Devi Bhagavata Purana · Chapter 9.11

gaṅ‌gopākhyānavarṇanam
nārada uvāca

śrutaṃ pṛthivyupākhyānamatīva sumanoharam //
gaṃgopākhyānamadhunā vada vedavidāṃ vara

bhārate bhāratīśāpātsā jagāma sureśvarī //
viṣṇu svarūpā paramā svayaṃ viṣṇupadīti ca

kathaṃ kutra yuge kena prārthitā preritā purā //
tatkramaṃ śrotumicchāmi pāpaghnaṃ puṇyadaṃ śubham

śrīnārāyaṇa uvāca //
rājarājeśvaraḥ śrīmānsagaraḥ sūryavaṃśajaḥ //
tasya bhāryā ca vaidarbhī śaibyā ca dve manohare

tatpatnyāmekaputraśca babhūva sumanoharaḥ //
asamaṃja iti khyātaḥ śaibyāyāṃ kulavardhanaḥ

anyā cā''rādhayāmāsa śaṃkaraṃ putra kāmukī//
babhūva garbhastasyāśca harasya ca vareṇa ha

gate śatābde pūrṇe ca māṃsapiṃḍaṃ suṣāva sā //
taddṛṣṭvā sā śivaṃ dhyātvā rurodoccaiḥ punaḥ punaḥ

śaṃbhurbrāhmaṇarūpeṇa tatsamīpaṃ jagāma ha //
cakāra saṃvibhajyaitatpiḍaṃ ṣaṣṭisahasradhā

sarve babhūvuḥ putrāśca mahābalaparākramāḥ //
grīṣmamadhyāhnamārtaṃḍaprabhāmuṣṭakalevarāḥ

kapilasya muneḥ śāpādbabhūvurbhasmasācca te //
rājā ruroda tacchutvā jagāma gahane vane

tapaścakārā'samaṃjo gaṃgānayanakāraṇāt //
lakṣavarṣaṃ tapastaptvā mamāra kālayogataḥ

aṃśumāṃstasya tanayo gaṃgānayanakāraṇāt //
tapaḥ kṛtvā lakṣavarṣaṃ mamāra kālayogataḥ

bhagīrathastasya putro mahābhāgavataḥ sudhīḥ //
vaiṣṇavo viṣṇubhaktaśca guṇavānajarāmaraḥ

tapaḥ kṛtvā lakṣavarṣaṃ gaṃgānayanakāraṇāt //
dadarśa kṛṣṇaṃ grīṣma sthasūryakoṭisamaprabham

dvibhujaṃ muralīhastaṃ kiśoragopaveṣiṇam //
gopālasundarīrūpaṃ bhaktānugraharūpiṇam

svecchāmayaṃ paraṃ brahma paripūrṇatamaṃ prabhum //
brahmaviṣṇuśivādyaiśca stutaṃ munigaṇairnutam

nirliptaṃ sākṣirūpaṃ ca nirguṇaṃ prakṛteḥ param //
īṣaddhāsya prasannāsyaṃ bhaktānugrahakāraṇam

vahniśuddhāṃśukādhānaṃ ralabhūṣaṇabhūṣitam //
tuṣṭāva dṛṣṭvā nṛpatiḥ praṇamya ca punaḥ punaḥ

līlayā ca varaṃ prāpa vāṃchitaṃ vaṃśatā raṇam //
kṛtvā ca stavanaṃ divyaṃ pulakāṃkitavigrahaḥ

śrībhagavānuvāca //
bhārataṃ bhāratīśāpādgaccha śīghraṃ sureśvari //
sagarasya sutānsarvānvṛtānkuru mamājñayā

tvatsparśavāyunāḥ pūtā yāsyaṃti mama maṃdiram //
bibhrato mama mūrtīśca divyasyaṃdanagāminaḥ

matpārṣadā bhaviṣyaṃti sarva kālaṃ nirāmayāḥ //
samucchidya karmabhogānkṛtāñjanmanijanmani

koṭijanmārjitaṃ pāpaṃ bhārate yatkṛtaṃ nṛbhiḥ //
gaṃgāyā vāta sparśena naśyatīti śrutau śrutam

sparśanāddarśanāddevyāḥ puṇyaṃ daśaguṇaṃ tataḥ //
mausalasnānamātreṇa sāmānyadivase nṛṇām

śatakoṭijanmapāpaṃ naśyatīti śrutau śrutam //
yāni kāni ca pāpāni brahmahatyā dikāni ca

janmasaṃkhyārjitānyeva kāmato'pi kṛtāni ca //
tāni sarvāṇi naśyaṃti mausalasnānato nṛṇām

puṇyāhasnānataḥ puṇyaṃ vedā naiva vadaṃti ca //
kiṃcidvadaṃti te vipra phalameva yathāgamam

brahmaviṣṇuśivādyāśca sarvaṃ naiva vadaṃti ca //
sāmānyadivasasnānasaṃkalpaṃ śṛṇu sundari

puṇyaṃ daśaguṇaṃ caiva mausalasnānataḥ param //
tatastriṃśadguṇaṃ puṇyaṃ ravisaṃkramaṇe dine

amāyāṃ cāpi tattulyaṃ dviguṇaṃ dakṣiṇāyane //
tato daśaguṇaṃ puṇyaṃ narāṇāmuttarāyaṇe

caturmāsyāṃ paurṇamāsyāmanaṃtaṃ puṇyameva ca //
akṣayāyāṃ tattulyaṃ caitadvede nirūpitam

asaṃkhyapuṇyaphaladameteṣu snānadānakam //
sāmānyadivasasnānāddānācchataguṇaṃ phalam

manvatarādyāyāṃ tithau yugādyāyāṃ tathaiva ca //
māghasyāsita saptamyāṃ bhīṣmāṣṭamyāṃ tathaiva ca

athāpyaśokāṣṭamyāṃ ca navamyāṃ ca tathā hareḥ //
tato'pi dviguṇaṃ puṇyaṃ naṃdāyāṃ tava durlabham

daśaharādaśamyāṃ tu yugādyādisamaṃ phalam //
naṃdāsamaṃ ca vāruṇyāṃ mahartve(?) caturguṇam

tataścaturguṇaṃ puṇyaṃ dvimahatpūrvake sati //
puṇyaṃ koṭiguṇaṃ caiva sāmānyasnānato'pi yat

caṃdroparāgasamaye sūrye daśaguṇaṃ tataḥ //
puṇyamardhodaye kāle tataḥ śataguṇaṃ phalam

ityevamuktvā deveśo virarāma tayoḥ puraḥ //
tamuvāca tato gaṃgā bhaktinamrātsakaṃdharā

gaṃgovāca //
yāmi cedbhārataṃ nātha bhāratī śāpataḥ purāḥ //
tavājñayā ca rājeṃdra tapasā caiva sāṃpratam

dāsyaṃti pāpino mahyaṃ pāpāni yāni kāni ca //
tāni me kena naśyaṃti tamupāyaṃ vada prabho

katikālaṃ parimitaṃ sthitirme tatra bhārate //
kadā yāsyāmi deveśa tadviṣṇoḥ paramaṃ padam

mamānyadvāchitaṃ yadyatsarvaṃ jānāsi sarvavit //
sarvāntarātmansarvajña tadupāyaṃ vada prabho

śrībhagavānuvāca //
jānāmi vāṃchitaṃ gaṃge tava sarvaṃ sureśvari //
patiste dravarūpāyā lavaṇodo bhaviṣyati

sa mamāṃśa svarūpaśca tvaṃ ca lakṣmīsvarūpiṇī //
pidagdhāyā vidagdhena saṃgamo guṇavānbhuvi

yāvatyaḥ saṃti nadyaśca bhāratyādyāśca bhārate //
saubhāgyā tvaṃ ca tāsveva lavaṇodasya saurate

adyaprabhṛti deveśi kaleḥ paṃcasahasrakam //
varṣaṃ sthitiste bhāratyāḥ śāpena bhārate bhuvi

nityaṃ tvamabdhinā sārthaṃ kariṣyasi raho ratim //
tvameva rasikā devī rasikeṃdreṇa saṃyutā

tvāṃ stoṣyanti ca stotreṇa bhagīrathakṛtena ca //
bhāratasthā janāḥ sarve pūrṇayiṣyaṃti bhaktitaḥ

kaṇvaśākhokta dhyānena dhyātvā tvāṃ pūjayiṣyati //
yaḥ stauti praṇayennityaṃ so'śvamedhaphalaṃ labhet

gaṃgā gaṃgeti yo brūyādyojanānāṃ śatairapi //
mucyate sarvapāpebhyo viṣṇulokaṃ sa gacchati

sahasrapāpināṃ snānādyatpāpaṃ te bhaviṣyati //
prakṛterbhaktasaṃsparśādeva taddhi vinaṃkṣyati

pāpināṃ tu sahasrāṇāṃ śavasparśena yattvayi //
tanmantropāsakasnānāttadaghaṃ ca vinaṃkṣyati

tatraiva tvamadhiṣṭhānaṃ kariṣyasyaghamocanam //
sārdhaṃ saridbhiḥ śreṣṭhābhiḥ sarasvatyādibhiḥ śubhe

tattu tīrthaṃ bhavetsadyo yatra tadguṇakīrtanam //
tvadreṇusparśamātreṇa pūto bhavati pātakī

reṇupramāṇavarṣaṃ ca develoke vased dhuvam //
jñānena tvayi ye bhaktyā mannāmasmṛtipūrvakam

samutsṛjaṃti prāṇāṃśca te gacchanti hareḥ padam //
pārṣadapravarāste ca bhaviṣyaṃti hareściram

layaṃ prākṛtikaṃ te ca drakṣyaṃti cāpya saṃkhyakam //
mṛtasya bahupuṇyena tacchavaṃ tvayi vinyaset

prayāti sa ca vaikuṇṭhaṃ yāvadahnaḥ sthitistvayi //
kāyavyūhaṃ tataḥ kṛtvā bhojayitvā svakarmakam

tasmai dadāmi sārūpyaṃ karomi taṃ ca pārṣadam //
ajñānī tvajjalasparśādyadi prāṇānsamutsṛjet

tasmai dadāmi sālokyaṃ karomi taṃ ca pārṣadam //
anyatra vā tyajetprāṇāṃstvannāmasmṛtipūrvakam

tasmai dadāmi sālokyaṃ yāvadvai brahmaṇo vayaḥ //
anyatra vā tyajetprāṇāṃstvannāmasmṛtipūrvakam

tasmai dadāmi sārūpyamasaṃkhyaṃ prākṛtaṃ layam //
ratneṃdrasāra nirmāṇayānena saha pārṣadaiḥ

sadyaḥ prayāti golokaṃ mama tulyo bhaved dhuvam//
tīrthe'pyarthe maraṇe viśeṣo nāsti kaścana

manmaṃtropāsakānāṃ tu nityaṃ naivedyabhojinām//
pūtaṃ kartuṃ sa śakto hi līlayā bhuvanatrayam

ratneṃdrasāra yānena golokaṃ saṃprayāṃti ca//
madbhaktā bāṃdhavā yeṣāṃ te'pi paśvādayo'pi hi

prayāṃti ratnayānena golokaṃ cātidurlabham //
yatra yatra smṛtāste ca jñānena jñāninaḥ sati

jīvanmuktāśca te pūtā madbhakte saṃvidhānataḥ //
ityuktvā śrīharistāṃ ca pratyuvāca bhagīratham

stuhi gaṃgāmimāṃ bhaktyā pūjāṃ ca kuru sāṃpratam //
bhagīrathastāṃ tuṣṭāva pūjayāmāsa bhaktitaḥ

kauthumoktena dhyānena stotreṇāpi punaḥ punaḥ //
praṇanāma ca śrīkṛṣṇaṃ paramātmānamīśvaram

bhagīrathaśca gaṃgā ca soṃ'tardhānaṃ cakāra ha //
nārada uvāca //
kena dhyānena stotreṇa kena pūjākrameṇa ca

pūjāṃ cakāra nṛpatirvada vedavidāṃ vara //
śrīnārāyaṇa uvāca //
snātvā nityakriyāṃ kṛtvā dhṛtvā dhaute ca vāsasī

saṃpūjya devaṣaṭkaṃ ca saṃyato bhaktipūrvakam //
gaṇeśaṃ ca dineśaṃ ca vahni viṣṇuṃ śivaṃ śivām

saṃpūjya devaṣaṭkaṃ ca so'dhikārī ca pūjane //
gaṇeśaṃ vighnanāśāya ārogyāya divākaram

vahniṃ śaucāya viṣṇuṃ ca lakṣmyarthaṃ pūjayennaraḥ //
śivaṃ jñānāya jñāneśaṃ śivāṃ ca muktisiddhaye

saṃpūjyaitām̐llabhetprājño viparītamato'nyathā //
dadhyāvanena dhyānena taddhyānaṃ śṛṇu nārada

iti śrīdevībhāgavate ma० navamaskandhe ekādaśo'dhyāyaḥ