Devi Bhagavata Purana · Chapter 6.29

nāradasya punaḥ svarūpaprāptivarṇanam
nārada uvāca
ityukto'haṃ tadā tena rājñā tāladhvajena ca /
vimṛśya manasātyarthaṃ tamuvāca viśāmpate

rājannāhaṃ vijānāmi putrī kasyeti niścayam /
pitarau kva ca me kena sthāpitā ca sarovare

kiṃ karomi kva gacchāmi kathaṃ me sukṛtaṃ bhavet /
nirādhārāsmi rājendra cintayāmi cikīrṣitam

daivameva paraṃ rājannāstyatra pauruṣaṃ mama /
dharmajño'si mahīpāla yathecchasi tathā kuru

tavādhīnāsmyahaṃ bhūpa na me ko'pyasti pālakaḥ /
na pitā na ca mātā ca na sthānaṃ na ca bāndhavāḥ

ityukto'sau mayā rājā babhūva madanāturaḥ /
māṃ nirīkṣya viśālākṣīṃ sevakānityuvāca ha

narayānamānayadhvaṃ caturvāhyaṃ manoharam /
ārohaṇārthamasyāstu kauśeyāmbaraveṣṭitam

mṛdvāstaraṇasaṃyuktaṃ muktājālavibhūṣitam /
caturasraṃ viśālaṃ ca suvarṇaracitaṃ śubham

tasya tadvacanaṃ śrutvā bhṛtyāḥ satvaragāminaḥ /
āninyuḥ śibikāṃ divyāṃ madarthe vastraveṣṭitām

ārūḍhā'haṃ tadā tasyāṃ tasya priyacikīrṣayā /
mudito'sau gṛhe nītvā māṃ tadā pṛthivīpatiḥ

vivāhavidhinā rājā śubhe lagne śubhe dine /
upayeme ca māṃ tatra hutabhuksannidhau tataḥ

tasyāhaṃ vallabhā jātā prāṇebhyo'pi garīyasī /
saubhāgyasundarītyevaṃ nāma tatra kṛtaṃ mama

ramamāṇo mayā sārdhaṃ sukhamāpa mahīpatiḥ /
nānābhogavilāsaiśca kāmaśāstroditaistathā

rājakāryāṇi santyajya krīḍāsakto divāniśam /
nāsau viveda gacchantaṃ kālaṃ kāmakalārataḥ

udyāneṣu ca ramyeṣu vāpīṣu ca gṛheṣu ca /
harmyeṣu varaśaileṣu dīrghikāsu varāsu ca

vāruṇīmadamatto'sau viharankānane śubhe /
visṛjya sarvakāryāṇi madadhīno babhūva ha

vyāsāhaṃ tena saṃsaktā krīḍārasavaśīkṛtā /
smṛtavānpūrvadehaṃ na puṃbhāvaṃ munijanma ca

mamaivāyaṃ patiryoṣāhaṃ pat‍nīṣu priyā satī /
paṭṭarājñī vilāsajñā saphalaṃ jīvitaṃ mama

iti cintayatī tasminpremabaddhā divāniśam /
krīḍāsaktā sukhe lubdhā taṃ sthitā vaśavartinī

vismṛtaṃ brahmavijñānaṃ brahmajñānaṃ ca śāśvatam /
dharmaśāstraparijñānaṃ tadāsaktamanā sthitā

evaṃ viharatastatra varṣāṇi dvādaśaiva tu /
gatāni kṣaṇavatkāmakrīḍāsaktasya me mune

jātā garbhavatī cāhaṃ mudaṃ prāpa nṛpastadā /
kārayāmāsa vidhivad‌garbhasaṃskārakarma ca

apṛcchaddohadaṃ rājā prīṇayanmāṃ punaḥ punaḥ /
nābravaṃ lajjamānāhaṃ nṛpaṃ prītamanā bhṛśam

sampūrṇe daśame māsi putro jātastato mama /
śubhe'hni grahanakṣatralagnatārābalānvite

babhūva nṛpatergehe putrajanmamahotsavaḥ /
rājā paramasantuṣṭo babhūva sutajanmataḥ

sūtakānte sutaṃ vīkṣya rājā mudamavāpa ha /
ahaṃ bhūmipateścāsaṃ priyā bhāryā parantapa

tato varṣadvayānte vai punargarbho mayā dhṛtaḥ /
dvitīyastu suto jātaḥ sarvalakṣaṇasaṃyutaḥ

sudhanveti sutasyātha nāma cakre nṛpastadā /
vīravarmeti jyeṣṭhasya brāhmaṇaiḥ preritastvayam

evaṃ dvādaśa putrāśca prasūtā bhūpasammatāḥ /
mohito'haṃ tadā teṣāṃ prītyā pālanalālane

punaraṣṭa sutāḥ kāle kāle jātāḥ svarūpiṇaḥ /
gārhasthyaṃ me tataḥ pūrṇaṃ sampannaṃ sukhasādhanam

teṣāṃ dārakriyāḥ kāle kṛtā rājñā yathocitāḥ /
snuṣābhiśca tathā putraiḥ parivāro mahānabhūt

tataḥ pautrādisambhūtāste'pi krīḍārasānvitāḥ /
āsannānārasopetā mohavṛddhikarā bhṛśam

kadācitsukhamaiśvaryaṃ kadācid‌duḥkhamad‌bhutam /
putreṣu rogajanitaṃ dehasantāpakārakam

parasparaṃ kadācittu virodho'bhūtsudāruṇaḥ /
putrāṇāṃ vā vadhūnāṃ ca tena santāpasambhavaḥ

sukhaduḥkhātmake ghore mithyācārakare bhṛśam /
saṅkalpajanite kṣudre magno'haṃ munisattama

vismṛtaṃ pūrvavijñānaṃ śāstrajñānaṃ tathā gatam /
yoṣābhāve vilīno'haṃ gṛhakāryeṣu sarvathā

ahaṅkārastu sañjāto bhṛśaṃ mohavivardhakaḥ /
ete me balinaḥ putrāḥ snuṣāḥ sukulasambhavāḥ

ete putrāḥ susannaddhāḥ krīḍanti mama veśmasu /
dhanyāhaṃ khalu nārīṇāṃ saṃsāre'sminnaho bhṛśam

nārado'haṃ bhagavatā vañcito māyayā kila /
na kadācinmayāpyevaṃ cintitaṃ manasā kila

rājapat‍nī śubhācārā bahuputrā pativratā /
dhanyāhaṃ kila saṃsāre kṛṣṇaivaṃ mohitastvaham

atha kaścinnṛpaḥ kāmaṃ dūradeśādhipo mahān /
arātibhāvamāpannaḥ patinā saha mānada

kṛtvā sainyasamāyogaṃ rathaiśca vāraṇairyutam /
ājagāma kānyakubje pure yuddhamacintayat

veṣṭitaṃ nagaraṃ tena rājñā sainyayutena ca /
mama putrāśca pautrāśca nirgatā nagarāttadā

saṃgrāmastumulastatra kṛtastaistena putrakaiḥ /
hatā raṇe sutāḥ sarve vairiṇā kālayogataḥ

rājā bhagnastu saṃgrāmādāgataḥ svagṛhaṃ punaḥ /
śrutaṃ mayā mṛtāḥ putrāḥ saṃgrāme bhṛśadāruṇe

sa hatvā me sutānpautrāngato rājā balānvitaḥ /
krandamānā hyahaṃ tatra gatā samaramaṇḍale

dṛṣṭvā tānpatitānputrānpautrāṃścaduḥkhapīḍitā /
vilalāpāhamāyuṣmañchokasāgarasaṃplave

hā putrāḥ kva gatā me'dya hā hatāsmi durātmanā /
daivenātibaliṣṭhena durvāreṇātipāpinā

etasminnantare tatra bhagavānmadhusūdanaḥ /
kṛtvā rūpaṃ dvijasyāgād‌vṛddhaḥ paramaśobhanaḥ

suvāsā vedavitkāmaṃ matsamīpaṃ samāgataḥ /
māmuvācātidīnāṃ sa krandamānāṃ raṇājire

brāhmaṇa uvāca
kiṃ viṣīdasi tanvaṅ‌gi bhramo'yaṃ prakaṭīkṛtaḥ /
mohena kokilālāpe patiputragṛhātmake

kā tvaṃ kasyāḥ sutāḥ ke'mī cintayātmagatiṃ parām /
uttiṣṭha rodanaṃ tyaktvā svasthā bhava sulocane

snānaṃ ca tiladānaṃ ca putrāṇāṃ kuru kāmini /
paralokagatānāṃ ca maryādārakṣaṇāya vai

kartavyaṃ sarvathā tīrthe snānaṃ tu na gṛhe kvacit /
mṛtānāṃ kila bandhūnāṃ dharmaśāstravinirṇayaḥ

nārada uvāca
ityuktvā tena vipreṇa vṛddhena pratibodhitā /
utthitāhaṃ nṛpeṇātha yuktā bandhubhirāvṛtā

agrato dvijarūpeṇa bhagavānbhūtabhāvanaḥ /
calitāhaṃ tatastūrṇaṃ tīrthaṃ paramapāvanam

harirmāṃ kṛpayā tatra puṃtīrthe sarasi prabhuḥ /
nītvāha bhagavānviṣṇurdvijarūpī janārdanaḥ

snānaṃ kuru taḍāge'sminpāvane gajagāmini /
tyaja śokaṃ kriyākālaḥ putrāṇāṃ ca nirarthakam

koṭiśaste mṛtāḥ putrā janmajanmasamud‌bhavāḥ /
pitaraḥ patayaścaiva bhrātaro jāmayastathā

keṣāṃ duḥkhaṃ tvayā kāryaṃ bhrame'sminmānasod‌bhave /
vitathe svapnasadṛśe tāpade dehināmiha

nārada uvāca
iti tasya vacaḥ śrutvā tīrthe puruṣasaṃjñake /
praviṣṭā snātukāmāhaṃ preritā tatra viṣṇunā

majjanādeva tīrtheṣu pumāñjātaḥ kṣaṇādapi /
harirvīṇāṃ kare kṛtvā sthitastīre svadehavān

unmajjya ca mayā tīre dṛṣṭaḥ kamalalocanaḥ /
pratyabhijñā tadā jātā mama citte dvijottama

sañcintitaṃ mayā tatra nārado'hamihāgataḥ /
hariṇā saha strībhāvaṃ prāpto māyāvimohitaḥ

iti cintāparaścāhaṃ yadā jātastadā hariḥ /
māmāha nāradāgaccha kiṃ karoṣi jale sthitaḥ

vismito'haṃ tadā smṛtvā strībhāvaṃ dāruṇaṃ bhṛśam /
punaḥ puruṣabhāvaśca sampannaḥ kena hetunā

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ ṣaṣṭhaskandhe
nāradasya punaḥ svarūpaprāptivarṇanaṃ nāmekonatriṃśo'dhyāyaḥ