣkakaṇṭhoṣṭhatālukāḥ /
sarve praṇemurgovindaṃ sarveśaṃ prakṛteḥ param

varaṃ vareṇyaṃ varadaṃ variṣṭhaṃ varakāraṇam /
gopikāgopavṛndānāṃ sarveṣāṃ pravaraṃ prabhum

nirīhaṃ ca nirākāraṃ nirliptaṃ ca nirāśrayam /
nirguṇaṃ ca nirutsāhaṃ nirvikāraṃ nirañjanam

svecchāmayaṃ ca sākāraṃ bhaktānugrahakārakam /
sattvasvarūpaṃ satyeśaṃ sākṣirūpaṃ sanātanam

paraṃ pareśaṃ paramaṃ paramātmānamīśvaram /
praṇamya tuṣṭuvuḥ sarve bhaktinamrātmakandharāḥ

sagad‌gadāḥ sāśrunetrāḥ pulakāṅ‌kitavigrahāḥ /
sarve saṃstūya sarveśaṃ bhagavantaṃ parātparam

jyotirmayaṃ paraṃ brahma sarvakāraṇakāraṇam /
amūlyarat‍nanirmāṇacitrasiṃhāsanasthitam

sevyamānaṃ ca gopālaiḥ śvetacāmaravāyunā /
gopālikānṛtyagītaṃ paśyantaṃ sasmitaṃ mudā

prāṇādhikapriyatamaṃ rādhāvakṣaḥsthalasthitam /
tayā pradattaṃ tāmbūlaṃ bhuktavantaṃ suvāsitam

paripūrṇatamaṃ rāse dadṛśuśca sureśvaram /
munayo manavaḥ siddhāstāpasāśca tapasvinaḥ

prahṛṣṭamanasaḥ sarve jagmuḥ paramavismayam /
parasparaṃ samālokya procuste ca caturmukham

niveditaṃ jagannāthaṃ svābhiprāyamabhīpsitam /
brahmā tadvacanaṃ śrutvā viṣṇuṃ kṛtvā svadakṣiṇe

vāmato vāmadevaṃ ca jagāma kṛṣṇasannidhim /
paramānandayuktaṃ ca paramānandarūpiṇīm

sarvaṃ kṛṣṇamayaṃ dhātā dadarśa rāsamaṇḍale /
sarvaṃ samānaveṣaṃ ca samānāsanasaṃsthitam

dvibhujaṃ muralīhastaṃ vanamālāvibhūṣitam /
mayūrapicchacūḍaṃ ca kaustubhena virājitam

atīva kamanīyaṃ ca sundaraṃ śāntavigraham /
guṇabhūṣaṇarūpeṇa tejasā vayasā tviṣā

paripūrṇatamaṃ sarvaṃ sarvaiśvaryasamanvitam /
kiṃ sevyaṃ sevakaṃ kiṃ vā dṛṣṭvā nirvaktumakṣamaḥ

kṣaṇaṃ tejaḥ svarūpaṃ ca rūpaṃ tatra sthitaṃ kṣaṇam /
nirākāraṃ ca sākāraṃ dadarśa dvividhaṃ kṣaṇam

ekameva kṣaṇaṃ kṛṣṇaṃ rādhayā rahitaṃ param /
pratyekāsanasaṃsthaṃ ca tayā sārdhaṃ ca tatkṣaṇam

rādhārūpadharaṃ kṛṣṇaṃ kṛṣṇarūpaṃ kalatrakam /
kiṃ strīrūpaṃ ca puruṣaṃ vidhātā dhyātumakṣamaḥ

hṛtpadmasthaṃ ca śrīkṛṣṇaṃ dhyātvā dhyānena cakṣuṣā /
cakāra stavanaṃ bhaktyā parihāramanekadhā

tataḥ svacakṣurunmīlya punaśca tadanujñayā /
dadarśa kṛṣṇamekaṃ ca rādhāvakṣaḥsthalasthitam

svapārṣadaiḥ parivṛtaṃ gopīmaṇḍalamaṇḍitam /
punaḥ praṇemustaṃ dṛṣṭvā tuṣṭuvuḥ parameśvaram

tadabhiprāyamājñāya tānuvāca rameśvaraḥ /
sarvātmā sa ca sarvajñaḥ sarveśaḥ sarvabhāvanaḥ

śrībhagavānuvāca
āgaccha kuśalaṃ brahmannāgaccha kamalāpate /
ihāgaccha mahādeva śaśvatkuśalamastu vaḥ

āgatā hi mahābhāgā gaṅ‌gānayanakāraṇāt /
gaṅ‌gā ca caraṇāmbhoje bhayena śaraṇaṃ gatā

rādhemāṃ pātumicchantī dṛṣṭvā matsannidhānataḥ /
dāsyāmīmāṃ ca bhavatāṃ yūyaṃ kuruta nirbhayām

śrīkṛṣṇasya vacaḥ śrutvā sasmitaḥ kamalod‍bhavaḥ /
tuṣṭāva rādhāmārādhyāṃ śrīkṛṣṇaparipūjitām

vaktraiścaturbhiḥ saṃstūya bhaktinamrātmakandharaḥ /
dhātā caturṇāṃ vedānāmuvāca caturānanaḥ

caturānana uvāca
gaṅ‌gā tvadaṅ‌gasambhūtā prabhośca rāsamaṇḍale /
yuvayordravarūpā sā mugdhayoḥ śaṅ‌karasvanāt

kṛṣṇāṃśā ca tvadaṃśā ca tvatkanyāsadṛśī priyā /
tvanmantragrahaṇaṃ kṛtvā karotu tava pūjanam

bhaviṣyati patistasyā vaikuṇṭheśaścaturbhujaḥ /
bhūsthāyāḥ kalayā tasyāḥ patirlavaṇavāridhiḥ // १ re ७ //
golokasthā ca yā gaṅ‌gā sarvatrasthā tathāmbike /
tadambikā tvaṃ deveśī sarvadā sā tvadātmajā

brahmaṇo vacanaṃ śrutvā svīcakāra ca sasmitā /
vahirbabhūva sā kṛṣṇapādāṅ‌guṣṭhanakhāgrataḥ

tatraiva satkṛtā śāntā tasthau teṣāṃ ca madhyataḥ /
uvāsa toyādutthāya tadadhiṣṭhātṛdevatā

tattoyaṃ brahmaṇā kiñcitsthāpitaṃ ca kamaṇḍalau /
kiñciddadhāra śirasi candrārdhakṛtaśekharaḥ

gaṅ‌gāyai rādhikāmantraṃ pradadau kamalod‍bhavaḥ /
tatstotraṃ kavacaṃ pūjāṃ vidhānaṃ dhyānameva ca

sarvaṃ tatsāmavedoktaṃ puraścaryākramaṃ tathā /
gaṅ‌gā tāmeva sampūjya vaikuṇṭhaṃ prayayau saha

lakṣmīḥ sarasvatī gaṅ‌gā tulasī viśvapāvanī /
etā nārāyaṇasyaiva catasro yoṣito mune

atha taṃ sasmitaḥ kṛṣṇo brahmāṇaṃ samuvāca saḥ /
sarvakālasya vṛttāntaṃ durbodhamavipaścitam

śrīkṛṣṇa uvāca
gṛhāṇa gaṅ‌gāṃ he brahman he viṣṇo he maheśvara /
śṛṇu kālasya vṛttāntaṃ matto brahmanniśāmaya

yūyaṃ ca ye'nye devāśca munayo manavastathā /
siddhā yaśasvinaścaiva ye ye'traiva samāgatāḥ

ete jīvanti goloke kālacakravivarjite /
jalāplute sarvaviśvaṃ jātaṃ kalpakṣayo'dhunā

brahmādyā ye'nyaviśvasthāste vilīnādhunā mayi /
vaikuṇṭhaṃ ca vinā sarvaṃ jalamagnaṃ ca padmaja

gatvā sṛṣṭiṃ kuru punarbrahmalokādikaṃ bhavam /
svaṃ brahmāṇḍaṃ viracaya paścād‌ gaṅ‌gā prayāsyati

evamanyeṣu viśveṣu sṛṣṭau brahmādikaṃ punaḥ /
karomyahaṃ punaḥ sṛṣṭiṃ gaccha śīghraṃ suraiḥ saha

gato bahutaraḥ kālo yuṣmākaṃ ca caturmukhāḥ /
gatāḥ katividhāste ca bhaviṣyanti ca vedhasaḥ

ityuktvā rādhikānātho jagāmāntaḥpure mune /
devā gatvā punaḥ sṛṣṭiṃ cakrureva prayat‍nataḥ

goloke ca sthitā gaṅ‌gā vaikuṇṭhe śivalokake /
brahmaloke sthitānyatra yatra yatra puraḥ sthitā

tatraiva sā gatā gaṅ‌gā cājñayā paramātmanaḥ /
nirgatā viṣṇupādābjāttena viṣṇupadī smṛtā

ityevaṃ kathitaṃ brahman gaṅ‌gopākhyānamuttamam /
sukhadaṃ mokṣadaṃ sāraṃ kiṃ bhūyaḥ śrotumicchasi

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
navamaskandhe gaṅ‌gopākhyānavarṇanaṃ nāma trayodaśo'dhyāyaḥ