Devi Bhagavata Purana · Chapter 8.24

devīpūjanavidhinirūpaṇam
nārada uvāca
dharmaśca kīdṛśastāta devyārādhanalakṣaṇaḥ /
kathamārādhitā devī sā dadāti paraṃ padam

ārādhanavidhiḥ ko vā kathamārādhitā kadā /
kena sā durganarakād‌durgā trāṇapradā bhavet

śrīnārāyaṇa uvāca
devarṣe śṛṇu cittaikāgryeṇa me viduṣāṃ vara /
yathā prasīdate devī dharmārādhanataḥ svayam

svadharmo yādṛśaḥ proktastaṃ ca me śṛṇu nārada /
anādāviha saṃsāre devī saśṛjitā svayam

paripālayate ghorasaṅkaṭādiṣu sā mune /
sā devī pūjyate lokairyathāvattadvidhiṃ śṛṇu

pratipattithimāsādya devīmājyena pūjayet /
ghṛtaṃ dadyād‌ brāhmaṇāya rogahīno bhavetsadā

dvitīyāyāṃ śarkarayā pūjayejjagadambikām /
śarkarāṃ pradadedvipre dīrghāyurjāyate naraḥ

tṛtīyādivase devyai dugdhaṃ pūjanakarmaṇi /
kṣīraṃ dattvā dvijāgryāya sarvaduḥkhātigo bhavet

caturthyāṃ pūjane'pūpā deyā devyai dvijāya ca /
apūpā eva dātavyā na vighnairabhibhūyate

pañcamyāṃ kadalījātaṃ phalaṃ devyai nivedayet /
tadeva brāhmaṇe deyaṃ medhāvānpuruṣo bhavet

ṣaṣṭhītithau madhu proktaṃ devīpūjanakarmaṇi /
brāhmaṇāya ca dātavyaṃ madhu kāntiryato bhavet

saptamyāṃ guḍanaivedyaṃ devyai dattvā dvijāya ca /
guḍaṃ dattvā śokahīno jāyate dvijasattama

nārikelamathāṣṭamyāṃ devyai naivedyamarpayet /
brāhmaṇāya pradātavyaṃ tāpahīno bhavennaraḥ

navamyāṃ lājamambāyai cārpayitvā dvijāya ca /
dattvā sukhādhiko bhūyādiha loke paratra ca

daśamyāmarpayitvā tu devyai kṛṣṇatilānmune /
brāhmaṇāya pradattvā tu yamalokād‍bhayaṃ na hi

ekādaśyāṃ dadhi tathā devyai cārpayate tu yaḥ /
dadāti brāhmaṇāyaitaddevīpriyatamo bhavet

dvādaśyāṃ pṛthukāndevyai dattvācāryāya yo dadet /
tāneva ca muniśreṣṭha sa devīpriyatāṃ vrajet

trayodaśyāṃ ca durgāyai caṇakānpradadāti ca /
tāneva dattvā viprāya prajāsantatimānbhavet

caturdaśyāṃ ca devarṣe devyai saktūnprayacchati /
tāneva dadyādviprāya śivasya dayito bhavet

pāyasaṃ pūrṇimātithyāmaparṇāyai prayacchati /
dadāti ca dvijāgryāya pitṛnuddharate'khilān

tattithau havanaṃ proktaṃ devīprītyai mahāmune /
tattattithyuktavastūnāmaśeṣāriṣṭanāśanam

ravivāre pāyasaṃ ca naivedyaṃ parikīrtitam /
somavāre payaḥ proktaṃ bhaume ca kadalīphalam

budhavāre ca samproktaṃ navanītaṃ navaṃ dvija /
guruvāre śarkarāṃ ca sitāṃ bhārgavavāsare

śanivāre ghṛtaṃ gavyaṃ naivedyaṃ parikīrtitam /
saptaviṃśatinakṣatranaivedyaṃ śrūyatāṃ mune

ghṛtaṃ tilaṃ śarkarāṃ ca dadhi dugdhaṃ kilāṭakam /
dathikūrcī modakaṃ ca pheṇikāṃ ghṛtamaṇḍakam

kaṃsāraṃ vaṭapatraṃ ca ghṛtapūramataḥ param /
vaṭakaṃ kokarasakaṃ pūraṇaṃ madhu sūraṇam

guḍaṃ pṛthukadrākṣe ca kharjūraṃ caiva cārakam /
apūpaṃ navanītaṃ ca mud‍gaṃ modaka eva ca

mātuliṅgamiti proktaṃ bhanaivedyaṃ ca nārada /
viṣkambhādiṣu yogeṣu pravakṣyāmi nivedanam

padārthānāṃ kṛteṣveṣu prīṇāti jagadambikā /
guḍaṃ madhu ghṛtaṃ dugdhaṃ dadhi takraṃ tvapūpakam

navanītaṃ karkaṭīṃ ca kūṣmāṇḍaṃ cāpi modakam /
panasaṃ kadalaṃ jambuphalamāmraphalaṃ tilam

nāraṅgaṃ dāḍimaṃ caiva badarīphalameva ca /
dhātrīphalaṃ pāyasañca pṛthukaṃ caṇakaṃ tathā

nārikelaṃ jambhaphalaṃ kaseruṃ sūraṇaṃ tathā /
etāni kramaśo vipra naivedyāni śubhāni ca

viṣkambhādiṣu yogeṣu nirṇītāni manīṣibhiḥ /
atha naivedyamākhyāsye karaṇānāṃ pṛthaṅ‌mune

kaṃsāraṃ maṇḍakaṃ pheṇī modakaṃ vaṭapatrakam /
laḍḍukaṃ ghṛtapūraṃ ca tilaṃ dadhi ghṛtaṃ madhu

karaṇānāmidaṃ proktaṃ devīnaivedyamādarāt /
athānyatsampravakṣyāmi devīprītikaraṃ param

vidhānaṃ nāradamune śṛṇu tatsarvamādṛtaḥ /
caitraśuddhatṛtīyāyāṃ naro madhukavṛkṣakam

pūjayetpañca khādyaṃ ca naivedyamupakalpayet /
evaṃ dvādaśamāseṣu tṛtīyātithiṣu kramāt

śuklapakṣe vidhānena naivedyamabhidadhmahe /
vaiśākhamāse naivedyaṃ guḍayuktaṃ ca nārada

jyeṣṭhamāse madhu proktaṃ devīprītyarthameva tu /
āṣāḍhe navanītaṃ ca madhukasya nivedanam

śrāvaṇe dadhi naivedyaṃ bhādramāse ca śarkarā /
āśvine pāyasaṃ proktaṃ kārtike paya uttamam

mārge pheṇyuttamā proktā pauṣe ca dadhikūrcikā /
māghe māsi ca naivedyaṃ mṛtaṃ gavyaṃ samāharet

nārikelaṃ ca naivedyaṃ phālgune parikīrtitam /
evaṃ dvādaśanaivedyairmāse ca kramato'rcayet

maṅgalā vaiṣṇavī māyā kālarātrirduratyayā /
mahāmāyā mataṅgī ca kālī kamalavāsinī

śivā sahasracaraṇā sarvamaṅgalarūpiṇī /
ebhirnāmapadairdevīṃ madhūke paripūjayet

tataḥ stuvīta deveśīṃ madhūkasthāṃ maheśvarīm /
sarvakāmasamṛddhyarthaṃ vratapūrṇatvasiddhaye

namaḥ puṣkaranetrāyai jagaddhātryai namo'stu te /
māheśvaryaṃ mahādevyai mahāmaṅgalamūrtaye

paramā pāpahantrī ca paramārgapradāyinī /
parameśvarī prajotpattiḥ parabrahmasvarūpiṇī

madadātrī madonmattā mānagamyā mahonnatā /
manasvinī munidhyeyā mārtaṇḍasahacāriṇī

jaya lokeśvari prājñe pralayāmbudasannibhe /
mahāmohavināśārthaṃ pūjitāsi surāsuraiḥ

yamalokābhāvakartrī yamapūjyā yamāgrajā /
yamanigraharūpā ca yajanīye namo namaḥ

samasvabhāvā sarveśī sarvasaṅgavivarjitā /
saṅganāśakarī kāmyarūpā kāruṇyavigrahā

kaṅkālakrūrā kāmākṣī mīnākṣī marmabhedinī /
mādhuryarūpaśīlā ca madhurasvarapūjitā

mahāmantravatī mantragamyā mantrapriyaṅkarī /
manuṣyamānasagamā manmathāripriyaṅkarī

aśvatthavaṭanimbāmrakapitthabadarīgate /
panasārkakarīrādikṣīravṛkṣasvarūpiṇī

dugdhavallīnivāsārhe dayanīye dayādhike /
dākṣiṇyakaruṇārūpe jaya sarvajñavallabhe

evaṃ stavena deveśīṃ pūjanānte stuvīta tām /
vratasya sakalaṃ puṇyaṃ labhate sarvadā naraḥ

nityaṃ yaḥ paṭhate stotraṃ devīprītikaraṃ naraḥ /
ādhivyādhibhayaṃ nāsti ripubhītirna tasya hi

arthārthī cārthamāpnoti dharmārthī dharmamāpnuyāt /
kāmānavāpnuyātkāmī mokṣārthī mokṣamājapnuyāt

brāhmaṇo vedasampano vijayī kṣatriyo bhavet /
vaiśyaśca dhanadhānyāḍhyo bhavecchūdraḥ sukhādhikaḥ

stotrametacchrāddhakāle yaḥ paṭhetprayato naraḥ /
pitṝṇāmakṣayā tṛptirjāyate kalpavartinī

evamārādhanaṃ devyāḥ samuktaṃ surapūjitam /
yaḥ karoti naro bhaktyā sa devīlokabhāgbhavet

devīpūjanato vipra sarve kāmā bhavanti hi /
sarvapāpahatiḥ śuddhā matirante prajāyate

yatra tatra bhavetpūjyo mānyo mānadhaneṣu ca /
jāyate jagadambāyāḥ prasādena virañcija

narakāṇāṃ na tasyāsti bhayaṃ svapne'pi kutracit /
mahāmāyāprasādena putrapautrādivardhanaḥ

devībhakto bhavatyeva nātra kāryā vicāraṇā /
ityevaṃ te samākhyātaṃ narakoddhāralakṣaṇam

pūjanaṃ hi mahādevyāḥ sarvamaṅgalakārakam /
madhūkapūjanaṃ tadvanmāsānāṃ kramato mune

sarvaṃ samācaredyastu pūjanaṃ madhukāhvayam /
na tasya rogabādhādibhayamud‍bhavate'nagha

athānyadapi vakṣyāmi prakṛteḥ pañcakaṃ param /
nāmnā rūpeṇa cotpattyā jagadānandadāyakam

sākhyānaṃ ca samāhātmyaṃ prakṛteḥ pañcakaṃ mune /
kutūhalakara caiva śṛṇu muktividhāyakam

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmaṣṭamaskandhe
devīpūjanavidhinirūpaṇaṃ nāma caturviṃśo'dhyāyaḥ