Devi Bhagavata Purana · Chapter 8.16

somādigativarṇanam
śrīnārāyaṇa uvāca
athātaḥ śrūyatāṃ citraṃ somādīnāṃ gamādikam /
tad‍gatyanusṛtā nṝṇāṃ śubhāśubhanidarśanā

yathā kulālacakreṇa bhramatā bhramatāṃ saha /
tadāśrayāṇāṃ ca gatiranyā kīṭādināṃ bhavet

evaṃ hi rāśivṛndena kālacakreṇa tena ca /
meruṃ dhuraṃ ca saratāṃ prādakṣiṇyena sarvadā

grahāṇāṃ bhānumukhyānāṃ gatiranyaiva dṛśyate /
nakṣatrāntaragāmitvād‌bhāntare gamanaṃ tathā

gatidvayaṃ cāviruddhaṃ sarvatraiṣa vinirṇayaḥ /
sa eva bhagavānādipuruṣo lokabhāvanaḥ

nārāyaṇo'khilādhāro lokānāṃ svastaye bhraman /
karmaśuddhinimittaṃ tu ātmānaṃ vai trayīmayam

kavibhiścaiva vedena vijijñāsyo'rkadhābhavat /
ṣaṭsu krameṇa ṛtuṣu vasantādiṣu ca svayam

yathopajoṣamṛtujān guṇān vai vidadhāti ca /
tamenaṃ puruṣāḥ sarve trayyā ca vidyayā sadā

varṇāśramācārapathā tathāmnātaiśca karmabhiḥ /
uccāvacaiḥ śraddhayā ca yogānāṃ ca vitānakaiḥ

añjasā ca yajante ye śreyo vindanti te matam /
athaiṣa ātmā lokānāṃ dyāvābhūmyantareṇa ca

kālacakragato bhuṅkte māsāndvādaśarāśibhiḥ /
saṃvatsarasyāvayavānmāsaḥ pakṣadvayaṃ divā

naktaṃ ceti sa pādarkṣadvayamityupadiśyate /
yāvatā ṣaṣṭhamaṃśaṃ sa bhuñjīta ṛturucyate

saṃvatsarasyāvayavaḥ kavibhiścopavarṇitaḥ /
yāvatārdhena cākāśavīthyāṃ pracarate raviḥ

taṃ prāktanā varṇayanti ayanaṃ munipūjitāḥ /
atha yāvannabhomaṇḍalaṃ saha pratigacchati

kārtsnyena saha bhuñjīta kālaṃ taṃ vatsaraṃ viduḥ /
saṃvatsaraṃ parivatsaramiḍāvatsarameva ca

anuvatsaramidvatsaramiti pañcakamīritam /
bhānormāndyaśaighryasamagatibhiḥ kālavittamaiḥ

evaṃ bhānorgatiḥ proktā candrādīnāṃ nibodhata /
evaṃ candro'rkaraśmibhyo lakṣayojanamūrdhvataḥ

upalabhyamāno mitrasya saṃvatsarabhujiṃ ca saḥ /
pakṣābhyāṃ cauṣadhīnātho bhuṅkte māsabhujiṃ ca saḥ

sapādamābhyāṃ divasabhuktiṃ pakṣabhujiṃ caret /
evaṃ śīghragatiḥ somo bhuṅkte nūnaṃ bhacakrakam

pūryamāṇakalābhiścāmarāṇāṃ prītimāvahan /
kṣīyamāṇakalābhiśca pitṝṇāṃ cittarañjakaḥ

ahorātrāṇi tanvānaḥ pūrvāparasughasrakaiḥ /
sarvajīvanikāyasya prāṇo jīvaḥ sa eva hi

bhuṅkte caikaikanakṣatraṃ muhūrtatriṃśatā vibhuḥ /
sa eva ṣoḍaśakalaḥ puruṣo'nādisattamaḥ

manomayo'pyannamayo'mṛtadhāmā sudhākaraḥ /
devapitṛmanuṣyādisarīsṛpasavīrudhām

prāṇāpyāyanaśīlatvātsa sarvamaya ucyate /
tato bhacakraṃ bhramati yojanānāṃ trilakṣataḥ

merupradakṣiṇenaiva yojitaṃ ceśvareṇa tu /
aṣṭāviṃśatisaṃkhyāni gaṇitāni sahābhijit

tataḥ śukro dvilakṣeṇa yojanānāmathopari /
puraḥ paścātsahaivāsāvarkasya parivartate

śīghramandasamānābhirgatibhirvicaranvibhuḥ /
lokānāmanukūlo'yaṃ prāyaḥ proktaḥ śubhāvahaḥ

vṛṣṭiviṣṭambhaśamano bhārgavaḥ sarvadā mune /
śukrād‌ budhaḥ samākhyāto yojanānāṃ dvilakṣataḥ

śīghramandasamānābhirgatibhiḥ śukravatsadā /
yadārkādvyatiricyeta saumyaḥ prāyeṇa tatra tu

ativātābhrapātānāṃ vṛṣṭyādibhayasūcakaḥ /
upariṣṭhāttato bhaumo yojanānāṃ dvilakṣataḥ

pakṣaistribhistribhiḥ so'yaṃ bhuṅkte rāśīnathaikaśaḥ /
dvādaśāpi ca devarṣe yadi vakro na jāyate

prāyeṇāśubhakṛtso'yaṃ grahaughānāṃ ca sūcakaḥ /
nato dvilakṣamānena yojanānāṃ ca gīṣpatiḥ

ekaikasminnatho rāśau bhuṅge saṃvatsaraṃ caran /
yadi vakro bhavennaivānukūlo brahmavādinām

tataḥ śanaiścaro ghoro lakṣadvayaparo mitaḥ /
yojanaiḥ sūryaputro'yaṃ triṃśanmāsaiḥ paribhraman

ekaikarāśau paryeti sarvān rāśīnmahāgrahaḥ /
sarveṣāmaśubho mandaḥ proktaḥ kālavidāṃ varaiḥ

tata uttarataḥ proktamekādaśasulakṣakaiḥ /
yojanaiḥ parisaṃkhyātaṃ saptarṣīṇāṃ ca maṇḍalam

lokānāṃ śaṃ bhāvayanto munayaḥ sapta te mune /
yattadviṣṇupadaṃ sthānaṃ dakṣiṇaṃ prakramanti te // ३७
iti śrīmaddevībhāgavate mahāpurāṇe'ṣṭādalasāhasryāṃ saṃhitāyāmaṣṭamaskandhe
somādigativarṇanaṃ nāma ṣoḍaśo'dhyāyaḥ